Sapta 5

God i Laikim Lotu Bilong Husat?

 1. Wanpela meri Samaria i gat wanem askim long lotu?

OLSEM WANEM? Sampela taim yu save askim skin bilong yu, ‘God i laikim lotu bilong husat?’ Meri i toktok wantaim Krais Jisas klostu long maunten Gerisim long Samaria, ating em tu i bin tingim kain askim olsem. Em i kolim samting i makim lotu bilong ol Juda na lotu bilong ol Samaria i narapela narapela kain, em i tok: “Ol tumbuna bilong mipela ol i save bung long dispela maunten na mekim lotu. Tasol yupela Juda i save tok, ples ol man i mas i go long en na mekim lotu, em i stap long Jerusalem tasol.” (Jon 4:20) Yu ting Jisas i tokim dispela meri Samaria, God i laikim olgeta lotu? O em i tok, i gat sampela samting ol man i mas mekim bambai God i ken laikim lotu bilong ol?

 2. Jisas i bekim wanem tok long dispela meri Samaria?

² Meri i kirap nogut long bekim bilong Jisas, em i tok: “Wanpela taim i laik kamap na bai yupela i no lotu long Papa long dispela maunten, na bai yupela i no lotu long em long Jerusalem tu.” (Jon 4:21) Longtaim tru ol Samaria i bin pret long Jehova na ol i bin lotuim ol narapela god long maunten Gerisim. (2 King 17:33) Tasol nau Krais Jisas i tok, dispela ples na Jerusalem tu bai i no bikpela samting long lotu i tru.

LOTU LONG SPIRIT NA PASIN I TRU

 3. (a) I gat wanem as na ol Samaria i no save tru long God? (b) Olsem wanem ol gutpela Juda na ol narapela inap kisim save long God?

³ Jisas i tok moa long meri Samaria olsem: “Yupela Samaria i save lotu long samting yupela i no save long en. Tasol mipela Juda i save lotu long samting mipela i save long en, long wanem, God i bin makim mipela Juda long i go pas long dispela wok bilong kisim bek ol manmeri.” (Jon 4:22) Ol Samaria i gat ol bilip kranki, na ol i bilip long 5-pela buk tasol bilong Baibel, em Stat i go inap long Lo, em spirit bilong God yet i bin kamapim—tasol ol yet i skelim na senisim na bai i wankain olsem bilip kranki bilong ol na ol i kolim Rait Bilong Ol Samaria. Olsem na ol i no save tru long God. Tasol God i bin givim Tok bilong em long ol Juda bilong lukautim. (Rom 3:1, 2) Ol dispela tok long buk bilong God i helpim ol gutpela Juda na ol narapela i harim tok na ol inap save long God.

 4. Olsem Jisas i tok, ol Juda wantaim ol Samaria i mas mekim wanem bambai ol i ken lotu long God long pasin em i laikim?

⁴ Jisas i kamapim klia olsem ol Juda wantaim ol Samaria i mas stretim pasin bilong ol long mekim lotu bambai God i ken laikim lotu bilong ol. Em i tok: “Taim i laik kamap, na nau i kamap pinis, na olgeta man i laik lotu tru bai ol i lotu long Papa long [spirit] na long pasin i tru. Na Papa i laikim tumas bai ol kain man olsem i mas lotu long em.” (Jon 4:23, 24) Bilong lotu long God “long spirit,” yumi mas kisim spirit bilong em na larim dispela spirit i stiaim yumi. Na bilong lotu long God long “pasin i tru,” yumi mas stadi long Baibel na lotuim em olsem tok i tru bilong em long Baibel i makim. Yu laik mekim olsem?

 5. (a) Pasin bilong lotu long God i olsem wanem? (b) Yumi mas mekim wanem bambai God i ken orait long lotu bilong yumi?

⁵ Jisas i tokaut strong olsem God i laik bai yumi mas lotu tru long em. Dispela i makim olsem i gat sampela pasin bilong lotu em Jehova i no save laikim. Bilong lotu long God yumi mas bilip tru long em na daun long em na litimapim nem bilong em na mekim wok bilong em. Sapos yu laik litimapim nem bilong wanpela strongpela king, bai yu wok strong long mekim wok bilong em na mekim pasin em i laikim. Yumi laik tru long mekim pasin God i laikim. Olsem na yumi no ken tok tasol, ‘Mi amamas long lotu bilong mi’; yumi mas wok strong long save, pasin bilong yumi long lotuim God i stret wantaim ol lo em i putim bilong lotuim em o nogat.

