Long Betde Pati Ol i Kilim Man i Dai

Taim ol aposel bilong Jisas i autim tok long Galili, man i bin tokaut long Jisas i stap yet long kalabus. Jon Bilong Baptais i kalabus klostu tupela yia pinis.

Jon i bin tokaut klia olsem samting King Herot Antipas i mekim i no stret. King Herot i bin maritim Herodias, em meri bilong hap brata bilong em Filip. Em i divosim fes meri bilong em na bai em i maritim Herodias. Herot i tok em i bihainim Lo Bilong Moses, olsem na Jon i tokaut long rong bilong Herot olsem, em i brukim lo bilong marit na mekim pasin pamuk. Herot i no amamas long tok bilong Jon, olsem na em i putim Jon long kalabus, ating Herodias i bin kirapim Herot long mekim olsem.

Herot i no save em bai mekim wanem long Jon, long wanem, ol manmeri i ting Jon “em i wanpela profet.” (Matyu 14:5) Tasol Herodias i gat narapela tingting. Em i “bel nogut long Jon,” na em i wok long painim rot bilong kilim em i dai. (Mak 6:19) Nau rot i op long kilim Jon i dai.

Paslain liklik long Pasova long yia 32 C.E., Herot i wokim bikpela kaikai long betde bilong em. Em i singautim ol bikman bilong gavman, ol komanda bilong ami, na ol man i gat nem long Galili, olgeta i kam long dispela bung. Ol i kaikai i stap, na Salome em pikinini meri bilong Herodias long fes man bilong em Filip, i kam insait na danis long ai bilong olgeta man i kam long dispela bung. Ol man i laikim tru danis bilong em.

Herot i amamas tru long Salome, na em i tok: “Yu ken askim mi long wanem samting yu laikim na bai mi givim long yu.” Na em i tok tru antap olsem: “Wanem samting yu askim mi long en, bai mi givim yu. Mi inap brukim kingdom bilong mi long tupela hap na givim wanpela hap long yu.” Salome i no bekim kwik tok, em i go na askim mama bilong em, olsem: “Bai mi askim em long wanem samting?”—Mak 6:22-24.

Nau rot i op long Herodias i kilim Jon i dai! Kwiktaim em i tokim Salome olsem: “Het bilong Jon, dispela man bilong baptaisim ol man.” Wantu, Salome i go long Herot na tok olsem: “Nau tasol mi laik bai yu givim mi het bilong Jon Bilong Baptais long wanpela plet.”—Mak 6:24, 25.

Herot i bel hevi tru, tasol ol man i kam long dispela bung i harim tok tru antap em i mekim long Salome. Em i no laik kisim sem long ai bilong ol, olsem na em i orait long ol i kilim i dai dispela man i no gat asua. Herot i salim wanpela soldia i go long kalabus bilong katim nek bilong Jon. Na i no longtaim, soldia i putim het bilong Jon long wanpela plet na i kam givim long Salome. Bihain Salome i go givim long mama bilong em.

Taim ol disaipel bilong Jon i harim tok long samting i bin kamap, ol i kam kisim bodi bilong Jon na i go planim long matmat. Na bihain ol i go toksave long Jisas.

Bihain, Herot i harim olsem Jisas i wok long oraitim sik bilong ol man na rausim ol spirit nogut, na em i tingting planti. Em i ting Jon Bilong Baptais i “kirap bek long dai,” na i mekim ol dispela wok. (Luk 9:7) Olsem na Herot i gat bikpela laik tru long lukim Jisas. Em i no laik harim tok Jisas i autim, nogat. Em yet i laik lukim Jisas na bai em i save olsem tru tru dispela man i no Jon.