Sapta 9
Wanem Samting i Painim Ol Famili Bilong Yumi i Dai Pinis?
1. Taim wanpela long famili bilong yu i dai, yu pilim olsem wanem?
“TAIM wanpela long famili bilong yumi i dai pinis, i olsem em i lus na yumi no save em i stap we.” Wanpela yangpela man i tok olsem long taim papa bilong em i dai na bihain liklik mama tu i dai. Bel bilong em i bagarap stret na em i tok em i pilim olsem bel hevi bilong em i laik “daunim” em olgeta. Ating kain hevi olsem i bin painim yu, na yu ting olsem: “Ol famili bilong mi i dai pinis, ol i stap we? Mi inap lukim ol gen o nogat?”
2. I gat wanem ol askim long i dai, em ol man i tingting planti long en?
2 Taim pikinini i dai na papamama i krai sori, sampela i save tokim ol: “God i save kisim ol gutpela plaua i go bilong i stap wantaim em long heven.” Yu ting dispela tok i stret? Ol famili bilong yu i dai pinis, yu ting ol i go i stap long wanpela ples spirit? Yu ting ol i stap gutpela tru, em sampela man i kolim Nevana, na ol i no gat pen moa na olgeta laik bilong ol i pinis? Olsem wanem? I dai i opim dua bilong i go i stap oltaim long paradais? O olsem sampela man i tok, em i bringim ol man i go bilong kisim pen oltaim sapos ol i bin mekim pasin nogut long ai bilong God? Ol man i dai pinis, yu ting ol inap mekim sampela samting long yumi? Bilong kisim stretpela bekim bilong olkain askim olsem, yumi mas lukim Baibel, em Tok Bilong God.
“SPIRIT” I STAP LONG OL MAN EM WANEM SAMTING?
3. Sokratis na Pleto i gat wanem tingting long ol man i dai pinis? Dispela i mekim wanem long ol manmeri long nau?
3 Tupela saveman bilong ol Grik long bipo, em Sokratis na Pleto, ol i ting i gat samting i stap insait long olgeta wan wan man na meri na i no inap i dai—em tewel. Ol i ting, taim man o meri i dai, tewel i stap laip yet na i no save dai. Long nau, long olgeta hap bilong graun, planti milion manmeri i gat wankain tingting. Dispela tingting i mekim na ol i laik helpim ol famili i dai pinis na bai ol i ken i stap gutpela, tasol ol i pret tu long ol man i dai pinis. Tok bilong Baibel long dispela samting i narapela kain olgeta.
4. (a) Buk Stat i tok wanem long man i kisim laip? (b) God i putim wanem samting long skin bilong Adam na em i kisim laip?
4 Bilong save gut wanem samting i painim man i dai pinis, yumi mas save namba wan tumbuna bilong yumi, Adam, em i no gat tewel. Em i gat laip. God i mekim narapela kain wok tru—em i kisim graun na wokim skin bilong Adam na putim “win bilong laip” long en. Stat 2:7 long Baibel i tok: “God, Bikpela i kisim graun na em i wokim man long en. Na em i winim win bilong laip i go insait long nus bilong man, na man i kisim laip.” Adam i mas pulim win bambai em inap i stap laip. Tasol taim God i givim win bilong laip long Adam, em i no winim win tasol i go insait long wetlewa bilong em. Baibel i toktok long “strong bilong laip” i stap long skin bilong olgeta samting i gat laip long graun.—Stat 7:22, NW.
5, 6. (a) “Strong bilong laip” em wanem samting? (b) “Spirit” em Saveman 12:7 i tok long en, taim em i no kirapim skin moa long mekim wok, wanem samting i kamap?
5 Wanem dispela “strong bilong laip”? Em strong God i putim long skin bilong Adam bambai em i ken kamap man i gat laip. Adam i mas pulim win bambai dispela strong i ken i stap long skin bilong em. Tasol wanem dispela “spirit” em Saveman 12:7 i tok long en? Dispela ves i tok, taim man i dai, “bodi bilong [em] bai i kamap graun gen, na spirit God i bin givim [long em] bai i go bek long God.” Taim ol man bilong raitim Baibel i kolim tok “spirit” olsem, ol i no tingim wanpela tewel i lusim bodi taim man i dai na bilong en yet i stap. Nogat.
