Tingim Laip I Bikpela Samting

 1. Husat i givim laip long yumi?

JEHOVA “em i God i stap laip.” (Jeremaia 10:10) Em i Man Bilong Wokim yumi, na em i givim laip long yumi. Baibel i tok: “Yu bin wokim olgeta samting. Na long laik bilong yu yet yu bin wokim ol na ol i stap.” (Revelesen 4:11) Yes, Jehova i laik bai yumi stap laip. Laip em i gutpela presen i kam long em.—Ritim Song 36:9.

 2. Yumi ken mekim wanem bilong i stap amamas?

² Jehova i givim ol samting yumi nidim bilong i stap laip olsem kaikai na wara. (Aposel 17:28) Tasol bikpela samting moa, em i laik bai yumi stap amamas. (Aposel 14:15-17) Bilong i stap amamas tru, yumi mas bihainim ol lo bilong God.—Aisaia 48:17, 18.

 3. Jehova i mekim wanem taim Kein i kilim i dai Abel?

³ Baibel i kamapim olsem laip bilong yumi na laip bilong ol arapela i bikpela samting long ai bilong Jehova. Olsem, long taim Kein—pikinini man bilong Adam tupela Iv—em i belhat tru long liklik brata bilong em, Abel, Jehova i mekim tok lukaut long Kein olsem em i mas bosim belhat bilong em. Tasol Kein i no harim tok, em i belhat nogut tru na “paitim brata bilong em Abel na kilim em i dai.” (Stat 4:3-8) Jehova i mekim save long Kein long em i bin kilim i dai Abel. (Stat 4:9-11) Olsem na pasin bilong belhat na heitim narapela em i samting nogut, long wanem, em inap mekim yumi i bagarapim narapela. Man i gat kain pasin olsem em i no inap kisim laip oltaim. (Ritim 1 Jon 3:15.) Bilong amamasim Jehova, yumi mas laikim olgeta manmeri.—1 Jon 3:11, 12.

 4. Wanpela lo God i givim long ol Israel i skulim yumi olsem wanem long laip?

⁴ Sampela tausen yia bihain, Jehova i soim olsem laip i bikpela samting long em taim em i givim Tenpela Lo long Moses. Wanpela lo i olsem: “Yupela i no ken kilim man i dai.” (Lo 5:17) Sapos wanpela man i min na kilim i dai narapela man, ol i mas kilim em i dai.

 5. God i gat wanem tingting long pasin bilong rausim bel?

⁵ God i gat wanem tingting long pasin bilong rausim bel? Laip bilong bebi i no bon yet i bikpela samting long ai bilong Jehova. Long Lo Jehova i givim long ol Israel, Jehova i tok sapos wanpela man i mekim na meri i gat bel i kisim bagarap na bebi bilong em i dai, ol i mas kilim i dai dispela man. (Ritim Kisim Bek 21:22, 23; Song 127:3) Dispela i skulim yumi olsem pasin bilong rausim bel i no stret.—Lukim Futnot long pes 222.

6, 7. Olsem wanem yumi soim Jehova olsem yumi tingim laip i bikpela samting?

⁶ Olsem wanem yumi ken soim Jehova olsem yumi tingim laip bilong yumi na laip bilong ol narapela i bikpela samting? Yumi no inap mekim wanpela samting we yumi yet inap kisim bagarap o ol narapela i kisim bagarap. Olsem na bai yumi no smok, kaikai buai, o kisim drak samting, long wanem, ol dispela samting i save bagarapim yumi na kilim yumi i dai.

⁷ God i bin givim bodi na laip long yumi, na yumi mas mekim wok long ol long pasin we em i laikim. Yumi mas lukautim gut bodi bilong yumi. Sapos yumi no mekim olsem, yumi bai kamap doti long ai bilong God. (Rom 6:19; 12:1; 2 Korin 7:1) Yumi no inap lotuim Jehova, em man i givim laip long yumi, sapos yumi no tingim laip i bikpela samting. Tru ating i hatwok long lusim ol dispela pasin nogut, tasol Jehova bai helpim yumi sapos yumi wok strong long mekim olsem, long wanem, yumi tingim laip i bikpela samting.