BIHAINIM LAIK BILONG PAPA

 6, 7. Bilong wanem Jisas i no orait long sampela manmeri em ol i tok ol i disaipel bilong em?

⁶ Orait, yumi ken kaunim Matyu 7:21-23 bilong kisim save long bikpela samting i makim olsem God i laikim olgeta lotu o nogat. Jisas i tok: “Yupela i no ken ting, olgeta manmeri i save kolim mi, ‘Bikpela, Bikpela,’ ol bai i go insait long kingdom bilong heven. Nogat. Man i bihainim laik bilong Papa bilong mi i stap long heven, em tasol bai i go insait long kingdom. Long de bilong bikpela kot bilong God, planti manmeri bai i tokim mi olsem, ‘Bikpela, Bikpela, mipela i bin mekim wok profet long nem bilong yu. Long nem bilong yu mipela i bin rausim ol spirit nogut. Long nem bilong yu mipela i bin wokim planti mirakel.’ Na long dispela taim mi bai tokaut long ol olsem, ‘Mi no save liklik long yupela. Yupela ol man bilong mekim pasin nogut, yupela klia long mi.’ ”

⁷ Man i laik lotu tru long God, em i mas tokaut olsem Krais Jisas em i Bikpela bilong em. Tasol ol dispela ves i makim olsem planti manmeri i tok ol i disaipel bilong Jisas ol i lus long mekim wanpela samting long lotuim God. Jisas i tok, sampela bai “wokim planti mirakel,” olsem ol i tok ol inap oraitim sik. Tasol ol i no mekim bikpela samting Jisas i tok ol i mas mekim. Ol i no “bihainim laik bilong Papa [bilong em].” Sapos yumi laik mekim pasin God i laikim, yumi mas kisim save long laik bilong Papa na bihainim.

STRETPELA SAVE I LUKAUTIM YUMI

 8. Yumi mas mekim wanem bilong bihainim laik bilong God? Yumi mas klia long wanem ol tingting kranki?

⁸ Bilong bihainim laik bilong God, yumi mas kisim stretpela save long God Jehova wantaim Krais Jisas. Dispela save inap bringim yumi long laip oltaim. Olsem na yumi olgeta i mas ting em i bikpela samting tru long kisim stretpela save i stap long Baibel. Sampela i tok, yumi no ken tingting tumas long dispela; bikpela samting em yumi mas givim bel tru long lotu. Sampela i tok, ‘Sapos yu save liklik tasol, yu inap abrusim bikpela wok.’ Tasol Baibel i kirapim yumi long kisim planti save long God na long laik bilong em.—Efesus 4:13; Filipai 1:9; Kolosi 1:9.

 9. Stretpela save i lukautim yumi olsem wanem? Bilong wanem yumi mas i gat dispela save bilong lukautim yumi?

⁹ Dispela save i lukautim yumi na bai lotu bilong yumi i no kamap nogut long ai bilong God. Aposel Pol i stori long wanpela spirit em i giaman olsem em i wanpela “ensel bilong lait.” (2 Korin 11:14) Long dispela rot, dispela spirit, em Satan, i laik giamanim yumi na bai yumi mekim samting i no stret long laik bilong God. Sampela spirit moa i wok wantaim Satan long paulim lotu bilong ol man, long wanem, Pol i tok: “Samting ol haiden i save ofaim, em ‘ol i ofaim long ol spirit nogut. Ol i no ofaim long God.’ ” (1 Korin 10:20) Tru, planti man i ting ol i lotu long pasin i stret, tasol ol i no bihainim laik bilong God. Satan i paulim ol na ol i mekim lotu i giaman na i no klin long ai bilong God. Bihain bai yumi kisim sampela save moa long Satan na ol spirit nogut, tasol yumi ken save tru olsem ol dispela birua bilong God i bin paulim lotu bilong ol man.

10. Sapos wanpela man i putim marasin nogut insait long tang wara bilong yu, bai yu mekim wanem? Sapos yumi kisim stretpela save long Baibel, em Tok Bilong God, bai yumi inap mekim wanem?

