God i Stap Namba Wan Long Famili Bilong yu?
“Yupela i mas laikim God, Bikpela bilong yumi. Yupela i mas laikim em tru long bel bilong yupela.”—MAK 12:29, 30.
WANPELA saveman bilong lo i askim Jisas: “Wanem lo em i winim olgeta lo na i namba wan?” Bilong bekim askim bilong man, Jisas i no kamapim tingting bilong em yet, nogat. Em i kamapim tok bilong God long Lo 6:4, 5. Em i bekim tok olsem: “Namba wan lo em i dispela, ‘Yupela Israel, harim gut. Bikpela em wanpela tasol em i God bilong yumi. Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela na long strong bilong yupela.’ ”—Mak 12:28-30.
2 Bilong bihainim dispela tok em Jisas i kolim olsem namba wan lo—em nambawan bikpela lo—oltaim yumi mas mekim ol samting Jehova i save laikim. Jisas i bin mekim olsem, maski wanpela taim Pita i no amamas long Jisas i mekim olsem, na long narapela taim ol wanblut bilong em tu i no amamas long dispela samting. (Matyu 16:21-23; Mak 3:21; Jon 8:29) Orait, olsem wanem sapos kain samting olsem i painim yu? Sapos sampela long famili ol i laik bai yu lusim pasin bilong stadi long Baibel na yu no ken bung moa wantaim ol Witnes Bilong Jehova, bai yu mekim wanem? Bai yu putim Jehova i stap namba wan na yu mekim ol samting em i laikim? God i stap namba wan, maski famili bilong yu i laik pasim yu na bai yu no mekim wok bilong em?
Taim Famili i Laik Pasim Yu
3 Jisas i no tok, taim famili i birua long wanpela i laik bihainim tok bilong Jisas, bikpela hevi i no ken painim em. Em i tok: “Ol famili bilong man yet bai i kamap birua bilong en.” Tasol maski dispela kain hevi bai painim man, Jisas i kamapim klia husat i mas i stap namba wan. Em i tok: “Man i laikim tumas papa o mama bilong en, na i no laikim mi moa yet, em i no inap i stap pren bilong mi. Na man i laikim tumas pikinini man o pikinini meri bilong en, na em i no laikim mi moa yet, em i no inap i stap pren bilong mi.” (Matyu 10:34-37) Yumi save putim God Jehova i stap namba wan taim yumi bihainim ol tok bilong Pikinini bilong em, Krais Jisas, em i “wankain tru olsem God yet.”—Hibru 1:3; Jon 14:9.
4 Long narapela taim Jisas i toktok long ol samting man i mas mekim bilong i stap disaipel tru bilong em, na em i tok: “Sapos man i kam long mi, tasol em i no birua long papa na mama na meri na ol pikinini na brata na susa bilong em, na long laip bilong em yet tu, orait em i no inap i stap disaipel bilong mi.” (Luk 14:26) Jisas i no laik tok, ol disaipel bilong em ol i mas birua long famili bilong ol. Yumi save long dispela, long wanem, em i tokim ol olsem ol i mas laikim ol birua bilong ol. (Matyu 5:44) Insait bilong dispela tok bilong Jisas i olsem: Ol disaipel bilong em i mas laikim God moa yet, winim laik bilong ol long famili. (Skelim wantaim Matyu 6:24.) Olsem na Baibel i tok, Jekop “i laikim tru Resel, tasol em i no laikim tumas Lea.” Tasol i no olsem Jekop i no laikim Lea, nogat. Em i laikim tumas Resel, winim Lea. (Stat 29:30-32) Jisas i tok, yumi mas birua long “laip” bilong yumi yet tu, olsem yumi no ken laikim tumas yumi yet, winim Jehova.