6 Dispela “spirit” i lusim man taim em i dai, em strong bilong i stap laip em Man bilong wokim yumi i as bilong en. (Song 36:9; Aposel 17:28) Dispela strong bilong laip i save kirapim man o animal long mekim sampela pasin o wok, tasol dispela strong yet i no kisim dispela pasin. Em i wankain olsem paua—em i save kirapim ol masin long mekim wok, tasol paua yet i no save kamap olsem ol dispela masin. Taim man i dai, spirit (strong bilong laip) i no kirapim moa ol liklik hap bilong skin long mekim ol wok, olsem lait i save dai taim ol i pasim paua. Taim strong bilong laip i no strongim moa skin, man i save dai—em i no gat laip moa.—Song 104:29; Song 146:4, NW.
“BAI YU GO BEK GEN LONG GRAUN”
7. Sapos Adam i sakim tok bilong God, wanem samting i mas painim em?
7 Jehova i tokaut klia long sinman Adam long ol samting bai painim em taim em i dai. God i tok: “Bai yu wok hat tru long kisim kaikai bilong yu na tuhat bai i kamap long pes bilong yu. Na bai yu hatwok oltaim inap yu dai na yu go bek long graun. Long wanem, mi bin wokim yu long graun, na bai yu go bek gen long graun.” (Stat 3:19) Adam bai i go bek we? Long graun. God i bin wokim em long graun na em bai go bek gen long graun. Taim Adam i dai bai em i no i stap moa!
8. Ol man wantaim ol animal em ol samting i gat laip, tasol ol man i no winim ol animal long wanem samting?
8 Long dispela samting, i dai bilong ol man i no narapela kain long i dai bilong ol animal. Ol animal tu em ol samting i gat laip, na ol i gat wankain spirit, o strong bilong laip, i kirapim ol long mekim ol samting ol i save mekim. (Stat 1:24) Long Saveman 3:19, 20, saveman Solomon i tok: “Ol abus i save dai, na yumi man tu i save dai. . . . Olsem na [taim ol i dai] laip bilong man i no winim laip bilong abus. Nogat. . . . God i bin kisim graun na wokim tupela, olsem na taim tupela i dai bai tupela i kamap olsem graun gen.” Tasol God i wokim man i kain olsem Em; ol man inap bihainim ol pasin bilong Jehova, na long dispela samting ol man i winim ol animal. (Stat 1:26, 27) Tasol taim ol i dai, ol man na animal wantaim i save go bek long graun.
9. Wanem samting i painim ol man i dai pinis? Ol i go we?
9 Solomon i stori moa long ol samting i painim man i dai pinis na em i tok: “Ol man i gat laip . . . ol i save bai ol i dai. Tasol ol man i dai pinis, ol i no inap save long wanpela samting.” Tru tumas, ol man i dai pinis ol i no save long wanpela samting. Olsem na Solomon i tok: “Sapos yu mekim wanpela wok, orait taitim bun na mekim save tru. Long wanem, bai yu no inap mekim wok o tingting o kisim gutpela tingting na save long ples bilong ol man i dai pinis [tok Hibru, sheʼolʹ], dispela ples bai yu go long en.” (Saveman 9:5, 10) Ol man i dai pinis ol i go we? Long sheʼolʹ, em matmat, em ples bilong ol man i dai pinis. Olsem na ol man yumi laikim tumas na ol i dai pinis, ol i no save long wanpela samting. Ol i no pilim pen na ol i no inap mekim wanpela samting long yumi.
10. Olsem wanem yumi ken tok, taim yumi dai i no olsem yumi mas pinis olgeta?
10 Yu ting yumi olgeta na ol famili bilong yumi i bilong i stap sampela yia tasol na i dai na pinis olgeta? Baibel i no tok olsem. Taim Adam i bikhet, kwiktaim God Jehova i stretim rot bilong tekewe ol samting nogut sin bilong Adam i kamapim. God i no laik bai ol man i dai. (Esekiel 33:11; 2 Pita 3:9) Olsem na taim yumi yet o wanpela long famili bilong yumi i dai, i no olsem yumi mas pinis olgeta.