¹⁰ Sapos yu save wanpela man i bin putim marasin nogut insait long tang wara bilong yu, bai yu dring yet long dispela wara? Nogat, a? Kwiktaim bai yu go painim klinpela wara i no ken bagarapim yu. Orait, sapos yumi kisim stretpela save long ol tok bilong Baibel, bai yumi inap luksave long lotu i tru, na sakim ol pasin bilong lotu i no klin na God i no laikim.

OL I AUTIM LO BILONG OL MAN

11. Wanem samting i kranki long lotu bilong planti Juda?

¹¹ Taim Jisas i stap long graun, planti Juda i no gat stretpela save long God na ol i no bihainim laik bilong em. Olsem na ol i no inap kamap stretpela man long ai bilong Jehova. Pol i tok long ol olsem: “Mi save gut long ol na mi tokaut olsem, ol i strong tumas long bihainim pasin God i laikim. Tasol ol i no klia gut long laik tru bilong God, na ol i mekim.” (Rom 10:2) Ol yet i makim pasin bilong lotu long God; ol i no laik harim gut tok bilong em.

12. Wanem samting i bagarapim lotu bilong ol Israel? Na wanem samting i bin kamap long dispela rot?

¹² Pastaim ol Israel i bihainim lotu i tru em God i givim long ol. Tasol bihain ol i kirap bihainim tok na tingting bilong ol man long samting bilong lotu. (Jeremaia 8:8, 9; Malakai 2:8, 9; Luk 11:52) Ol Farisi, em ol hetman bilong lotu Juda, ol i ting God i laikim lotu bilong ol, tasol Jisas i tokim ol: “Profet Aisaia em i makim tru yupela man bilong giaman. Em i bin raitim tok olsem, ‘Ol dispela lain manmeri ol i save litimapim nem bilong mi long maus bilong ol, tasol bel na tingting bilong ol i stap longwe tru long mi. Ol i save autim lo bilong ol man tasol na tok, “Dispela em i tok bilong God.” Olsem na ol i lotu nating long mi.’ ”—Mak 7:6, 7.

13. Olsem wanem yumi inap mekim pasin olsem ol Farisi i bin mekim?

¹³ Nogut yumi mekim ol pasin olsem ol Farisi, a? Dispela samting bai kamap sapos yumi bihainim tasol lotu bilong ol tumbuna na yumi no skelim tok bilong God long lotu. Pol i givim tok lukaut long yumi long dispela samting, olsem: “Holi Spirit i tok klia olsem, long dispela taim i laik kamap bihain sampela man bai i lusim bilip bilong ol, long wanem, ol bai i putim yau long tok bilong ol spirit bilong giaman na ol spirit nogut na bihainim tok bilong ol.” (1 Timoti 4:1) Olsem na yumi no ken ting tasol olsem God i laikim lotu bilong yumi. Ating yumi olsem meri Samaria i bungim Jisas—yumi bihainim lotu yumi bin kisim long papamama. Tasol yumi mas save tru, lotu yumi mekim i stret long laik bilong God o nogat.

NOGUT YUMI MEKIM PASIN GOD I NO LAIKIM

14, 15. Maski yumi gat sampela save long laik bilong God, i gat wanem as na yumi mas was gut?

¹⁴ Sapos yumi no was gut, yumi inap mekim pasin God i no laikim. Olsem: Aposel Jon i brukim skru long wanpela ensel na i “laik lotu long em.” Tasol ensel i tok: “Yu no ken mekim olsem! Mi tu mi wanwok bilong yu wantaim ol brata bilong yu, em yupela ol lain i save bilip long tok Jisas i autim. Yu mas lotu long God wanpela tasol.” (KTH 19:10) Olsem na ating yu pilim olsem yu mas skelim pasin bilong yu long lotuim God, nogut yu mekim wanpela pasin i olsem pasin bilong lotuim god giaman.—1 Korin 10:14.

