‘Ol Man i Bin Strongim Bel na Karim Hevi Ol i Ken Amamas’
1. Bihain long yia 1914 wanem samting i bin kamap long graun na i truim tok bilong Matyu 24:3-8? Lig ov Nesen na Yunaitet Nesen i lus long mekim wanem wok ol man i tok bai ol i mekim?
WANPELA man i raitim buk na em i stori long dispela taim nau na em i tok, ‘Kirap long yia 1914 na i kam inap long nau, long wan wan yia tasol i no gat pait long graun na i olsem i gat wanpela Pait Bilong 75 Yia.’ (Buk The Present Age, bilong Robert Nisbet.) Tru tumas, Jisas i bin tok profet olsem nau long las taim bai i gat pait na “tok win long ol bikpela pait,” na bai ol bikpela pait bilong olgeta hap i kamap. (Matyu 24:3-8) Ol man i bin kamapim wanpela oganaisesen long yia 1920 bilong “pinisim pait inap long olgeta taim bihain,” em Lig ov Nesen. Tasol sori tru! Dispela oganaisesen i lus tru long mekim wok bilong en! Olsem na long yia 1945 ol man i bin kamapim Yunaitet Nesen “bilong helpim ol lain i kamap bihain long abrusim hevi bilong pait.” Tasol wanpela buk i tok, ‘Bihain long Namba 2 Bikpela Pait, long olgeta taim i gat pait long sampela hap bilong graun.’—Buk Fires All Around the Horizon, bilong Max Harrelson.
2. Sampela man i lukim ol samting nogut i kamap long graun na ol i tok wanem? Tasol yumi mas tingim wanem ol askim?
2 Na i gat ol narapela samting nogut i kamap long nau, olsem pasin bilong pretim ol man na bagarapim ol, na pasin bilong giaman, na planti man i stap rabis, na ol i kisim drak, na kain kain sik i painim ol. Olsem na ating sampela man bai tok: ‘Olsem wanem ol man inap karim ol dispela hevi?’ Tasol bikpela samting moa yumi mas tingim, em olsem: ‘Olsem wanem God i bin karim hevi ol man i putim long em, em ol i bagarapim ol samting em i bin wokim hia long graun? Inap hamas yia moa bai em i larim ol man nogat i bagarapim dispela graun na bagarapim nem bilong em?’
3. (a) Profet Aisaia i bin mekim wanem askim? Bilong wanem em i bin mekim? (b) Jehova i bekim wanem tok long em? Orait, olsem wanem long taim bilong yumi?
3 Profet Aisaia i bin mekim wankain askim. Jehova i salim Aisaia i go long ol wantok bilong em bilong autim tok bilong Jehova long ol. Tasol Jehova i toksave long Aisaia olsem ol i no ken harim tok bilong Aisaia o tok bilong dispela God em i bin salim Aisaia i go long ol. Olsem na Aisaia i askim olsem: “Bikpela, mi bai mekim dispela wok i go inap wanem taim?” Yes, Aisaia i mas autim tok long dispela lain bilong bikhet i go inap long wanem taim? Ol i mekim pasin nogut tru—ol i no laik harim tok bilong Jehova—orait inap long wanem taim bai Jehova i larim ol i mekim olsem? Jehova i bekim tok, olsem: “Inap long taim olgeta taun i bagarap na graun i bagarap na ol haus i stap nating, na i no gat man moa i stap long ol.” (Aisaia 6:8-11) Olsem tasol long nau, God bai larim ol man i mekim kain pasin nogut olsem i go inap long taim em i makim pinis bilong givim strafe long ol lain bilong dispela graun, na ol lain i gat bikpela asua moa em ol lain ol i kolim Kristen, tasol ol i no bin stap gut long God.
