Samting i Soim Tru Rot Bilong i Stap Amamas

OLGETA man i gat rait long “painim Amamas.” Dispela em tingting bilong ol lain i bin kamapim Dekleresen ov Indipendens Bilong Yunaitet Stets Bilong Amerika. Tasol wok bilong painim wanpela samting i no wankain olsem man i kisim pinis dispela samting. Planti yangpela i laik kisim nem long spot o singsing na musik samting, tasol yu save long planti yangpela i bin kisim dispela biknem ol i gat laik tru long kisim? Wanpela man i gat nem long singsing na em i save long hatwok bilong kisim kain nem olsem, em i tok, “Ating bai yu no inap winim dispela mak.”

Sapos yu ting yu no inap painim amamas, i gat as na yu no ken bel hevi. Sapos yu bihainim stretpela rot bilong painim amamas, yu inap tru long painim. Bilong wanem? Stori i kamap paslain long dispela i toktok long dispela ‘God i as bilong amamas,’ em Jehova. (1 Timoti 1:11) Long Baibel, God i save soim rot bambai wok bilong yu long painim amamas i karim gutpela kaikai. Jehova inap helpim yu long daunim sampela samting i save mekim na planti man i stap bel hevi. Tingim gutpela tok bilong em long mekim gut bel bilong yu taim wanpela long famili i dai.

Taim Wanpela Long Famili i Dai

Yumi save, dai i no gat wanpela gutpela samting bilong en, a? Dai i save tekewe papamama long ol pikinini o ol pikinini long ol papamama. Em i save brukim ol gutpela pren, na bagarapim bel isi bilong ol lain man i save pas gut wantaim. Na taim wanpela long famili i dai, ol i no stap amamas moa​—nau ol i bel hevi tru.

Yu save pinis, dai em i samting nogut tru. Tasol sampela man i no tok olsem; ol i tok dai em i wanpela gutpela samting. Tingim samting i kamap bihain long traipela win na ren ol i kolim Katrina, i kamap long Galf Bilong Meksiko long Ogas 2005. Long bung bilong planim wanpela i bin i dai long en, pris i tok: “Katrina i no bin kilim em i dai. God i kisim em i go long heven.” Na wanpela kuskus bilong haus sik i laik mekim gut bel bilong wanpela meri em mama bilong em i dai, na i tokim meri olsem em i no ken bel hevi, long wanem, God i bin kisim mama bilong em i go long heven. Meri i krai na i tok: “Bilong wanem em i mas kisim mama i go?”

Yumi ken lukim olsem ol dispela tingting kranki long dai i no save mekim gut bel bilong ol man em wanpela bilong famili i dai. Bilong wanem? Long wanem, ol dispela kain tingting i no tru. Na tu, ol dispela tingting i kamapim olsem God i save kisim nating wanpela bilong famili o pren long wanpela rot nogut i save givim bikpela pen. God i save mekim gut bel bilong yumi, tasol ol dispela tingting i mekim na i olsem God em i man nogut i save bagarapim man. Tasol Baibel i kamapim tok i tru long ol samting bilong dai.

Baibel i tok, dai em i wanpela birua, na em i olsem wanpela king i bosim ol man. (Rom 5:17; 1 Korin 15:26) Dai em i wanpela strongpela birua tru, i no gat wanpela man inap sakim, na taim wanpela man i dai em i kamap wanpela bilong planti milion man em dai i bin daunim ol. Dispela tok i tru bilong Baibel i kamapim klia bel hevi yumi save kisim taim wanpela bilong famili i dai. Em i soim olsem i stret yumi bel hevi long kain taim olsem. Tasol yu ting God i save mekim wok long dispela birua​—dai​—bilong kisim ol famili bilong yumi i go long heven? Yumi larim Baibel i bekim dispela askim.

Saveman 9:​4, 5, 10 i tok: “Ol man i dai pinis, ol i no inap save long wanpela samting. . . . Bai yu no inap mekim wok o tingting o kisim gutpela tingting na save long ples bilong ol man i dai pinis [“Sheol,” NW], dispela ples bai yu go long en.” Sheol em i wanem samting? Em matmat ol man i save go long en taim ol i dai. Long matmat ol daiman i no save mekim wanpela wok, ol i no meknais liklik, o pilim wanpela samting, na ol i no inap tingting. I olsem ol i slip i dai.a Olsem na Baibel i kamapim klia olsem, taim wanpela bilong famili i dai, God i no save kisim em i go long heven bilong i stap wantaim em, nogat. Dai i mekim na ol i stap long matmat na i no gat laip moa.

