Ol Mirakel Bilong Jisas i Skulim Yumi
“TUPELA de bihain . . . wanpela man i marit long taun Kana long distrik Galili. . . . Ol i bin singautim tu Jisas wantaim ol disaipel bilong en, na ol tu i kam i stap long dispela marit. Taim wain i pinis, mama bilong Jisas i tokim em olsem, ‘Ol i no gat wain.’ ” Dispela samting i mekim na nau Jisas i kamapim namba wan mirakel bilong em.—Jon 2:1-3.
Dispela liklik hevi olsem wain i pinis, em i liklik samting tasol, na bilong wanem ol i tokim Jisas long en? Wanpela saveman bilong Baibel i tok: ‘Pasin bilong mekim gut long man em i wanpela wok holi long hap bilong Is. Na long ol kaikai bilong marit, ol i mas mekim gutpela pasin moa yet long ol man, na i mas i gat planti kaikai na dring moa. Sapos kaikai na dring i pinis long kaikai bilong marit, famili wantaim tupela nupela marit bai i gat bikpela sem tru.’
Olsem na Jisas i kirap na mekim sampela samting. Em i lukim “6-pela bikpela sospen ston i stap, bilong ol Juda i ken waswas long pasin bilong ol.” Long dispela taim em i pasin bilong ol Juda long waswas long taim ol i laik kaikai, olsem na i mas i gat bikpela wara tru bilong ol manmeri i bin i kam long dispela kaikai. Orait Jisas i tokim ol wokman: “Pulimapim wara long ol sospen.” Jisas i no man bilong bosim kaikai, tasol em i toktok olsem man i gat namba. Baibel i tok: “Dispela wara i kamap pinis olsem wain na man i bosim kaikai i traim.”—Jon 2:6-9; Mak 7:3.
Ating sampela bai ting, ol bung bilong marit i no narapela kain samting—ol i save kamap long olgeta taim; olsem na bilong wanem Jisas i wokim namba wan mirakel long dispela taim? Dispela i soim yumi long sampela pasin na tingting bilong Jisas. Em i singel, na bihain em i tokim ol disaipel olsem: Long sampela samting, pasin bilong i stap singel i winim marit. (Matyu 19:12) Tasol em i bin go long dispela kaikai bilong marit, na dispela i kamapim klia olsem em i no ting marit i samting nogut. Jisas i gat stretpela tingting na em i helpim pasin bilong marit; em i tingim marit i olsem gutpela samting long ai bilong God.—Skelim wantaim Hibru 13:4.
Jisas i no man bilong pes drai na i tambuim skin bilong em long kisim sampela amamas, olsem ol piksa bilong em ol man i wokim na i stap long ol haus lotu. Em i save amamas long toktok wantaim ol man na bung wantaim ol long kaikai samting. (Skelim wantaim Luk 5:29.) Olsem na samting em i mekim i olsem mak na ol disaipel i ken bihainim. Jisas i soim ol, ol i no ken i stap pes drai na mekim olsem man i bihainim stretpela pasin em i no save amamas liklik. Bihain ol Kristen i kisim tok olsem: “Oltaim yupela i mas amamas long Bikpela.” (Filipai 4:4) Long nau ol Kristen i save was gut, nogut ol i lusim bikpela taim long ol pilai na amamas. Ol i save kisim amamas long mekim wok bilong God, tasol ol i bihainim pasin bilong Jisas na long wan wan taim ol i save bung wantaim bilong kisim amamas.
Na yumi ken tingim bel sori bilong Jisas. I no olsem em i mas wokim wanpela mirakel, nogat. I no gat wanpela tok profet i tok em i mas mekim olsem. Tasol mama bilong Jisas i tingting planti na Jisas i pilim tru, na em i tingim tupela nupela marit tu na em i no laik bai ol i bel hevi na sem. Ating dispela i strongim bel bilong yu na yu save, Jisas i save tingim yu tru—na em i tingim ol hevi bilong yu bilong olgeta wan wan de.—Skelim wantaim Hibru 4:14-16.
