LESEN 07
Jehova Em i Wanem Kain Man?
Taim yu tingim Jehova God, yu tingim wanem samting? Yu tingim em olsem bikpela man tumas, na em i stap longwe long yu, olsem ol sta i stap long wanpela galaksi i stap longwe tru? O yu tingim em olsem em i no wanpela man tru, tasol olsem wanpela samting i gat bikpela strong, kain olsem bikpela win na tanda? Jehova em wanem kain man tru? Long rot bilong Tok bilong em, Baibel, Jehova i kamapim sampela pasin bilong em, na tu, em i kamapim olsem em i save tingim yu.
1. Wai na yumi no inap lukim God?
“God em i wanpela Spirit.” (Jon 4:24) Jehova i no gat bodi olsem yumi ol man. Em i wanpela Spirit i stap long heven, em ples yumi no inap lukim.
2. Wanem sampela pasin bilong Jehova?
Maski yumi no inap lukim Jehova, em Man i stap tru na em i gat ol gutpela pasin we i mekim na ol man i save long em i laikim em. Baibel i tok: “Jehova i save laikim stretpela pasin, na em bai i no inap givim baksait long ol man i stap gut long em.” (Buk Song 37:28) Na tu, em “i gat pasin bilong sori tru na marimari,” moa yet long ol man i karim pen na hevi. (Jems 5:11) “Jehova i save stap klostu long ol manmeri em hevi i daunim tru ol; na em i save kisim bek ol manmeri bel bilong ol i bagarap.” (Buk Song 34:18) Na yu save olsem Jehova inap pilim amamas o bel hevi long ol samting yumi mekim? Man i mekim ol pasin nogut i save mekim God i bel hevi. (Buk Song 78:40, 41) Tasol man i mekim stretpela pasin i save mekim em i amamas.—Ritim Provep 27:11.
3. Olsem wanem Jehova i soim olsem em i laikim yumi?
Nambawan pasin bilong Jehova em pasin laikim. Baibel i tok: “God em i pasin laikim.” (1 Jon 4:8) Jehova i kamapim pasin laikim bilong em long rot bilong Baibel, na tu, long ol samting em i wokim. (Ritim Aposel 14:17.) Olsem, skelim hau em i wokim yumi. Em i wokim yumi gut na yumi inap lukim ol naispela kala, harim ol gutpela musik, na teistim ol switpela kaikai. Em i laik bai yumi stap amamas.
KISIM SAMPELA SAVE MOA
Kisim save long Jehova i yusim wanem samting long mekim ol wok bilong em. Na skelim hau Jehova i kamapim ol gutpela pasin bilong em.
4. Holi spirit—strong bilong God long mekim ol wok
Olsem yumi save yusim han bilong yumi long mekim wok, Jehova i yusim holi spirit bilong em. Baibel i kamapim olsem holi spirit em strong bilong God long mekim wok, na i no wanpela man. Ritim Luk 11:13 na Aposel 2:17, na stori long ol dispela askim:
God bai “kapsaitim” holi spirit bilong em long ol man i askim long en. So, yu ting holi spirit em wanpela man, o strong bilong God long mekim wok? Wai na yu tok olsem?
Jehova i yusim holi spirit long mekim ol narakain wok. Ritim Jop 33:4 na 2 Pita 1:20, 21, na stori long dispela askim:
Jehova i yusim holi spirit bilong em long wanem sampela rot?
5. Jehova i gat ol gutpela pasin
Moses em gutpela wokman bilong God, tasol em i laik save gut long Krieta bilong em. So Moses i tokim em: “Skulim mi long pasin bilong yu, na bai mi ken save gut long yu.” (Kisim Bek 33:13) Bilong bekim tok, Jehova i kamapim sampela gutpela pasin bilong Em long Moses. Ritim Kisim Bek 34:4-6, na stori long ol dispela askim:
Jehova i kamapim wanem ol pasin bilong em long Moses?
Yu pilim tru wanem ol pasin bilong Jehova?
6. Jehova i save tingim tru ol man
Lain bilong God, em ol Hibru, i bin wok sleiv long Isip. Taim ol i karim ol pen na hevi, Jehova i pilim olsem wanem long dispela? Pilaim ODIO na bihainim, o ritim Kisim Bek 3:1-10. Stori long ol dispela askim.
Dispela stori i skulim yumi long Jehova i save pilim olsem wanem taim ol man i karim pen na hevi?—Lukim ves 7 na 8.
Yu ting Jehova i laik tru long helpim ol man na em inap long mekim olsem? Wai na yu ting olsem? O wai na yu ting nogat?
7. Olgeta samting long graun i kamapim klia ol pasin bilong Jehova
Jehova i kamapim klia ol pasin bilong em long rot bilong ol samting em i wokim. Pilaim VIDIO. Bihain ritim Rom 1:20, na stori long dispela askim.
Yu lukim wanem ol pasin bilong Jehova long ol samting em i wokim?
SAMPELA MAN I TOK: “God i no save tingim mi.”
Yu ting wanem?
Wai na yu ting olsem?
OL BIKPELA POIN
Jehova em wanpela Spirit yumi no inap lukim na em i gat planti gutpela pasin, nambawan em pasin laikim.
Riviu
Wai na yumi no inap lukim Jehova?
Holi spirit em wanem samting?
Wanem sampela pasin bilong Jehova?
MEKIM WOK PAINIMAUT
Save gut moa long Jehova long rot bilong kisim save long 4-pela bikpela pasin bilong em.
Skelim ol evidens i soim olsem Jehova i no wanpela samting i stap long olgeta samting.
Lukim wai na Baibel i kolim holi spirit olsem han bilong God.
Wanpela aipas man i hatwok long bilip olsem God i tingim em. Kisim save long samting i senisim tingting bilong em.
“Nau Mi Inap Long Helpim Ol Narapela” (Wastaua, Oktoba 1, 2015)