Olsem Wanem? Ol Kristen i Mas Bihainim Wanpela De Bilong Malolo?

BIKPELA ren moa yet i bin pundaun long mun Jun. Dispela samting i mekim na long 1991, long taim bilong mekim resis bilong pilai tenis long Wimbeldon (Inglan), ol i sakim wanpela pasin ol man i save bihainim, kirap long bipo yet. No gat wanpela taim bipo ol man i mekim pilai long Sande, nogat; tasol nau ol i mekim, long wanem, taim i sot, na no gat narapela hap taim bilong pilai. Wan wan taim tasol ol i bin senisim nabaut sampela lo olsem dispela, tasol long Inglan na long planti narapela kantri tu, Sande i stap yet olsem de holi bilong malolo.

Sampela man i bihainim narapela de bilong malolo. Ol Juda long olgeta hap bilong graun ol i strong long bihainim lo bilong Sabat, kirap long taim san i go daun long Fraide i go inap long taim san i go daun long Sarere. Long Israel long de Sabat, ol balus i no raun, na long sampela taun, ol PMV samting i no raun. Long Jerusalem, ol man i strong long bihainim pasin bilong ol tumbuna, ol i save pasim sampela rot bambai ol ka samting i no ken ran long en.

Planti lotu i bihainim yet wanpela de bilong malolo o sabat, na dispela i kamapim sampela askim olsem: Ol Juda tasol i mas bihainim lo bilong Sabat? Bilong wanem planti lotu i gat nem Kristen ol i bin kisim narapela de bilong malolo? Lo bilong Baibel bilong malolo long wanpela de long olgeta wik, dispela lo i stap yet o olsem wanem?

Lo Bilong Sabat i Bin Stap Olgeta Taim?

Namba wan taim Baibel i stori long sabat em long hap bilong Kisim Bek. Taim ol Israel i stap long ples wesan nating, Jehova i wokim mirakel na givim kaikai olsem mana long ol. Long de namba 6 long olgeta wik ol i mas bungim kaikai bilong tupela de, long wanem, de namba 7 em “de bilong Bikpela,” na i tambu long mekim wok long dispela de.​—⁠Kisim Bek 16:​4, 5, 22-25.

Na tu, God i givim lo bilong Sabat long ol Israel bambai ol inap tingim dispela taim ol i bin wok kalabus long Isip. Tasol sapos ol i bin bihainim lo bilong Sabat taim ol i no lusim yet Isip, orait, dispela lo bai i no inap kirapim tumas tingting bilong ol olsem. Olsem na ol lo bilong bosim ol samting bilong de Sabat, God i givim long lain Israel tasol.​—⁠Lo 5:​2, 3, 12-15.

Ol Liklik Liklik Lo i Save Putim Hevi Long Man

Lo bilong Moses i no kolim ol liklik liklik samting bilong Sabat, olsem na insait long planti handet yia i kamap i go pinis, ol tisa bilong lotu Juda i bin kamapim planti ol liklik liklik lo bilong ol yet i tambuim olgeta kain wok long de Sabat. Buk bilong ol dispela lo, em Mishnah, i putim tambu long 39 bikpela samting olsem wok bilong samap, na wok bilong rait, na wok gaden. Planti bilong ol dispela lo ol i no bin kisim long Baibel. Wanpela bikpela buk (Encyclopædia Judaica) i kamapim sampela tok bilong buk Mishnah, na i tokaut olsem ol dispela tambu i olsem ‘ol maunten i hangamap i stap long wanpela gras bilong het bilong man, long wanem, ol tambu ol man i kamapim ol i planti tru, tasol Baibel i no kolim planti samting.’

Long Kisim Bek 16:​29, Baibel i tok: “Long de namba 7 olgeta manmeri i mas i stap long haus sel. I no gat wanpela man o meri i ken lusim banis bilong en.” Sampela man i tok, mak bilong banis em inap olsem 900 mita samting. Tasol ol tisa bilong lotu Juda i putim sampela lo na bai ol inap kalapim dispela mak, olsem: Sapos long apinun paslain long de Sabat, man i putim kaikai bilong Sabat i stap lusim haus i go inap 900 mita, orait, mak bilong dispela 900 mita bai i kamap olsem arere bilong banis bilong em, na kirap long dispela mak em i ken skruim narapela 900 mita moa.