¹⁵ Taim sampela Kristen i kirap bihainim sampela pasin bilong lotu em God i no laikim, Pol i askim ol: “Bilong wanem yupela i laik surik i go bek long ol dispela rabis spirit [olsem pasin] i no gat strong tru, na yupela i laik kamap wokboi nating bilong ol gen? Oltaim yupela i save ting yupela i mas bihainim ol lo bilong ol bikpela de bilong lotu na bilong ol nupela mun na bilong bikpela lotu bilong nupela yia. Mi tingting long dispela pasin bilong yupela na mi pret, nogut wok mi bin mekim namel long yupela em i lus nating.” (Galesia 4:8-11) Ol dispela manmeri i bin kisim save long God, tasol bihain ol i kirap bihainim sampela pasin na bikpela de bilong lotu em Jehova i no laikim. Olsem Pol i tok, yumi mas wok long “kisim save long ol pasin Bikpela i save laikim.”—Efesus 5:10.

16. Olsem wanem Jon 17:16 na 1 Pita 4:3 i helpim yumi long skelim olsem God i save laikim ol bikpela de na pasin bilong lotu o nogat?

¹⁶ Yumi mas klia long ol bikpela de bilong lotu na ol pasin bilong lotu i no stret long ol stiatok bilong God. (1 Tesalonaika 5:21) Jisas i tok long ol disaipel bilong em olsem: “Ol i no bilong dispela graun, olsem mi yet mi no bilong dispela graun.” (Jon 17:16) Olsem wanem? Lotu bilong yu i save insait long sampela pasin o bikpela de i kalapim dispela stiatok i tok yumi no ken insait long ol wok bilong dispela graun? Sampela taim ol wanlotu bilong yu i save insait long sampela pasin o bikpela de bilong amamas i kirapim ol man long mekim pasin olsem Pita i stori long en? Em i tok: “Yupela i wokabaut inap pinis long pasin bilong olpela bel, na mekim olkain pasin ol haiden i save laikim tumas long mekim, em ol pasin pamuk, na pasin bilong bel i kirap long ol samting nogut, na pasin bilong spak nabaut, na pasin bilong mekim ol bikpela pati na kaikai planti tumas na dringim planti strongpela dring na mekim pasin nogut, na pasin bilong sakim lo bilong God na mekim lotu long ol giaman god.”—1 Pita 4:3.

17. Bilong wanem yumi mas klia long olgeta pasin i kamapim tingting na pasin bilong ol man bilong dispela graun?

¹⁷ Aposel Jon i tokaut strong olsem yumi mas klia long olkain pasin bilong ol man bilong dispela graun i givim baksait long God. Jon i tok: “Yupela i no ken laikim ol pasin bilong graun na olgeta samting bilong graun. Sapos wanpela man i laikim ol pasin bilong graun, orait em i no save laikim tru Papa. Yumi save, olgeta pasin bilong ol man bilong graun, em pasin bilong bel kirap na aigris na bikhet, ol dispela pasin i no kam long Papa. Nogat. Ol i pasin bilong graun tasol. Na dispela graun bai i pinis, na olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim. Tasol man i bihainim tok bilong God, em bai i stap oltaim.” (1 Jon 2:15-17) Yu lukim dispela tok olsem ol man i “bihainim tok bilong God” bai stap oltaim? Tru tumas, sapos yumi bihainim laik bilong God na klia long ol pasin bilong graun, yumi inap tingting long kisim laip i stap oltaim!

BIHAINIM OL PASIN I STRET LONG AI BILONG GOD

18. Sampela Korin i gat wanem tingting kranki long pasin ol i ken mekim? Dispela i mas lainim yumi long wanem samting?

¹⁸ God i laik bai ol man i lotu long em ol i mas bihainim ol pasin i stret long ai bilong em. Sampela long Korin bipo ol i kranki na ol i ting God inap orait long pasin i no stret. Sapos yumi kaunim tok bilong 1 Korin 6:9, 10, bai yumi inap save, tingting bilong ol i kranki tru. Sapos yumi laik lotu long God long pasin em i orait long en, yumi mas mekim olgeta tok na pasin em i laikim. Olsem wanem? Lotu bilong yu i helpim yu long mekim olsem?—Matyu 15:8; 23:1-3.

19. Lotu i tru i kirapim yumi long mekim wanem kain pasin long ol narapela?

¹⁹ Pasin yumi mekim long ol narapela man, dispela tu i mas stret long pasin God i laikim. Krais Jisas i kirapim yumi long mekim pasin long ol narapela olsem yumi laik bai ol i mas mekim long yumi, long wanem, dispela em i hap wok bilong lotu tru long God. (Matyu 7:12) Na long pasin bilong laikim tru ol brata, em i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Ol disaipel bilong Jisas i mas laikim tru ol wanbilip bilong ol na mekim gutpela pasin long ol na long ol narapela man.—Galesia 6:10.

