Klostu Nau God Bai Oraitim Ol Man Long Rot Bilong Mirakel
“BIPO mipela i no lukim kain samting olsem.” Em tok bilong sampela man ol i bin lukim long ai bilong ol yet olsem wantu tasol Jisas i oraitim wanpela man em ol bun bilong em i dai olgeta. (Mak 2:12) Jisas i bin oraitim tu ol man i aipas, ol mauspas, ol lek nogut, na ol disaipel bilong em i mekim wankain samting. Jisas i oraitim ol man long strong bilong husat? Pasin bilong bilip em i bikpela samting o olsem wanem? Ol dispela mirakel long taim bilong ol aposel i helpim yumi long kisim wanem save long pasin bilong oraitim ol sik long rot bilong mirakel long nau?—Matyu 15:30, 31.
“Yu Bilip Long Mi, Olsem na Yu Kamap Orait Gen”
Ol man bilong oraitim sik long rot bilong bilip long nau, ol i amamas long kamapim wanpela tok em Jisas i bin mekim long wanpela meri i karim blut oltaim inap long 12-pela yia, na em i bin kam long Jisas bambai em i ken oraitim sik bilong em. Jisas i tokim em olsem: “Yu bilip long mi, olsem na yu kamap orait gen.” (Luk 8:43-48) Olsem wanem? Tok bilong Jisas i kamapim olsem dispela meri i kamap orait gen, long wanem, em i bilip? Dispela i wankain olsem wok ol man i save mekim long nau bilong “oraitim sik long rot bilong bilip”?
Taim yumi kaunim gut ol stori bilong Baibel, yumi kisim save olsem planti taim Jisas na ol disaipel bilong em ol i no tok ol man i mas kamapim bilip bilong ol pastaim na bihain bai ol i oraitim ol. Dispela meri em yumi stori long em antap, em i no mekim wanpela tok long Jisas, em i kam na putim han long arere bilong klos bilong Jisas na “wantu tasol blut bilong en i drai na i no kamap moa.” Long narapela taim, Jisas i oraitim wanpela man em i bin stap namel long ol man i kam bilong holim em. Em i oraitim tu wanpela man i no bin save long Jisas em i husat tru.—Luk 22:50, 51; Jon 5:5-9, 13; 9:24-34.
Olsem na pasin bilong bilip i gat wanem wok long taim bilong oraitim sik? Taim Jisas na ol disaipel bilong em i stap long distrik bilong Tair na Saidon, wanpela meri bilong lain Kenan i kam na i singaut olsem: “Bikpela, yu Pikinini Bilong Devit, yu mas sori long mi. Spirit nogut i bagarapim tru pikinini meri bilong mi.” Tingim bikpela bel hevi bilong em taim em i singaut: “Bikpela, yu mas helpim mi.” Jisas i sori tru long em, na em i bekim tok olsem: “Meri, bilip bilong yu em i bikpela tru. Samting yu laik i mas kamap long yu, em i ken kamap.” Na long “dispela taim stret” pikinini meri bilong em i kamap orait gen. (Matyu 15:21-28) Tru tumas, pasin bilong bilip i bikpela samting, tasol em bilip bilong husat? Jisas i bin litimapim bilip bilong dispela meri, em i no litimapim bilip bilong pikinini i sik. Na meri hia i bilip long wanem samting? Taim em i kolim Jisas olsem “Bikpela, yu Pikinini Bilong Devit,” dispela meri i tokaut long ai bilong ol man olsem Jisas em dispela Mesaia God i bin tok promis long salim i kam. Em i no kamapim tasol bilip bilong em long God o em i bilip olsem dispela man inap oraitim sik. Taim Jisas i tok “bilip bilong yu em i bikpela tru,” i olsem em i tok sapos ol manmeri i gat hevi i no bilip olsem em i Mesaia, ol i no inap kam long em bambai em i ken oraitim ol.
Long ol dispela stori bilong Baibel, yumi ken save olsem ol mirakel Jisas i wokim bilong oraitim ol sik i narapela kain long ol mirakel giaman ol man i lukim o ol i tok ol i mekim long nau. Ol manmeri i no strong long kamapim bel bilong ol—olsem singaut singaut, krai krai, mekim olsem ai i raun, na ol kain samting olsem—na Jisas tu i no mekim olsem. Na tu, long olgeta taim Jisas i oraitim ol sikman, em i no tok olsem ol i no gat bilip o mani ol i givim i no inap, olsem na em i no inap oraitim ol.
