Bihainim Pasin Marimari Bilong Jehova

“Yupela i mas sori long ol man, olsem Papa bilong yupela em i save sori long ol.”​—⁠LUK 6:⁠36.

 1. Olsem wanem ol Farisi i soim olsem ol i no gat pasin marimari?

TRU, Jehova i bin wokim ol man i kamap olsem em yet, tasol planti ol i no save bihainim pasin marimari bilong em. (Stat 1:​27) Yumi ken tingim ol Farisi. Lain Farisi ol i no amamas taim Jisas i mekim pasin marimari na long de Sabat em i oraitim wanpela man han bilong em i dai pinis. Ol i bung na wokim toktok “bilong painim rot long kilim Jisas i dai.” (Matyu 12:​9-​14) Long narapela taim, Jisas i oraitim wanpela man aipas, em mama i bin karim em olsem. Em nau, “sampela Farisi” i mekim wankain pasin gen​—⁠ol i no amamas long pasin sori bilong Jisas. Ol i kirap toktok planti, olsem: “Yumi save, God i no salim dispela man i kam, long wanem, em i no save bihainim lo bilong de Sabat.”​—⁠Jon 9:​1-7, 16.

² Ol Farisi i no gat bel sori liklik, na dispela em i wanpela rong ol i mekim long ol man, na wanpela sin ol i mekim long God. (Jon 9:​39-​41) Em nau, i gat as na Jisas i givim tok lukaut long ol disaipel bilong em olsem, “Yupela lukaut long yis” bilong dispela lain i gat bikpela namba na ol narapela bikpela man bilong lotu, olsem ol Sadyusi. (Matyu 16:⁠6) Long Baibel yis i makim sin o pasin nogut. Olsem na Jisas i laik tok olsem ol tok bilong ‘ol saveman bilong lo na ol Farisi’ inap bagarapim pasin bilong lotu tru long God. Olsem wanem em inap mekim olsem? Long wanem, ol dispela tok i skulim ol man olsem taim ol i tingim Lo bilong God, ol i mas tingim ol lo bilong dispela lain yet na ol bilaspasin na lo bilong lotu, na maski long tingim “olgeta bikpela hap tok bilong lo,” olsem pasin marimari. (Matyu 23:23) Ol dispela kain pasin na lo bilong lotu i mekim na ol manmeri i gat bikpela hatwok tru long lotuim God.

2, 3. Wanem insait bilong tok bilong Jisas olsem, “Yupela lukaut long yis bilong ol Farisi”?

³ Long namba 2 hap bilong tok piksa bilong pikinini i bin lusim papa, Jisas i kamapim long ples klia tingting nogut bilong ol hetman bilong lotu Juda. Long dispela tok piksa, papa​—⁠em i makim Jehova​—⁠em i amamas long lusim rong bilong pikinini bilong em i bin tanim bel. Tasol bikbrata bilong dispela yangpela man​—⁠em i makim “ol Farisi na ol saveman bilong lo”​—⁠em i gat narapela kain tingting long dispela samting.​—⁠Luk 15:⁠2.

Brata i Belhat

4, 5. Dispela pikinini i bin lusim papa, olsem wanem yumi ken tok em i “lus”?

⁴ “Long dispela taim namba wan pikinini em i stap long gaden. Bihain em i kam bek, na i kamap klostu long haus, na em i harim musik na em i harim ol manmeri i wok long danis. Orait em i singautim wanpela wokboi, na i askim em olsem, ‘Ol i mekim wanem?’ Na wokboi i tokim em, ‘Brata bilong yu i kam bek pinis, na papa bilong yu i kilim patpela pikinini bulmakau, long wanem, papa em i amamas long lukim pikinini i stap gut na i kam bek pinis.’ Namba wan pikinini i harim dispela tok, orait em i belhat, na i no laik i go insait long haus.”​—⁠Luk 15:​25-​28.