GIVIM BEL OLGETA LONG LOTU

20, 21. (a) God i laik bai yumi mas lotuim em olsem wanem? (b) Bilong wanem Jehova i sakim lotu bilong ol Israel long taim bilong Malakai?

²⁰ Long bel bilong yu, ating yu laik lotu long God long pasin em i laikim. Sapos olsem, yu mas i gat wankain tingting long lotu olsem Jehova yet. Disaipel Jems i kamapim klia olsem tingting bilong God i bikpela samting; tingting bilong yumi, nogat. Jems i tok: “Pasin bilong Kristen i stap stret olgeta na i no gat asua long ai bilong God Papa bilong yumi, em i olsem. Yumi mas tingting long ol pikinini, papamama bilong ol i dai pinis, na long ol meri, man bilong ol i dai pinis, na yumi mas helpim ol long karim ol hevi bilong ol. Narapela samting tu, yumi mas lukautim gut wokabaut bilong yumi yet, bai pasin bilong dispela graun i no ken mekim yumi i kamap doti long ai bilong God.” (Jems 1:27) Sapos yumi laik mekim lotu God i laikim, yumi olgeta wan wan i mas skelim lotu bilong yumi, nogut i gat sampela pasin i no stret long ai bilong God, o yumi lus long mekim samting God i ting em i bikpela samting.—Jems 1:26.

²¹ Yumi mas mekim lotu i stret na givim bel olgeta long mekim bambai Jehova i ken laikim. (Matyu 22:37; Kolosi 3:23) Taim lain Israel i givim hap bel tasol, God i tok: “Pikinini i save aninit long papa bilong en, na wokman tu i save bihainim tok bilong bosman bilong en. Olsem na yupela harim. Mi papa bilong yupela. Bilong wanem yupela i no save aninit long mi? Mi bos bilong yupela. Olsem wanem na yupela i no save bihainim tok bilong mi?” God i no amamas long ol, long wanem, ol i givim ol ofa nogut long em, em ol animal i aipas, na lek nogut, na i gat sik; em i sakim dispela pasin ol i mekim bilong lotuim em. (Malakai 1:6-8) Jehova em inap tru long yumi lotu long em long pasin i stret olgeta, na yumi mas lotu long em wanpela tasol bambai em i ken laikim lotu bilong yumi.—Kisim Bek 20:5; Sindaun 3:9; KTH 4:11.

22. Sapos yumi laik bai God i orait long lotu bilong yumi, bai yumi klia long wanem samting? Na bai yumi mekim wanem?

²² Meri Samaria i toktok wantaim Jisas, i olsem em i laik lotuim God long pasin God i laikim. Sapos yumi gat wankain laik, bai yumi klia long olgeta tok na pasin bilong lotu i no stret long ai bilong God. (2 Korin 6:14-18) Bai yumi wok strong long kisim stretpela save long God na bihainim laik bilong em. Bai yumi bihainim gut ol lo bilong em i makim pasin yumi mas mekim bilong lotuim em na em i ken orait long en. (1 Timoti 2:3, 4) Ol Witnes Bilong Jehova i wok strong long mekim olsem, na ol i laik bai yu bung wantaim ol na lotu long God ‘long spirit na long pasin i tru.’ (Jon 4:24) Jisas i tok: “Papa i laikim tumas bai ol kain man olsem i mas lotu long em.” (Jon 4:23) Gutpela sapos yu kain man olsem. Mipela i save yu laik kisim laip i stap oltaim, olsem meri Samaria. (Jon 4:13-15) Tasol yu lukim ol manmeri i go lapun na ol i dai. Sapta 6 bai stori long as bilong dispela.

TRAIM SAVE BILONG YU

God i laikim wanem kain lotu, olsem Jon 4:23, 24 i makim?

I gat wanem rot bilong save God i laikim sampela pasin na bikpela de bilong lotu o nogat?

Wanem sampela lo bilong lotuim God long pasin em i laikim?

[Piksa i karamapim pes olgeta long pes 44]