I Gat Wanem As na Yumi Mas Kisim Baptais?
“Yupela i mas i go mekim olgeta lain manmeri i kamap disaipel bilong mi. Na yupela baptaisim ol.”—MATYU 28:19.
1, 2. (a) Olsem wanem na sampela i bin kisim baptais? (b) Wanem ol askim i kamap long pasin bilong baptais?
KING CHARLEMAGNE bilong lain Frank em i daunim ol Sakson long pait na long 775-777 C.E. em i subim ol long kisim baptais. Saveman John Lord i tok: ‘Em i subim ol long kamap Kristen.’ Taim King bilong Rasia, Vladimir Namba 1, em i maritim pinis wanpela meri bilong lotu Grik Otodoks long 987 C.E., em tu i subim ol man em i bosim long kamap “Kristen.” Em i putim tok long ol i mas kisim baptais—sapos nogat, orait ol i mas i dai!
2 Olsem wanem? Ol dispela kain baptais i stret? Kain baptais olsem inap helpim tru man? I gat sampela mak ol man i mas winim pastaim o olsem wanem?
Baptais—Kisim Olsem Wanem?
3, 4. Taim man i kisim baptais Kristen, bilong wanem pasin bilong tromoi liklik wara long skin o kapsaitim long het i no stret?
3 Taim Charlemagne na Vladimir Namba 1 i subim ol man long kisim baptais, tupela king ya i mekim pasin i no stret wantaim Tok Bilong God. Kain baptais we ol i tromoi liklik wara long skin o kapsaitim hap wara long het, em i no save helpim man liklik. Na baptais we ol i putim man insait long wara, dispela tu i no inap helpim man sapos em i no bin lain long ol tok i tru bilong Baibel.
4 Tingim samting i bin kamap taim Jisas bilong Nasaret i go long Jon Bilong Baptais long 29 C.E. Jon i wok long baptaisim ol man long wara Jordan. Long laik bilong ol yet ol i bin kam long em bilong kisim baptais. Olsem wanem? Ol i sanap tasol long wara Jordan na Jon i kisim liklik wara na kapsaitim long het bilong ol o tromoi long ol? Orait wanem samting i kamap taim Jon i baptaisim Jisas? Matyu i tok, taim Jisas i kisim baptais pinis, “kwiktaim em i lusim wara na i kam antap.” (Matyu 3:16) Em i bin go insait long wara—em wara Jordan. Na wanpela man bilong Itiopia, em tu i bin go insait long “wanpela wara” na kisim baptais. I mas i gat ol bikpela wara olsem, long wanem, Jisas na ol disaipel i bin kisim baptais long pasin bilong go insait olgeta long wara.—Aposel 8:36.
5. Ol Kristen bilong pastaim i save baptaisim ol man olsem wanem?
5 Insait bilong ol tok Grik ol i tanim olsem “baptais” o “baptaisim” i olsem: putim i go insait long wara. Wanpela buk (Smith’s Bible Dictionary) i tok: “Mining tru bilong tok baptais i olsem putim i go insait olgeta.” Olsem na sampela Baibel i tok long Jon olsem, “Jon, Man Bilong Putim Narapela Insait Long Wara.” (Matyu 3:1, Rotherham) Buk bilong Augustus Neander i tok: “Pastaim ol i baptaisim man long pasin bilong putim em i go insait long wara.” (History of the Christian Religion and Church, During the Three First Centuries) Narapela buk i tok: “Ol Kristen bilong pastaim i save kisim baptais long wanem wanem hap i gat wara na ol i go insait olgeta long wara.” (Larousse du XXe Siècle [Paris, 1928]) Na narapela buk i tok: “Pasin bilong Sios bilong pastaim long givim Baptais long man i olsem: Ol i putim em i go daun insait long wara.” (New Catholic Encyclopedia [1967, Volium 2, pes 56]) Olsem na long nau, taim ol Witnes Bilong Jehova i kisim baptais, ol i kisim long laik bilong ol yet, long pasin bilong go insait olgeta long wara.
Nupela As Bilong Kisim Baptais
6, 7. (a) I gat wanem as na Jon i givim baptais long ol man? (b) Wanem samting i nupela long baptais ol disaipel bilong Jisas i kisim?
