“Kam Long Masedonia”

1-3. (a) Olsem wanem holi spirit i stiaim Pol na ol poroman bilong em? (b) Bai yumi skelim wanem ol samting?

SAMPELA meri i lusim taun bilong Filipai long Masedonia, na i no longtaim ol i kamap long wara Gengitis. Olsem ol i save mekim, ol i sindaun long arere bilong wara na beten long God bilong Israel. Jehova i lukluk long ol i stap.​—2 Sto. 16:9; Sng. 65:2.

² Long wankain taim, winim 800 kilomita long hap is bilong Filipai, sampela man i lusim taun Listra long hap saut bilong Galesia. Sampela de bihain, ol i kam kamap long bikrot em ol Rom i bin wokim long ston. Dispela rot i go olsem long hap wes bilong distrik Esia long ples we planti manmeri tru i stap long en. Ol dispela man—Pol, Sailas, na Timoti—i gat bikpela laik long bihainim dispela rot i go long Efesus na ol narapela taun we planti tausen manmeri i mas harim tok bilong Krais. Tasol paslain long ol i kirapim raun bilong ol, long sampela rot em Baibel i no kolim, holi spirit i stopim ol long autim tok long Esia. Bilong wanem? Long rot bilong spirit bilong God, Jisas i laik stiaim Pol na ol poroman bilong em long go olsem long Esia Maina, brukim solwara Ijien, na go kamap long wara Gengitis.

³ Pasin bilong Jisas long stiaim Pol na ol poroman bilong em long dispela narakain raun i go long Masedonia, inap skulim yumi long sampela samting long nau. Orait nau yumi ken skelim sampela bilong ol samting i bin kamap long namba 2 misineri raun bilong Pol, we i bin kirap long 49 C.E. samting.

4, 5. (a) Wanem samting i kamap long Pol na ol poroman bilong em klostu long Bitinia? (b) Ol disaipel i wokim wanem disisen? Wanem samting i kamap?

⁴ Holi spirit i pasim Pol na ol poroman bilong em long autim tok long Esia, olsem na ol i go long hap not, na ol i laik autim tok long ol taun bilong Bitinia. Bilong go long hap, ating ol i mas wokabaut inap sampela de long ol liklik rot namel long ol ples we i no gat planti man i stap long en long ol hap bilong Frigia na Galesia. Tasol taim ol i kam klostu long Bitinia, Jisas i yusim gen holi spirit long pasim ol. (Apo. 16:6, 7) Ating nau tingting bilong ol dispela man i paul, bikos ol i save long wanem tok ol i mas autim na olsem wanem ol bai autim, tasol ol i no save bai ol i autim tok we. Ol i laik autim tok long Esia—tasol rot i no op. Ol i laik autim tok long Bitinia—tasol dispela rot tu i no op. Tasol Pol i strong yet long painim rot bilong autim tok, em i mekim olsem i go inap long rot i op. Nau ol dispela man i wokim narapela kain disisen. Ol i tanim i go long hap wes na wokabaut inap 550 kilomita, ol i abrusim ol taun i go inap long ol i kamap long haba bilong Troas, em hap we ol inap kisim sip i go long Masedonia. (Apo. 16:8) Long dispela hap, em namba 3 taim bilong Pol long painim rot long autim tok, na nau rot i op!

⁵ Man bilong raitim Gutnius, em Luk, i joinim Pol na ol poroman bilong em long Troas, na em i stori long samting i kamap: “Long nait Pol i lukim wanpela visen long wanpela man Masedonia i sanap na singautim em na tok: ‘Kam long Masedonia na helpim mipela.’ Pol i lukim pinis dispela visen, na kwiktaim mipela i painim rot long go long Masedonia. Mipela i kisim tingting olsem God i bin singautim mipela long i go autim gutnius long ol.” a (Apo. 16:9, 10) Nau Pol i save long em i mas autim tok we. Em i amamas tru long em i no bin givap long dispela raun bilong em! Wantu tasol ol dispela man i kalap long sip na i go long Masedonia.

