LESEN 22
Hau Yu Ken Autim Gutnius Long Ol Narapela?
Taim yu wok long lainim tok i tru bilong Baibel, ating yu tingting, ‘Olgeta man i mas save long dispela!’ Tru, olgeta i mas save long dispela gutnius! Tasol ating yu pret long tokim ol narapela long ol samting yu lainim. Nau bai yumi stori long olsem wanem yu ken daunim pasin bilong pret na amamas long autim gutnius bilong Baibel.
1. Hau yu ken stori wantaim ol man yu save long ol long samting yu lainim?
Ol disaipel bilong Jisas i tok: “[Mipela] i no inap pasim maus long ol samting [mipela] i bin lukim na harim.” (Aposel 4:20) Ol i tingim tok i tru i bikpela samting olsem na ol i laik tokim planti manmeri long dispela tok. Yu pilim olsem tu? Sapos olsem, painim rot bilong tokim ol famili na ol pren long ol samting yu lainim na mekim long gutpela pasin.—Ritim Kolosi 4:6.
Sampela rot yu ken bihainim
Taim yu toktok wantaim wanpela long famili long Baibel, yu ken kirapim tok olsem: “Mi lainim wanpela gutpela samting long dispela wik.”
Stori long wanpela skripsa bilong strongim wanpela pren i sik o i tingting planti.
Sapos wanpela wanwok i askim yu long yu mekim wanem long wiken, yu ken tokim em long samting yu lainim long Baibel stadi o long miting bilong kongrigesen.
Soim ol pren bilong yu jw.org websait.
Singautim ol narapela long sindaun wantaim yu long Baibel stadi bilong yu o soim ol long jw.org long ol i ken askim long wanpela i ken stadi wantaim ol.
2. Wai na i gutpela long putim mak long autim tok wantaim kongrigesen?
Ol disaipel bilong Jisas i no autim tok tasol long ol man ol i save long ol, nogat. Jisas i “salim ol i go 2-pela 2-pela paslain long em. Na ol i go long olgeta taun” na autim tok. (Luk 10:1) Taim ol i bihainim dispela pasin bilong autim tok, rot i op long ol inap autim gutnius long planti manmeri moa. Taim ol disaipel i autim tok wantaim, dispela i givim bikpela amamas long ol. (Luk 10:17) Yu tu i laik putim mak long autim tok wantaim kongrigesen?
KISIM SAMPELA SAVE MOA
Skelim sampela samting yu inap mekim bilong daunim pasin bilong pret na kisim amamas long autim gutnius.
3. Jehova bai stap wantaim yu
Sampela i laik autim tok, ating ol i pret long ol man bai i gat wanem tingting long ol o ol man bai mekim wanem kain pasin long ol.
Olsem wanem? Yu pret long tokim ol arapela long ol samting yu lainim? Wai na yu pilim olsem o wai na yu no pilim olsem?
Pilaim VIDIO, na stori long dispela askim.
Olsem wanem ol dispela yangpela Witnes i daunim pasin bilong pret?
Ritim Aisaia 41:10, na stori long dispela askim:
Sapos yu pret long autim tok, olsem wanem beten bai helpim yu?
Yu save long dispela?
Pastaim planti Witnes Bilong Jehova i bin pilim olsem ol i no inap long autim gutnius. Olsem, Sergey i pilim olsem em i samting nating na em i hatwok long toktok wantaim ol narapela. Tasol bihain em i stadi long Baibel. Em i tok: “Maski mi pret, mi kirap tokim ol narapela long ol samting mi lainim. Mi kirap nogut olsem taim mi tokim ol narapela long ol samting mi lainim long Baibel, dispela i mekim na mi amamas moa long mi yet. Na tu, dispela i strongim nupela bilip bilong mi.”
4. Mekim pasin rispek
Taim yu autim gutnius long wanpela, skelim gut wanem tok yu bai mekim, na tu, tingim hau yu bai mekim dispela tok. Ritim 2 Timoti 2:24 na 1 Pita 3:15, na stori long ol dispela askim:
Olsem wanem yu ken bihainim ol dispela ves taim yu toktok wantaim ol narapela long Baibel?
Sampela long famili o ol pren bai i no wanbel long tok yu mekim. Yu bai mekim wanem? Yu no ken mekim wanem?
Wai na i gutpela long mekim ol gutpela askim na no ken tokim ol long ol samting ol i mas bilip long en?
5. Wok bilong autim gutnius i save givim amamas
Jehova i givim wok bilong autim gutnius long Jisas. Jisas i gat wanem tingting long dispela wok? Ritim Jon 4:34, na stori long ol dispela askim:
Taim yumi kaikai gutpela kaikai, dispela i save helpim bodi bilong yumi na mekim yumi i stap amamas. Wai na Jisas i tok wok bilong mekim laik bilong God—na tu autim gutnius—i wankain long pasin bilong kisim kaikai?
Yu ting yu inap kisim wanem kain amamas taim yu autim gutnius?
Sampela rot yu ken bihainim
Long taim bilong miting namel long wik, traim long painim ol rot bilong toktok wantaim ol narapela.
Skelim sapos yu laik insait long skul i save kamap long miting namel long wik. Ol tok long skul bai helpim yu long redi gut long tokim ol narapela long ol samting yu wok long lainim.
Yusim hap “Sampela Man i Tok” o hap “Sapos Wanpela i Askim” long dispela stadi kos na prektis long bekim ol askim ol man i save mekim na bekim tok long man i no laik harim tok.
SAPOS WANPELA I ASKIM: “Sapos wanpela i tok, longtaim mi no lukim.”
Olsem wanem yu ken yusim dispela haptaim long tokim em long ol samting yu lainim long stadi bilong yu long Baibel?
OL BIKPELA POIN
Taim yu autim gutnius long ol narapela, dispela bai mekim yu amamas. Ating yu ting em hatwok, tasol taim yu kirap long mekim, em bai isi long mekim.
Riviu
Wai na yu mas autim gutnius long ol narapela?
Olsem wanem yu ken autim tok long pasin rispek?
Olsem wanem yu inap daunim pasin bilong pret long autim tok?
MEKIM WOK PAINIMAUT
Skelim 4-pela rot em yu inap yusim jw.org kontek kat long autim gutnius.
Kisim skul long 4-pela pasin we inap helpim yu long autim gutnius.
“Yu Redi Long Kamap Man Bilong Kisim Ol Manmeri?” (Wastaua, Septemba 2020)
Lukim wanpela eksampel bilong Baibel we inap strongim yumi long autim gutnius, maski yumi pikinini.
Painimaut hau yu ken stori long Baibel wantaim wanpela long famili i no save yet long Jehova.
“Putim Tok i Tru i Go Daun Long Bel Bilong Ol Wanblut i No Bilip” (Wastaua, Mas 15, 2014)