Oraitim Ol Sik Long Strong Bilong God
Jisas na ol disaipel bilong em i oraitim ol sik long wanem rot? Baibel i tok: “Strong bilong Bikpela em i stap long Jisas na em i wok long mekim orait ol sikman.” (Luk 5:17) Taim em i oraitim pinis wanpela sikman, Luk 9:43 i tok: “Olgeta manmeri i lukim bikpela strong bilong God, na ol i kirap nogut tru.” Jisas i no bin mekim ol dispela samting bilong ol man i ken givim biknem long em yet olsem man bilong oraitim ol sik, nogat. Wanpela taim, em i tokim wanpela man em i bin helpim em long kamap fri long ol spirit nogut olsem: “Yu go long haus bilong yu na long ol wanlain bilong yu. Na yu tokim ol long olgeta samting [“Jehova,” NW] i bin mekim bilong helpim yu, na long em i bin marimari long yu.”—Mak 5:19.
Jisas na ol aposel i bin oraitim ol man long strong bilong God, olsem na yumi ken save bilong wanem i no olsem long olgeta taim man ol i bin oraitim em i mas bilip. Tasol man bilong oraitim ol sik em i mas bilip. Olsem na taim ol disaipel bilong Jisas i no inap long rausim wanpela strongpela spirit nogut, Jisas i tokim ol long as bilong en olsem: “Bilip bilong yupela em i liklik tumas.”—Matyu 17:20.
As Bilong Oraitim Ol Sik Long Rot Bilong Mirakel
Taim Jisas i mekim wok bilong em long graun em i oraitim planti man, tasol ‘wok bilong oraitim sik’ i no olsem nambawan wok bilong em. Wok bilong em long oraitim ol sik long rot bilong mirakel—i no gat wanpela taim em i bin singaut long pe o askim ol man long givim mani—i olsem nambatu wok, nambawan wok em long “autim gutnius bilong kingdom bilong God.” (Matyu 9:35) Baibel i stori olsem long wanpela taim “em i amamas long ol i kam. Em i autim tok bilong kingdom bilong God long ol, na em i mekim orait ol manmeri i gat sik.” (Luk 9:11) Long ol stori bilong 4-pela Gutnius, planti taim ol i kolim Jisas olsem “Tisa,” na i no wanpela taim ol i kolim em “Man Bilong Oraitim Ol Sik.”
Olsem na i gat wanem as na Jisas i wokim ol mirakel? Bikpela samting i olsem: Em i laik kamapim long ples klia olsem em i Mesaia God i tok promis long salim i kam. Taim Jon Bilong Baptais i kalabus, em i laik save olsem em i pinisim wok God i bin salim em long mekim o nogat. Olsem na em i salim ol disaipel bilong em i go long Jisas long askim em olsem: “Ating yu dispela man God i bin promis long salim i kam, o mipela i mas wetim narapela?” Lukim tok Jisas i bekim long ol disaipel bilong Jon, olsem: “Yupela go tokim Jon long olgeta samting yupela i harim na lukim. Ol aipas ol i lukluk gen, na ol lek nogut ol i wokabaut. Skin bilong ol man i gat sik lepra, em i kamap klin, na ol yaupas i harim toktok. Ol man i dai pinis, ol i kirap gen, na ol rabisman i harim gutnius.”—Matyu 11:2-5.
Tru tumas, Jisas i bin oraitim ol man na em i wokim tu ol narapela mirakel olsem ol stori long 4-pela Gutnius i kamapim, na dispela i kamapim long ples klia olsem em i Mesaia, em “dispela man God i bin promis long salim i kam.” I no olsem ol i mas “wetim narapela” Mesaia i kam.
I Gat Ol Mirakel Long Nau?
Olsem wanem? Yumi mas wetim God i kamapim strong bilong em long rot bilong oraitim ol man long nau? Nogat. Ol mirakel Jisas i wokim long strong bilong God, ol i bin kamapim long ples klia tru olsem em i Mesaia God i tok promis long salim i kam. Baibel i stori long ol strongpela wok bilong Jisas na yumi olgeta inap kaunim. I no olsem God i mas kamapim gen strong bilong em na wokim gen ol mirakel long olgeta lain i wok long kamap bihain.
Pasin bilong oraitim ol man na wokim ol narapela mirakel, dispela i no kirapim olgeta man long bilip long Jisas. Sampela man i bin lukim ol mirakel bilong Jisas tasol ol i no bilip olsem em i wokim ol dispela mirakel long strong bilong Papa bilong em long heven. “Ol i bin lukim em i wokim planti mirakel o mak, tasol ol i no bilip long em.” (Jon 12:37) Olsem na taim aposel Pol i toktok long ol narapela narapela kain presen—olsem autim tok profet, mekim tok long kain kain tok ples, oraitim ol sikman, na ol dispela kain wok—em God i bin givim long sampela man bilong kongrigesen Kristen long taim bilong ol aposel, aposel Pol i tok: “Wok bilong autim tok bilong God olsem profet, em bai i pinis. Na ol kain kain tok ples bai i pinis. Na olgeta kain save bilong ol man, em tu bai i pinis. Nau yumi gat hap hap save tasol long ol samting. Na tu, yumi save autim ol hap hap tok profet tasol. Tasol bihain samting tru bai i kamap, na long dispela taim olgeta dispela hap hap samting nau yumi save long en, ol bai i pinis.”—1 Korin 12:28-31; 13:8-10.
