“Karim Planti Kaikai”

“Yupela i mas karim planti kaikai na i stap disaipel bilong mi.”​​—⁠JON 15:⁠8.

 1. (a) Jisas i stori long ol aposel long wanem mak man i mas winim bilong i stap disaipel? (b) Yumi mas givim wanem ol askim long yumi yet?

EM NAIT paslain long em i dai. Jisas i bin lusim bikpela hap taim long toktok gut wantaim ol aposel bilong strongim ol. Em biknait pinis tasol pasin bilong laikim tru ol pren bilong em i kirapim em long toktok yet wantaim ol. Orait nau namel long toktok em i mekim, em i kirapim tingting bilong ol long wanpela mak moa ol i mas winim bilong i stap disaipel bilong em. Em i tok: “Yupela i mas karim planti kaikai na i stap disaipel bilong mi, na long dispela pasin Papa bilong mi i kisim biknem.” (Jon 15:⁠8) Olsem wanem long nau? Yumi save winim dispela mak bilong i stap disaipel? Wanem mining bilong dispela tok “karim planti kaikai”? Bilong painimaut, yumi laik skelim tok ol i bin mekim long dispela nait.

 2. Long nait paslain long em i dai, Jisas i kamapim wanem tok piksa?

² Dispela tok bilong karim planti kaikai em i hap bilong wanpela tok piksa Jisas i bin givim long ol aposel. Em i tok: “Mi yet mi diwai wain tru. Na Papa bilong mi em i papa bilong gaden wain. Olgeta han bilong mi i no save karim kaikai, em Papa i save rausim. Na olgeta han i save karim kaikai, em Papa i save rausim ol lip samting bilong en i nogut, na mekim em i kamap klin, bai em i ken karim planti kaikai. Yupela i kamap klin pinis. Dispela tok mi givim yupela, em i mekim yupela i kamap klin. Yupela i mas pas long mi, na bai mi pas long yupela. Sapos han bilong diwai wain em i no pas long diwai, orait em i no inap karim kaikai. Olsem tasol, sapos yupela i no pas long mi, yupela tu i no inap karim kaikai. ‘Mi yet mi diwai wain, na yupela i han bilong diwai wain. . . . Yupela i mas karim planti kaikai na i stap disaipel bilong mi, na long dispela pasin Papa bilong mi i kisim biknem. Papa i save laikim mi tumas, na long wankain pasin mi bin laikim yupela. Oltaim yupela i mas i stap insait long dispela laikim bilong mi. Sapos yupela i bihainim gut ol lo na tok bilong mi, orait yupela bai i stap insait long laikim bilong mi, olsem mi bin bihainim gut ol lo na tok bilong Papa bilong mi, na mi stap insait long laikim bilong em.’ ”​—⁠Jon 15:​1-10.

 3. Bilong karim kaikai, ol disaipel bilong Jisas i mas mekim wanem?

³ Long dispela tok piksa Papa bilong gaden em Jehova, na diwai wain em Jisas, na ol han bilong diwai wain em ol aposel Jisas i toktok wantaim ol. Sapos ol aposel i wok long “pas long” Jisas, ol bai karim kaikai. Orait nau Jisas i kamapim olsem wanem ol aposel i ken holim dispela pasin bilong pas wantaim em, em i tok: “Sapos yupela i bihainim gut ol lo na tok bilong mi, orait yupela bai i stap insait long laikim bilong mi.” Bihain, aposel Jon i raitim wankain tok long ol wanbilip Kristen.a (1 Jon 2:24) Olsem na taim ol disaipel bilong Krais i bihainim ol lo bilong em, ol i pas wantaim em, na dispela i mekim na ol i karim kaikai. Yumi mas karim wanem kain kaikai?

Em Inap Kamap Bikpela Moa

 4. Jehova i save “rausim” olgeta han bilong diwai wain i no save karim kaikai na dispela i givim wanem save long yumi?

⁴ Long tok piksa bilong diwai wain, Jehova i save “rausim” ol han bilong en i no save karim kaikai. Dispela i givim wanem save long yumi? Olsem: Olgeta disaipel i mas karim kaikai, na tu, ol inap long mekim olsem, maski long sindaun o ol hevi bilong ol. Tru tumas, i no stret wantaim gutpela pasin sori bilong Jehova long “rausim” wanpela disaipel bilong Krais long wanem em i no mekim wanpela wok em i no inap tru long mekim, nogat.​—⁠Song 103:14; Kolosi 3:23; 1 Jon 5:⁠3.

