Bilip Bilong Lain Bilong Jehova i Kamap Strong Moa
“Bilip bilong ol manmeri bilong ol [kongrigesen] i kamap strong moa, na namba bilong ol i go bikpela moa long olgeta de.”—APOSEL 16:5.
1. God i givim wanem wok long aposel Pol?
GOD JEHOVA i “makim” Sol bilong Tarsus bilong mekim wok. Taim Sol i kamap aposel Pol em i ‘karim planti pen na hevi.’ Tasol ol wok bilong em na bilong ol wanwok bilong em i helpim lain bilong Jehova long i stap wanbel na i go bikpela.—Aposel 9:15, 16.
2. Sapos yumi skelim ol tok bilong Aposel 13:1–16:5, dispela bai helpim yumi olsem wanem?
2 Planti man i no bilong lain Juda ol i wok long kamap Kristen, na wanpela bikpela bung bilong lain bilong bosim ol Kristen bilong pastaim i helpim lain bilong God long i stap wanbel na kamap strong long bilip. Gutpela sapos yumi skelim stori bilong ol dispela samting na sampela samting moa i bin kamap long dispela taim bipo, em stori bilong en i stap long Aposel 13:1–16:5. Sapos yumi mekim olsem, dispela bai helpim yumi tru, long wanem yumi ol Witnes Bilong Jehova long nau i kisim ol wankain blesing bilong spirit, na lain bilong yumi i wok long i go bikpela olsem. (Aisaia 60:22) (Taim yu yet yu stadi long ol tok bilong dispela Wastaua i stori long hap bilong Aposel long Baibel, gutpela sapos yu kaunim ol ves bilong Aposel ol i raitim long blakpela rait tru.)
Ol Misineri i Kirap Mekim Wok
3. ‘Ol profet na tisa’ i mekim wanem wok long Antiok?
3 Kongrigesen bilong Antiok, long Siria, i salim sampela brata i go mekim wok na ol dispela brata i helpim ol bilipman long kamap strong moa long bilip. (13:1-5) Long Antiok i gat “sampela man i save autim tok profet na sampela man i save skulim ol manmeri.” Nem bilong ol em Barnabas, na Simeon (Niger), na Lusius bilong taun Sairini, na Manain, na Sol bilong taun Tarsus. Ol dispela ‘profet’ i save kamapim as bilong ol tok bilong God, na ol i save tokaut long ol samting bai kamap long bihain. Na ol ‘tisa’ i save skulim ol manmeri long ol tok bilong Baibel na long ol pasin God i laikim na ol i mas bihainim. (1 Korin 13:8; 14:4) Kongrigesen i makim Barnabas tupela Sol bilong mekim wanpela wok. Tupela i kisim Mak, em kandere bilong Barnabas, i go wantaim ol na ol i go long ailan Saiprus. (Kolosi 4:10) Ol i autim tok long ol haus lotu bilong ol Juda long taun Salamis i stap long hap bilong sankamap. Tasol Baibel i no stori olsem ol dispela Juda i bilip. Ol i gat gutpela sindaun na planti samting bilong skin, olsem na ol i ting i no gat wok long Man bilong kisim bek ol em i mas helpim ol.
4. Taim ol misineri i wok i go moa long autim tok long Saiprus, wanem samting i kamap?
4 Tasol God i blesim ol narapela wok bilong autim tok ol dispela misineri i mekim long ailan Saiprus. (13:6-12) Long taun Pafos, ol i bungim wanpela man bilong mekim posin, nem bilong em Barjisas (Elimas). Em i wanpela profet giaman bilong ol Juda. Em i laik pasim namba wan gavman, em Sergius Paulus, bambai em i no ken harim tok bilong God. Tasol spirit holi i pulap long Sol na Sol i tokim em: ‘Yu man bilong giaman, yu pikinini bilong Satan, yu birua bilong olgeta stretpela pasin, yu laik bagarapim olgeta stretpela rot bilong Jehova. Ating yu no laik lusim dispela pasin?’ Nau strafe bilong God i painim Elimas na inap liklik taim em i kamap aipas. Tasol Sergius Paulus “i bilip. Tingting bilong en i kirap tru long tok bilong Bikpela.”