⁵ Em nau, long tok piksa bilong Jisas, i no dispela yangpela man tasol i mekim pasin i no stret. Wanpela buk i tok, ‘tupela pikinini wantaim long dispela tok piksa ol i lus​—⁠wanpela i lus, long wanem, em i mekim pasin i no stret na dispela i bagarapim em, na wanpela i ting em yet i stretpela man na dispela i pasim tingting bilong em.’ Olsem dispela stori i tok, bikbrata i no laik amamas long brata bilong em i kam bek, na tu, em i “belhat.” Wanpela tok Grik ol i kisim dispela tok “belhat” long en, i makim wanpela kain tingting i stap longtaim long man, na i no makim olsem man i belhat wantu tasol, nogat. Ating bikbrata hia i bin bel nogut longtaim long liklik brata, olsem na em i ting i no stret long mekim bung na amamas long liklik brata i kam bek, long wanem, em i bin lusim papa na i no stret em i mekim olsem.

 6. Brata bilong dispela pikinini i bin lusim papa, em i makim husat? Olsem wanem na em i makim ol?

⁶ Em nau, bikbrata i makim stret ol dispela lain i bin bel nogut long pasin sori na gutpela pasin Jisas i bin mekim long ol sinman. Ol dispela man em ol i ting ol yet i stretpela man, bel bilong ol i no pilim pasin marimari bilong Jisas, na ol i no bihainim pasin bilong ol ensel long heven em ol i save amamas tru taim God i lusim rong bilong wanpela man i bin mekim rong. Pasin marimari bilong Jisas i kirapim ol na ol i belhat, na ol i kirap na kisim “tingting nogut” long bel bilong ol. (Matyu 9:​2-4) Wanpela taim ol Farisi i belhat nogut tru na ol i singautim wanpela man em Jisas i bin oraitim em, na nau ol i “rausim em” long haus lotu​—⁠ating ol i tambuim em long kam lotu wantaim ol! (Jon 9:​22, 34) Bikbrata bilong yangpela man i bin lusim papa, em “i no laik i go insait long haus,” na ol hetman bilong lotu Juda ol i mekim wankain pasin​—⁠ol i gat rot long “amamas wantaim ol man i amamas,” tasol ol i no laik mekim olsem. (Rom 12:15) Orait Jisas i wok yet long kamapim tingting nogut bilong ol taim em i mekim sampela stori moa bilong dispela tok piksa.

Tingting Kranki

7, 8. (a) Olsem wanem bikbrata i no bin pilim tru pasin bilong i stap pikinini bilong wanpela man? (b) Olsem wanem namba wan pikinini i no olsem papa bilong em?

⁷ “Orait papa bilong en i kam ausait na i givim gutpela tok long em bilong daunim belhat bilong en. Tasol em i bekim tok bilong papa olsem, ‘Olsem wanem? Planti yia mi hatwok tru long mekim wok bilong yu, olsem wanpela wokboi nating. Na mi no save sakim tok bilong yu. Na i no gat wanpela taim yu bin givim mi wanpela liklik pikinini meme tasol, bai mi ken amamas wantaim ol pren bilong mi. Nogat tru. Tasol dispela pikinini bilong yu, em i pinisim pinis olgeta samting bilong yu long ol pamukmeri. Na nau em i kam bek, na yu laik amamasim em na yu kilim patpela pikinini bulmakau.’ ”​—⁠Luk 15:​28-​30.

⁸ Taim bikbrata i tok olsem, em i kamapim klia olsem em i no bin pilim tru pasin bilong i stap pikinini bilong wanpela man. Em i bin mekim wok bilong papa olsem wanpela wokman i save mekim wok bilong bos bilong em. Olsem em i bin tokim papa bilong em: “Mi hatwok tru long mekim wok bilong yu, olsem wanpela wokboi nating.” Tru, dispela namba wan pikinini i no bin lusim papa o brukim sampela lo bilong papa. Tasol yu ting em i laikim tru papa na dispela i bin kirapim em long bihainim tok bilong em? Yu ting em i kisim amamas tru long mekim wok bilong papa? O em i ting em i gutpela pikinini, long wanem, em i bin mekim ol wok bilong em “long gaden”? Sapos em i bin givim bel tru long papa, olsem wanem na em i no bihainim wankain tingting olsem bilong papa? Taim em i gat rot long mekim pasin marimari long liklik brata bilong em, olsem wanem na i no gat liklik hap sori i stap long bel bilong em?​—⁠Skelim wantaim Song 50:​20-​22.