‘EM I SLIP’
11. Taim pren bilong Jisas, em Lasarus, i dai, Jisas i tok em i mekim wanem?
11 Jehova i laik kisim bek yumi na ol famili bilong yumi i dai pinis bambai dai bilong Adam i no ken i stap moa long yumi. Olsem na Baibel i tok, ol man i dai pinis i olsem ol i slip. Taim Krais Jisas i kisim save olsem pren bilong em Lasarus i dai pinis, em i tokim ol disaipel: “Pren bilong yumi Lasarus i slip. Tasol mi bai go na kirapim em.” Ol disaipel i no kisim gut dispela tok, olsem na Jisas i tok klia long ol olsem: “Lasarus i dai pinis.” (Jon 11:11, 14) Na Jisas i go long Betani, em ples tupela susa bilong Lasarus, em Maria na Marta, i stap na krai sori long brata bilong ol. Taim Jisas i tokim Marta, “Brata bilong yu bai i kirap bek,” Marta i kamapim bilip bilong em olsem God i laik tekewe hevi bilong i dai long ol manmeri. Em i tok: “Mi save, em bai i kirap bek long las de, long dispela taim olgeta manmeri bai i kirap bek.”—Jon 11:23, 24.
12. Brata bilong Marta i dai pinis, tasol Marta i wetim wanem gutpela samting i kamap long ol man i dai pinis?
12 Marta i no kamapim tingting olsem i gat wanpela tewel i stap laip yet long narapela hap. Em i no bilip olsem Lasarus i go pinis long wanpela ples spirit na em i stap laip yet. Marta i bilip long gutpela samting tru bai kamap bihain, em olsem: Ol man i dai pinis bai i kirap bek long matmat. Em i no ting olsem wanpela tewel i lusim bodi bilong Lasarus; em i save, brata bilong em i dai tru na em i no i stap moa. I gat wanpela rot tasol bilong stretim dispela hevi—brata bilong em i mas kirap bek.
13. God i givim wanem strong long Jisas? Olsem wanem em i kamapim dispela strong bilong em?
13 God Jehova i givim strong long Krais Jisas bilong kisim bek ol man. (Hosea 13:14) Olsem na Jisas i bekim tok long Marta olsem: “Kirap bek, em mi yet. Na laip, em mi yet. Na man i bilip long mi, maski sapos em i dai, em bai i stap laip.” (Jon 11:25) Taim Lasarus i stap 4-pela de pinis long matmat na Jisas i go kirapim em bek, Jisas i kamapim dispela strong God i bin givim long em. (Jon 11:38-44) Ol manmeri i lukim Krais Jisas i kirapim bek Lasarus o ol narapela man, ating ol i amamas nogut tru, a?—Mak 5:35-42; Luk 7:12-16.
14. Olsem wanem tok bilong kirap bek na tewel i no inap i dai i narapela narapela kain olgeta?
14 Orait, tingim gut dispela samting: Sapos yumi gat wanpela tewel i stap laip yet taim bodi i dai, i no gat wok long yumi mas kirap bek, o kisim bek laip. Sapos Lasarus i go pinis long heven na em i stap gutpela tru, orait i no gutpela long kirapim em bek long graun na bai em i stap nogut gen, a? Baibel i no tok ol man i gat wanpela tewel i no inap i dai. Baibel i tok man i mekim sin em i mas i dai. (Esekiel 18:4, 20) Olsem na Baibel i makim olsem kirap bek em rot bilong stretim hevi bilong i dai.
“OLGETA MANMERI I STAP LONG MATMAT”
15. (a) Dispela hap tok “kirap bek” i makim wanem samting? (b) Olsem wanem na i no hatwok long God Jehova i kirapim bek ol man?