6 Jon i baptaisim ol man, tasol samting dispela i makim em i narapela kain long baptais ol disaipel bilong Jisas i givim long ol man. (Jon 4:1, 2) Baptais Jon i givim long ol man i makim olsem ol i hevi long rong ol i bin mekim long Lo na ol i tanim bel.a (Luk 3:3) Tasol baptais ol disaipel bilong Jisas i kisim em i makim wanpela nupela samting. Long Pentikos 33 C.E., aposel Pita i tok: “Yupela olgeta wan wan i mas tanim bel na kisim baptais long nem bilong Jisas Krais, na God bai i lusim ol sin bilong yupela.” (Aposel 2:37-41) Tru, Pita i toktok long ol Juda wantaim ol arapela man i bihainim lotu Juda, tasol baptais em i toktok long en i no bilong makim olsem man i hevi long rong em i bin mekim long Lo, na em i no laik tok olsem baptais long nem bilong Jisas i makim olsem ol sin i tekewe.—Aposel 2:11.
7 Long dispela taim, Pita i mekim wok long namba wan bilong “ol ki bilong kingdom.” Bilong mekim wanem wok? Bilong helpim ol man i harim tok bilong em long save olsem ol i gat rot long go insait long Kingdom bilong heven. (Matyu 16:19) Ol Juda i bin sakim Jisas—ol i no bilip olsem em i Mesaia—olsem na pasin bilong tanim bel na bilip long em, dispela em i wanpela nupela samting ol i mas mekim bambai God i ken lusim ol rong bilong ol. Ol inap kamapim long ai bilong ol man olsem ol i bilip long Jisas, taim ol i kisim baptais long wara long nem bilong Jisas Krais. Long dispela rot ol i kamapim olsem ol i dediket pinis long God long rot bilong Krais. Olgeta man long nau i laik bai God i ken orait long ol, ol tu i mas bilip long Jisas, na dediket tru long God Jehova, na kisim baptais Kristen bilong makim olsem ol i dediket pinis long God Antap Tru.
Kisim Stretpela Save
8. Bilong wanem baptais Kristen i no samting bilong olgeta man?
8 Baptais Kristen i no bilong ol man i no winim mak. Jisas i tokim ol disaipel: “Go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” (Matyu 28:19, 20) Taim ol i no baptais yet, ol i mas ‘lain long bihainim olgeta tok em Jisas i bin givim long ol disaipel.’ Olsem na sapos man i no bilip na em i no gat stretpela save long Tok Bilong God na nau narapela i subim em long kisim baptais, orait dispela baptais i no ken helpim dispela man, na kain baptais olsem i no stret wantaim dispela wok Jisas i bin givim long ol disaipel tru bilong em.—Hibru 11:6.
9. Wanem insait bilong dispela tok, kisim baptais “long nem bilong Papa”?
9 Wanem insait bilong dispela tok, kisim baptais “long nem bilong Papa”? I olsem: Man i laik kisim baptais, em i mas save long namba na strong bilong Papa bilong yumi long heven. Olsem na em i mas bilip tru olsem God Jehova em i Man bilong wokim yumi, na em i ‘God Antap Tru na i bosim olgeta hap bilong graun,’ na em i King bilong heven na graun.—Song 83:18; Aisaia 40:28; Aposel 4:24.
10. Taim man i kisim baptais ‘long nem bilong Pikinini,’ dispela i makim wanem samting?
10 Taim man i kisim baptais ‘long nem bilong Pikinini,’ dispela i makim olsem em i save long namba na strong bilong Jisas, em i dispela wanpela pikinini tasol bilong God. (1 Jon 4:9) Ol man i winim mak bilong kisim baptais ol i bilip tru olsem Jisas em dispela man God i bin givim bilong “baim bek planti manmeri.” (Matyu 20:28; 1 Timoti 2:5, 6) Ol man i laik kisim baptais ol i mas bilip tu olsem God i bin litimapim Pikinini bilong em na mekim em i “stap antap tru.”—Filipai 2:8-11; KTH 19:16.