5 Jehova em i Man bilong wokim yumi na Man bilong givim laip long yumi, olsem na Jehova em inap tru long olgeta wokman bilong em i mas givim bel olgeta long em. (KTH 4:11) Aposel Pol i tok: “Mi save brukim skru long [Papa]. Em i Papa bilong olgeta lain i stap long heven na long graun, na em yet i givim nem long olgeta dispela lain.” (Efesus 3:14, 15) Jehova yet i bin kamapim famili, na em i mekim long gutpela pasin tru na bai narapela i ken laikim tru narapela insait long famili. (1 King 3:25, 26; 1 Tesalonaika 2:7) Tasol Satan i mekim wok nogut long dispela pasin bilong laikim tru ol narapela insait long famili na ol i laik mekim ol samting ol narapela long famili i laikim. Em i save kirapim famili long birua moa yet long wanpela i laik bihainim tok i tru bilong Baibel, na planti manmeri ol i save hatwok long sanap strong taim famili i mekim olsem long ol.—KTH 12:9, 12.
Rot Bilong Winim Dispela Hevi
6 Bai yu mekim wanem sapos yu mas skelim olsem yu bai mekim ol samting Jehova i laikim o ol samting wanpela bilong famili i laikim? Bai yu tokim skin bilong yu olsem God i no strong long yumi mas stadi long Baibel na bihainim tok bilong en sapos dispela i kamapim kros insait long famili? Tasol tingim dispela samting: Sapos yu bihainim tok bilong famili na yu no stadi moa long Baibel o bung wantaim ol Witnes Bilong Jehova, olsem wanem famili bilong yu bai save, stretpela save bilong Baibel inap helpim man long kisim laip na bai em i no ken lus?—Jon 17:3; 2 Tesalonaika 1:6-8.
7 Yumi ken tok piksa olsem: Wanpela long famili i save dring oltaim. Orait, bai yu helpim em tru sapos yu larim em tasol o yu orait long em i dring oltaim? Yu ting i gutpela sapos yu larim em tasol na bai yu ken i stap isi wantaim em? Nogat, a? I gutpela sapos yu wok long helpim em long lusim pasin bilong dring oltaim, maski em i kros na tok long paitim yu. (Sindaun 29:25) Na olsem tasol, sapos yu laikim tru famili bilong yu, bai yu strong long stadi long Baibel, maski ol i laik pasim yu. (Aposel 5:29) Sapos yu sanap strong, long dispela rot tasol bai yu inap helpim ol long save, yumi mas bihainim ol tok bilong Krais bambai yumi ken kisim laip na yumi no ken lus.
8 Tru, sampela taim bai i hatwok long putim God i stap namba wan na famili i stap namba tu. Tasol tingim dispela: Satan i mekim na Jisas tu i gat hatwok long mekim laik bilong God. Tasol Jisas i no les na lusim dispela wok. Em i stap strong na karim hevi, maski em i kisim bikpela pen tru long diwai bilong helpim yumi. Baibel i tok: “Jisas Krais, em Man bilong kisim bek yumi.” “Jisas i dai bilong helpim yumi.” (Taitus 3:6; 1 Tesalonaika 5:10) Yumi tenkyu tru long Jisas i no bin lusim wok bilong Jehova taim ol man i birua long em, a? Em i dai olsem wanpela ofa, olsem na sapos yumi bilip long blut bilong em i kapsait pinis, yumi gat rot long kisim laip i stap oltaim long nupela taim i gat bel isi na stretpela pasin long en.—Jon 3:16, 36; KTH 21:3, 4.
Yumi Inap Kisim Gutpela Pe
9 Yu tu inap insait long wok bilong helpim ol narapela na bai ol i no ken lus, na yu inap helpim ol wanblut tu, yu save laikim ol tumas. Aposel Pol i tokim Timoti: “Yu mas was gut long . . . wok yu mekim bilong skulim ol manmeri [long ol samting yu bin lainim]. Na sapos yu strong long mekim olsem, orait long wok bilong yu God bai i kisim bek yu yet, na em bai i kisim bek ol manmeri i save harim tok bilong yu.” (1 Timoti 4:16) Famili bilong Timoti i no stap wanbel long ol samting bilong lotu. Papa bilong em i wanpela man Grik na em i no bilip long Krais. (Aposel 16:1; 2 Timoti 1:5; 3:14) Papa bilong Timoti i kamap wanpela bilipman o nogat, em yumi no save. Tasol pasin bilong meri bilong em Yunis na bilong Timoti long i stap gut long God, dispela inap helpim papa long kamap bilipman.