15 Hap tok ol disaipel bilong Jisas i kolim na yumi tanim olsem “kirap bek,” insait bilong en i olsem “kirap sanap gen.” Dispela i makim man i kirap bek long matmat—olsem em i kisim laip gen na kirap sanap. I no hatwok long God Jehova i kirapim bek man i dai pinis. Olsem wanem na i no hatwok? Long wanem, Jehova em i As bilong laip. Long nau ol man inap kisim nek na piksa bilong man long video na maski bihain dispela man i dai, ol inap putim video na kamapim gen nek na piksa bilong em. Orait, Man bilong wokim yumi em i gat olgeta strong, olsem na em inap tru long tingim olgeta pasin samting bilong olgeta wan wan man na meri na wokim nupela skin na kirapim bek dispela man o meri yet.
16. (a) Jisas i mekim wanem tok promis long ol man i stap long matmat? (b) Wanem samting bai makim olsem man i kirap bek bilong kisim laip o bilong kamap long kot?
16 Krais Jisas i tok: “Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait. Ol manmeri i bin mekim gutpela pasin, ol bai i kirap bek na i stap laip. Na ol manmeri i bin mekim pasin nogut, ol bai i kirap bek na i kamap long kot na kot bai i tok olsem, ol i mas bagarap.” (Jon 5:28, 29) Olgeta manmeri i dai pinis na Jehova i tingim ol, ol bai i kirap bek na skul long ol pasin bilong em. Ol man i kisim save long God na bihainim ol pasin em i laikim, yumi ken tok kirap bek bilong dispela lain i bilong kisim laip. Tasol ol man i kirap bek na ol i sakim ol tok bilong God na wok king bilong em, yumi ken tok ol i kirap bek bilong kamap long kot, olsem kisim strafe.
17. Husat ol bai kirap bek?
17 Yumi save, ol man i stap wokboi bilong Jehova na ol i bin bihainim stretpela pasin, ol bai kirap bek. Dispela bilip olsem ol man i dai pinis bai kirap bek, em i bin helpim planti long sanap strong taim indai i laik painim ol o ol birua i laik kilim ol i dai. Ol i save, God inap givim laip gen long ol. (Matyu 10:28) Tasol planti milion manmeri i dai pinis ol i no bin mekim sampela samting i makim klia olsem ol i laik bihainim ol stretpela lo bilong God. Ol tu bai kirap bek. Aposel Pol i bilip tru olsem dispela em i laik bilong Jehova, na em i tok: “Mi bilip na mi wet long God bai i kirapim bek ol man i dai pinis, em ol stretpela man na ol man nogut wantaim.”—Aposel 24:15.
18. (a) Aposel Jon i kisim wanem driman long ol man i kirap bek? (b) Wanem samting i bagarap long “bikpela hul i gat paia”? Dispela “bikpela hul i gat paia” i makim wanem samting?
18 Aposel Jon i lukim gutpela samting tru olsem driman—em i lukim ol man i kirap bek ol i sanap long pes bilong sia king bilong God. Orait Jon i tok long ol samting em i lukim, olsem: “Solwara i larim olgeta man i dai pinis na i stap long en, ol i go. Na Dai wantaim Ples bilong ol man i dai pinis, tupela tu i larim olgeta man i dai pinis na i stap long han bilong tupela, ol i go. Na man i sindaun long sia king em i lukim pasin olgeta wan wan man i bin mekim, na em i skelim ol long kot bilong en. Na bihain em i tromoi Dai wantaim Ples bilong ol man i dai pinis i go daun long dispela bikpela hul i gat paia. Dispela bikpela hul i gat paia em i namba 2 dai.” (KTH 20:12-14) Olaman! Tingim dispela gutpela samting: Olgeta manmeri i dai pinis na God i tingim ol, God bai kirapim bek ol long matmat (tok Grik, haiʹdes; tok Hibru, sheʼolʹ). (Song 16:10; Aposel 2:31) Na ol inap mekim ol samting bilong kamapim klia olsem ol i laik daun long God na mekim wok bilong em. Bihain “Dai wantaim Ples bilong ol man i dai pinis” bai i go daun long “bikpela hul i gat paia.” Dispela i makim olsem ol bai pinis olgeta. Dispela tok “Gehena” tu i makim dispela samting. (Luk 12:5, NW) Taim olgeta man i kirap bek na lusim pinis matmat, bai i no gat matmat moa. Taim yumi lainim tok bilong Baibel na yumi save God i no save givim pen long ol man, dispela i mekim isi bel bilong yumi!—Jeremaia 7:30, 31.