11. Taim man i kisim baptais ‘long nem bilong spirit holi,’ dispela i makim wanem samting?
11 Taim man i kisim baptais ‘long nem bilong spirit holi,’ dispela i makim wanem samting? Dispela i makim olsem ol man i laik kisim baptais ol i save olsem spirit holi em strong bilong Jehova na Em i mekim kain kain wok long en i stret wantaim laik bilong Em. (Stat 1:2; 2 Samuel 23:1, 2; 2 Pita 1:21) Ol man i winim mak bilong kisim baptais ol i bilip olsem spirit holi i helpim ol long kisim gut “olgeta tingting hait bilong God,” na autim tok bilong Kingdom, na kamapim ol pasin em spirit i kamapim—‘laikim tru ol arapela, amamas, bel isi, no belhat kwik, helpim ol man, mekim gutpela pasin long ol, wokabaut stret oltaim, stap isi, daunim laik bilong olpela bel.’—1 Korin 2:10; Galesia 5:22, 23; Joel 2:28, 29.
Tanim Bel na Baut
12. Olsem wanem baptais Kristen em i samting bilong tanim bel?
12 Baptais em i wanpela mak God i orait long en na i kamapim olsem man i tanim bel pinis. Baptais bilong Krais tasol i no samting bilong tanim bel, long wanem, em i no gat sin. Taim yumi tanim bel, yumi hevi long sampela samting yumi bin mekim o yumi no bin mekim. Ol Juda long taim bilong ol aposel em ol i laik mekim pasin God i laikim, ol i mas hevi long ol rong ol i bin mekim long Krais na tanim bel. (Aposel 3:11-19) Sampela bilipman long Korin em ol i no bilong lain Juda, ol i tanim bel na givim baksait long pasin pamuk, lotuim god giaman, stil, na sampela bikpela rong moa. Ol i tanim bel na i olsem “God i wasim” ol long blut bilong Jisas na ol i kamap klin; na God i makim ol i kamap “lain manmeri bilong em stret” bilong ol i ken mekim wok bilong em; na long nem bilong Krais na strong bilong spirit holi, God i mekim ol i “kamap stretpela manmeri long ai bilong en.” (1 Korin 6:9-11) Em nau, pasin bilong tanim bel em wanpela bikpela samting man i mas mekim bambai bel bilong em i ken kamap klin long ai bilong God na asua bilong sin i no bagarapim moa bel bilong em.—1 Pita 3:21.
13. Man i kisim baptais em i baut olsem wanem?
13 Taim yumi laik kisim baptais na kamap wanpela Witnes Bilong Jehova, pastaim yumi mas baut. Pasin bilong baut em samting man i mekim long laik bilong em yet. Kain man olsem i bin pasim tok long bel long bihainim Krais Jisas. Taim em i baut, em i sakim pasin nogut bipo em i bihainim na em i tingting strong long mekim ol pasin i stret long ai bilong God. Em i baut na i go long God. (1 King 8:33, 34) Em i mas mekim ‘pasin i soim olsem em i tanim bel pinis.’ (Aposel 26:20) Pasin bilong baut i olsem yumi mas lusim lotu giaman, na mekim pasin i stret wantaim ol lo bilong God, na lotu long Jehova wanpela tasol. (Lo 30:2, 8-10; 1 Samuel 7:3) Taim yumi baut, yumi senisim sampela tingting na pasin na laik bilong yumi. (Esekiel 18:31) Yumi baut taim yumi lusim ol pasin nogut na kamap olsem nupela man.—Aposel 3:19; Efesus 4:20-24; Kolosi 3:5-14.
Dediket
14. Dediket bilong ol disaipel bilong Jisas i makim wanem samting?
14 Paslain long ol disaipel bilong Jisas i kisim baptais, ol i mas dediket long God long bel olgeta. Dediket i olsem man i givim em yet long God bilong mekim wok bilong em. Dispela em i bikpela samting tru, olsem na taim yumi tingting pinis long lotuim Jehova wanpela tasol na mekim wok bilong em oltaim oltaim, yumi mas beten tokim em long dispela. (Lo 5:9) Yumi no dediket long wanpela wok o long wanpela man. Yumi dediket long God yet.
15. I gat wanem as na ol man bilong kisim baptais ol i go insait long wara?
15 Taim yumi dediket long God long rot bilong Krais, yumi tokaut olsem yumi gat strongpela tingting long mekim wok bilong God olsem Baibel i kamapim. Bilong makim dispela dediket, ol man bilong kisim baptais ol i go insait long wara, olsem Jisas i bin baptais long wara Jordan bilong makim olsem em i givim em yet long God. (Matyu 3:13) Na tingim: Long dispela bikpela de tru, Jisas i beten i stap.—Luk 3:21, 22.