⁹ Ol hetman bilong lotu Juda ol i wankain olsem dispela namba wan pikinini. Ol i bilip olsem ol i stap gut long God, long wanem, ol i strong long bihainim ol lo. Tru, pasin bilong bihainim tok em i bikpela samting. (1 Samuel 15:22) Tasol ol i strong tumas long mekim ol wok na pasin bilong lotu, olsem na pasin bilong lotuim God i kamap olsem wanpela wok ol i mekim nating tasol, olsem ol i lotuim God long skin tasol na ol i no tingim tru ol samting bilong spirit. Ol i tingting strong tumas long ol tok na lo bilong ol tumbuna. I no gat liklik hap sori i stap long bel bilong ol. Ol i tingim ol man nating i olsem pipia graun i stap aninit long lek bilong ol, na ol i kolim ol olsem ol lain “God i tok pinis long ol bai i bagarap.” (Jon 7:​49) Olsem na yu ting God i amamas long ol wok bilong ol dispela hetman em bel bilong ol i stap longwe long em? Nogat, a?​—⁠Matyu 15:​7, 8.

10. (a) Dispela tok bilong Jehova olsem em i laikim pasin marimari na em i no laikim ol ofa, olsem wanem i stret Jisas i givim dispela tok long ol Farisi? (b) Sapos man i no gat pasin marimari, olsem wanem dispela em i bikpela samting?

¹⁰ Jisas i tokim ol Farisi: “Yupela go kisim save long dispela tok i stap long buk bilong God, ‘Mi no laikim ol ofa nating yupela i save mekim. Mi laikim tumas bai yupela i mekim gutpela pasin [olsem marimari] long ol arapela.’ ” (Matyu 9:​13; Hosea 6:⁠6) Ol i kranki stret long tingim wanem samting i namba wan samting, long wanem, sapos ol i no gat pasin marimari, olgeta ofa bilong ol i samting nating tasol. Dispela em i bikpela samting tru, long wanem, Baibel i tok ol man “i no save sori long ol arapela,” God i bungim ol wantaim ol man em i ting i stret “ol i mas i dai.” (Rom 1:​31, 32) Olsem na Jisas i tok, lain hetman bilong lotu ol i bilong bagarap olgeta i go inap oltaim oltaim. Ating pasin bilong ol, olsem ol i no save marimari liklik long ol man, em wanpela bikpela as na God i makim ol bilong kisim dispela kain strafe. (Matyu 23:33) Tasol ating Jisas inap helpim ol wan wan bilong dispela lain. Long pinis bilong tok piksa bilong em, Jisas i laik stretim tingting bilong ol dispela Juda long rot bilong ol tok papa i givim long namba wan pikinini bilong em. Orait nau yumi ken stori long dispela samting.

Pasin Marimari Bilong Papa

11, 12. Long dispela tok piksa, papa i givim wanem tok long namba wan pikinini bilong givim stretpela tingting long em? Ating i gat wanem as na papa i kolim dispela tok olsem “brata bilong yu”?

¹¹ “Na papa i tokim em olsem, ‘Pikinini, oltaim yu save stap wantaim mi. Na olgeta samting bilong mi em i bilong yu. Tasol nau yumi mas amamas, na bel bilong yumi i mas gutpela, long wanem, brata bilong yu i dai pinis, tasol nau em i kisim laip gen. Em i lus pinis, tasol nau yumi kisim em bek.’ ”​—⁠Luk 15:​31, 32.

¹² Tingim dispela hap tok papa i mekim, em i tok “brata bilong yu.” Bilong wanem em i tok olsem? Tingim ol tok namba wan pikinini i mekim taim em i toktok wantaim papa, em i bin kolim liklik brata olsem “pikinini bilong yu”​—⁠em i no tok, “brata bilong mi.” I olsem em i no laik tokaut olsem dispela namba tu pikinini em i brata bilong em. Olsem na nau i olsem papa i laik tokim namba wan pikinini: ‘Tru, em i pikinini bilong mi, tasol em i brata bilong yu, em i wanblut tru bilong yu. I gat as tru na yu mas amamas long em i kam bek!’ Ol hetman Juda i mas klia gut long dispela tok bilong Jisas. Ol sinman ol dispela hetman i nolaik tru long ol, em ol “brata” bilong ol. Tru tumas, “i no gat wanpela stretpela man i save mekim gutpela pasin oltaim. Nogat. Sampela taim em tu i mekim sin.” (Saveman 7:​20) Olsem na i gat as tru na ol bikman Juda i mas amamas taim ol sinman i tanim bel.