 5. (a) Tok piksa bilong Jisas i mekim wanem tok i soim olsem yumi inap karim planti kaikai? (b) Bai yumi skelim wanem tupela kain kaikai?

⁵ Na tu, tok piksa Jisas i mekim long diwai wain i soim olsem inap long skel bilong yumi wan wan, yumi mas painim rot bilong mekim wok disaipel bilong yumi i kamap gutpela moa. Jisas i tok: “Olgeta han bilong mi i no save karim kaikai, em Papa i save rausim. Na olgeta han i save karim kaikai, em Papa i . . . mekim em i kamap klin, bai em i ken karim planti kaikai.” (Jon 15:⁠2) Klostu long pinis bilong tok piksa, Jisas i kirapim ol disaipel long karim “planti kaikai.” (Ves 8) Wanem insait bilong dispela tok? Yumi ol disaipel i no laik kisim tingting olsem samting yumi mekim em inap long yumi. (KTH 3:​14, 15, 19) Nogat. Yumi laik painim rot long karim planti kaikai moa. Orait, wanem kain kaikai yumi laik wok strong moa long karim? I gat (1) ol gutpela pasin spirit holi i save kamapim na (2) kaikai bilong Kingdom.​—⁠Galesia 5:​22, 23; Matyu 24:⁠14.

Ol Pasin Kristen

 6. Olsem wanem Jisas i bin kamapim strong olsem pasin bilong laikim tru narapela em i bikpela samting?

⁶ Pasin bilong laikim tru narapela em i namba wan pasin long lista bilong ol pasin spirit holi i save kamapim. Spirit holi bilong God i save kamapim pasin bilong laikim tru narapela insait long ol Kristen, long wanem, ol i bihainim lo Jisas i bin givim paslain liklik long em i kamapim tok piksa bilong diwai wain i karim kaikai. Em i tokim ol aposel: “Mi givim nupela lo long yupela olsem, yupela wan wan i mas laikim tru ol arapela.” (Jon 13:34) Long dispela laspela nait bilong i stap bilong em hia long graun, planti taim em i tokim ol aposel olsem ol i mas kamapim pasin bilong laikim tru ol narapela.​—⁠Jon 14:​15, 21, 23, 24; 15:​12, 13, 17.

 7. Olsem wanem aposel Pita i soim olsem pasin bilong karim kaikai i wok wantaim pasin bilong kamapim ol pasin bilong Krais?

⁷ Pita i bin stap long dispela nait, na em i save olsem ol disaipel tru i mas kamapim dispela pasin bilong Krais bilong laikim tru narapela na ol narapela gutpela pasin tu. Planti yia bihain, Pita i strongim ol Kristen long kisim pasin bilong bosim gut laik bilong bodi, pasin bilong i stap pren tru bilong ol narapela, na pasin bilong givim bel bilong ol long ol narapela. Em i tok taim yumi mekim olsem, dispela save “bai i no inap i stap nating. Nogat. Em bai i karim planti kaikai.” (2 Pita 1:​5-8) Maski yumi gat wanem kain sindaun, yumi inap kamapim ol pasin spirit bilong God i save kamapim. Olsem na yumi laik wok strong long kamapim moa yet pasin bilong laikim narapela, pasin bilong helpim ol man, pasin bilong i stap isi, na ol narapela pasin bilong Krais, long wanem, “i no gat wanpela lo i tambuim ol dispela kain pasin.” (Galesia 5:23) Tru tumas, yumi laik “karim planti kaikai.”

Karim Ol Kaikai Bilong Kingdom

 8. (a) Olsem wanem ol pasin spirit holi i save kamapim i save helpim yumi long karim ol kaikai bilong Kingdom? (b) I gat wanem askim yumi mas tingim?