Long olgeta wan wan sospen ol inap pulimapim olsem 100 lita wara, olsem na dispela mirakel i kamapim planti wain tru! (Jon 2:6) Bilong wanem Jisas i kamapim planti wain olsem? Em i no laik kirapim ol man long dring longlong—God i nolaik tru long dispela pasin. (Efesus 5:18) Jisas i laik mekim gutpela pasin bilong givim ol samting long ol man, olsem God i save mekim. Wain em i wanpela samting ol i save dring long olgeta taim, na hap wain i stap yet, ol i ken mekim wok long en long narapela taim.—Skelim wantaim Matyu 14:14-20; 15:32-37.
Ol Kristen bilong pastaim i bihainim pasin bilong Jisas long givim ol samting long man. (Skelim wantaim Aposel 4:34, 35.) Na Baibel i laik kirapim ol Kristen bilong nau tu long “givim ol samting long ol arapela.” (Luk 6:38) Tasol dispela namba wan mirakel bilong Jisas i makim wanpela samting bai kamap bihain. Long taim bihain God bai “redim bikpela kaikai tru. Bai i gat planti gutpela gutpela abus na nambawan wain tru bilong dring,” na God bai pinisim hangre na bai i no gat hangre moa.—Aisaia 25:6.
Tasol ol mirakel Jisas i bin wokim bilong oraitim sik bilong ol man, dispela inap skulim yumi long wanem samting?
Mekim Gutpela Pasin Long Sabat
“Yu sanap na kisim bet bilong yu na wokabaut.” Jisas i givim dispela tok long wanpela man i gat sik inap 38 yia. Baibel i stori moa olsem: “Orait kwiktaim tumas bodi bilong dispela man em i kamap gutpela. Na em i kisim bet bilong en na i wokabaut i go.” Tasol sampela man i no amamas long dispela samting. Baibel i tok: “Orait ol Juda i stat long mekim nogut long Jisas, long wanem, em i save mekim dispela kain samting long ol de Sabat.”—Jon 5:1-9, 16.
God i bin makim Sabat em taim bilong olgeta man i ken malolo na amamas. (Kisim Bek 20:8-11) Tasol long taim bilong Jisas ol man i bin skruim planti lo moa long Sabat na i putim bikpela hevi long ol man. Wanpela saveman, em Alfred Edersheim, em i tok, long buk bilong ol Juda (Talmud) i gat ol lo bilong sabat, ‘ol i toktok long ol samting i olsem bikpela samting tru bilong lotu, tasol man i gat save na i no longlong, em i no inap tingim ol dispela samting i olsem bikpela samting.’ (Buk The Life and Times of Jesus the Messiah) Ol tisa bilong lotu i putim ol liklik lo nating i bosim olgeta samting long sindaun bilong ol Juda, na ol i mekim olsem ol dispela lo i bikpela samting tru—tasol planti bilong ol dispela lo i no gat liklik hap pasin sori long en. Wanpela lo bilong Sabat i olsem: “Sapos haus i pundaun antap long wanpela man na ol i no save, em i stap aninit long en o nogat, o em i stap laip o i dai pinis, o em i wanpela man bilong ol narapela lain o em i wanpela Israel, ol i ken rausim ol hap bilong haus i bin pundaun antap long em. Sapos ol i lukim em i stap laip yet, ol i ken rausim sampela hap moa; sapos em i dai pinis, ol i mas larim em i stap.”—Wanpela tok bilong Yoma 8:7, The Mishnah, em Herbert Danby i tanim.
Jisas i ting olsem wanem long ol dispela liklik liklik lo nating ol i putim? Taim ol i sutim tok long em long wok bilong oraitim sik em i mekim long Sabat, em i tok: “Papa bilong mi em i save wok oltaim i kam inap long nau. Na mi tu mi save wok.” (Jon 5:17) Jisas i no mekim dispela wok bilong kisim mani. Em i mekim laik bilong God. Lo i larim ol Livai i mekim wok bilong God long Sabat, na olsem tasol i stret Jisas i mekim wok God i givim long em olsem Mesaia, na em i no brukim Lo bilong God.—Matyu 12:5.