5, 6. (a) Taim Pol i mekim tok long haus lotu bilong ol Juda long Antiok, long Pisidia, em i mekim wanem tok long Jisas? (b) Tok bilong Pol i mekim wanem long ol man i harim?
5 Orait nau ol i lusim Saiprus na ol i kalap long wanpela sip na i go long taun Perga, long Esia Maina. Pol tupela Barnabas i go long hap bilong not long taun Antiok, long distrik Pisidia. Ol i wokabaut long ol liklik rot long ples maunten na ‘ol i laik bagarap long han bilong ol man nogut i save pulim samting bilong ol man i wokabaut long rot.’ (2 Korin 11:25, 26) Taim ol i kamap pinis long Antiok, Pol i autim tok long haus lotu bilong ol Juda. (13:13-41) Em i stori long olgeta samting God i bin mekim long lain Israel, na em i tokaut olsem Jisas em i bilong lain bilong Devit na em i Man bilong kisim bek ol. Em i tok, ol hetman bilong lain Juda i bin tok long Jisas i mas i dai, tasol God i kirapim bek Jisas na truim tok promis em i bin mekim long ol tumbuna bilong ol. (Buk Song 2:7; 16:10; Aisaia 55:3) Pol i givim strongpela tok long ol, em i tok ol i no ken sakim rot bilong God long kisim bek ol, em Krais.—Habakuk 1:5.
6 Tok bilong Pol i kirapim tru tingting bilong ol dispela man olsem ol pablik-tok bilong ol Witnes Bilong Jehova long nau i save mekim. (13:42-52) Long de Sabat bihain, klostu olgeta manmeri bilong dispela taun i bung bilong harim tok bilong Jehova. Ol Juda i lukim dispela samting na ol i bel nogut tru. I olsem wok bilong ol dispela misineri i winim tru wok bilong ol dispela Juda, long wanem insait long wanpela wik tasol ol i bin kirapim planti manmeri bilong ol narapela lain long tanim bel! Ol Juda i wok long daunim tok bilong Pol, na ol i tok bilas long em, olsem na taim i kamap bilong i go givim lait bilong spirit long ol narapela lain, olsem na Pol tupela Barnabas i tokim ol, ‘Yupela i givim baksait long tok bilong God, na i olsem yupela yet i tok, “Mipela i no inap long kisim laip i stap oltaim.” Olsem na mipela i no ken autim tok moa long yupela. Mipela bai i go autim tok long ol manmeri bilong ol narapela lain.’—Aisaia 49:6.
7. Taim ol man i mekim nogut long Pol tupela Barnabas, tupela i mekim wanem?
7 Ol manmeri bilong ol narapela lain ol i amamas long harim tok bilong God, na olgeta manmeri i gat stretpela tingting inap long ol i kisim laip i stap oltaim, ol i bilip. Ol i kisim tok bilong Jehova i go nabaut long olgeta hap bilong dispela distrik, tasol ol Juda i kirapim ol meri i gat biknem (em ol inap subim man bilong ol o ol arapela long mekim sampela samting) na ol hetman long mekim nogut long Pol tupela Barnabas na rausim tupela long dispela distrik. Tasol dispela tupela misineri i no pret na lusim wok bilong ol. Nogat. Tupela i “rausim pipia graun i stap long lek bilong tupela, bai ol manmeri i ken save ol i gat asua long dispela pasin bilong ol,” na tupela i go long taun Aikoniam (nau ol man i kolim Konya), em wanpela biktaun long provins Galesia bilong ol Rom. (Luk 9:5; 10:11) Tasol olsem wanem long ol disaipel i stap yet long taun Antiok, long Pisidia? Ol i kamap strong moa long bilip, na “Holi Spirit i pulap long ol . . . , na ol i amamas tru.” Dispela samting i helpim yumi long save, ol man inap kamap strong moa long bilip, maski ol narapela man i mekim nogut long ol.