⁸ Ol prut i gat naispela kala na i swit tru i save bilasim diwai. Tasol ol dispela prut i no bilas tasol. Ol prut bilong diwai i gat bikpela wok long kamapim ol nupela diwai long rot bilong pikinini bilong ol. I wankain long ol pasin spirit holi i save kamapim, ol i no bilasim tasol pasin Kristen bilong yumi. Nogat. Ol pasin olsem bilong laikim tru narapela na bilip i save kirapim yumi long tokim ol narapela long ol tok bilong Kingdom i stap long Baibel. Aposel Pol i strongim dispela tok, em i tok: “Mipela tu i bilip [em wanpela bilong ol pasin spirit holi i save kamapim], olsem na mipela tu i save tokaut.” (2 Korin 4:13) Pol i stori moa long dispela samting na em i tok “oltaim maus bilong yumi i mas litimapim nem bilong [God]” na “i stap olsem ofa yumi save givim long [em]”​—⁠dispela i olsem namba tu kain kaikai yumi laik kamapim. (Hibru 13:15) Olsem wanem? Yumi ol man bilong autim tok bilong Kingdom bilong God, yumi gat rot long karim “planti kaikai” moa?

 9. Taim yumi toktok long karim kaikai dispela i makim olsem yumi kamapim ol disaipel o olsem wanem? Stori long dispela.

⁹ Bilong mekim stretpela bekim, pastaim yumi mas save gut olsem kaikai bilong Kingdom i makim wanem samting. Em i stret long ting olsem dispela i makim ol disaipel yumi kamapim o nogat? (Matyu 28:19) Dispela kaikai yumi karim i makim ol man husat yumi bin helpim ol long kamap ol man i lotuim Jehova na ol i baptais pinis na em tasol? Nogat. Sapos olsem, ol gutpela Witnes i save stap gut na autim tok inap planti yia long ol hap we ol man i no save harim tok tumas bai stap bel hevi stret. Sapos kaikai bilong Kingdom yumi karim em ol nupela disaipel tasol, ol Witnes i save wok hat long ol kain ples bai stap olsem ol dispela han diwai i no karim kaikai long tok piksa bilong Jisas! Tasol i no olsem. Orait nambawan kaikai bilong Kingdom em wok autim tok bilong yumi i karim, em wanem samting?

Karim Kaikai—⁠Tromoi Pikinini Kaikai Bilong Kingdom

10. Olsem wanem tok piksa bilong Jisas long man i planim pikinini wit, na ol narapela narapela kain graun, i kamapim klia kaikai bilong Kingdom em i wanem samting na em i no wanem samting?

¹⁰ Tok piksa bilong Jisas long man i tromoi pikinini wit na ol narapela narapela kain graun i bekim dispela askim​—⁠em wanpela bekim i strongim bel bilong ol man i autim tok long ol hap we ol man i no harim tok tumas. Jisas i tok pikinini kaikai em i tok bilong Kingdom i stap long Baibel, na graun i makim bel bilong man. Sampela pikinini wit “i pundaun long gutpela graun, na wit i kamap, na i karim planti kaikai moa.” (Luk 8:⁠8) Wanem kaikai? Taim wanpela stik wit i kamap bikpela, em i save karim kaikai. Em i no kamapim nupela liklik stik wit, nogat. Em i kamapim ol pikinini wit. Wanpela Kristen i wankain tu, em i karim kaikai, i no olsem ol nupela disaipel, nogat, em ol nupela pikinini kaikai bilong Kingdom.

11. Kaikai bilong Kingdom i makim wanem samting?

¹¹ Olsem na kaikai yumi stori long en i no ol nupela disaipel na i no ol gutpela pasin Kristen. Pikinini kaikai ol i tromoi em i tok bilong Kingdom, olsem na kaikai dispela i karim i mas dispela tok bilong Kingdom yet ol i autim planti taim moa. Kaikai ol i karim i makim ol tok ol i mekim bilong autim tok bilong Kingdom. (Matyu 24:14) Olsem wanem? Yumi inap karim kain kaikai bilong Kingdom maski yumi gat wanem kain sindaun? Yes, yumi inap! Long dispela tok piksa Jisas i kamapim olsem wanem yumi inap mekim.