6, 7. (a) Yumi inap kisim wanem skul long samting i kamap long raun bilong Pol? (b) Ekspiriens bilong Pol inap strongim yumi olsem wanem?

⁶ Dispela stori inap lainim yumi long wanem samting? Tingim, spirit bilong God i mekim samting bihain long Pol i kirapim raun bilong em long Esia. Na Jisas i givim tok long Pol bihain long em i kamap klostu long Bitinia. Na bihain long Pol i kamap long Troas, Jisas i tokim em long go long Masedonia. Jisas em i Het bilong kongrigesen, na em inap mekim wankain pasin long yumi tu long nau. (Kol. 1:18) Olsem, ating yu bin tingting long mekim wok painia o go long hap i sot long ol man bilong autim tok. Tasol ating Jisas bai stiaim yu long rot bilong spirit bilong God bihain long yu kirap mekim sampela samting bilong winim mak yu bin putim. Bilong wanem i olsem? Tingim dispela tok piksa: Draiva inap tanim kar i go long han kais o han sut, tasol kar i mas muv na bai em inap mekim olsem. Na olsem tasol, Jisas inap stiaim yumi long mekim bikpela wok moa bilong autim tok sapos yumi mekim wok i stap—olsem wok strong long mekim ol samting bilong winim mak yumi bin putim.

⁷ Tasol olsem wanem sapos ol hatwok yumi mekim i no karim kaikai hariap? Olsem wanem? Bai yumi givap na ting olsem spirit bilong God i no stiaim yumi? Nogat. Tingim, ol samting i no bin kamap olsem Pol i bin tingting long en. Tasol em i wok yet long painim rot bilong autim tok i go inap long wanpela rot i op long em. Na olsem tasol, sapos yumi wok strong long painim ‘rot long mekim wok,’ orait ol gutpela samting inap painim yumi tu.​—1 Kor. 16:9.

 8. (a) Taun bilong Filipai i wanem kain? (b) Wanem gutpela samting i kamap taim Pol i autim tok long “ples bilong mekim beten”?

⁸ Bihain long Pol na ol poroman bilong em i kamap long distrik Masedonia, ol i go long Filipai—em wanpela taun we ol manmeri bilong en i sitisen bilong Rom, na dispela i bikpela samting long ol. Planti samting long Filipai i olsem long Rom, olsem na ol soldia bilong Rom husat i ritaia na sindaun long Filipai, ol i pilim olsem ol i stap long Rom. Ausait long banis bilong taun, ol misineri i lukim wanpela hap i stap arere long wara, em ol i ting em “ples bilong mekim beten.”b Long Sabat, ol i go daun long dispela hap na ol i lukim sampela meri i bung long hap bilong mekim lotu long God. Ol disaipel i sindaun na i kirap toktok long ol. Wanpela meri nem bilong em, Lidia, “i putim yau i stap na Jehova i opim bel bilong em.” Lidia i pilim tru ol tok em i kisim save long en long ol misineri, na em wantaim ol wanhaus bilong em i kisim baptais. Em i strong long Pol na ol poroman bilong em i kam stap long haus bilong em.c—Apo. 16:13-15.