Planti bilong ol dispela lo ol man i bin putim ol i stap yet long taim bilong Jisas. Olsem na ol bikman bilong lotu i gat tok long ol disaipel bilong Jisas, ol i bin wokabaut namel long gaden wit na kisim pikinini bilong wit na kaikai. Ol i tok ol i brukim lo bilong Sabat​—⁠ol i ting pasin bilong kisim pikinini bilong wit i olsem wok bilong bungim wit long gaden, na pasin bilong rapim long han i olsem wok bilong wilwilim. Planti taim Jisas i kamapim tingting kranki bilong ol, long wanem, tingting bilong ol i no stret wantaim as bilong dispela lo Jehova i putim.​—⁠Matyu 12:​1-8; Luk 13:​10-17; 14:​1-6; Jon 5:​1-16; 9:​1-16.

Sande i Senisim Sarere Bilong Bihainim De Sabat

Misin Katolik i tingim Namba 4 Lo bilong Sabat, na kamapim tok olsem: “Sande em de bilong givim bel long mekim wok bilong God.” Wanpela buk (Catéchisme pour adultes) i stori long dispela olsem: ‘Sande, em de ol Kristen i kisim malolo, em i kamap wanpela de bihain long de Sabat long de namba 8, em olsem de namba wan bilong nupela samting i kamap. Sande bilong ol Kristen i wankain liklik olsem de Sabat, tasol Sande em de bilong tingim Pasova bilong Krais.’ Wanem samting i mekim na ol i lusim Sarere bilong mekim sabat na ol i makim Sande?

Tru Sande em de Jisas i bin kirap bek, tasol ol Kristen bilong bipo i tingim Sande i olsem de bilong mekim wok, wankain long ol narapela de. Tasol long wanpela kibung lotu long Laodisia (yia 350-390 samting) ol i kamapim wanpela lo bilong ol yet, na em i kamapim klia olsem sabat ol “Kristen” i bihainim long Sande i bin kamap isi isi olsem senis bilong Sabat ol Juda i bihainim long Sarere. Dispela lo i “tambuim ol Kristen long bihainim pasin bilong ol Juda na long malolo long de Sabat [bilong ol Juda], na ol i mas tingim de bilong Bikpela [em de Jisas i kirap bek].” Kirap long dispela taim na i go, ol man i bihainim ol lotu ol i kolim Kristen ol i mas wok long Sarere, na long Sande ol i no ken mekim wok. Bihain ol dispela misin i tokim lain bilong ol long ol i mas go long Misa long Sande.

I no longtaim na long ol hap i gat nem Kristen, ol i tambuim ol man long mekim wok long Sande, na gavman i orait long dispela samting. Kirap long yia 500 na i kam, ol i givim strafe long man i wok long Sande, olsem: Man i mas baim kot o kisim kanda, na kot inap kisim ol bulmakau bilong em. Na sampela taim, sapos man i no tanim bel, orait kot i makim em bilong wok kalabus.

I gat ol lo i makim wanem wanem wok i orait long mekim long Sande, na ol i planti olsem ol lo ol tumbuna i bin kamapim bilong bosim de Sabat bilong ol Juda. Wanpela buk (Dictionnaire de théologie catholique) i gat lista bilong wanem wanem wok i tambu long mekim, olsem wok bilong skin, na wok gaden, na wok bilong haus kot samting, na wok bilong maket, na wok bilong painim abus.

Ol i tok, Sabat bilong ol Juda i as na ol i putim ol dispela tambu. Wanpela buk (New Catholic Encyclopedia) i kamapim ol lo em King Salemein i bin putim bilong malolo long Sande, olsem: ‘Maski Jerom na Bung bilong Olens (yia 538) i tokaut long Sabat i olsem samting bilong ol Juda na i no samting bilong ol Kristen, Salemein long yia 789 em i putim lo i tambuim olgeta wok bilong skin long Sande​—⁠ol kain wok olsem i brukim [ol Tenpela Lo.]’ Taim gavman i makim Sande i olsem de bilong malolo, misin Katolik i amamas na larim ol i putim ol dispela tambu, maski ol i tok lo bilong Sabat i as na ol i putim ol dispela tambu​—⁠em dispela lo bilong Moses em misin i sakim.