13. Tok piksa bilong Jisas i pinis wantu tasol, olsem na i gat wanem askim yumi mas tingim?

¹³ Orait taim papa i tok olsem long namba wan pikinini, wantu dispela stori i pinis. I olsem Jisas i laik bai ol man i harim dispela tok piksa ol yet i ken skelim pinis bilong dispela stori. Namba wan pikinini i mekim wanem, em yumi no save. Tasol olgeta wan wan man i harim dispela stori ol i mas tingim wanpela askim olsem: ‘Bai yu yet yu insait long dispela amamas ol lain bilong heven i kisim taim wanpela sinman i tanim bel?’ Ol Kristen bilong nau ol tu i gat rot long kamapim klia bekim bilong ol long dispela askim. Bai ol i kamapim klia olsem wanem?

Bihainim Pasin Marimari Bilong God Long Nau

14. (a) Olsem wanem yumi ken bihainim tok bilong Pol long Efesus 5:1 long pasin bilong marimari? (b) Yumi mas was gut, nogut yumi kisim wanem tingting kranki long marimari bilong God?

¹⁴ Pol i tokim ol Efesus: “God i save laikim yupela tru, na yupela i stap pikinini bilong em. Olsem na yupela i mas bihainim ol pasin em yet i save mekim.” (Efesus 5:⁠1) Olsem na yumi ol Kristen i mas pilim tru marimari bilong God, na putim i go daun tru long bel bilong yumi, na nau yumi mas kamapim dispela marimari long ol pasin yumi mekim long ol narapela man. Tasol yumi mas was gut. Yumi no ken kisim tingting kranki long marimari bilong God olsem sin i no bikpela samting tumas. Olsem: I gat sampela man ating ol i save tingting olsem, ‘Sapos mi mekim wanpela rong, mi inap beten long God na askim em long lusim rong bilong mi, na em bai marimari long mi.’ Wanpela man bilong raitim Baibel, em Jut, em i stori long ol man i gat kain tingting olsem, na em i tok “ol i save senisim tok bilong marimari bilong God, na mekim em i kamap tok bilong [givim rot long ol long mekim] ol kain kain pasin nogut.” (Jut 4) Tru, Jehova em i God bilong marimari, tasol em i “save mekim save long ol man i gat asua,” em ol man i bin mekim rong na ol i no tanim bel.​—⁠Kisim Bek 34:7; skelim wantaim Josua 24:19; 1 Jon 5:​16.

15. (a) Bilong wanem ol elda i mas holim stretpela tingting long pasin marimari? (b) Tru, ol man bilong mekim rong, ol elda i no ken larim ol, tasol ol i mas wok strong long mekim wanem? Bilong wanem ol i mas mekim olsem?

¹⁵ Tasol yumi mas was gut long narapela kain pasin​—⁠nogut yumi kamap hatpela man na wok long skelim skelim ol man i kamapim klia olsem ol i tanim bel tru na ol i bel hevi tru long rong ol i bin mekim. (2 Korin 7:​11) Jehova i bin putim ol sipsip bilong em long han bilong ol elda bilong lukautim ol, olsem na ol elda i mas holim stretpela tingting long dispela samting, na ol i mas mekim moa yet taim ol i harim kot bilong sampela insait long kongrigesen. Tru, kongrigesen Kristen i mas i stap klin, na Baibel i tok ol i mas ‘rausim man nogut’ long kongrigesen. (1 Korin 5:​11-​13) Tasol i gutpela tru long mekim pasin marimari long man sapos i gat as tru bilong mekim olsem. Olsem na sapos long laik bilong em yet wanpela man i mekim rong, ol elda i no save larim em, tasol ol i save wok strong long painim rot bilong mekim pasin sori na marimari sapos dispela i no kalapim lo bilong stretpela kot ol i mas bihainim. Ol i save long wanpela lo bilong Baibel i tok: “Sapos wanpela man i no bin sori long ol arapela man, orait taim God i skelim em long kot, God bai i no sori liklik long em. Tasol man i save sori long ol arapela man, em bai i winim kot.”​—⁠Jems 2:​13; Sindaun 19:17; Matyu 5:⁠7.

16. (a) Kamapim sampela tok bilong Baibel na soim olsem Jehova i laik tru bai ol man i bin mekim rong ol i ken kam bek long em. (b) Olsem wanem yumi ken kamapim long ples klia olsem yumi tu i amamas long ol sinman i tanim bel na ol i kam bek?