KIRAP BEK WE?
19. Bilong wanem sampela man bai kirap bek na i go long heven? God bai givim wanem kain bodi long ol?
19 Sampela man na meri, olsem liklik lain tasol, ol bai kirap bek na kisim laip long heven. Ol bai mekim wok king na wok pris wantaim Jisas, na wok wantaim em long pinisim olgeta samting nogut bilong i dai em ol manmeri i bin kisim long namba wan man Adam. (Rom 5:12; KTH 5:9, 10) God bai kisim hamas i go long heven bilong mekim wok king wantaim Krais? Baibel i tok em bai kisim 144,000 tasol. (KTH 7:4; 14:1) Jehova bai givim bodi bilong heven long olgeta wan wan bambai ol inap i stap long heven.—1 Korin 15:35, 38, 42-45; 1 Pita 3:18.
20. Wanem samting bai painim ol manmeri i bihainim tok na ol man i kirap bek tu?
20 Bikpela hap lain bilong olgeta manmeri i dai pinis, bai ol i kirap bek na kisim laip long Paradais long graun. (Song 37:11, 29; Matyu 6:10) Wanpela as bilong kirapim bek sampela bilong i stap long heven em bilong kamapim laik bilong God long graun. Krais Jisas na lain 144,000 long heven bai wok long helpim ol manmeri i bihainim tok bilong God na bai ol i kamap gutpela olgeta, em dispela samting namba wan tumbuna papamama bilong yumi i lusim. Ol bai helpim tu ol man i kirap bek, olsem Jisas i tokim man ol i nilim long pos klostu long em na em i laik i dai: “Bai yu stap wantaim mi long Paradais.”—Luk 23:42, 43, Nupela Testamen na Ol Sam bilong 1978.
21. Wanem samting bai kamap long indai, olsem profet Aisaia na aposel Jon i tok?
21 Taim Paradais i kamap long graun, dispela dai nau i save givim planti hevi long ol man, em bai pinis olgeta. (Rom 8:19-21) Profet Aisaia i tok, God Jehova bai “i pinisim dai tru.” (Aisaia 25:8) Aposel Jon i lukim driman long wanpela taim bai i kamap na bai ol manmeri i bihainim tok bilong God ol i no kisim pen moa o i dai moa. Yes, “God yet bai i stap wantaim ol, na em bai . . . mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—KTH 21:1-4.
22. Yu kisim save pinis olsem ol man i dai pinis bai kirap bek, na dispela i mekim wanem long yu?
22 Ol tok bilong Baibel i kliaim tingting bilong yumi long ol samting i painim ol man i dai pinis. Baibel i tokaut klia olsem: “[Krais] i pinisim pinis olgeta arapela birua, orait em bai i pinisim dai tu.” (1 Korin 15:26) Yumi kisim save olsem ol man i dai pinis bai kirap bek, na dispela i strongim tru bel bilong yumi! Yumi ken amamas tru, long wanem, ol famili bilong yumi i dai pinis na God i tingim ol, ol inap kisim olgeta gutpela samting God i redim bilong ol man i laikim em tumas! (Song 145:16) Ol dispela blesing bai kamap long rot bilong Kingdom bilong God. Tasol wanem taim Kingdom i mas kamap? Orait, nau yumi ken stori long dispela.
TRAIM SAVE BILONG YU
Spirit i stap long skin bilong ol man em wanem samting?
Bai yu stori olsem wanem long ol samting i painim ol man i dai pinis?
Husat ol bai kirap bek?
[Piksa long pes 85]
Jisas i kirapim bek Lasarus long matmat, na olsem tasol planti milion moa ol tu bai kirap bek
[Piksa long pes 86]
Taim God “i pinisim dai tru,” bikpela amamas bai kamap