Jisas i strongim dispela tok i tru taim pren bilong em, Lasarus, i dai. Jisas i tok dai i olsem slip. Sapos Lasarus i bin go long heven bilong i stap wantaim God i Gat Olgeta Strong, Jisas i no mekim gutpela pasin taim em i bringim Lasarus i kam bek long graun na bihain em i mas i dai gen. Baibel i tok, long matmat bilong Lasarus, Jisas i singaut strong olsem: “Lasarus, yu kam ausait.” Na Baibel i tok moa: “Orait Lasarus i kirap bek na i kam ausait.” Em nau, Lasarus i stap laip gen. Jisas i save Lasarus i no bin lusim graun. Em i bin stap long matmat na i no gat laip.​—Jon 11:​11-14, 34, 38-44.

Dispela stori long Baibel i helpim yumi long save olsem dai em i no wanpela rot bilong God long kisim ol man long graun i go long heven. Olsem na yumi inap go klostu long God, long wanem, yumi save em i no as bilong bel sori bilong yumi. Na yumi inap bilip olsem em i pilim tru bel hevi na pen em birua bilong yumi, dai, i save givim long yumi. Na tok i tru bilong Baibel long ol man i dai pinis i stap olsem wanem, i kamapim klia olsem ol daiman i no kisim pen long bikpaia o klinpaia​—ol i stap long matmat na i no gat laip moa. Olsem na taim yumi tingim sampela bilong famili i dai pinis, yumi no bel nogut long God o tingting planti long ol i stap we. Na long Baibel Jehova i kamapim sampela tok moa bilong mekim gut bel bilong yumi.

Wetim Gutpela Samting i Kamap

Ol ves bilong Baibel yumi bin skelim i soim olsem pasin bilong bilip na wetim gutpela samting i kamap, em i bikpela samting bilong helpim man i stap amamas tru. Dispela tok “bilip na wetim” em Baibel i kolim i makim olsem man i bilip long gutpela samting bai kamap. Bilong save olsem wanem pasin bilong bilip na wetim gutpela samting i helpim yumi long i stap amamas long nau, yumi ken skelim moa stori bilong Jisas i kirapim bek Lasarus.

I gat olsem tupela as na Jisas i wokim dispela mirakel. Wanpela i olsem: Em i laik pinisim bel hevi bilong Marta, Maria, na ol pren i bel sori. Ol inap long bung na amamas gen wantaim dispela man ol i laikim tumas. Tasol Jisas i kamapim narapela as bilong dispela long Marta, na em i bikpela samting moa. Jisas i tok: “Pastaim mi tokim yu pinis, sapos yu bilip, orait yu bai lukim bikpela strong bilong God.” (Jon 11:40) Wanpela Baibel (The New Testament in Modern English, bilong J. B. Philips) i tanim laspela hap bilong dispela ves olsem “narakain samting tru God inap mekim.” Taim Jisas i givim laip gen long Lasarus, em i soim samting God Jehova inap mekim na em bai mekim long bihain. Em hia sampela tok moa bilong Baibel long dispela “narakain samting tru God inap mekim.”

Long Jon 5:​28, 29, Jisas i tok: “Yupela i no ken tingting planti long dispela tok bilong mi. Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” Dispela i makim olsem olgeta man i dai pinis na i stap long matmat, ol famili bilong yumi tu, ol bai stap laip gen. Aposel 24:15 i stori moa long dispela gutpela samting bai kamap: “God bai i kirapim bek ol man i dai pinis, em ol stretpela man na ol man nogut wantaim.” Em nau, “ol man nogut” tu, em planti ol i no bin save long Jehova na mekim wok bilong em, bihain ol i gat rot long mekim ol pasin God i laikim.

Ol man i dai pinis ol bai kirap bek we? Song 37:29 i tok: “Ol stretpela man bai i kisim graun God i givim ol, na bai ol i stap oltaim long en.” Tingim: Ol famili na pren em dai i mekim na ol i no stap moa wantaim ol narapela, ol bai bung gen hia long graun. Taim yu tingting long bung na poroman gen wantaim ol man em bipo yupela i bin pren gut wantaim, bel bilong yu bai amamas moa yet.