¹⁶ Tok piksa bilong pikinini i lusim papa em i kamapim klia olsem Jehova i gat laik tru long ol man i bin mekim rong ol i ken i kam bek long em. Em i wok long givim dispela singaut long ol i go inap long taim ol i kamapim klia olsem ol i no inap tru long tanim bel. (Esekiel 33:11; Malakai 3:7; Rom 2:​4, 5; 2 Pita 3:⁠9) Olsem papa bilong dispela yangpela man i mekim long dispela tok piksa, Jehova i save mekim gut long ol man i kam bek, na em i kisim ol olsem hap lain bilong famili yet. Olsem wanem long yu? Yu bihainim pasin bilong Jehova long dispela samting? Sapos wanpela wanbilip i bin raus long kongrigesen na nau ol i kisim em bek, yu save mekim wanem? Yumi save pinis, “amamas i save kamap long heven” long dispela taim. (Luk 15:⁠7) Tasol olsem wanem? I gat amamas i save kamap long graun, na long kongrigesen bilong yu, na long bel bilong yu? O yu bihainim pasin bilong bikbrata long dispela tok piksa na yu bel nogut liklik, olsem i no inap yu ken tok amamas long em i kam bek, long wanem, em i bin lusim lain bilong God na i no stret em i bin mekim olsem?

¹⁷ Bilong helpim yumi long skelim gut bel bilong yumi long dispela samting, yumi ken tingim samting i bin kamap long Korin long yia olsem 55 C.E. Long dispela hap, wanpela man bipo em i bin raus long kongrigesen, nau em i stretim pinis pasin bilong em na em i bihainim pasin i stret. Orait ol brata bai mekim wanem? Ol i mas i gat tupela tingting long em olsem em i no bin tanim bel tru, na ol i wok yet long abrusim em? Nogat tru. Pol i tokim ol Korin: “Mobeta yupela i lusim sin bilong em na mekim isi bel bilong en. Nogut bikpela bel hevi moa i daunim tru dispela man. Olsem na mi laik bai yupela i soim em olsem yupela i laikim em yet.” (2 Korin 2:​7, 8) Ol man i bin mekim rong na ol i tanim bel pinis, sampela ol i sem long pasin ol i bin mekim na ol i save bel hevi. Olsem na ol wanbilip i mas mekim gut long ol na tokim ol olsem ol i save laikim tru ol, na Jehova tu i laikim ol. (Jeremaia 31:3; Rom 1:​12) Dispela em i bikpela samting. Bilong wanem?

¹⁸ Taim Pol i tokim ol Kristen long lusim tingting long rong bilong narapela, em i kamapim wanpela as bilong dispela olsem, “nogut Satan i giamanim yumi na i winim yumi. Yumi save pinis long tingting na pasin bilong em.” (2 Korin 2:​11) Wanem insait bilong dispela tok bilong Pol? Paslain long dispela, em i bin krosim kongrigesen Korin, long wanem, ol i isi tumas na ol i bin larim dispela man i stap na mekim yet rong bilong em na em i no kisim strafe long en. Em nau, taim ol i mekim olsem, kongrigesen​—⁠na ol elda bilong en​—⁠ol i mekim pasin em Satan i amamas long en, long wanem, em i laik tru bai kongrigesen i stap nogut na ol man i tok nogut long en.​—⁠1 Korin 5:​1-5.

¹⁹ Orait sapos nau ol elda i mekim narapela kain pasin tru na ol i no laik lusim rong bilong dispela man i tanim bel pinis, Satan bai i giamanim na winim ol long narapela rot, olsem: Em inap mekim wok long dispela pasin bilong ol, olsem ol i hatpela man na ol i no gat pasin marimari. Dispela man i bin mekim rong na i tanim bel, sapos “bikpela bel hevi moa i daunim tru” em, o “em i bel hevi nogut tru na em i les olgeta,” olsem Baibel Today’s English Version i tok, ol elda bai i kot long Jehova long dispela pasin ol i mekim! (Skelim wantaim Esekiel 34:6; Jems 3:⁠1) Olsem na i gat as na taim Jisas i tokim ol disaipel olsem ol i mas was gut, nogut ol i pundaunim “wanpela bilong ol dispela liklik pikinini,” em i tok: “Yupela lukaut gut long yupela yet. Sapos brata bilong yu i mekim sin, yu mas tokim em long stretim pasin bilong em. Na sapos em i tanim bel, orait yu mas lusim sin bilong em.”a​—⁠Luk 17:​1-4.