16. Taim yumi lukim ol man i kisim baptais, yumi ken kamapim amamas bilong yumi long wanem pasin i stret?
16 Baptais bilong Jisas i wanpela bikpela samting tru, tasol em i samting bilong amamas tu. Na i wankain long baptais Kristen long nau. Taim yumi lukim ol man i kisim baptais bilong makim olsem ol i dediket pinis long God, yumi ken kamapim amamas bilong yumi long rot bilong paitim han na mekim gutpela tok amamas long ol. Tasol i no stret yumi singaut bikmaus o wisil samting, long wanem, yumi mas tingim baptais i olsem wanpela samting holi. Yumi mas kamapim amamas bilong yumi long pasin i stret.
17, 18. Wanem samting i helpim ol elda long save, ol man i winim mak bilong kisim baptais o nogat?
17 Ol Witnes Bilong Jehova i no save bihainim pasin bilong ol lain i save tromoi liklik wara long ol bebi o subim ol man i no gat save long Baibel long kisim baptais, nogat. Ol i no save subim ol man long kisim baptais. Na ol i no baptaisim ol man i no winim ol mak em Baibel i kolim. Taim man i no baptais yet na i laik kamap man bilong autim gutnius, pastaim ol elda Kristen i mas save gut olsem em i kisim gut ol as tok bilong Baibel, na bihainim ol dispela tok, na tok yes long dispela askim, “Yu gat laik tru long kamap wanpela Witnes Bilong Jehova?”
18 Taim ol man i givim bel long wok autim tok bilong Kingdom na ol i tokaut olsem ol i laik baptais, orait nau ol elda Kristen i toktok wantaim ol bambai ol i ken save ol i bilipman i dediket pinis long Jehova na ol i winim ol mak God i putim bilong kisim baptais. (Aposel 4:4; 18:8) Ol i bekim winim 100 askim bilong ol tok bilong Baibel, na bekim ol i givim i helpim ol elda long save olsem ol i winim ol mak bilong Baibel bilong kisim baptais o nogat. Sampela i no winim mak, olsem na ol elda i no orait long ol i ken kisim baptais.
Sampela Samting i Pasim Yu?
19. Olsem Jon 6:44 i tok, husat ol bai mekim wok king wantaim Jisas?
19 Planti man ol narapela i bin subim ol long kisim baptais, ating ol i bin kisim tok olsem taim ol i dai, ol bai go long heven. Tasol Jisas i toktok long ol man i bihainim pasin bilong em olsem: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi.” (Jon 6:44) Jehova i bin bringim 144,000 i kam long Krais na ol bai mekim wok king wantaim em long Kingdom long heven. Baptais ol man i bin subim ol narapela long kisim, dispela i no bin helpim ol long kamap stretpela manmeri bilong God inap long ol i ken kisim dispela gutpela wok long heven, nogat.—Rom 8:14-17; 2 Tesalonaika 2:13; KTH 14:1.
20. Ating wanem samting bai helpim sampela i no baptais yet?
20 Kirap long 1935 samting, bikpela lain manmeri i laik winim taim bilong “bikpela hevi” na stap oltaim long graun, ol i bin go insait long lain “arapela sipsip” bilong Jisas. (KTH 7:9, 14; Jon 10:16) Ol i winim mak long kisim baptais, long wanem, long wokabaut bilong ol, ol i bihainim Tok Bilong God na ol i laikim tru God long ‘bel na strong na tingting bilong ol.’ (Luk 10:25-28) Sampela i save pinis olsem ol Witnes Bilong Jehova i ‘lotuim God long spirit na long pasin i tru,’ tasol ol i no bihainim yet pasin bilong Jisas na kisim baptais bilong kamapim long ai bilong ol man olsem ol i laikim tru Jehova na lotuim em wanpela tasol. (Jon 4:23, 24; Lo 4:24; Mak 1:9-11) Sapos ol i beten strong long dispela bikpela samting, ating dispela inap kirapim ol na strongim ol long bihainim tru Tok Bilong God, na dediket tru long God Jehova, na kisim baptais.
21, 22. I gat wanem ol as na sampela i surik long dediket na kisim baptais?