Ol i Stap Strong long Bilip Maski Birua
8. Ol i autim gut tok long Aikoniam na wanem samting i kamap?
8 Pol tupela Barnabas i stap strong long bilip maski ol man i birua long ol na mekim nogut long ol. (14:1-7) Tupela i autim tok long haus lotu bilong ol Juda long Aikoniam na planti Juda na Grik ol i bilip. Ol Juda i no bilip ol i kirapim ol man bilong ol narapela lain long birua long ol nupela bilipman, tasol God yet i bin givim wok long dispela tupela wokman bilong Em, olsem na tupela i no pret long autim tok. God i amamas long tupela na em i givim strong long tupela bilong wokim ol kain kain mirakel. Dispela samting i mekim na ol birua i bruk long tupela lain—sampela i wanbel wantaim ol Juda na sampela i wanbel wantaim tupela aposel. (Insait bilong tok “aposel” i olsem “man ol i bin salim i go.”) Tupela i no man bilong pret, tasol taim ol i harim tok olsem ol man i laik mekim nogut long ol, ol i bihainim gutpela tingting na ol i go autim tok long distrik Likonia. Yumi tu, sapos yumi bihainim gutpela tingting, dispela inap helpim yumi long mekim yet wok bilong autim tok maski ol man i birua long yumi.—Matyu 10:23.
9, 10. (a) Taim Pol i oraitim wanpela lek nogut long Listra, ol Listra i mekim wanem? (b) Pol tupela Barnabas i mekim wanem long ol samting i kamap long Listra?
9 Nau tupela i go autim tok long taun Listra long distrik Likonia. (14:8-18) Long dispela taun Pol i oraitim wanpela man lek nogut, mama i bin karim em olsem. Planti manmeri i lukim dispela samting na ol i no save Jehova em i as bilong dispela mirakel, olsem na ol i singaut strong na tok olsem: “Ol god i kamap olsem man, na ol i kam daun long yumi.” Ol i singaut long tok ples bilong Likonia, olsem na Pol tupela Barnabas i no save ol i tok wanem. Pol i go pas long mekim ol tok, olsem na ol i ting em i god Hermes (ol i tok em god i gat wok long bringim tok bilong ol god i kam), na ol i ting Barnabas em i god Sus, em king bilong ol god bilong ol.
10 Pris bilong haus lotu bilong god Sus em i kisim sampela bulmakau man na sampela plaua ol i bin ropim bilong mekim ofa long Pol na Barnabas. Tasol kwiktaim tupela i kirap tokim ol manmeri, tupela i man tasol wankain olsem ol, na ol i kam bilong autim gutnius long ol bambai ol i ken lusim “ol dispela samting nating” (ol god giaman i no gat laip) na ol i ken tanim i go long God i gat laip. (1 King 16:13; Buk Song 115:3-9; 146:6) Tru, bipo God i bin larim ol narapela lain (lain Hibru nogat) i wokabaut long pasin bilong ol yet, tasol em i no bin hait olgeta na bai ol man i no ken save long em na long gutpela pasin bilong em. Nogat. Em i bin ‘mekim ren i kam daun long ol na mekim planti gutpela kaikai i kamap na mekim bel bilong ol i amamas.’ (Buk Song 147:8) Barnabas tupela Pol i kamapim ol dispela gutpela tok na tingting, tasol tupela i hatwok long pasim ol manmeri na bai ol i no ken mekim ofa long tupela. Tasol tupela i no larim ol man i litimapim nem bilong ol olsem god bilong ol bambai tupela i ken kamapim lotu Kristen long dispela hap. Tupela i stap olsem gutpela piksa bilong yumi. Na sapos yumi gat laik long ol man i mas litimapim nem bilong yumi long ol gutpela wok Jehova yet i larim yumi i mekim, yumi mas lusim dispela tingting na wok strong moa long bihainim pasin bilong tupela!