10 Baibel i kamapim klia olsem ol man na meri marit i strong long holimpas tok i tru bilong Baibel, ol inap helpim poroman marit bilong ol i no bilip na bai ol i kamap bilipman na God i ken kisim bek ol. Aposel Pol i tok: “Sapos wanpela brata long Krais em i marit na meri bilong en i no bilip long Krais, na sapos meri i laik i stap wantaim em, orait dispela brata i no ken rausim em. Na sapos wanpela meri i marit na man bilong en i no bilip long Krais, na sapos man i laik i stap wantaim em, orait meri i no ken lusim man. Yu meri, bai yu inap helpim man bilong yu na em i kamap Kristen, o nogat, em yu no save. Na yu man, bai yu inap helpim meri bilong yu na em i kamap Kristen, o nogat, em yu no save tu.” (1 Korin 7:12, 13, 16) Aposel Pita i stori long olsem wanem ol meri inap helpim man bilong ol na bai ol i no ken lus. Em i tok: “Yupela i mas aninit long ol man bilong yupela. Na sapos sampela bilong ol dispela man i no save bihainim tok bilong God, orait ol i ken lukim gutpela pasin bilong yupela meri bilong ol. Na maski yupela i no mekim wanpela tok long ol, bai ol i inap tanim bel.”—1 Pita 3:1.
11 Nau long dispela taim, planti tausen manmeri em ol i bin kamap Witnes Bilong Jehova, pastaim ol i bin wok inap planti mun o yia long biruaim wok Kristen ol wanblut Witnes bilong ol i mekim. Em gutpela pe tru ol dispela Kristen i kisim long sanap strong, na em i gutpela blesing ol dispela famili i kisim, em pastaim ol i bin biruaim wok Kristen bilong ol dispela wanblut Witnes! Wanpela elda Kristen i gat 74 krismas em i pilim tru dispela samting na em i tok: “Planti taim mi save tok tenkyu long meri pikinini bilong mi, long wanem, ol i bin holimpas tok i tru, maski mi bin biruaim ol inap planti yia.” Em i tok, inap 3-pela yia em i no larim meri bilong em i toktok wantaim em long Baibel. Tasol em i tok, “Meri bilong mi i tingting gut na makim wanpela taim em i ting mi inap putim yau na harim, na nau em i kirap autim tok long mi. Mi tenkyu tru long em i no bin lusim tok i tru taim mi biruaim em!”
12 Narapela man marit i bin biruaim famili bilong em, em i tok: ‘Mi nambawan birua tru bilong meri bilong mi, long wanem, taim em i kisim tok i tru, mi save tok long mekim nogut long em, na mitupela i save tok pait long olgeta de; o mi mas tok tru olsem, oltaim mi yet mi save kirapim tok pait. Mi mekim mekim, nogat. Meri bilong mi i holimpas tok bilong Baibel. Inap 12-pela yia mi pait long tok i tru na long meri pikinini bilong mi. Long tupela, mi olsem Satan yet.’ Bihain dispela man i kirap skelim pasin bilong em. Em i tok: ‘Mi lukim olsem pasin bilong mi i nogut tru. Orait, mi kaunim Baibel na mi bihainim tok bilong en, na nau mi wanpela Witnes i baptais pinis.’ Em nau, meri bilong em i kisim gutpela pe tru, a? Maski man bilong em i bin biruaim em inap 12-pela yia, em i sanap strong na long dispela rot em i helpim man long “kamap Kristen”!
