Askim
◼ Long Rom 7:19, Pol i stori long “gutpela pasin” em i no inap bihainim. Em i stori long wanem “gutpela pasin”?
Pol i stori long olgeta gutpela pasin em Lo bilong Moses i tok ol man i mas bihainim. Pol na olgeta narapela man, na yumi tu, i no inap bihainim ol dispela gutpela pasin, long wanem yumi olgeta i gat sin. Tasol yumi no ken bel hevi na ting yumi no gat rot. Ofa bilong Krais i opim rot bambai God i ken lusim tingting long sin bilong yumi na yumi inap i stap gutpela long ai bilong em.
Rom 7:19 i tok: “Gutpela pasin mi laik mekim, em mi no save mekim. Na pasin nogut mi no laik mekim, em mi save mekim.” Taim yumi lukim ol ves klostu long dispela, yumi save, Pol i stori long “gutpela pasin” Lo bilong Moses i tok ol man i mas bihainim. Long ves 7 Pol i bin tok: “Sapos lo i bin kirapim laik nogut long yumi na yumi mekim sin, orait bai yumi tok wanem? Lo em i samting nogut olsem sin yet, a? Nogat tru. Tasol sapos lo i no i stap bilong helpim mi long save long wanem ol pasin i nogut, orait bai mi no inap save sin em i wanem samting. Lo i tok olsem, ‘Yu no ken mangalim ol samting bilong narapela man.’ Sapos lo i no tok olsem, orait mi no inap save, dispela pasin bilong mangal, em i pasin nogut.” Ol man i no inap bihainim olgeta tok bilong Lo, olsem na tru tumas, Lo i kamapim klia olsem olgeta man i gat sin.
Pol i tok, “Taim mi no save yet lo bilong God, mi bin i stap laip.” Pol i stori long wanem taim? Em i stori long taim bilong Abraham, taim God i no givim yet Lo long lain bilong em. Tru long dispela taim Pol i no kamap yet, tasol Abraham i tumbuna bilong em na em i stap long bodi bilong tumbuna. (Rom 7:9; lukim tu Hibru 7:9, 10.) Abraham i gat sin, tasol long taim bilong em Lo i no kamap yet, olsem na sapos em i no bihainim gutpela pasin ol dispela planti planti lo i kolim, em i no save em i mekim sin. Orait, taim Lo i kamap pinis na i kamapim klia sin bilong ol man, ating Lo i mekim wok nogut, a? Nogat. Pol i tok moa olsem: “Orait bai yumi tok wanem long lo? Lo bilong God, em i kam long God yet. Na olgeta tok i stap long lo, em tu i samting bilong God yet, na em i stretpela na i gutpela.”—Rom 7:12.
Pol i tok Lo em i “samting bilong God yet” na “i gutpela.” Na long ol ves i kamap bihain long dispela Pol i tok, “dispela gutpela samting”—em Lo—i kamapim klia olsem em i gat sin na i stret em i mas i dai. Pol i tok: “Gutpela pasin mi laik mekim, em mi no save mekim. Na pasin nogut mi no laik mekim, em mi save mekim. Orait pasin mi no laikim, dispela mi save mekim. Olsem na i no mi yet mi mekim dispela. Nogat. Sin i stap insait long mi, em tasol i mekim.”—Rom 7:13-20.
Olsem na Pol i no stori long olgeta kain gutpela pasin, olsem gutpela pasin yumi inap mekim bilong helpim narapela man. (Lukim Aposel 9:36; Rom 13:3.) Em i stori long pasin bilong bihainim gutpela Lo bilong God na em i tok, sapos man i bihainim, em i mekim “gutpela pasin,” na sapos em i no bihainim, em i mekim “pasin nogut.” Bipo Pol i bin givim bel tru long bihainim lotu bilong ol Juda—na sapos yumi skelim dispela pasin bilong em wantaim pasin bilong ol narapela yumi ken tok, em i “no gat asua.” Long tingting em i aninit olgeta long dispela gutpela Lo, tasol em i no inap bihainim tru olgeta tok bilong Lo. (Filipai 3:4-6) Lo i kamapim ol stretpela pasin bilong God na i soim Pol, long bodi em i stap aninit yet long lo bilong sin na em i bilong i dai. Tasol Pol i tenkyu long God, long wanem, long rot bilong ofa bilong Krais, God inap kolim em stretpela man. Ofa bilong Krais i baim bek em long lo bilong sin na pe bilong sin, em dai.—Rom 7:25.
Ol Kristen long nau ol i no aninit long Lo bilong Moses, long wanem, dispela Lo i pinis taim ol i nilim Jisas long pos pen. (Rom 7:4-6; Kolosi 2:14) Tasol yumi no ken ting i gat planti tumas lo long dispela Lo bilong Moses na i hatwok long ol man i bihainim na i no gat wok long yumi tingim. Nogat. Lo i gutpela. Olsem na yumi mas kaunim ol hap bilong Baibel em Lo i stap long en, na bai yumi inap kisim save long ol samting God i bin tokim lain Israel long mekim. Klostu nau bai ol Witnes Bilong Jehova long olgeta hap bilong graun i kirap long kaunim ol dispela hap bilong Baibel, long wanem, sedyul i makim olsem kaunim bilong olgeta wik.
Taim yumi kaunim ol tok bilong Lo, yumi mas tingim as bilong ol dispela lo na ol gutpela samting i bin painim lain bilong God taim ol i wok long bihainim ol dispela gutpela lo. Na yumi mas save, yumi gat sin, na maski yumi wok strong long bihainim tru olgeta gutpela tok bilong Baibel yumi kisim save long en, yumi no inap mekim. Long olgeta taim yumi mas wok long daunim lo bilong sin i stap long bodi bilong yumi. Tasol yumi ken amamas, long wanem, klostu nau bai God i mekim wok long ofa bilong Krais na kisim bek yumi.