Wok Autim Tok Bilong Pol i Kirapim Pasin Birua

OL Juda i stap long Damaskus ol i no kliagut long olsem wanem wanpela man husat i bin wok strong tru long helpim lotu Juda em i kamap man i tromoi dispela bilip. Sol i gat nem olsem man i bin mekim nogut long ol manmeri long Jerusalem em ol i singaut long nem bilong Jisas. Em i kam long Damaskus bilong mekim nogut long ol disaipel long dispela hap. Tasol nau em yet i autim tok olsem dispela Jisas, em ol i tok em i man nogut na em i tok bilas long God na ol i bin nilim em long diwai, dispela man em i Mesaia! Ating Sol i kamap longlong o olsem wanem?​—Aposel 9:​1, 2, 20-22.

Ating i gat as bilong samting em i mekim. Yumi ken ting olsem ol man i lusim Jerusalem na i go wantaim Sol, ating ol i bin mekim sampela tok long samting i kamap long rot. Taim ol i kamap klostu long Damaskus, wantu wanpela strongpela lait i kamap, na olgeta i pundaun long graun. Ol i harim wanpela maus i toktok. Olgeta i orait​—Sol wanpela tasol i kisim bagarap. Em i slip i stap long rot. Taim em i kirap sanap, ol arapela i holim em na kisim em i go long Damaskus, long wanem, em i kamap aipas.​—Aposel 9:​3-8; 26:​13, 14.

Birua Bilong Jisas i Autim Tok

Wanem samting i bin kamap long Sol long rot i go long Damaskus? Longpela rot ol i go long en o hat bilong san i bin mekim na dispela senis i kamap long em? Sampela man i tok ating Sol i airaun, o driman, o bel i gat tok na nau tingting na bel i bagarap, o em i gat sik epilepsi.

Tasol samting tru i kamap em olsem: Jisas Krais i kamap long Sol long dispela strongpela lait, na em i kirapim Sol long bilip olsem Em i dispela Mesaia. Sampela atis i droim ol piksa i soim olsem Sol i pundaun long hos. Tru, dispela samting inap kamap, tasol Baibel i tok tasol olsem em i “pundaun long graun.” (Aposel 22:​6-11) Em i bin pundaun long graun, tasol dispela i no bikpela samting taim yumi skelim wantaim samting i bin painim em taim em i pundaun long bikpela namba na wok em i bin holim. Nau em i mas luksave olsem ol tok em ol disaipel bilong Jisas i autim, em i trupela tok. I gat wanpela samting tasol Sol inap mekim​—em i mas bihainim ol. Pastaim Sol i bin birua tru long tok bilong Jisas, tasol nau em i kamap wanpela strongpela man bilong autim dispela tok. Taim ai bilong em i orait na em i baptais pinis, “strong bilong Sol i kamap bikpela moa, na em i tok klia gut tru long ol Juda i stap long Damaskus olsem, ‘Jisas em dispela man God i makim bilong kisim bek ol manmeri bilong en.’ Ol Juda i harim ol toktok bilong Sol na ol i kirap nogut na ol i no mekim wanpela tok bilong daunim em.”​—Aposel 9:22.

Ol i Pasim Tok Bilong Kilim Em i Dai

Sol, bihain ol i kolim em Pol, em i go we taim em i kamap Kristen pinis? Taim em i raitim pas i go long ol Galesia, em i tok: “Mi go i stap long kantri Arebia. Na bihain mi go bek long taun Damaskus.” (Galesia 1:17) Dispela tok “Arebia” inap makim wanem wanem hap i insait long Poin Bilong Arebia. Sampela saveman i tok Pol i bin i go long Ples Nating Bilong Siria o long sampela hap bilong kantri Nabataea bilong bipo em King Aretas Namba 4 i bosim. Yumi ken ting olsem taim Sol i baptais pinis, em i bin i go long wanpela ples i no gat man long en na bai em i ken skelim gut ol samting long bel, olsem Jisas i bin mekim bihain tasol long em i baptais.​—Luk 4:1.

Taim Sol i go bek long Damaskus, “ol Juda i kibung na ol i pasim tok long kilim Sol i dai.” (Aposel 9:23) Long Damaskus, kiap bilong King Aretas i putim ol soldia i was long taun, long wanem, em i laik kalabusim Sol. (2 Korin 11:32) Tasol taim ol birua i toktok i stap long kilim i dai Sol, ol disaipel bilong Jisas i stretim rot bilong helpim em long ranawe.

Sampela bilong ol lain i helpim Sol long ranawe em Ananaias na ol disaipel em Sol i bin stap wantaim ol bihain tasol long em i kamap Kristen.a (Aposel 9:​17-19) Sampela em ol i bin harim Sol i autim tok long Damaskus na ol i kamap bilipman, ating ol tu i helpim em, long wanem, Aposel 9:25 i tok: “Ol disaipel bilong Sol i kisim em long nait na ol i bringim em i go antap long bikpela banis i raunim taun. Na ol i tokim em long sindaun long wanpela bikpela basket, na ol i slekim basket i go daun long ausait bilong taun.” Dispela tok “ol disaipel bilong Sol” inap makim ol lain em Sol i bin skulim ol. Yumi ken ting olsem wok autim tok bilong em i kamapim ol gutpela samting, na dispela i kirapim ol man long birua moa yet long em.

Samting Yumi Mas Lainim

Taim yumi skelim sampela samting i bin kamap paslain na bihain long Sol i baptais na kamap Kristen, yumi inap kisim save olsem em i no bin tingting tumas long ol narapela i ting olsem wanem long em; na em i no larim pasin birua i pasim wok bilong em. Nambawan samting long Sol em wok autim tok em i bin kisim.​—Aposel 22:​14, 15.

Olsem wanem? Nau tasol yu save olsem em i bikpela samting long autim gutnius? Sapos olsem, yu save olsem olgeta trupela Kristen i mas autim tok bilong Kingdom. Taim yu autim tok, yu no ken kirap nogut sapos sampela taim ol man i mekim hatpela pasin long yu. (Matyu 24:9; Luk 21:12; 1 Pita 2:20) Pasin Sol i bin mekim taim ol man i birua long em, dispela i stap gutpela piksa yumi ken bihainim. Ol Kristen em ol i karim hevi na ol i no les kwik, God bai orait long ol. Jisas i tokim ol disaipel bilong em: “Olgeta man bai i bel nogut tru long yupela, long wanem, nem bilong mi em i stap long yupela.” Tasol em i strongim ol olsem: “Yupela i mas i stap strong, na bai yupela i kisim laip na i stap gut.”​—Luk 21:​17-19.

[Futnot]

[Piksa long pes 28]

Sol i “pundaun long graun” taim Jisas i kamap long em

[Piksa long pes 29]

Sol i ranawe taim ol man i pasim tok long kilim em i dai long Damaskus