 8. Yumi mas mekim wanem na bai bagarap i no painim yumi o bagarap i painim ol arapela?

⁸ Yumi kisim save olsem laip em i gutpela presen. Jehova i bilip olsem yumi bai was gut na bai yumi yet i no inap kisim bagarap o ol narapela i kisim bagarap. Yumi mekim olsem long pasin bilong yumi long draivim kar, motobaik, o bas samting. Yumi no insait long ol spot i gat pasin pait long en o man inap kisim bagarap long en. (Song 11:5) Yumi mekim ol samting na bai haus bilong yumi i stap gut na man i no inap kisim bagarap. Jehova i tokim ol Israel: “Taim yupela i wokim nupela haus, yupela i mas wokim tu liklik banis long arere bilong rup, na bai yupela na famili bilong yupela i no gat asua long blut taim wanpela man long rup i pundaun i go daun na i dai.”—Lo 22:8.

 9. Yumi mas mekim wanem kain pasin long ol animal?

⁹ Pasin yumi mekim long ol animal tu i bikpela samting long ai bilong Jehova. Em i larim yumi long kilim i dai ol animal bilong kisim kaikai na klos, na sapos animal i laik bagarapim yumi, em i orait long yumi ken kilim em i dai. (Stat 3:21; 9:3; Kisim Bek 21:28) Tasol yumi no ken mekim nogut long ol animal o kilim ol i dai bilong kisim amamas tasol.—Provep 12:10.

10. Olsem wanem yumi save blut em i as bilong laip?

¹⁰ Blut em samting holi long ai bilong Jehova, long wanem, blut em i as bilong laip. Bihain long Kein i kilim i dai brata bilong em, Abel, Jehova i tokim Kein: “Blut bilong brata bilong yu i stap long graun na i wok long krai long mi long bekim dispela rong.” (Stat 4:10) Blut bilong Abel em i as bilong laip bilong em, na Jehova i mekim save long Kein long em i kilim i dai Abel. Bihain long Bikpela Tait long taim bilong Noa, Jehova i kamapim klia gen olsem blut em i as bilong laip. Jehova i orait long Noa na famili bilong em long kaikai mit bilong ol animal. Em i tok: “Olgeta animal i ken i stap olsem kaikai bilong yupela. Mi bin givim yupela olgeta grinpela lip na gras samting olsem kaikai, na olsem tasol mi givim olgeta animal long yupela.” Tasol i gat wanpela samting tasol Jehova i tokim ol long no ken kaikai: “Mit i gat blut long en, yupela i no ken kaikai, long wanem, blut em i as bilong laip.”—Stat 1:29; 9:3, 4.

11. God i givim wanem lo bilong blut long ol manmeri bilong Israel?

¹¹ Inap 800 yia bihain long Jehova i bin tokim Noa long no ken kaikai blut bilong ol animal, em i tokim lain manmeri bilong em gen olsem: “Sapos wanpela man bilong Israel o wanpela man bilong narapela ples i stap wantaim yupela, em i go painim abus na em i kisim wanpela wel animal o pisin bilong kaikai, orait em i mas kapsaitim blut bilong en na karamapim dispela blut long graun.” Na em i tok: “Yupela i no ken kaikai blut.” (Wok Pris 17:13, 14) Jehova i laik bai ol manmeri bilong em i tingim blut olsem samting holi. Ol i ken kaikai mit bilong animal, tasol ol i no ken kaikai blut bilong en. Taim ol i kilim i dai animal bilong kaikai, ol i mas kapsaitim blut i go long graun.

12. Ol Kristen i gat wanem tingting long blut?

¹² Sampela yia bihain long Jisas i dai, ol aposel na ol hetman long kongrigesen Kristen long Jerusalem, ol i bung wantaim bilong pasim tok long wanem ol Lo God i givim long ol Israel em ol Kristen i mas bihainim. (Ritim Aposel 15:28, 29; 21:25.) Jehova i helpim ol long kliagut olsem blut em i bikpela samting long ai bilong em na ol i mas tingim olsem blut i samting holi. Ol Kristen long bipo i no ken kaikai o dring blut o kaikai mit em ol i no rausim gut blut bilong en. Sapos ol i mekim olsem, em i samting nogut wankain olsem pasin bilong lotuim god giaman o pasin pamuk. Kirap long dispela taim na i kam, ol Kristen tru i no kaikai blut o dring blut. Olsem wanem long nau? Jehova i laik yet bai yumi mas tingim blut olsem samting i holi.

13. Bilong wanem ol Kristen i no save kisim blut long haus sik?

¹³ Olsem wanem? Dispela i makim tu olsem ol Kristen i no ken kisim blut long haus sik? Yes, em i makim dispela tu. Jehova i tokim yumi long no ken kaikai o dring blut. Tingim, sapos dokta i tokim yu olsem yu no ken dring alkohol, bai yu kisim alkohol long rot bilong sut? Nogat! Na olsem tasol, dispela lo bilong no ken kaikai blut o dring blut i makim olsem yumi no inap kisim blut long haus sik.—Lukim Futnot long pes 222-223.