 9. Olsem wanem planti long nau i bin bihainim pasin bilong Pol? Dispela i kamapim wanem ol blesing?

⁹ Tingim amamas i kamap taim Lidia i kisim baptais! Pol i amamas tru olsem em i bin bihainim dispela singaut long “kam long Masedonia,” na Jehova i mekim wok long em na ol poroman bilong em bilong bekim ol beten bilong ol dispela meri i daun long God! Long nau tu, planti brata na sista—yangpela na lapun, singel na marit—i go long ol ples we i sot long ol pablisa bilong autim tok bilong Kingdom. Tru, ol i karim ol hevi, tasol dispela i olsem samting nating taim ol i skelim wantaim amamas ol i kisim long bungim ol manmeri olsem Lidia, husat i kisim tok i tru bilong Baibel na bihainim. Olsem wanem? Yu inap mekim ol senis bambai yu inap go long ol teritori we i gat bikpela nid? Bai yu kisim planti blesing. Tingim Aaron, wanpela brata i gat 26 krismas samting. Em i bin go sindaun long wanpela kantri bilong Sentral Amerika. Em i kamapim wankain tingting olsem planti narapela taim em i tok: “Wok bilong autim tok long narapela kantri i bin helpim mi long kamap strong moa long tok i tru, na i helpim mi long pas gut moa wantaim Jehova. Na wok bilong autim tok i gutpela stret—mi lukautim 8-pela Baibel stadi!”

10. Olsem wanem wok bilong ol spirit nogut i mekim na ol man i birua long Pol na ol poroman bilong em?

¹⁰ Satan i belhat tru olsem gutnius i kamap long hap we ol manmeri i strong bihainim pasin bilong em na ol spirit nogut bilong em. Olsem na yumi no kirap nogut olsem Satan na ol spirit nogut i kirapim ol man long birua long Pol na ol poroman bilong em. Taim ol i wok long i go long ples bilong mekim beten, wanpela wokmeri i gat spirit nogut i wok long bihainim Pol na ol poroman bilong em na singaut olsem: “Ol dispela man i wokboi bilong God Antap Tru, na ol i autim tok long yupela long rot bilong God long kisim bek yupela.” Ol bosman bilong wokmeri i save kisim mani long rot bilong em long tokaut long ol samting bai kamap bihain. Ating dispela spirit nogut i kirapim meri long mekim dispela tok bambai ol man i ting ol tok meri i mekim na ol tok Pol i autim i kam long wanpela rot tasol. Dispela inap pulim tingting bilong ol manmeri na ol i no tingim tok bilong ol disaipel tru bilong Krais. Tasol Pol i pasim maus bilong dispela meri taim em i rausim spirit nogut long em.​—Apo. 16:16-18.

11. Bihain long ol i rausim spirit nogut long yangpela meri, wanem samting i painim Pol na Sailas?

¹¹ Taim ol bosman bilong wokmeri i kisim save olsem rot bilong ol long kisim isi mani i pinis, ol i belhat nogut tru. Ol i pulim Pol na Sailas i go long ples bung long maket, we ol majistret—em ol ofisa i mausman bilong gavman Rom—i save mekim kot. Ol bosman i mekim ol tok ol jas i wanbel long en, em ol i save luk daun long ol arapela lain na tingim moa yet lain bilong ol. Ol i tok: ‘Ol dispela Juda man i kirapim bikpela trabel taim ol i skulim ol man long ol kastam we yumi ol Rom i no bihainim.’ Tok bilong ol i kirapim ol man long mekim sampela samting. “Bikpela lain manmeri tu [long ples maket] i kirap birua long tupela [Pol na Sailas],” na ol majistret i tokim ol man “long paitim ol long kanda.” Bihain, ol i pulim Pol na Sailas i go long kalabus. Tupela i kisim bagarap na woda i tromoi ol long rum i stap insait tru long kalabus, na em i pasim lek bilong ol long hap plang. (Apo. 16:19-24) Taim woda i pasim dua bilong sel, ples i tudak nogut tru na Pol na Sailas i no inap lukim tupela yet. Tasol Jehova i wok long lukluk i stap.​—Sng. 139:12.

12. (a) Ol disaipel bilong Krais i gat wanem tingting taim ol man i mekim nogut long ol? Bilong wanem ol i ting olsem? (b) Satan na ol lain bilong em i bihainim yet wanem ol pasin long birua long lain bilong God?