Givim Nambawan Samting Bilong Givim Biknem Long God

12. Olsem wanem? Olgeta Kristen inap karim kaikai bilong Kingdom? Stori long dispela.

¹² Jisas i tok: “Dispela pikinini wit i pundaun long gutpela graun, em i . . . save karim kaikai, inap 100 o 60 o 30.” (Matyu 13:23) Hamas kaikai ol pikinini wit i karim bai i no wankain. I wankain long wok yumi mekim long autim gutnius, long wanem, yumi gat ol narapela narapela sindaun, na tok bilong Jisas i soim olsem em i luksave long dispela. Sampela i gat rot bilong autim tok planti taim winim narapela, na sampela skin bilong ol i strong moa, winim narapela. Olsem na wok yumi mekim bai bikpela moa o liklik moa long wok sampela narapela i mekim, tasol sapos yumi traim bes bilong yumi, Jehova i save amamas. (Galesia 6:⁠4) Maski lapun o sik i mekim na yumi no inap mekim bikpela wok long autim tok, gutpela Papa bilong yumi, Jehova, i save tingim yumi olsem man i save “karim planti kaikai.” Bilong wanem na em i ting olsem? Long wanem, yumi givim em olgeta samting bilong yumi​—⁠yumi givim bel olgeta long mekim wok bilong em.b​—⁠Mak 12:​43, 44; Luk 10:⁠27.

13. (a) Wanem nambawan as na yumi laik “i go” yet na karim kaikai bilong Kingdom? (b) Wanem samting bai helpim yumi long wok yet long karim kaikai long ol hap we wan wan man tasol i laik harim tok? (Lukim blok long pes 21.)

¹³ Maski yumi karim hamas kaikai bilong Kingdom, taim yumi tingim as na yumi mekim olsem, dispela bai kirapim yumi long wok yet long “karim kaikai.” (Jon 15:16) Jisas i kolim nambawan as bilong mekim: “Yupela i mas karim planti kaikai na i stap disaipel bilong mi, na long dispela pasin Papa bilong mi i kisim biknem.” (Jon 15:⁠8) Tru tumas, wok autim tok bilong yumi i save litimapim nem bilong Jehova long ai bilong olgeta man. (Song 109:30) Wanpela Witnes i stap gut long God, em i gat 75 krismas samting, nem bilong em Honor, i tok: “Maski yumi stap long wanpela hap we planti man i no laik harim tok, em i wanpela gutpela wok tru long i stap mausman bilong God Antap Tru.” Claudio em wanpela Witnes i bin givim bel long autim tok kirap long 1974 na i kam. Taim ol i askim em wanem as na em i autim tok yet, maski i gat wan wan man tasol i harim tok, em i kolim tok bilong Jisas long Jon 4:34: “God i bin salim mi na mi kam, na kaikai bilong mi, em long bihainim laik bilong em na long pinisim wok em i bin givim mi.” Claudio i tok: “Wankain olsem Jisas, mi no laik kirapim tasol wok bilong autim tok bilong Kingdom, nogat, mi laik pinisim dispela wok.” (Jon 17:⁠4) Ol Witnes Bilong Jehova long olgeta hap i gat wankain tingting.​​—⁠Lukim blok “Rot Bilong ‘Stap Strong na Karim Kaikai i Stap,’ ” long pes 21.

Autim Tok na Skulim Ol Man

14. (a) Jon Bilong Baptais na Jisas i bin mekim wanem tupela wok? (b) Bai yu tok wanem long wok bilong ol Kristen long nau?

¹⁴ Namba wan man bilong autim tok bilong Kingdom ol Gutnius i stori long en, em Jon Bilong Baptais. (Matyu 3:​1, 2; Luk 3:18) Namba wan wok bilong em, em bilong “autim tok,” na em i mekim dispela wok wantaim strongpela bilip na em i laik “bai olgeta manmeri i ken harim tok bilong em, na ol i ken bilip.” (Jon 1:​6, 7) Sampela man Jon i bin autim tok long ol, ol i kamap disaipel bilong Krais. (Jon 1:​35-37) Olsem na Jon em i man bilong autim tok, na tu, em i man bilong kamapim disaipel. Jisas tu em i man bilong autim tok na em i wanpela tisa. (Matyu 4:23; 11:⁠1) Olsem na yumi no kirap nogut olsem, Jisas i bin tokim ol disaipel bilong em long autim tok bilong Kingdom na helpim ol man i harim tok long kamap disaipel bilong em. (Matyu 28:​19, 20) Olsem na wok bilong yumi long nau em bilong autim tok na bilong skulim ol man.