Pasin Bilong Jisas i Skulim Yumi
13 Nambawan bikpela samting pasin bilong Jisas i mas skulim ol man na meri marit long en, em pasin bilong bihainim tok bilong God. Jisas i tok: “Oltaim mi save mekim ol samting em i laikim.” Na em i tok: “Mi no save bihainim laik bilong mi yet. Nogat. Mi bihainim laik bilong Papa, em i bin salim mi na mi kam.” (Jon 5:30; 8:29) Na maski sampela laik bilong God i hatwok long Jisas i mekim na i no gutpela long em, em i bihainim tok bilong God na em i mekim. Em i beten olsem: “Papa, sapos yu laik, yu ken rausim dispela kap long mi.” Tasol kwiktaim em i tok moa olsem: “Tasol yu no ken bihainim laik bilong mi. Nogat. Yu mas bihainim laik bilong yu tasol.” (Luk 22:42) Jisas i no askim God long senisim laik bilong Em, nogat. Em i bihainim tok na em i mekim olgeta samting God i laik bai em i mekim, na long dispela rot em i kamapim klia olsem em i laikim tru God. (1 Jon 5:3) Pasin bilong putim laik bilong God i stap namba wan long olgeta taim, olsem Jisas i bin mekim, dispela em i bikpela samting bilong helpim ol singel na helpim ol marit na famili tu na bai ol wok bilong ol i kamap gutpela. I gat wanem as na yumi ken tok olsem?
14 Olsem yumi tok pinis, taim ol bilipman i putim God i stap namba wan, ol i strong long i stap wantaim poroman marit bilong ol, na long dispela rot ol i ken helpim poroman na bai em inap kisim laip na i no ken lus. Na maski tupela marit wantaim i bilip, sampela taim tupela i no stap amamas wantaim. Sin i stap long skin bilong ol marit, na sampela taim narapela i no gat gutpela tingting long narapela. (Rom 7:19, 20; 1 Korin 7:28) Na sampela ol i wok long painim narapela poroman, maski i no gat as bilong katim marit bilong ol olsem Baibel i makim. (Matyu 19:9; Hibru 13:4) Ol i tokim skin bilong ol, dispela rot em i gutpela bilong helpim ol, na laik bilong God long tupela marit i mas i stap wantaim, em i hatwok tumas long bihainim. (Malakai 2:16; Matyu 19:5, 6) Ol marit i mekim olsem, ol i bihainim tingting bilong ol man tasol na ol i no bihainim tingting bilong God.
15 Olsem na taim yumi putim God i stap namba wan, dispela i save lukautim gut yumi! Ol marit i mekim olsem ol i save wok strong long i stap wantaim, na ol i wok long bihainim ol tok bilong God long Baibel bambai ol i ken stretim ol hevi bilong ol. Long dispela rot ol i save abrusim ol kain kain hevi i save kamap taim man i sakim laik bilong God. (Song 19:7-11) Yumi ken tingim stori bilong tupela yangpela marit. Klostu tupela i laik katim marit, tasol bihain tupela i tingting long bihainim ol tok bilong Baibel long marit. Planti yia bihain, meri i tingting long bikpela amamas em i kisim long marit bilong em, na em i tok: “Mi laik krai taim mi tingting olsem klostu mi bin lusim man bilong mi na i stap wanpis insait long ol dispela yia. Taim mi tingim dispela samting, mi save beten na tok tenkyu long God Jehova long ol gutpela tok bilong em i bin soim rot long mitupela na nau mitupela i pas gut wantaim na i stap amamas tru.”
Ol Man na Meri Marit—Bihainim Pasin Bilong Krais!
16 Long olgeta taim Jisas i bin putim God i stap namba wan, na em i stap olsem gutpela piksa tru bilong ol man na meri marit, na ol i mas tingim gut dispela samting. Baibel i kirapim ol man marit long bihainim pasin sori Jisas i bin mekim long bosim lain Kristen. (Efesus 5:23) Na pasin bilong Jisas long i stap daun long God long olgeta taim, dispela inap skulim ol meri marit bilong lain Kristen long pasin ol i mas bihainim.—1 Korin 11:3.