¹² Sampela yia paslain long dispela, Jisas i bin tokim ol disaipel bilong em: “Ol bai mekim nogut long yupela.” (Jon 15:20) Olsem na taim Pol na ol poroman bilong em i go long Masedonia, ol i redi long ol man bai birua long ol. Taim ol man i kirap birua long ol, ol i kliagut olsem Satan i belhat long ol, na i no olsem Jehova i no orait long ol. Long nau, ol lain bilong Satan i mekim wok yet long ol wankain pasin olsem ol i bin mekim long Filipai. Sampela man i save sutim ol tok giaman long yumi long skul na long ples wok bilong kirapim ol narapela long birua long yumi. Long sampela kantri, ol man bilong lotu i birua long yumi na i sutim tok long yumi long kot na i olsem ol i tok: ‘Ol dispela Witnes i wok long kirapim trabel taim ol i wok long autim tok long ol kastam em mipela yet i no save bihainim.’ Long sampela hap, ol i paitim ol wanbilip bilong yumi na tromoi ol long kalabus. Tasol Jehova i wok long lukluk i stap.​—1 Pita 3:12.

13. Wanem samting i kirapim woda long askim: “Mi mas mekim wanem na bai God i kisim bek mi?”

¹³ Pol na Sailas i nidim liklik haptaim bambai bel na tingting bilong ol i ken stap isi gen bihain long hevi i bin painim ol long dispela de. Long biknait ol i pilim orait gen na ol i kirap “beten na mekim ol singsing bilong litimapim nem bilong God.” Na wantu, graun i guria na seksekim kalabus! Woda i kirap long slip na em i lukim ol dua bilong kalabus i op. Em i pret, nogut ol kalabus i ranawe pinis. Em i save olsem em bai kisim strafe long larim ol kalabus i ranawe, olsem na em “i kisim bainat bilong em na i laik kilim em yet.” Tasol Pol i singaut: “No ken bagarapim yu yet. Mipela olgeta i stap!” Dispela woda husat i tingting planti i askim olsem: “Ol bikman, mi mas mekim wanem na bai God i kisim bek mi?” Pol na Sailas i no inap kisim bek em; Jisas wanpela tasol inap. Olsem na ol i tok: “Bilip long Bikpela Jisas na God bai kisim bek yu.”​—Apo. 16:25-31.

14. (a) Pol na Sailas i givim wanem helpim long woda? (b) Pol na Sailas i kisim wanem blesing taim ol i amamas na karim hevi long ol man i mekim nogut long ol?

¹⁴ Yu ting woda i siries taim em i mekim dispela askim? Pol i save olsem tru tru dispela woda i laik kisim save. Dispela woda em i man bilong arapela lain, na em i no klia long ol tok i stap long buk bilong God. Olsem na paslain long em i kamap wanpela Kristen, em i mas kisim save na bilip long ol bikpela tok i tru bilong Baibel. Olsem na Pol na Sailas i lusim sampela haptaim long “autim tok bilong Jehova long em.” Tupela i givim bel long skulim woda long ol tok i stap long buk bilong God, na ating ol i lus tingting long skin pen ol i bin kisim. Tasol woda i luksave long ol dip kat long baksait bilong tupela na em i wasim ol dispela kat. Na kwiktaim bihain woda na ol wanhaus bilong em “i kisim baptais.” Tru tumas, Pol na Sailas i kisim blesing taim ol i amamas na karim hevi long ol man i mekim nogut long ol!​—Apo. 16:32-34.

15. (a) Olsem wanem planti Witnes long nau i bin bihainim pasin bilong Pol na Sailas? (b) Bilong wanem yumi mas go yet na lukim ol man long teritori bilong yumi?

¹⁵ Olsem Pol na Sailas, planti Witnes long nau i bin autim gutnius taim ol i stap long kalabus bikos ol i holimpas bilip bilong ol, na dispela i kamapim gutpela samting. Olsem, long wanpela kantri we ol i bin tambuim ol wok bilong yumi, inap 40 pesen bilong ol Witnes i stap long hap i bin lainim tok i tru bilong Jehova taim ol i stap long kalabus! (Ais. 54:17) Tingim tu olsem woda i bin askim long kisim helpim bihain long graun i guria. Olsem tasol, sampela long nau husat i no bin laik harim tok bilong Kingdom, ating taim wanpela bikpela hevi i painim ol, dispela inap mekim na nau ol i laik harim tok. Taim yumi givim bel long go yet na lukim ol man long teritori bilong yumi, yumi soim olsem yumi redi long skulim ol taim ol i redi long kisim helpim long yumi.