15. Olsem wanem pasin bilong ol man long harim tok long taim bilong Pol na long nau i wankain?

¹⁵ Ol man i bin stap long taim bilong Pol na ol i harim em i autim tok na skulim ol man, sampela “i ting dispela tok Pol i mekim, em i stret. Tasol sampela i no bilipim tok bilong en.” (Aposel 28:24) Long nau em i wankain. Sori tru, klostu olgeta pikinini kaikai bilong Kingdom i save pundaun long ol graun nogut. Tasol sampela i save pundaun long gutpela graun, putim rop, na kru i kamap, olsem Jisas i bin tok profet. Long olgeta wan wan wik i gat moa long 5,000 manmeri bilong olgeta hap i kamap disaipel tru bilong Krais! Ol dispela nupela disaipel ‘i ting dispela tok em i stret,’ maski klostu olgeta narapela manmeri i no ting olsem. Wanem samting i mekim na bel bilong ol i laikim tok bilong Kingdom? Planti taim em pasin bilong ol Witnes long tingim tru ol​—⁠i olsem ol i givim wara long pikinini kaikai ol i planim nau tasol. (1 Korin 3:⁠6) Planti kain samting olsem i bin kamap, tasol bai yumi skelim tupela tasol.

Pasin Bilong Tingim Man—⁠Em Bikpela Helpim

16, 17. Bilong wanem em i bikpela samting long tingim tru ol man yumi bungim taim yumi autim tok?

¹⁶ Karolien, wanpela yangpela Witnes long Beljam, i bin autim tok long wanpela lapun meri i no laik harim tok bilong Kingdom. Meri i pasim banis long han bilong em, olsem na Karolien na poroman bilong em ol i tok ol i laik helpim em, tasol meri i tok nogat. Tupela de bihain dispela tupela Witnes i go bek long haus bilong lapun meri na ol i askim em olsem em i stap orait. Karolien i tok: “Dispela em i bikpela helpim tru. Meri i kirap nogut long save olsem mipela i tingim tru em yet. Em i singautim mipela i go insait long haus na mipela kirapim Baibel-stadi wantaim em.”

¹⁷ Sandi, wanpela Witnes long Amerika, em tu i save mekim ol samting bilong tingim ol man em i autim tok long ol. Em i save lukim hap bilong niuspepa we i stori long husat ol mama i karim nupela pikinini, na em i save kisim wanpela Buk Baibel Stori Bilong Mi na i go lukim ol.c Klostu olgeta taim mama i stap long haus na em i amamas long ol man i lukim bebi bilong em, olsem na planti taim rot i op long toktok wantaim. Sandi i tok: “Mi bai stori wantaim papamama olsem em i bikpela samting long pas gut wantaim nupela bebi long rot bilong ritim ol tok long em. Bihain bai mi stori long hatwok bilong ol papamama long mekim bikpela long ol pikinini long nau.” Long dispela rot, i no longtaim i go pinis, wanpela mama na 6-pela pikinini bilong em ol i kirap lotuim Jehova. Pasin bilong painim kain kain rot bilong autim tok na tingim ol man i ken opim rot long yumi long kisim wankain amamas long wok autim tok yumi mekim.

18. (a) Olsem wanem yumi ken winim mak bilong “karim planti kaikai”? (b) Wanem 3-pela mak man i mas winim bilong i stap disaipel, em Gutnius Jon i Raitim i kolim, em yumi gat strongpela laik long winim?