11. Tok bilong Baibel olsem “Yumi laik i go insait long kingdom bilong God, tasol pastaim yumi mas wokabaut long rot i gat planti hevi i stap long en,” dispela tok i lainim yumi long wanem samting?
11 Tasol wantu pasin birua i kamap. (14:19-28) Em i kamap olsem wanem? Sampela Juda bilong Antiok long Pisidia na Aikoniam ol i pulim tingting bilong ol manmeri na kirapim ol long birua long Pol. Ol i tromoi ston long Pol, na taim ol i ting em i dai pinis, ol i pulim bodi bilong em i go na lusim i stap ausait long taun. (2 Korin 11:24, 25) Tasol ol disaipel i kam bung long em na helpim em, na em i kirap na i go bek insait long taun Listra. Ating em i taim bilong tudak, olsem na ol man i no lukim em. Long de bihain em i go wantaim Barnabas long taun Derbe, na long Derbe planti manmeri liklik ol i kamap disaipel. Taim dispela tupela misineri i go bek long Listra na Aikoniam na Antiok, ol i strongim ol brata na kirapim ol long i stap strong long bilip, na tupela i tok: “Yumi laik i go insait long kingdom bilong God, tasol pastaim yumi mas wokabaut long rot i gat planti hevi i stap long en.” Yumi tu yumi Kristen na yumi save yumi mas karim hevi, tasol yumi no ken lusim bilip liklik bilong painim rot bilong abrusim hevi. (2 Timoti 3:12) Long dispela taim bipo ol i bin makim ol elda long ol kongrigesen long provins Galesia, em Pol i raitim pas long ol.
12. Namba wan raun bilong Pol long mekim wok misineri i pinis, na bihain em wantaim Barnabas i mekim wanem?
12 Bihain tupela i wokabaut i go namel long distrik Pisidia, na tupela i go kamap long taun Perga, em wanpela biktaun long provins Pamfilia. Bihain moa ol i go bek long taun Antiok, long Siria. Em nau, namba wan raun bilong Pol i pinis, na dispela tupela misineri i tokim kongrigesen long “olgeta samting God i bin mekim long han bilong tupela.” Na tupela i tok: “God i bin opim rot long ol manmeri bilong ol arapela lain, na ol i bilip.” Nau tupela i stap longtaim liklik wantaim ol brata long Antiok, na dispela i helpim ol brata long kamap strong moa long bilip. Long nau tu, ol wasman bilong raun i save go lukim ol kongrigesen na ol i mekim wankain gutpela wok bilong strongim bilip bilong ol brata.
Ol i Stretim Wanpela Bikpela Askim
13. Ol i mas mekim wanem na bai lotu Kristen i no ken bruk na kamap tupela lain, olsem ol Juda na ol manmeri i no Juda?
13 Bilong i stap strong long bilip, ol i mas i stap wanbel na i gat wankain tingting. (1 Korin 1:10) Tasol nau planti manmeri i no bilong lain Juda ol i kamap Kristen na nogut lotu Kristen i bruk na i kamap tupela lain, olsem ol Juda (Hibru) na ol manmeri i no Juda. Olsem na lain bilong bosim ol Kristen bilong pastaim i mas stretim wanpela bikpela askim olsem: Ol dispela manmeri i no Juda ol i mas bihainim Lo bilong Moses na ol i mas katim skin o nogat? (15:1-5) Sampela man bilong Judia i bin i go long taun Antiok, long Siria, na ol i skulim ol Kristen bilong ol narapela lain olsem ol i mas katim skin bambai God i ken kisim bek ol. (Kisim Bek 12:48) Olsem na kongrigesen i salim Pol na Barnabas na sampela brata moa i go long ol aposel na ol elda long Jerusalem. Long Jerusalem tu, sampela Kristen bipo ol i Farisi na ol i bin strong long bihainim lo, ol i ting olsem ol Kristen bilong ol narapela lain ol i mas katim skin na bihainim Lo bilong Moses.