Wok Jisas i mekim long de Sabat long oraitim sik, em i kamapim pasin bilong ol saveman na Farisi bilong lain Juda, ol i “strong tumas long bihainim stretpela pasin”—ol i no save isi liklik long ol man. (Saveman 7:16) God i no laik bai ol i mekim gutpela pasin long sampela de tasol long wik; na i no laik bilong God long ol man i mas bihainim nating lo bilong Sabat na ol i no tingim as bilong en. Long Mak 2:27 Jisas i tok: “God i no putim ol manmeri bilong helpim de Sabat. Nogat. Em i putim de Sabat bilong helpim ol manmeri.” Jisas i laikim tumas ol man—em i no laikim ol strongpela lo i daunim ol man.
Olsem na ol Kristen bilong nau i mas was gut, nogut ol i tingting strong tumas long ol lo na ol i no tingim ol narapela samting. Ol wasman insait long kongrigesen i no ken putim planti lo bilong ol yet na putim hevi long ol brata sista. Pasin Jisas i mekim i kirapim yumi long painim rot bilong mekim gutpela pasin long ol narapela. Olsem: Kristen i no ken ting em bai givim tok i tru bilong Baibel long ol man taim em i go long haus bilong ol na autim tok o long taim em i mekim tok long kongrigesen, na long ol narapela taim nogat. Aposel Pita i tok: “Sapos ol i askim yupela long as bilong dispela gutpela samting yupela i wetim i stap, orait yupela i mas redi oltaim long bekim tok long ol.” (1 Pita 3:15) Olsem na yumi ken mekim gutpela pasin long man long olgeta taim.
Skulim Yumi Long Pasin Sori
Stori bilong narapela bikpela mirakel bilong Jisas i stap long Luk 7:11-17. Em i tok, Jisas “i go long wanpela taun, nem bilong en Nain. Ol disaipel bilong en wantaim bikpela lain manmeri ol i go wantaim em.” Long nau tu yumi inap lukim ol ples matmat long nupela ples Nain bilong ol Arap long hap bilong saut-is. “Em i kamap klostu long bikpela dua bilong banis i raunim dispela taun” na “em i bungim sampela man i karim bodi bilong wanpela man i dai pinis i kam ausait long taun. Mama bilong dispela man, em i gat dispela wanpela pikinini tasol. Na man bilong en tu i dai pinis. Na bikpela lain manmeri bilong dispela taun i wokabaut i kam wantaim dispela meri.” Wanpela man, em H. B. Tristram, em i tok, “dispela pasin ol i mekim long planim man, em i no senis”—em i stap yet. Na em i tok: “Mi bin lukim ol meri i go pas long ol lain bilong karim bodi bilong man, na ol meri ol i baim ol bilong krai sori, ol i bringim ol i go. Ol i mekim save tromoi han na pulim gras bilong ol olsem ol i bel hevi tru, na ol i singaut bikmaus na kolim nem bilong man i dai pinis.”—Buk Eastern Customs in Bible Lands.
Namel long dispela bikpela lain i wok long pairap, wanpela meri i wokabaut, em man bilong em i dai pinis; em i krai sori nogut tru. Man bilong em i dai pinis, na olsem Herbert Lockyer i tok long buk bilong em, ‘meri i tingim dispela pikinini em man bilong helpim em na strongim bel bilong em nau long taim em i lapun, tasol nau dispela pikinini bilong em tu i dai, na i no gat wanpela moa bilong helpim na strongim em.’ (All the Miracles of the Bible) Orait Jisas i mekim wanem? Olsem Luk i tok: “Bikpela i lukim dispela meri, na em i sori tru long em, na em i tokim meri olsem, ‘Yu no ken krai.’ ” Wanpela tok Grik i makim dispela tok “sori tru,” insait bilong en i olsem “bel.” Em i olsem “bel sori.” (Vine’s Expository Dictionary of Old and New Testament Words) Tru tumas, Jisas i bel sori stret.
