I Stap na Wok Bilong Jisas

Meri i Holim Klos Bilong Em

JISAS i bin i stap long Dekapolis na nau ol man i harim tok olsem em i laik i kam bek long Kaperneam, na bikpela lain manmeri i go bung long nambis na wetim em i kam. Ating ol i harim pinis olsem em i tok na biksi i stap isi na em i bin rausim spirit nogut long tupela man. Taim bot i sua pinis na Jisas i lusim bot i go daun long nambis, ol manmeri i kam bung long em na ol i amamas.

Wanpela long ol dispela manmeri i wet long lukim Jisas em wanpela hetman bilong lotu, nem bilong em Jairus. Em i brukim skru klostu long lek bilong Jisas na i askim strong long em olsem, “Liklik pikinini meri bilong mi klostu i laik i dai. Plis, yu mas kam putim han long em, na bai em i orait gen na i stap.” Jairus i gat wanpela pikinini tasol na pikinini i gat 12-pela krismas tasol, olsem na Jairus i sori tru long em.

Orait Jisas i wokabaut i go na bikpela lain manmeri ol i pas tru long em, i go long haus bilong Jairus. Ol manmeri i amamas tru long wanem ol i tingting long lukim narapela mirakel gen. Wanpela meri i stap em i gat bikpela hevi tru na tingting bilong em i stap long dispela.

Dispela meri em i save karim blut oltaim inap 12-pela yia. Em i bin i go lukim ol narapela narapela dokta, na i lusim olgeta mani bilong em long ol. Tasol i no gat wanpela i bin helpim em, na sik bilong em i go bikpela.

Dispela sik i mekim na skin bilong meri i no gat strong na em i sem tu. Sapos kain sik olsem i painim wanpela meri, meri i no laik tokaut long dispela long ai bilong ol man. Lo bilong Moses i tok, taim meri i karim blut olsem em i no klin, na husat man o meri i putim han long em o long laplap bilong em i gat blut long en, em i mas go na waswas na em bai i stap olsem i no klin i go inap long apinun.

Dispela meri em i bin harim tok long ol mirakel Jisas i bin mekim, olsem na nau em i laik painim Jisas. Em i save em i no klin, olsem na em i was gut na wokabaut isi isi namel long bikpela lain manmeri, na em i go klostu long Jisas. Em i bin tokim em yet olsem, “Sapos mi putim han tasol long klos bilong em, bai mi orait gen.” Na em i mekim olsem, na wantu sik bilong em i orait na blut i no kamap moa!

Kwiktaim Jisas i tok, “Husat i putim han long klos bilong mi?” Ating meri hia i kirap nogut long tok bilong Jisas! Olsem wanem na Jisas i save? Pita i tok, ‘Bikman, bikpela lain manmeri i sanap raunim yu, na ol i pas tru long yu. Na bilong wanem yu tok, “Husat i putim han long mi?” ’

Jisas i lukluk raun bilong painimaut husat i bin holim klos bilong em. Em i tok: “Wanpela i bin putim han long mi. Mi pilim sampela strong i lusim mi na i go.” Taim meri i putim han long Jisas, sik bilong em i pinis na dispela i pulim sampela strong bilong Jisas. Dispela meri i save nau, em i no inap hait long em, olsem na meri i guria, na em i kam brukim skru klostu long lek bilong Jisas. Na long ai bilong olgeta manmeri em i tokaut long sik bilong em na olsem wanem dispela sik bilong em i orait nau.

Jisas i pilim tru hevi bilong dispela meri, na bel bilong em i sori long em, na Jisas i tokim em: “Pikinini, yu bilip long mi, olsem na yu kamap orait gen. Yu go, na bel bilong yu i ken i stap isi.” Yumi amamas tru long kisim save olsem dispela man God i bin makim bilong bosim dispela graun, em i man bilong sori, na i gat bikpela tingting long ol manmeri na em i gat strong bilong helpim ol! Matyu 9:​18-22; Mak 5:​21-34; Luk 8:​40-48; Wok Pris 15:​25-27.

♦ Jairus em i husat? Bilong wanem em i kam long Jisas?

♦ Wanpela meri i gat wanem hevi? Bilong wanem i hatwok long em i kam long Jisas bambai Jisas i ken helpim em?

♦ Olsem wanem na sik bilong meri i pinis? Na Jisas i strongim bel bilong em olsem wanem?