14, 15. Ol Kristen i gat wanem tingting long laip? Ol bai sakim lo bilong God na bai ol i ken stap laip longpela taim liklik? Stori long dispela.

¹⁴ Tasol olsem wanem sapos dokta i tokim yumi olsem yumi mas kisim blut, nogut yumi dai? Olgeta wan wan i mas skelim olsem ol bai bihainim lo bilong God long blut o nogat. Yumi ol Kristen i tingim laip em God i bin givim olsem gutpela presen, na yumi bai painim rot bilong kisim ol narapela marasin samting na bai yumi ken i stap laip; tasol yumi bai i no inap kisim blut.

¹⁵ Yumi wok strong long stap helti, tasol blut em as bilong laip na em i bikpela samting long ai bilong God, olsem na yumi no inap kisim blut. Em bikpela samting long bihainim tok bilong Jehova winim pasin bilong sakim tok bilong em bilong i stap laip longpela taim liklik. Jisas i tok: “Sapos man i laik holimpas laip bilong em yet, orait laip bilong em bai lus. Tasol sapos man i tingim mi na i lusim laip bilong em, orait bai em i kisim laip.” (Matyu 16:25) Yumi laik bihainim tok bilong Jehova, long wanem, yumi laikim em. Em i save long wanem samting i gutpela bilong helpim yumi, na yumi tingim laip i bikpela samting na i holi, wankain olsem tingting bilong Jehova.—Hibru 11:6.

16. Bilong wanem ol wokman bilong God i bihainim tok bilong em?

¹⁶ Ol gutpela wokman bilong God i strong long bihainim lo bilong em long blut. Ol bai no kaikai o dring blut na ol bai no kisim blut bilong stretim sik.a Tasol ol bai kisim ol narapela marasin bilong ol i ken stap laip. Ol i save olsem Man i as bilong laip na blut em i save long wanem samting bai helpim ol tru. Olsem wanem? Yu bilip olsem em i save long ol samting i gutpela bilong helpim yu?

17. Wanem wanpela rot tasol Jehova i orait long yusim blut long Israel?

¹⁷ Long Lo God i givim long Moses, Jehova i tokim ol Israel olsem: “Laip bilong olgeta man na animal i stap long blut. Na mi yet mi makim blut bilong mekim wok long alta, na bai yupela i ken karamapim sin bilong yupela yet [o, askim mi long fogivim yupela]. Long wanem, laip i stap long blut.” (Wok Pris 17:11) Taim ol Israel i mekim sin, Jehova inap lusim rong bilong ol taim ol i givim wanpela animal long pris long ofaim na pris bai kapsaitim sampela blut bilong en long alta long tempel. Dispela em wanpela rot tasol Jehova i orait long ol Israel long yusim blut.

18. Sakrifais bilong Jisas i opim rot long yumi ken kisim wanem samting?

¹⁸ Taim Jisas i kam long graun, em i senisim lo bilong givim animal olsem sakrifais taim em i givim laip bilong em o blut bilong em na bai God i ken fogivim ol sin bilong yumi. (Matyu 20:28; Hibru 10:1) Laip bilong Jisas i dia tru olsem na long rot bilong sakrifais bilong em, rot i op long Jehova i givim laip oltaim long ol man.—Jon 3:16; Hibru 9:11, 12; 1 Pita 1:18, 19.

19. Yumi mas mekim wanem na bai yumi “no gat asua long blut bilong wanpela man”?

¹⁹ Yumi tenkyu long Jehova long em i bin givim laip long yumi! Na yumi laik tokim ol manmeri olsem sapos ol i bilip long Jisas ol inap stap oltaim. Yumi laikim ol manmeri na yumi bai mekim olgeta samting yumi inap long mekim bilong skulim ol long rot bilong kisim laip. (Esekiel 3:17-21) Na olsem aposel Pol yumi inap tok: “Mi no gat asua long blut bilong wanpela man. Long wanem, mi no bin surik long tokim yupela long olgeta laik bilong God.” (Aposel 20:26, 27) Yes, yumi soim olsem yumi tingim laip na blut i bikpela samting taim yumi tokim ol arapela long Jehova na olsem wanem laip i bikpela samting long em.