21 Sampela i no dediket na kisim baptais, long wanem, ol i givim bel long ol samting bilong dispela graun o long painim mani, na nau ol i no gat taim bilong tingim ol samting bilong spirit. (Matyu 13:22; 1 Jon 2:15-17) Tasol sapos ol i senisim tingting na laik bilong ol, ol bai amamas tru! Sapos ol i go klostu long Jehova, dispela bai helpim gut ol long ol samting bilong spirit, na ol i no ken tingting planti tumas, na ol bai kisim bel isi long mekim laik bilong Jehova.—Song 16:11; 40:8; Sindaun 10:22; Filipai 4:6, 7.
22 Sampela moa i tok ol i laikim tru Jehova, tasol ol i no dediket na kisim baptais, long wanem, ol i ting long dispela rot bai God i no ken skelim ol. Tasol yumi olgeta wan wan i mas kot long God long olgeta pasin yumi bin mekim o i no bin mekim. Yumi bin kisim wok long bihainim laik bilong God long taim yumi bin harim tok bilong Jehova. (Esekiel 33:7-9; Rom 14:12) Ol Israel bilong bipo ol i ‘lain stret’ bilong God, olsem na ol i bilong wanpela lain i dediket pinis long Jehova na dispela i mekim na ol i gat wok long bihainim gut ol lo bilong em. (Lo 7:6, 11) I no gat wanpela man long nau em taim mama i karim em em i dediket pinis long God, nogat; tasol sapos yumi bin kisim stretpela save long Baibel, orait yumi mas bilip na bihainim ol dispela tok.
23, 24. Wanem sampela samting ol man i tingting planti long en na dispela i no ken pasim ol long kisim baptais?
23 Sampela i ting ol i no gat planti save, na dispela i pasim ol long kisim baptais. Tasol yumi olgeta i gat planti samting bilong lain long en, long wanem, ‘ol man i no inap save long olgeta samting God i mekim long bipo yet i go inap long bihain tru.’ (Saveman 3:11, NW ) Tingim man bilong Itiopia. Em i bihainim lotu bilong ol Juda, olsem na em i gat sampela save long Baibel, tasol em i no save long olgeta samting God i laik mekim. Tasol taim em i save pinis long samting Jehova i putim bilong kisim bek ol man long rot bilong ofa bilong Jisas, kwiktaim em i kirap na kisim baptais long wara.—Aposel 8:26-38.
24 Sampela i surik long dediket long God, long wanem, ol i pret ol i no inap bihainim dispela dediket. Monique i gat 17 krismas em i tok: “Mi bin surik long kisim baptais, long wanem, mi pret olsem mi no inap bihainim dediket bilong mi.” Tasol sapos yumi bilip strong long Jehova long bel olgeta, ‘em bai soim yumi stretpela rot long bihainim.’ Em bai helpim yumi ol gutpela wokboi i dediket pinis long em long “bihainim tok tru.”—Sindaun 3:5, 6; 3 Jon 4.
25. I gat wanem askim yumi mas tingim?
25 Long olgeta yia, bel bilong planti tausen manmeri i kirapim ol long dediket na kisim baptais, long wanem, ol i bilip tru long Jehova na ol i laikim em tru. Olgeta wokman bilong God i dediket pinis, ol i laik stap gut long em. Tasol yumi stap long taim bilong planti hevi nogut tru, na kain kain hevi i save kamap bilong traim bilip bilong yumi. (2 Timoti 3:1-5) Yumi ken mekim wanem na bai yumi inap bihainim dediket em yumi bin mekim long Jehova? Bai yumi skelim dispela askim long stori i kamap bihain long dispela.
[Futnot]
a Jisas i no gat sin, olsem na em i no kisim baptais bilong makim olsem em i tanim bel. Baptais bilong em i makim olsem em i givim em yet long God bilong mekim ol samting Papa i laik bai em i mekim.—Hibru 7:26; 10:5-10.
Yu Inap Tingim?
• Ol i save givim baptais Kristen olsem wanem?
• Man i kisim baptais, pastaim em i mas kisim save long wanem samting?
• Trupela Kristen i mas mekim wanem ol samting paslain long em i kisim baptais?
• I gat wanem as na sampela i surik long kisim baptais? Ating wanem samting inap helpim ol?
[Ol Piksa long pes 14]
Yu save long samting em baptais ‘long nem bilong Papa, na Pikinini, na spirit holi’ i makim?