¹⁸ Yumi amamas long save olsem mak yumi mas winim long “karim planti kaikai” em i wanpela mak yumi ken winim! Maski yumi yangpela o lapun, yumi gat strongpela skin o yumi gat sik, yumi autim tok long wanpela hap we planti man i harim tok o i no tumas, yumi olgeta i ken karim planti kaikai. Yumi ken mekim olsem wanem? Long rot bilong kamapim moa yet ol pasin em spirit holi i as bilong en na long rot bilong autim tok bilong Kingdom bilong God inap tru long skel bilong yumi. Taim yumi mekim olsem yumi mas wok strong long ‘holim strong tok bilong Jisas’ na “laikim tru ol arapela man bilong lain bilong [yumi].” Yes, taim yumi winim dispela 3-pela bikpela mak bilong i stap disaipel, em Gutnius Jon i Raitim i kamapim, dispela i kamapim long ples klia olsem yumi “stap ol disaipel tru bilong [Krais].”​—⁠Jon 8:31; 13:⁠35.

[Ol Futnot]

Ol Askim Bilong Riviu

• Wanem kain kaikai yumi mas karim moa moa yet?

• Olsem wanem na yumi ken winim dispela mak bilong “karim planti kaikai”?

• Yumi stori pinis long wanem 3-pela bikpela mak man i mas winim bilong kamap disaipel, olsem Gutnius Jon i Raitim i kamapim?

[Blok/Piksa long pes 21]

ROT BILONG ‘STAP STRONG NA KARIM KAIKAI I STAP’

WANEM samting i save helpim yu long stap gut long wok bilong autim tok long ol hap we ol man i no amamas tumas long harim tok? Sampela gutpela bekim bilong dispela askim i stap daunbilo.

“Mi save olsem Jisas i save sapotim tru dispela wok na dispela i kirapim mi long pilim olsem sampela man bai harim tok na mi mas mekim yet dispela wok, maski ol man i harim tok o nogat.”​​—⁠Harry, 72 krismas; baptais 1946.

“Oltaim tok bilong 2 Korin 2:17 i save strongim mi. Em i tok olsem yumi mekim wok autim tok ‘wantaim Krais, na long ai bilong God.’ Olsem na taim mi autim tok, mi amamas long i stap wantaim ol nambawan pren bilong mi.”​​—⁠Claudio, 43 krismas; baptais 1974.

“Tru tru, mi save hatwok long mekim wok autim tok. Tasol tok bilong Song 18:19 i tru long mi: ‘God, . . . sapos yu strongim mi, bai mi inap kalapim bikpela banis bilong taun.’ ”​​—⁠Gerard, 79 krismas; baptais 1955.

“Sapos mi inap ritim wanpela skripsa tasol taim mi autim tok, mi amamas olsem tok bilong Baibel i bin skelim bel bilong wanpela man.”​​—⁠Eleanor, 26 krismas; baptais 1989.

“Mi wok long traim ol narapela narapela kirap bilong tok. I gat planti tru na mi no inap traim olgeta insait long hap taim mi gat yet bilong i stap laip.”​​—⁠Paul, 79 krismas; baptais 1940.

“Taim ol man i no laik harim tok, mi no kisim tingting olsem ol i no laikim mi. Mi save stap isi na mekim pasin pren wantaim ol na toktok wantaim ol na putim yau long tingting ol i kamapim.”​​—⁠Daniel, 75 krismas; baptais 1946.

“Mi bin bungim sampela Witnes ol i baptais nupela na ol i tok wok autim tok mi bin mekim i bin helpim ol long kamap wanpela Witnes. Mi no bin save, tasol bihain long mi autim tok long ol, narapela Witnes i stadi wantaim ol na helpim ol long kamap strong. Mi pilim amamas long save olsem yumi stap olsem wanpela tim bilong wok autim tok.”​​—⁠Joan, 66 krismas; baptais 1954.

Wanem samting i save helpim yu long ‘stap strong na karim kaikai i stap’?​​—⁠Luk 8:15.

[Ol Piksa long pes 20]

Taim yumi kamapim ol pasin spirit holi i as bilong en na yumi autim tok bilong Kingdom, yumi karim planti kaikai

[Piksa long pes 23]

Jisas i gat wanem tingting taim em i tokim ol aposel: “Yupela i mas karim planti kaikai”?