14. (a) Long bikpela bung long Jerusalem, ol i mekim planti toktok, tasol ol i no mekim wanem na dispela i makim gutpela pasin yumi ken bihainim? (b) Ol tok Pita i bin mekim long dispela taim i kamapim klia wanem samting?
14 Ol i wokim bung bambai ol i ken save long laik bilong God long dispela samting. (15:6-11) Ol i mekim planti toktok, tasol ol i no kros na tok pait—ol i stap olsem gutpela piksa bilong ol elda long nau! Long dispela taim Pita i bin tok: ‘God i makim mi bilong autim tok long ol man bilong ol arapela lain [olsem Kornilius], bai ol i ken harim na bilip. Em i givim spirit holi long ol, wankain olsem em i bin givim long yumi, bilong soim yumi em i amamas long kisim ol. [Aposel 10:44-47] Olsem na bilong wanem yupela laik pasim hevipela samting [wok bilong bihainim Lo] long ol Kristen, em ol tumbuna na yumi tu i no inap karim? Long marimari bilong Krais Jisas bai God i kisim bek yumi [ol Juda bilong skin] na ol dispela man tu.’ God i kisim ol dispela man bilong ol narapela lain, em ol i no bin katim skin, na dispela i kamapim klia olsem ol Kristen i no gat wok long katim skin o bihainim Lo bilong Moses bambai God i ken kisim bek ol.—Galesia 5:1.
15. Jems i kamapim wanem ol bikpela tok? Em i laik bai ol i raitim pas long ol Kristen bilong ol narapela lain na givim wanem tok long ol?
15 Pita i tok olsem, orait ol man i stap long dispela bung ol i no mekim wanpela tok. Tasol bihain sampela moa ol i toktok. (15:12-21) Barnabas na Pol i stori long ol mirakel God i bin wokim long han bilong tupela namel long ol manmeri bilong ol narapela lain. Na bihain siaman bilong dispela bung, em Jems brata bilong Jisas, em i tok, ‘Saimon [nem bilong Pita long tok Hibru] i tokim yumi pinis long namba wan taim God i kam long ol man bilong ol arapela lain, bilong kisim ol lain manmeri bilong ol na mekim ol i kamap lain bilong holim nem bilong em.’ Jems i kolim wanpela tok profet i tok God bai sanapim gen “haus sel” o “lain bilong Devit” (olsem kamapim gen wanpela king long lain bilong Devit), na Jems i stori olsem truim bilong dispela tok profet i kamap taim Jisas i kirap long bungim ol disaipel (bilong kamap king long Kingdom) namel long ol Juda na ol manmeri bilong ol narapela lain. (Amos 9:11, 12; Rom 8:17) Dispela samting i kamap em i laik bilong God, olsem na ol disaipel i no ken sakim. Jems i tok, gutpela sapos ol i raitim pas long ol Kristen bilong ol narapela lain, na ol i mas tokim ol olsem: (1) Ol i no ken kisim kaikai samting ol man i bin ofaim long ol god giaman, na (2) ol i no ken mekim pasin pamuk, na (3) ol i no ken kaikai blut o kaikai abus ol man i pasim nek bilong en na kilim i dai. Ol dispela tambu i stap long ol rait bilong Moses ol i save kaunim long olgeta de Sabat long ol haus lotu bilong ol Juda.—Stat 9:3, 4; 12:15-17; 35:2, 4.
