LESEN 30
Ol Famili na Pren Bilong Yu Bai Stap Laip Gen!
Dai i save kamapim krai sore na bel hevi. Olsem na Baibel i kolim dai olsem birua. (1 Korin 15:26) Long Lesen 27, yu kisim save olsem Jehova bai daunim dispela birua. Tasol wanem samting bai painim ol man i dai pinis? Long dispela lesen, yu bai kisim save long narapela gutpela promis bilong Jehova—em bai givim bek laip long planti bilion manmeri na ol bai stap oltaim. Em bai kirapim bek ol! Yu ting dispela samting inap kamap tru? Ol bai kirap bek na stap long heven o long graun?
1. Jehova i laik mekim wanem long ol famili na pren bilong yumi i dai pinis?
Jehova i gat bikpela laik tru long givim bek laip long ol man i dai pinis. Bilipman Jop i bilip tru olsem God i no inap lusim tingting long em taim em i dai. Em i tok long God: “Yu bai singautim mi, na mi bai bekim [long Matmat].”—Ritim Jop 14:13-15.
2. Hau na yumi save olsem ol daiman inap kirap bek?
Taim Jisas i stap long graun, God i givim em strong long kirapim bek ol daiman. Jisas i bin kirapim bek liklik gel i gat 12-pela krismas na pikinini man bilong wido meri. (Mak 5:41, 42; Luk 7:12-15) Bihain, pren bilong Jisas, Lasarus, i dai. Maski Lasarus i dai na ol i planim em inap 4-pela de pinis, Jisas i kirapim em bek. Jisas i beten long God pinis, na i singaut strong olsem: “Lasarus, yu kam ausait!” Na “dispela man husat i dai pinis em i kam ausait”—em i stap laip gen. (Jon 11:43, 44) Tingim amamas ol famili na pren bilong Lasarus i pilim!
3. Wanem gutpela samting bai painim ol famili na pren bilong yu i dai pinis?
Baibel i tok promis olsem: “Bai i gat kirap bek.” (Aposel 24:15) Ol man Jisas i kirapim bek ol long bipo, ol i no go long heven. (Jon 3:13) Ol i amamas tru long kirap bek na stap hia long graun. Olsem tasol, klostu nau Jisas bai kirapim bek planti bilion manmeri na ol bai amamas long stap oltaim long paradais long graun. Em i tok olgeta man em God i tingim ol, ol bai kirap bek—maski ol man yumi no save long ol, ol tu bai kirap bek.—Jon 5:28, 29.
KISIM SAMPELA SAVE MOA
Skelim ol evidens long Baibel i soim olsem Jisas i gat strong long kirapim bek ol man i dai pinis na em bai mekim olsem. Kisim save long hau bilip bilong kirap bek inap mekim isi bel bilong yu na yu inap wetim gutpela samting i kamap.
4. Jisas i kamapim klia olsem em inap kirapim bek ol daiman
Kisim sampela save moa long samting Jisas i bin mekim long pren bilong em Lasarus. Ritim Jon 11:14, 38-44, na stori long ol dispela askim:
Hau yumi save olsem Lasarus i bin dai tru tru?—Lukim ves 39.
Sapos Lasarus i bin go long heven, yu ting Jisas bai bringim em i kam bek long graun?
5. Planti manmeri bai kirap bek!
Ritim Buk Song 37:29, na stori long dispela askim:
Planti bilion manmeri i kirap bek ol bai stap we?
Jisas bai kirapim bek planti manmeri moa, i no ol manmeri i lotuim Jehova tasol, nogat. Ritim Aposel 24:15, na stori long dispela askim:
Yu laik lukim husat i kirap bek?
Tingim dispela: Em isi long Jisas inap kirapim bek wanpela i dai pinis, wankain long papa inap kirapim pikinini bilong em i slip indai
6. Kirap bek inap mekim isi bel bilong yu, na yu wetim gutpela samting i kamap
Stori bilong pikinini meri bilong Jairus i mekim isi bel na strongim planti manmeri husat i krai sore. Ritim dispela stori long Luk 8:40-42, 49-56.
Paslain long Jisas i kirapim bek pikinini meri bilong Jairus, Jisas i tokim em: “No ken pret, yu mas i gat bilip.” (Lukim ves 50.) Hau bai bilip bilong kirap bek i helpim yu . . .
taim wanpela pren o famili bilong yu i dai?
taim laip bilong yu inap lus?
Pilaim VIDIO, na stori long dispela askim.
Olsem wanem hop bilong kirap bek i strongim na mekim isi bel bilong papamama bilong Phelicity?
SAMPELA MAN I TOK: “I hatwok long bilip olsem ol daiman inap kirap bek.”
Wanem tingting bilong yu?
Bai yu yusim wanem skripsa bilong soim olsem bai i gat kirap bek?
OL BIKPELA POIN
Baibel i tok promis olsem planti bilion manmeri i dai, ol bai kirap bek. Jehova i laik bai ol i stap laip gen, na em i givim strong long Jisas long kirapim bek ol.
Riviu
Jehova na Jisas i pilim olsem wanem long kirapim bek ol man i dai?
Planti bilion manmeri bai kirap bek na stap we—long heven o long graun? Wai na yu tok olsem?
Wai na yu bilip olsem ol famili na pren bilong yu bai kirap bek?
MEKIM WOK PAINIMAUT
Kisim save long sampela samting yu ken mekim bilong karim bel hevi bilong krai sori.
Yu ting ol stiatok bilong Baibel inap helpim wanpela husat i krai sore?
Hau bai ol pikinini i ken karim hevi bilong wanpela ol i laikim tru i dai?
Bai i gat sampela i kirap bek na go long heven? Husat i no inap kirap bek?