16. Long de bihain long ol i bin paitim Pol na Sailas, olsem wanem hevi i go bek long ol majistret?

¹⁶ Long neks moning bihain long ol bin paitim Pol na Sailas, ol majistret i tokim ol man long larim tupela i go. Tasol Pol i tok: “Mitupela i man bilong Rom, mipela i no sanap yet long kot na ol i paitim mipela nating long ai bilong ol man na putim mipela long kalabus. Na nau ol i laik hait na rausim mipela, a? Nogat tru! Ol yet i mas kam na kisim mipela i go ausait.” Taim ol majistret i kisim save olsem dispela tupela man i sitisen bilong Rom, ol “i pret” bikos ol i no bin tingim raits bilong dispela tupela man.d Nau hevi i go bek long ol majistret. Ol i bin paitim tupela long ai bilong ol man, olsem na nau ol majistret i mas tok sori long ol long ai bilong ol man. Ol i askim Pol na Sailas long lusim Filipai. Tupela disaipel i bihainim tok bilong ol, tasol pastaim ol i lusim sampela haptaim long strongim ol nupela disaipel.

17. Ol nupela disaipel inap lainim wanem bikpela samting taim ol i lukim Pol na Sailas i sanap strong na karim hevi?

¹⁷ Sapos ol i bin rispektim raits bilong Pol na Sailas olsem sitisen bilong Rom, ating ol i no inap paitim ol. (Apo. 22:25, 26) Tasol dispela inap mekim na ol disaipel long Filipai bai ting olsem tupela i yusim namba bilong ol long abrusim hevi long stap disaipel bilong Krais. Dispela bai mekim wanem long bilip bilong ol disaipel husat i no sitisen bilong Rom? Lo i no inap banisim ol. Olsem na taim Pol na Sailas i karim dispela hevi, tupela i soim ol nupela bilipman olsem ol disaipel bilong Krais inap sanap strong taim ol man i mekim nogut long ol. Na tu, taim Pol na Sailas i strong long ol majistret i mas luksave long raits bilong ol olsem sitisen bilong Rom, tupela i laik bai ol majistret i tokaut long ai bilong ol man olsem ol majistret yet i bin brukim lo. Dispela inap pasim ol long mekim nogut long ol wanbilip bilong Pol. Na long sait bilong lo, dispela inap banisim ol disaipel long kain hevi olsem long bihain.

18. (a) Olsem wanem ol wasman Kristen long nau i bihainim pasin bilong Pol? (b) Olsem wanem yumi “strongim sait bilong gutnius long rot bilong kot” long nau?

¹⁸ Long nau, ol wasman bilong kongrigesen Kristen i stiaim ol bratasista long rot bilong stap gutpela piksa. Ol i redi long mekim ol samting em ol i laik bai ol wanbilip i mekim. Olsem Pol, yumi tu i mas skelim gut olsem wanem na long wanem taim yumi ken yusim raits bilong yumi bilong kisim helpim long sait bilong lo. Sapos i gat wok long mekim, yumi ken apil long distrik kot, nesenel kot, o intenesenel kot bilong kisim tok orait long mekim yet wok lotu bilong yumi. Yumi no gat tingting long stiaim wok bilong gavman, nogat. Yumi gat tingting long “strongim sait bilong gutnius long rot bilong kot,” olsem Pol i bin tokim kongrigesen Filipai inap 10-pela yia bihain long em i bin stap kalabus long hap. (Fili. 1:7) Maski kot i wokim wanem disisen, yumi mas tingting strong long “autim gutnius” long wanem wanem hap spirit bilong God i stiaim yumi long en, olsem Pol na ol poroman bilong em i bin mekim.​—Apo. 16:10.