4. Jop i sanap strong na wanem samting i bin painim em? Orait, olsem wanem long yumi long nau?
4 Inap longtaim pinis, Jehova i bin larim Satan i sutim tok long em. Inap olsem 3,600 yia bipo gutpela man Jop tu i bin karim dispela hevi. Satan i sutim tok long em na i tok, sapos traim i painim em bai em i lusim Jehova. Tasol Jop i stap gut long Jehova. Dispela samting i mekim bel bilong Jehova i amamas! (Jop 2:6-10; 27:5; Sindaun 27:11) Bihain brata bilong Jisas, em Jems, em i tok: “Harim. Yumi save tok olsem, ‘Ol man i bin strongim bel na karim hevi, ol i save stap gut na amamas i stap.’ Yupela i harim pinis stori bilong Jop, em i bin strongim bel na karim olgeta hevi i kamap long em. Na yupela i save, bihain Bikpela i bin mekim gutpela pasin long em. Yes, yumi save, Bikpela em i save sori moa yet long yumi, na oltaim em i save marimari long yumi.” Long nau tu, ol man i sanap strong wantaim Jehova, ol i ken amamas.—Jems 5:11.
5. Jisas i tok wanem na yumi save, lain bilong God long nau ol i mas karim hevi na sanap strong? Taim ol i mekim wanem wok bai ol i karim hevi na ol i mas stap strong?
5 Jisas i tokaut klia olsem lain bilong God long nau ol i mas karim hevi na sanap strong. Em i mekim tok profet na kolim ol samting bai makim taim bilong pinis na em i tok: “Ol manmeri i stap strong inap long las de, God bai i kisim bek ol.” Ol i mas stap strong na mekim wanem wok? Jisas i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim.” (Matyu 24:3, 13, 14) Na “bihain tasol bai las de i kamap.”—Lukim tu Mak 13:10, 13; Luk 21:17-19.
Bilong Wanem Jehova i Strongim Bel na Karim Hevi?
6. Jehova i bin mekim wanem na em i makim tru pasin bilong karim hevi na sanap strong? I gat wanem as na Jehova i bin mekim olsem?
6 Aposel Pol i bin stori olsem God “i laik kamapim ples klia belhat bilong em, bai olgeta man i ken save long bikpela strong bilong em. Ol sospen bilong kisim pe nogut ol i redi pinis long bagarap, tasol em i larim ol na em i wet longtaim long brukim ol.” (Rom 9:22) Bilong wanem Jehova i larim ol man nogut i stap, em ol i olsem sospen bilong kisim pe nogut? Wanpela as bilong dispela samting, em olsem: Em i laik kamapim long ples klia olsem ol man i no inap sakim Man bilong wokim ol na bosim ol yet; olgeta wok ol i mekim bilong bosim ol yet i no inap kamap gutpela. (Jeremaia 10:23) Klostu nau bai God i soim ol man em wanpela tasol inap kamapim gutaim long graun na helpim olgeta manmeri long i stap wanbel na amamas, na dispela bai litimapim nem bilong em, em i bos tru bilong heven na graun. Em bai mekim ol dispela gutpela wok long rot bilong Kingdom bilong em i stap long han bilong Krais.—Buk Song 37:9-11; 45:1, 6, 7.
7. I gat wanem narapela as na Jehova i bin karim dispela hevi na i stap strong? Olsem wanem dispela i bin helpim planti milion manmeri kirap long taim bilong 1930-1939?
7 I gat narapela as tu na Jehova i bin karim dispela hevi na i stap strong, em olsem: Em i bin larim ol man nogut i stap bambai olgeta man i ken save long . . . gutpela sindaun tru em i laik givim long ol sospen bilong kisim marimari.” (Rom 9:23) Ol dispela sospen bilong kisim marimari em ol manmeri spirit bilong God i bin makim ol na ol i holimpas lo bilong God. God i bin “baim bek ol dispela lain namel long olgeta manmeri bilong graun” bambai ol i ken i stap king wantaim Krais Jisas long Kingdom bilong em long heven. Kirap long taim bilong ol aposel God i bin wok long putim mak long ol dispela 144,000 manmeri. Nau dispela wok i laik pinis. (Kamapim Tok Hait 7:3; 14:1, 4) Na lukim! Pasin isi bilong Jehova i larim bikpela lain manmeri i kam bung. Wok bilong bungim “dispela ol manmeri ol i bilong olgeta lain man.” em i kirap long yia 1935 samting. Ol dispela manmeri i planti tru na ol i amamas, long wanem ol inap abrusim bagarap long taim bilong laspela bikpela hevi, na bai ol inap i stap oltaim long paradais 1ong graun. (Kamapim Tok Hait 7:4, 9, 10, 13-17) Olsem wanem? Yu wanpela bilong dispela bikpela lain manmeri? Sapos olsem, orait yu amamas long Jehova i bin strongim bel na larim ol sospen bilong kisim pe nogut ol i stap inap long nau? Tasol yu yet yu mas strongim bel na karim hevi wankain olsem Jehova i bin mekim.