17 Baibel i tok: “Yupela man, yupela i mas laikim tumas ol meri bilong yupela, olsem Krais i laikim tumas sios na i givim laip bilong em yet bilong helpim sios.” (Efesus 5:25) Jisas i stap pren tru bilong lain bilong em, na dispela em i bikpela samting bilong kamapim klia olsem em i laikim tumas ol. Em i tok: “Olgeta tok mi harim long Papa bilong mi, em mi tokim yupela pinis. Olsem na mi kolim yupela ‘pren.’ ” (Jon 15:15) Tingim bikpela hap taim Jisas i bin lusim long toktok wantaim ol disaipel bilong em, na planti planti tok em i bin givim long ol, na pasin bilong em long bilip long ol disaipel! Em i gutpela pasin tru ol man marit i ken bihainim, a?
18 Jisas i bin tingim tru ol disaipel bilong em na em i laikim tru ol. (Jon 13:1) Taim ol i no kisim gut ol tok em i skulim ol long en, em i save kisim ol i go long hap i no gat man na em i kamapim gut as bilong dispela tok. (Matyu 13:36-43) Orait yupela ol man marit, i stap bilong meri bilong yupela long ol samting bilong spirit em i bikpela samting long yupela? Yu save lusim hap taim wantaim em bambai yu ken save, yutupela wantaim i kisim gut ol tok i tru bilong Baibel na em i stap long tingting na bel bilong yupela? Jisas i bin i go wantaim ol aposel long autim tok, na ating em i bin skulim olgeta wan wan bilong ol. Olsem wanem long yu? Yu save go wantaim meri bilong yu long autim tok long ol haus na long mekim ol Baibel-stadi?
19 Na taim ol aposel i mekim ol pasin kranki, ol samting Jisas i mekim bilong skulim ol i olsem gutpela piksa tru bilong ol man marit i ken bihainim. Long laspela kaikai bilong em wantaim ol aposel, em i pilim olsem ol i kisim gen pasin bilong resis long i stap namba wan. Olsem wanem? Em i bin krosim ol na givim strongpela tok long ol? Nogat. Em i mekim pasin daun na wasim lek bilong olgeta wan wan. (Mak 9:33-37; 10:35-45; Jon 13:2-17) Yu save isi olsem long meri bilong yu? Sapos em i wok long mekim gen wanpela liklik pasin kranki, yu yet yu save mekim gutpela pasin bambai yu inap helpim em na em i ken putim gut long bel bilong em? Sapos man marit i mekim pasin sori olsem, ating meri bai kirap na lusim dispela pasin kranki, olsem ol aposel i bin mekim bihain.
20 Ol meri tu i mas tingim pasin bilong Jisas. Em i no bin lusim tingting olsem “het bilong Krais em God.” Long olgeta taim Jisas i daun long Papa bilong em long heven. Na olsem tu ol meri i no ken lusim tingting olsem “het bilong meri em man bilong en.” (1 Korin 11:3; Efesus 5:23) Aposel Pita i tokim ol meri marit bilong lain Kristen long tingim pasin bilong ol bilipmeri bilong bipo olsem Sara, em i “bin bihainim tok bilong Abraham na i kolim em ‘bikman.’ ”—1 Pita 3:5, 6.
21 Yumi ken ting, Sara i bin lusim gutpela haus tru long wanpela biktaun i gat planti wok bisnis na ol gutpela samting long en, na em i go long narapela kantri na sindaun long ol haus sel tasol. Bilong wanem em i mekim olsem? Em i laikim dispela kain sindaun? Ating nogat. Orait, ating em i mekim olsem, long wanem, man bilong em i tokim em long mekim? Tru yumi save, Sara i bin tingim dispela samting, long wanem, em i laikim tumas Abraham na em i tingim ol gutpela pasin bilong Abraham. (Stat 18:12) Tasol nambawan as na Sara i bihainim man bilong em i olsem: Em i laikim tru Jehova na em i gat bikpela laik long bihainim rot God i makim. (Stat 12:1) Em i amamas long bihainim tok bilong God. Tasol meri bilong Lot i gat tupela tingting long mekim laik bilong God, olsem na em i lukluk i go bek long ol samting em i lusim pinis long ples bilong em, Sodom. (Stat 19:15, 25, 26; Luk 17:32) Sori tru! Em i bikhet long God na marit bilong em i bagarap.