Ating long dispela taim mama bilong Jisas yet em wanpela meri man bilong em i dai pinis, olsem na Jisas i pilim pinis bikpela hevi bilong taim papa bilong em Josep i dai. (Skelim wantaim Jon 19:25-27.) Meri i no gat wok long krai krai long Jisas i helpim em. Kwiktaim Jisas “i go klostu, na i putim han long bet ol i karim bodi long en,” maski Lo Bilong Moses i tok, sapos man i holim bodi bilong man i dai pinis em i no klin. (Namba 19:11) Jisas i gat strong bilong wokim ol mirakel, olsem na em inap tekewe samting i mekim man i no klin! “Jisas i tok: ‘Yangpela man, mi tokim yu, yu kirap.’ Na dispela man i dai pinis, em i kirap na i sindaun, na em i stat long toktok. Na Jisas i givim em bek long mama bilong en.”
Dispela stori i skulim yumi gut long pasin sori, a? Ol Kristen i no ken bihainim hatpela pasin bilong ol man nau long “taim bilong las de,” em ol i no gat sori liklik. (2 Timoti 3:1-5) Tasol 1 Pita 3:8 i tok: “Yupela olgeta i mas i stap wanbel na sori long olgeta man. Yupela i mas laikim tru ol arapela manmeri bilong God na marimari long ol.” Taim wanpela man o meri yumi save long en em i dai o em i gat wanpela bikpela sik, yumi no inap kirapim em bek o oraitim sik bilong em. Tasol yumi inap helpim famili bilong em na strongim bel bilong ol, maski yumi inap mekim liklik samting tasol olsem sindaun wantaim ol na krai wantaim ol.—Rom 12:15.
Dispela mirakel Jisas i wokim bilong kirapim bek yangpela man, dispela tu i makim samting bai kamap bihain, em “olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait”! (Jon 5:28, 29) Long olgeta hap bilong graun, ol manmeri em sampela bilong ol i dai pinis ol bai pilim tru sori bilong Jisas taim ol mama, na papa, na pikinini, na pren, ol bai lusim matmat na bungim ol gen!
Ol Mirakel i Skulim Yumi
Olsem na ol mirakel bilong Jisas i no bilong kamapim strong bilong em tasol. Ol i litimapim nem bilong God, na ol Kristen tu i mas “litimapim nem bilong God.” (Rom 15:6) Ol dispela mirakel i kirapim ol man long mekim gut long ol man, na givim ol samting long ol, na mekim pasin sori. Na bikpela samting tru, ol i olsem piksa bilong ol strongpela wok bai kamap long taim bilong Wan Tausen Yia Bilong Krais i Stap King.
Taim Jisas i stap long graun, em i kamapim planti strongpela wok insait long wanpela hap tasol bilong graun. (Matyu 15:24) Tasol nau em i stap King, na em bai bosim olgeta hap bilong graun! (Song 72:8) Taim Jisas i bin stap long graun, ol manmeri em i oraitim ol na kirapim bek ol, bihain ol i dai. Tasol taim em i bosim graun bihain, sin na dai bai pinis olgeta, na ol manmeri bai i gat rot long i stap oltaim oltaim. (Rom 6:23; KTH 21:3, 4) Tru tumas, ol mirakel bilong Jisas i makim gutpela taim bai kamap bihain. Ol Witnes Bilong Jehova i bin helpim planti milion man long bilip na wetim dispela taim i kamap. Orait, nau yumi ken tingim ol gutpela samting tru ol dispela mirakel bilong Krais Jisas i makim, em klostu nau bai kamap!
[Piksa long pes 7]
Jisas i tanim wara i kamap wain