16. Pas bilong lain bilong bosim ol Kristen bilong pastaim i kamapim wanem 3-pela bikpela tok i stiaim tingting bilong ol Kristen i kam inap long nau?
16 Nau lain bilong bosim ol Kristen i salim pas i go long ol Kristen bilong ol narapela lain ol i stap long Antiok, na long provins Siria, na long Silisia. (15:22-35) Spirit holi na ol man bilong raitim dispela pas i tokim ol Kristen ol i mas klia long ol kaikai samting ol man i bin ofaim long ol god giaman; na ol i mas klia long blut (em sampela man i save kaikai long olgeta taim); na ol i no ken kaikai abus ol man i bin pasim nek bilong en na kilim i dai na i gat blut i stap yet long en (planti haiden i save laikim tru kain abus olsem); na ol i mas klia long pasin pamuk (tok Grik, por·neiʹa, i makim maritpasin ol i mekim na ol i no marit stret olsem Baibel i makim). Sapos ol i abrusim ol dispela samting, bai ol i stap gutpela long ol samting bilong spirit, olsem ol Witnes Bilong Jehova long nau i stap gutpela long spirit, long wanem ol i save bihainim “ol dispela pasin.” Long pinis bilong dispela pas, ol i raitim tok olsem: “Yupela i ken i stap gut.” I olsem ol i tok, “Gutbai,” na i no olsem ol i laik tok sapos ol Kristen i bihainim ol dispela tok bai ol i stap gutpela long skin. Nogat. Taim kongrigesen long Antiok i kaunim dispela pas, ol i amamas, long wanem ol dispela tok i strongim ol. Long dispela taim Pol na Sailas na Barnabas na sampela brata moa ol i mekim sampela tok, na dispela tu i strongim ol manmeri bilong God i stap long Antiok na ol i kamap strong moa long bilip. Yumi tu i mas wok long painim rot bilong strongim ol brata bilong yumi na helpim ol long kamap strong moa long bilip.
Ol Misineri i Kirap Mekim Namba 2 Raun
17. (a) Taim Pol i tok long mekim namba 2 raun bilong autim tok, wanem hevi i bin kamap? (b) Taim kros i kamap namel long Pol tupela Barnabas, tupela i stretim olsem wanem?
17 Taim Pol i tok long mekim namba 2 raun bilong autim tok, wanpela hevi i kamap. (15:36-41) Em i tok, em i laik bai em wantaim Barnabas i go bek lukim ol kongrigesen long Saiprus na Esia Maina. Barnabas i orait long dispela, tasol em i laik kisim kandere bilong em, em Mak, i go wantaim tupela. Pol i no laik, long wanem bipo Mak i bin lusim ol taim ol i stap long provins Pamfilia. Tupela i “tok kros planti,” tasol Pol i no singautim ol elda o lain bilong bosim ol Kristen bilong helpim em na stretim dispela kros, na Barnabas tu i no mekim olsem. Tupela i no laik bai ol narapela i insait long dispela kros i samting bilong tupela yet. Tupela i makim gutpela pasin yumi ken bihainim!
18. Pol tupela Barnabas i bruk na mekim wanem? Dispela samting i bin kamap long bipo inap helpim yumi olsem wanem long nau?
18 Tasol dispela kros i mekim na tupela i bruk. Barnabas i kisim Mak na i go long Saiprus, na Pol i kisim Sailas na “tupela i wokabaut i go nabaut long provins Siria na Silisia, na Pol i wok long strongim ol manmeri bilong ol [kongrigesen] i stap long dispela hap.” Ating Barnabas i tingim tumas ol famili bilong em, tasol em i mas tingim wok aposel bilong Pol, em Bikpela yet i bin “makim em” bilong mekim dispela wok. (Aposel 9:15) Orait, olsem wanem long yumi? Dispela samting i bin kamap long bipo i mas kirapim yumi long tingting gut na bai yumi daun long God na wok gut wantaim dispela lain ol i olsem ‘gutpela wokboi’!—Matyu 24:45-47.