20. Olsem wanem i gat amamas i kamap long heven na long graun taim wanpela sinman i tanim bel?

²⁰ Planti tausen manmeri em ol i save kam bek long lotu i tru long olgeta yia, ol i tenkyu tru long Jehova i bin mekim pasin marimari long ol. Wanpela sista Kristen i stori long taim kongrigesen i kisim em bek na em i tok: “Mi no inap tingim narapela taim mi bin kisim bikpela amamas olsem long dispela taim.” Yumi save, ol ensel tu i amamas long dispela samting. Orait yumi tu i mas insait long dispela “amamas i save kamap long heven” taim wanpela sinman i tanim bel. (Luk 15:⁠7) Sapos yumi mekim olsem, bai yumi bihainim pasin marimari bilong Jehova.

[Futnot]

Stori Gen

◻ Olsem wanem brata bilong pikinini i bin lusim papa em i kain olsem ol hetman bilong lotu Juda?

◻ Olsem wanem bikbrata i no bin pilim tru pasin bilong i stap pikinini bilong wanpela man?

◻ Taim yumi tingim pasin marimari bilong God, yumi mas abrusim wanem tupela pasin i narapela narapela kain?

◻ Olsem wanem yumi ken bihainim pasin marimari bilong God long nau?

 9. Stori long olsem wanem ol hetman bilong lotu Juda ol i wankain olsem dispela namba wan pikinini.

17. (a) Wanem samting i kamap long Korin long taim bilong ol aposel? Pol i givim wanem tok long kongrigesen long ol samting ol i mas mekim long dispela? (b) Olsem wanem dispela tok bilong Pol i gutpela long bihainim? Olsem wanem yumi inap bihainim long nau? (Na lukim blok long han sut.)

18, 19. (a) Pastaim ol Korin i mekim wanem na dispela i soim olsem ol i isi tumas long sinman? (b) Sapos ol Korin i no gat pasin marimari, olsem wanem dispela inap mekim na ‘Satan i winim’ ol?

[Blok long pes 17]

“SOIM EM OLSEM YUPELA I LAIKIM EM YET”

Pol i tingim dispela man i bin mekim rong na i kamapim klia olsem em i tanim bel, na Pol i tokim kongrigesen Korin: “Mi laik bai yupela i soim em olsem yupela i laikim em yet.” (2 Korin 2:⁠8) Tok Grik ol i tanim olsem “soim em,” em i wanpela tok bilong ol loya samting, insait bilong en i olsem “strongim long kot.” Tru tumas, ol man i tanim bel pinis na kongrigesen i kisim bek ol, ol i mas pilim olsem yumi laikim tru ol na yumi amamas long ol i insait gen long kongrigesen.

Tasol yumi mas save, klostu olgeta long kongrigesen i no save long ol samting i bin kamap na kongrigesen i rausim wanpela man o kisim em bek. Na tu, ating sampela insait long kongrigesen i bin kisim hevi long dispela rong em i bin mekim, na ating dispela hevi bai stap longtaim. Yumi tingim dispela samting, olsem na taim kongrigesen i toksave olsem ol i kisim bek wanpela man, long dispela taim yet yumi no mekim sampela tok o pasin bilong amamas long em​—⁠yumi wet inap long taim yumi ken i go sekanim em na tok amamas long em i kam bek.

Taim ol dispela man i save, yumi amamas long kisim bek ol olsem lain tru bilong kongrigesen, dispela i save strongim tru bilip bilong ol! Bilong strongim bel bilong ol dispela man i bin tanim bel, yumi ken toktok wantaim ol na amamas long bung wantaim ol long Haus Kingdom, na long taim yumi autim tok, na long ol narapela taim i stret long mekim olsem. Taim yumi soim ol olsem yumi laikim tru ol, i no olsem yumi tingim rong ol i bin mekim i olsem liklik samting tasol, nogat. Yumi wantaim ol ensel long heven yumi amamas long ol i lusim pinis pasin bilong mekim rong na ol i kam bek long Jehova.​—⁠Luk 15:⁠7.

[Piksa long pes 15]

Namba wan pikinini i no laik amamas long brata bilong em i kam bek