Man i Sanap Strong Bai Kisim Gutpela Pe
8. Bilong wanem yumi olgeta i mas sanap strong? Husat i bin sanap strong na yumi mas lukluk i go long em?
8 Yumi olgeta yumi mas sanap strong bambai yumi inap kisim ol samting God i tok promis long givim long yumi. Pol i kolim dispela tok i tru long Hibru 10:36 na bihain em i stori long strongpela bilip bilong “ol dispela manmeri bilong bipo” ol i bin sanap strong. Na bihain Pol i tok yumi mas “ran strong long dispela resis God i bin makim bilong yumi ran long en. Yumi mas lukluk i go long Jisas, em i as bilong bilip bilong yumi, na bihain em bai inapim tru bilip bilong yumi. Jisas i save, sapos em i bihainim tru tok bilong God, orait bihain em bai i stap gut na amamas moa yet.” Jisas i givim bel olgeta long mekim wok na em i karim olgeta hevi na sanap strong. Em i tingting oltaim long gutpela prais em bai kisim. Pasin bilong em i helpim yumi long karim hevi na sanap strong!—Hibru 12:1, 2.
9. Wanem samting i bin kamap long pasin bilong ol brata long nau, em ol i sanap strong na stap gut long God?
9 Na i gat planti manmeri long nau tu ol i makim gutpela pasin bilong karim hevi na sanap strong. Ating yu save long sampela brata o sista em ol i bin karim bikpela hevi na sanap strong o nau ol i wok long mekim. Ol i stap gut long Jehova na pasin bilong ol i strongim tru yumi! Na long olgeta yia taim ol Witnes Bilong Jehova i mekim ripot long Sosaiti Was Taua long ol wok ol i bin mekim bilong autim tok long olgeta hap, i gat ol gutpela stori long ol brata na sista i bin sanap strong na holimpas lo bilong Jehova. Lukim lista i stap long narapela 4-pela pes hia, na bai yu inap save long bikpela wok ol dispela Witnes i bin mekim long yia 1989, em ‘bilip bilong ol i bin stap strong, na ol i bin karim hevi na sanap strong.’—2 Pita 1:5, 6.
Yumi Bin Mekim Bikpela Wok Tru, Winim Olgeta Yia Bipo
10. (a) Long yia 1989 ol i bin autim gutpela tok bilong Kingdom long hamas kantri na ailan? Hamas manmeri ol i bin autim tok? (b) Long mun i gat planti painia i bin autim tok, winim olgeta narapela mun, hamas painia i bin putim ripot? Ol Witnes i bin lusim hamas aua olgeta long autim tok?
10 Lista long 4-pela pes paslain hia i makim olsem yumi bin autim tok bilong Kingdom bilong Jehova long 212 kantri na ol ailan, na yumi bin tokim ol man, nau dispela Kingdom i laik kirap bosim graun. Olsem wanem? Yu wanpela bilong ol 3,787,188 manmeri ol i bin insait long dispela gutpela wok? O yu wanpela bilong ol 808,184 painia i bin putim ripot long mun i gat planti painia i bin autim tok, winim olgeta narapela mun? Maski yu bin mekim bikpela wok o liklik wok tasol, yu ken amamas, long wanem yu bin insait long dispela wok ol i bin lusim 835,426,538 aua long mekim long 1989.—Buk Song 104: 33, 34; Filipai 4:4.