Ol i Stap Wanbel na Kamap Strong
19. Timoti i makim wanem gutpela pasin ol yangpela Kristen long nau i ken bihainim?
19 Ol i no larim dispela kros i bagarapim pasin wanbel bilong lain Kristen. Ol dispela manmeri bilong God i wok long kamap strong moa long bilip. (16:1-5) Pol tupela Sailas i go long Derbe, na bihain ol i go long Listra. Long taun Listra wanpela Kristen i stap, nem bilong em Timoti, em i pikinini bilong wanpela meri Juda, em i Kristen, nem bilong em Yunis. Papa bilong Timoti i bilong lain Grik na em i no bilip. Long dispela taim Timoti em i yangpela yet; yumi save long dispela, long wanem, inap olsem 18 o 20 yia bihain Pol i tokim em: “Ol i lukim yu i yangpela liklik, tasol ol i no ken ting yu man nating.” (1 Timoti 4:12) “Ol Kristen long Listra na Aikoniam [i stap longwe long Listra inap olsem 29 kilomita] ol i tok . . . Timoti i gutpela man.” Ol i save long ol gutpela wok na pasin bilong em; em i save mekim wok bilong God na bihainim ol pasin bilong God, olsem na em i gat gutpela nem. Ol yangpela Kristen long nau tu i mas beten askim Jehova long helpim ol long kisim gutpela nem olsem. Pol i bin katim skin bilong Timoti, long wanem tupela bai go long haus bilong ol Juda na long ol haus lotu bilong ol Juda, na ol dispela Juda i save, papa bilong Timoti i no bilong lain Juda, em i bilong narapela lain. Pol i no laik bai wanpela samting i pasim rot bilong ol dispela Juda, em ol i mas kisim save long Man bilong kisim bek ol. Long nau tu, ol Witnes Bilong Jehova i save mekim olgeta samting bilong helpim olgeta kain kain man bambai ol i ken save long gutpela tok bilong Kingdom, tasol ol i no save kalapim ol lo bilong Baibel bilong mekim olsem.—1 Korin 9:19-23.
20. Ol kongrigesen i bihainim ol tok bilong pas bilong lain bilong bosim ol na dispela i mekim wanem long ol? Yu ting dispela i mas lainim yumi long wanem samting?
20 Timoti i go wantaim Pol tupela Sailas taim tupela i go givim pas bilong lain bilong bosim ol Kristen long ol kongrigesen. Ol tok bilong dispela pas i mekim wanem long ol kongrigesen? Luk i stori long ol kongrigesen long Siria na Silisia na Galesia na em i tok: “Olsem na bilip bilong ol manmeri bilong ol [kongrigesen] i kamap strong moa, na namba bilong ol i go bikpela moa long olgeta de.” Tru tumas, taim ol kongrigesen i bihainim ol tok bilong dispela pas, dispela i helpim ol long i stap wanbel na i stap strong long bilip. Ol i stap olsem gutpela piksa bilong lain bilong Jehova long nau, em ol tu i stap long taim bilong planti hevi na ol i mas wok strong long i stap wanbel na long kamap strong moa long bilip!
Bai Yu Bekim Wanem Tok?
◻ Taim ol man i mekim nogut long Pol tupela Barnabas, tupela i mekim wanem?
◻ Dispela tok: “Yumi laik i go insait long kingdom bilong God, tasol pastaim yumi mas wokabaut long rot i gat planti hevi i stap long en,” em i mas lainim yumi long wanem samting?
◻ Ol 3-pela bikpela tok bilong pas bilong lain bilong bosim ol Kristen bilong pastaim i givim wanem gutpela tingting long yumi?
◻ Ol samting i bin helpim lain witnes bilong Jehova long taim bilong ol aposel na ol i kamap strong moa long bilip, olsem wanem ol dispela samting inap helpim yumi long nau?