22 Olsem na yu man marit o meri marit, yu mas askim skin bilong yu olsem: ‘God i stap namba wan long famili bilong mi? Mi wok strong long mekim wok God i bin givim long mi insait long famili? Mi wok strong long laikim tru poroman bilong mi na helpim em long pas gut wantaim Jehova?’ Long planti famili i gat ol pikinini tu i stap. Long stadi i kamap bihain long dispela, bai yumi toktok long wok bilong papamama, na tupela wantaim ol pikinini bilong ol i mas putim God i stap namba wan.
Yu Tingim Yet?
◻ Ol tok Jisas i skulim ol man long en inap mekim wanem long planti famili?
◻ Planti tausen Kristen i bin sanap strong na ol i kisim wanem gutpela pe?
◻ Wanem samting bai helpim ol marit long abrusim pasin pamuk na katim marit?
◻ Pasin bilong Jisas inap skulim ol man marit long wanem samting?
◻ Ol meri marit inap mekim wanem bilong kamapim amamas insait long marit bilong ol?
[Askim Bilong Stadi]
1. Em i bikpela samting long yumi mas laikim tru Jehova, o olsem wanem?
2. (a) Husat ol i laik pasim Jisas na bai em i no bihainim laik bilong God? (b) Wanem sampela samting inap kamap na i hatwok long mekim ol samting Jehova i laikim?
3. (a) Ol tok Jisas i skulim yumi long en inap mekim wanem long famili? (b) Bilong kamapim klia olsem ol i laikim tumas husat, winim ol narapela, ol wan wan long famili i ken mekim wanem?
4. (a) Jisas i tok, man i mas mekim wanem bilong i stap disaipel bilong em? (b) Wanem insait bilong dispela tok olsem ol Kristen i mas birua long famili bilong ol?
5. Satan i mekim wanem wok nogut long pasin bilong famili, olsem narapela i laikim tumas narapela insait long famili?
6, 7. (a) Olsem wanem yumi inap helpim famili long pilim tru olsem yumi mas stadi long Baibel na bung wantaim ol Kristen? (b) Olsem wanem yumi inap kamapim long ples klia olsem yumi laikim tru famili bilong yumi?
8. Jisas i bin bihainim tru laik bilong God, na dispela i helpim yumi olsem wanem?
9. (a) Olsem wanem ol Kristen inap helpim ol narapela na bai ol i no ken lus? (b) Olsem wanem long famili bilong Timoti?
10. Ol marit Kristen i ken mekim wanem bilong helpim poroman bilong ol?
11, 12. (a) Planti tausen Kristen ol i bin kisim wanem gutpela pe? Ol i bin mekim wanem bilong kisim dispela pe? (b) Kolim stori bilong wanpela long famili em i bin i stap strong na kisim gutpela pe.
13. (a) Pasin bilong Jisas i mas skulim ol man na meri marit long wanem bikpela samting? (b) Olsem wanem pasin bilong Jisas inap helpim ol man em ol i hatwok long bihainim laik bilong God?
14. Sampela Kristen i gat wanem tingting kranki?
15. Taim yumi putim God i stap namba wan, olsem wanem dispela i save lukautim yumi?
16. Jisas i mekim wanem na em i stap olsem gutpela piksa bilong man marit na meri marit wantaim?
17, 18. Olsem wanem Jisas i stap olsem gutpela piksa bilong ol man marit i ken bihainim?
19. Taim ol aposel i mekim ol pasin kranki, Jisas i mekim wanem bilong skulim ol na em i stap olsem gutpela piksa ol man marit i ken bihainim?
20. Ol meri marit long lain Kristen ol i no ken lusim tingting long wanem samting? Husat i stap olsem gutpela piksa bilong ol?
21. Bilong wanem marit bilong Abraham wantaim Sara i stap strong, tasol marit bilong Lot wantaim meri bilong em i bagarap?
22. (a) Olgeta wan wan long famili ol i ken givim wanem ol askim long skin bilong ol yet? (b) Long stadi i kamap bihain long dispela bai yumi toktok long wanem samting?
[Piksa long pes 10]
Sara i mekim wanem na em i helpim marit bilong em long stap strong?