Pasin bilong bilip long God em i bikpela samting bambai yumi ken stap gut. Tasol sapos as bilong bilip bilong yumi em ol promis nating bilong oraitim sik, bihain bai yumi bel hevi. Jisas i tingim taim bilong pinis, na em i tok: “Sampela man bai i kam na tok giaman olsem, ‘Mi dispela man God i makim bilong kisim bek ol manmeri bilong en,’ o ‘Mi wanpela profet.’ Na bai ol i wokim ol bikpela mirakel na mekim ol narakain narakain samting i kamap. Ol i laik paulim olgeta manmeri, na sapos ol inap ol i laik paulim tu ol manmeri God i makim bilong em yet.” (Matyu 24:24) I no pasin giaman tasol i insait long dispela samting, nogat, ol samting bilong ol spirit nogut tu i insait long en. Olsem na yumi no ken kirap nogut sapos yumi harim sampela stori long ol narakain samting i kamap na yumi no save long as tru bilong en, na ol dispela stori i no as na yumi ken bilip tru long God.
Long nau i no gat wanpela man i oraitim ol sik olsem Jisas i bin mekim. Olsem wanem? Yumi lus long wanpela gutpela samting? Nogat tru. Ol man Jisas i oraitim, bihain ol i sik gen. Olgeta i bin go lapun na ol i dai. Jisas i oraitim ol na dispela i helpim ol inap liklik taim tasol. Tasol ol mirakel Jisas i mekim, gutpela samting bilong en em bilong i stap oltaim, long wanem, ol i makim ol blesing ol man bai kisim long bihain.
Olsem na bihain long ol i skelim Tok Bilong God, em Baibel, Alexandre na Benedita, em pastaim yumi stori long tupela, ol i no bilip moa long pasin bilong ol man long nau long oraitim ol sik long rot bilong bilip na ol spirit, nogat. Tasol ol i bilip tru olsem pasin bilong oraitim man long rot bilong mirakel i no samting bilong bipo tasol. Olsem wanem na ol i bilip olsem? Olsem planti milion manmeri long olgeta hap, ol i wetim ol gutpela blesing bilong oraitim ol sik aninit long Kingdom bilong God.—Matyu 6:10.
I No Gat Moa Sik na i Dai
Olsem yumi stori pinis, nambawan wok bilong Jisas i no bilong oraitim ol sik na wokim ol mirakel, nogat. Em i mekim wok bilong autim gutnius bilong Kingdom bilong God olsem nambawan wok bilong em. (Matyu 9:35; Luk 4:43; 8:1) Long rot bilong dispela Kingdom God bai wokim mirakel bilong oraitim ol man na stretim bek olgeta samting nogut em sin i bin mekim long ol manmeri. Olsem wanem na long wanem taim em bai kamapim ol dispela samting?
Krais Jisas i givim wanpela driman long aposel Jon long ol samting bai kamap inap planti handet yia bihain olsem: “Nau God bilong yumi em i kisim bek yumi pinis, na strong bilong en i kamap pinis long ples klia, na em i stap king. Na dispela man em i makim bilong kisim bek ol manmeri bilong en, em i kisim pinis bikpela namba na strong.” (KTH 12:10) Ol samting i kamapim long ples klia olsem kirap long 1914 bikpela birua bilong God, em Satan, em i kam daun long graun, na Kingdom i kirap pinis long mekim wok bilong en! Jisas i kamap King pinis long Kingdom bilong God na nau em i redi long kamapim ol bikpela senis long graun.
Klostu nau, gavman bilong Jisas long heven bai bosim ol stretpela manmeri long graun, em olsem “nupela graun.” (2 Pita 3:13) Olsem wanem long sindaun bilong ol man long dispela taim bihain? Baibel i mekim gutpela tok profet, olsem: “Mi lukim nupela skai na nupela graun i stap. Namba wan skai na namba wan graun i go pinis olgeta. . . . [God] bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—KTH 21:1, 4.
Olsem wanem? Yu inap tingim i stap bilong ol man taim God i oraitim ol long rot bilong mirakel? “I no gat man . . . bai i tok olsem, ‘Mi gat sik.’ Na Bikpela bai i lusim sin bilong ol manmeri.” Yes, God bai mekim ol samting ol man bilong oraitim sik long rot bilong bilip ol i no inap tru long mekim. “Em bai i pinisim dai tru na bai dai i no kamap moa.” Tru tumas, “God, Bikpela bai i . . . mekim drai wara bilong ai bilong olgeta manmeri.”—Aisaia 25:8; 33:24.
[Piksa long pes 7]
Aninit long Kingdom, God bai oraitim ol man long rot bilong mirakel