11. (a) Hamas ol i bin bung long Mas 22 bilong tingim i dai bilong Jisas na yumi amamas tru long dispela? Bilong wanem yumi amamas long dispela samting? (b) Hamas ol i bin kisim baptais? Lukim lista na kolim nem bilong ol kantri em planti tru long ol dispela kantri i bin kisim baptais.
11 Na yu ken amamas, long wanem inap olsem 9,479,064 manmeri i bin bung long Mas 22, 1989 bilong tingim i dai bilong Jisas! Dispela i makim olsem i gat 5,691,876 manmeri moa ol inap autim tok bilong Kingdom sapos yumi inap helpim ol long kam insait long lain bilong Jehova na mekim wok bilong Jehova long olgeta taim. Olsem wanem? Yumi inap helpim ol long mekim olsem? (Jon 10:16; Kamapim Tok Hait 7:9, 15) Planti ol i kam insait pinis, olsem na i gat 263,855 nupela Witnes i bin kisim baptais long yia bilong wok bilong 1989.
12. Wanem sampela samting dispela lista i no kamapim (a) long ol faktori bilong Sosaiti Was Taua? (b) long ol magasin na sabskripsen ol Witnes i bin tilim?
12 I gat sampela samting dispela lista i no kamapim. Wanpela samting em olsem: Ol man i dai long kisim ol Baibel na buk na buklet na nius bilong yumi. Olsem na ol faktori bilong Sosaiti Was Taua long Nu Yok i bin mekim wok long 28,659 ton pepa bilong wokim 35,811,000 Baibel na buk na buklet. Dispela wok i go bikpela, winim bilong yia 1988 inap olsem 101 pesen. Ol narapela bikpela faktori bilong Sosaiti Was Taua, olsem long Jemani na Itali na Japan, ol tu i bin wok long san na long nait bilong helpim “wokboi i gat gutpela tingting” long givim kaikai bilong spirit long ol man ‘long taim stret bilong en.’ (Matyu 24:45) Long mun Epril na Me long yia 1989 ol brata i bin tilim planti Wastaua na Kirap! na ol i bin kisim planti sabskripsen. Ol i bin wok strong long tilim ol Wastaua i stori long ‘Bikpela Babilon.’ (Kamapim Tok Hait 17:5) Yumi save, long dispela Epril tu ol painia hap taim na ol narapela Witnes i wok strong long olgeta hap, na ating ol i bin mekim bikpela wok tru, winim olgeta narapela mun long dispela yia bilong wok bilong 1990.—Lukim Aisaia 40:31; Rom 12:11, 12.
13. Wanem ol kantri i stap long dispela lista na ol i no bin raitim nem bilong ol long lista bilong 1988? Stori long dispela samting.
13 Lukim gen dispela lista. Olsem wanem? Long lista yu lukim nem bilong sampela kantri ol i no bin raitim nem bilong ol long lista bilong yia i go pinis? Tru ya! . . . Ol i raitim nem bilong Hangari na Polan na sampela kantri moa. Sampela bilong ol dispela kantri ol i longwe ples na nau tasol tok i tru bilong Kingdom i go kamap long en. Tasol long Hangari na Polan, nau tasol gavman i orait long wok bilong yumi. Mipela laik tok tenkyu tru long ol dispela gavman nau ol i mekim gut long ol Witnes Bilong Jehova. Jehova i harim beten bilong ol brata long olgeta hap bilong graun, em ol i bin beten askim em “long helpim ol king na olgeta gavman. Olsem bai yumi olgeta sindaun gut na i stap bel isi, na yumi ken bihainim tru olgeta pasin God i laikim.”—1 Timoti 2:1, 2.