Ol i No Bihainim Tok Bilong Baibel

Inap planti handet yia paslain long taim bilong Salemein, sampela Tisa Kristen, olsem Ogastin, ol i tok, Sabat em bilong ol Juda tasol na em bilong i stap inap liklik hap taim tasol. Taim ol i mekim tok olsem, ol i bihainim tok bilong Nupela Testamen i tok, Sabat em wanpela lo i stap insait long Lo bilong Moses, em dai bilong Jisas i pinisim.​—⁠Rom 6:14; 7:6; 10:4; Galesia 3:​10-14, 24, 25.

Wanpela buk (Vocabulaire biblique) i kamapim tok bilong wanpela tisa Talatala (Oscar Cullmann), olsem: ‘Jisas i kam daun long graun na em i dai na kirap bek, olsem na em inapim ol bikpela de bilong Olpela Testamen, na sapos yumi bihainim yet ol dispela de, i olsem yumi stap aninit yet long Lo bilong Moses, na i olsem Krais i no kam yet.’ Olsem wanem? I stret ol i subim ol man long bihainim de Sabat?

Long nau sampela Katolik bilong raitim ol buk ol i kolim tok bilong Aposel 20:7 i stori long “namba wan de bilong wik” (Sande), taim Pol i bung wantaim ol Kristen bilong kaikai wantaim ol. Tasol no gat wanpela hap tok long dispela ves o long ol narapela ves bilong Baibel i makim olsem dispela samting Pol i mekim i stap olsem piksa bilong ol Kristen i mas bihainim. Tru tumas, pasin bilong bihainim lo bilong Sabat long Sande i no gat as bilong en long Baibel.

I Gat Wanem Malolo Bilong Ol Kristen?

Tru, God i no tok ol Kristen i mas bihainim wanpela de bilong malolo, tasol God i singautim ol Kristen long bihainim narapela kain malolo. Pol i stori gut long dispela samting long ol brata Kristen Juda bilong em, olsem: “Ol manmeri bilong God bai i gat malolo i stap yet, em i olsem malolo bilong de Sabat. . . . Yumi mas wok strong bilong i go insait long dispela ples malolo.” (Hibru 4:​4-11) Taim ol dispela Juda i no kamap Kristen yet, ol i bin bihainim gut Lo bilong Moses. Tasol nau, Pol i no tokim ol long bihainim Lo bilong Moses na bai God i kisim bek ol, nogat; em i kirapim ol long “malolo” long ol wok ol i mekim i no gat laip long en. Olsem na ol i mas bilip long ofa bilong Jisas, em tasol i rot bilong ol man inap kamap stretpela man long ai bilong God.

Yumi long nau i ken mekim wanem bilong kamapim klia olsem yumi bihainim dispela tok bilong God? Olsem ol narapela man, ol Witnes Bilong Jehova long planti kantri ol i amamas long gavman i makim wanpela de long olgeta wik bilong ol i ken malolo long wok mani. Dispela i helpim skin bilong ol na ol i gat taim bilong bung wantaim famili bilong ol na kisim malolo na strong. Tasol bikpela samting moa i olsem: Ol i gat taim bilong mekim wok Kristen. (Efesus 5:​15, 16) Ol dispela wok Kristen i olsem go long ol miting, na autim tok, na helpim ol narapela long kisim save long ol tok bilong Baibel, olsem liklik taim gutaim bai kamap long olgeta hap bilong graun na ol man i bilip bai ol i stap bel isi. Sapos yu laik kisim save long dispela samting, ol Witnes Bilong Jehova bai amamas long helpim yu, maski em Sarere o Sande o narapela de bilong wik.

[Piksa long pes 28]

Jisas i bihainim gut lo bilong Sabat, em i no bihainim ol lo bilong ol tumbuna bilong ol Juda

[Piksa long pes 29]

Wok Kristen i givim malolo na strong long ol Kristen long ol de ol i malolo long wok mani