Jehova i Laik Bai Yu Amamas

Yumi stori pinis long tupela rot Jehova inap mekim amamas bilong yu i kamap bikpela moa maski yu gat hevi. Namba wan: Long rot bilong Baibel Jehova i givim save na i soim rot bilong helpim yu long karim ol hevi i painim yu. Baibel i helpim yumi long karim hevi bilong taim wanpela i dai, na tu, em inap helpim yumi long karim hevi bilong mani na hevi bilong sik. Em inap strongim yu long karim hevi bilong ol pasin i no stret ol man i mekim long yu, na hevi bilong ol pait bilong politik. Sapos yu bihainim ol tok bilong Baibel bilong stiaim yu, em bai helpim yu long karim ol narapela hevi bilong yu.

Namba tu: Taim yu stadi long Baibel, bai yu inap bilip na wet long gutpela samting i winim tru olgeta samting ol man bilong dispela graun inap givim long yu. Ol pren na famili bai kirap bek, dispela em wanpela hap bilong dispela samting yumi bilip na wet long en, em Baibel i tok long en. Kamapim Tok Hait 21:​3, 4 i stori moa long dispela: “God yet bai i stap wantaim ol [manmeri] . . . Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” Em nau, olgeta samting i givim bel hevi long yu, liklik taim ol bai pinis olgeta. Ol samting Baibel i tok promis long en bai kamap tru, na yu inap i stap na kisim ol dispela gutpela samting. Taim yu save olsem bihain gutpela taim bai kamap, dispela inap strongim bel bilong yu. Yu ken amamas, long wanem, yu save sapos yu dai bai yu no karim pen inap oltaim oltaim.

Tingim dispela stori: Sampela yia i go pinis, man bilong Maria i karim bikpela pen na isi isi em i dai long sik kensa. Tasol i no longtaim na Maria i sot tru long mani na em wantaim 3-pela pikinini meri ol i mas lusim haus bilong ol. Tupela yia bihain, Maria i kisim sik kensa. Ol dokta i katim em pinis tupela taim, na long olgeta de em i karim bikpela pen. Tasol maski em i gat ol dispela hevi, em i gat stretpela tingting na dispela i kirapim em long strongim bel bilong ol narapela. Olsem wanem em inap i stap amamas?

Maria i tok: “Taim mi gat wanpela hevi, mi no laik tingting tumas long mi yet. Mi no laik tingting olsem: ‘Bilong wanem dispela samting i painim mi? Bilong wanem mi mas karim pen olsem? Bilong wanem dispela sik i kamap long mi?’ Ol dispela kain tingting i save pinisim strong. Mi putim strong bilong mi long mekim wok bilong Jehova na helpim ol man. Dispela i givim amamas long mi.”

Pasin bilong bilip na wetim gutpela samting i helpim Maria olsem wanem? Em i save tingting long taim Jehova bai pinisim sik na ol narapela hevi bilong ol man. Taim em i go long haus sik bilong kisim marasin, em i save kamapim dispela bilip bilong em long ol narapela i gat sik kensa na i bel hevi. Samting Maria i bilip na wet long en i bikpela samting olsem wanem long em? Em i tok: “Planti taim mi save tingim tok bilong Baibel long Hibru 6:​19, em Pol i tok, samting yumi bilip na wet long en i olsem strongpela anka bilong laip bilong yumi. Sapos yu no gat dispela anka, bai yu olsem bot i no gat anka na i drip nabaut long taim bilong bikpela win. Tasol sapos yu pas strong long anka, bai yu stap gut, maski wanem ol bikpela hevi i painim yu.” ‘Laip bilong i stap oltaim God i tok pinis long givim long yumi, na em i no save giaman,’ dispela i helpim Maria long i stap amamas. Em inap helpim yu tu long i stap amamas.​—Taitus 1:2.

Long rot bilong stadi long Baibel, yu inap painim amamas tru, maski yu gat ol hevi. Tasol ating yu laik save, sapos yu kisim save long Baibel, dispela bai helpim yu olsem wanem? Ol Witnes Bilong Jehova bai amamas long helpim yu long kisim ol bekim bilong Baibel long ol samting yu mas save long en bambai yu ken i stap amamas tru. Taim yu wetim truim bilong ol gutpela samting Jehova i tok promis long en, yu inap i stap namel long ol lain Baibel i tok long ol: “Bai . . . ol i amamas moa yet, na dispela amamas bilong ol bai i no inap pinis. Na pen na bel hevi bai i no inap i stap wantaim ol moa.”​—Aisaia 35:10.

[Futnot]

[Piksa long pes 5]

Tok i tru bilong Baibel tasol inap daunim bel hevi

[Piksa long pes 7]

Tok promis bilong Baibel long ol man i dai pinis bai kirap bek em inap helpim yu long i stap amamas