14. Stori long sampela gutpela samting i bin kamap long ol “Givim Bel long God” Kibung Distrik long Polan.
14 Tru tumas, yumi laik givim bel long God na bihainim olgeta pasin God i laikim. Na ol i bin mekim ol “Givim Bel long God” Kibung Distrik long Polan tu! Ol i bin mekim long tripela hap bilong Polan long mun Ogas long yia 1989. Ol 91,024 brata bilong yumi long Polan i bin lukautim gut ol brata bilong ol narapela kantri i go long ol kibung bilong ol! (Hibru 13:1, 2, 16) Planti tausen tausen brata bilong Sekoslovakia na Jemani na Rasia na sampela moa ol i kisim ol pas na pepa long gavman bilong orait long ol i go long ol dispela kibung. I olsem wanpela mirakel i kamap! Ol i kalap long bas na tren o ol i wokabaut long lek i go long ol kibung. Planti tausen Witnes long Not na Saut Amerika na Westen Yurop, na long ol ailan bilong Pasifik i stap longwe na long Japan, ol i kalap long balus na i go long ol dispela kibung. Ol brata long Polan i bin klinim tru ol traipela stediam, tasol planti manmeri tru i kam pulap na i olsem ol dispela traipela stediam i no inap long ol. Inap olsem 65,710 i bung long Kosov, na 40,442 long Posnan, na 60,366 long Woso—olgeta em inap olsem 166,518! Long olgeta kibung, taim ol i lukim ol nupela brata sista i kisim baptais, ol i amamas nogut tru na aiwara i kamap. Long Posnan, wanpela pikinini i gat 9-pela krismas na wanpela lapun i gat 90 krismas i kisim baptais. Inap olsem 6,093 i bin kisim baptais long dispela 3-pela kibung na planti ol i yangpela na ol i kam long ol kantri, em bipo ol man i bin tok taim ol lapun bilong ol dispela kantri i dai bai lotu tu i dai. Tasol nogat. Lotu tru em Baibel i as bilong en em i no i dai! (Lukim Buk Song 148:12, 13; Aposel 2:41; 4:4.) Ol brata long hap bilong Is long Yurop ol i bin karim hevi na sanap strong, na nau ol i kisim gutpela pe!
Ol i Karim Hevi na i Stap Strong Yet
15. Olsem wanem ol Witnes long Lebanon i bin karim hevi na sanap strong? Wanem ol gutpela samting i bin kamap?
15 Kain kain hevi na traim i save painim ol Witnes Bilong Jehova olsem i bin painim aposel Pol long bipo, na ol i mas strongim bel na karim hevi. (2 Korin 11:24-27) Long Lebanon narapela narapela lain bilong dispela kantri yet ol i pait. Orait, ol brata bilong yumi i mekim wanem? Ol i strongim bel na sanap strong. Long yia 1989 planti gan na bom i pairap, tasol maski pait i kamap strong long sampela hap, ol brata long ol dispela hap i tingting strong long ol i no ken slek liklik long mekim wok. Wanpela kongrigesen long Beirut i salim ripot na ol i tok: “Kongrigesen i putim bung bilong i go long autim tok long olgeta apinun. Maski i gat ol taim tambu na kefiu, ol brata i no les long mekim wok. Mipela autim tok long planti hap, winim bilong bipo. Long mun Epril i gat planti painia, winim olgeta narapela mun. Mipela bin kirapim ol nupela Baibel-stadi na mipela i bin tilim planti magasin na buk, winim bilong bipo.”
16. Olsem wanem ol brata bilong yumi long Kolombia i bin karim hevi na wok strong long autim gutpela tok bilong Kingdom long ol taun i no gat Witnes long en?
16 Yumi bin harim ripot long ol nius long gavman bilong Kolombia i wok strong long daunim pasin bilong baim drak i go long ol man, na bikpela pait i bin kamap na planti man i bagarap. Tasol yumi amamas long harim ripot long wok bilong ol gutpela Kristen long Kolombia, em ol i bin sanap strong. Long dispela taim ofis bilong Sosaiti long Kolombia i bin makim sampela painia bilong mekim wok painia salim inap liklik taim, na ol i bin salim ol i go long 31 taun i gat 10,000 samting manmeri i stap long en na i no gat sampela Witnes i stap. Long wanpela taun ol painia i autim tok na sampela man i harim tok na taim ol i save ol painia bai stap inap liklik taim tasol wantaim ol, ol i strong long ol painia i no ken lusim ol. Long narapela taun, inap olsem 18 manmeri i amamas long harim tok na ol i raitim pas long ofis bilong Sosaiti na olgeta i sainim nem long en. Ol i tok tenkyu long gutpela wok ol painia i bin mekim bilong helpim ol long ol samting bilong spirit taim ol painia i stap wantaim ol inap 3-pela mun. Na ol i tok, ‘Plis, yupela i mas wok yet long helpim mipela.’ Ol i tok, “Dispela em i bikpela samting.” Olsem na ol brata i stretim rot bilong helpim ol manmeri long dispela tupela taun, em ol i laik harim tok. I hatwok long i go autim tok long ol dispela longwe ples i no gat Witnes long en, tasol ol painia i go mekim dispela wok ol i bin sanap strong na ol i bin kisim planti blesing.
17, 18. (a) Ol Witnes Bilong Jehova i bin karim wanem kain hevi long Itali? (b) Maski ol man i bin mekim ol tok giaman long ol Witnes, olsem wanem long ol Witnes?
17 Long Itali, ol bikpela man bilong misin, olsem ol pris pasto, ol i save birua tru long ol Witnes Bilong Jehova. Tasol long strong bilong Jehova ol brata i bin karim dispela hevi na sanap strong. Long sampela hap, ol pris i bin givim liklik hap pepa long ol lain bilong ol bilong pasim long dua bilong haus. Ol dispela liklik hap pepa i gat rait long en olsem ol Witnes Bilong Jehova i no ken paitim dua bilong haus. Planti pris i bin kisim ol manki na salim ol i go pasim ol dispela hap pepa long dua bilong olgeta haus long wanpela hap—haus bilong ol Witnes tu! Tasol ol Witnes i no pret, na sampela taim ol i stori wantaim man bilong haus long dispela liklik hap pepa na wok long kirapim toktok wantaim em. Na tu long ol nius na long televisen ol man i bin tokaut long dispela samting ol pris i mekim, na ol i tok i no stret narapela lotu i birua long narapela lotu, na dispela samting i kamapim long ples klia olsem misin i no gat strong moa. Wanpela profesa bilong yunivesiti i kros tru long ol dispela pepa i birua long ol Witnes, olsem na em i kirap na kisim sabskripsen bilong Wastaua na Kirap!
18 Misin Katolik long Itali i kirapim sampela man, em bipo ol i Witnes na ol i lusim bilip pinis, na ol dispela man i mekim planti tok giaman long ol Witnes. Tasol dispela wok tu i lus nating, long wanem ol manmeri i save gut long ol 172,382 Witnes i save autim tok long Itali na ol i gat gutpela nem. Sampela Witnes i go autim tok na ol i bungim wanpela man i stori olsem em i bin kaunim sampela tok nogut long ol Witnes long wanpela buk em sampela man bipo ol i Witnes ol i bin raitim. Olsem na taim brata bilong em i kamap wanpela Witnes Bilong Jehova em i no amamas liklik, na em i birua long ol Witnes. Tasol bihain em i lukim olsem dispela nupela lotu bilong brata bilong em i kirapim em long senisim tru pasin bilong em na nau pasin bilong brata bilong em i kamap gutpela. Dispela samting i mekim na em i tingting olsem: ‘Sapos dispela lotu i nogut, olsem wanem em inap kirapim man long mekim gutpela pasin?’ Orait, nau em i tokim ol dispela Witnes olsem em i laik stadi long Baibel.—Lukim Kolosi 3:8-10.
Taim Ol Man i Les long Harim Tok
19, 20. (a) Ol Witnes long Finlan i bin karim wanem kain hevi? Wanem bikpela samting i kamap ples klia taim misin i skelim tingting bilong ol man? (b) Wanem samting i bin painim wanpela brata na dispela i makim olsem yumi mas karim hevi na wok strong yet long autim tok?
19 Long sampela kantri ol Witnes i save go planti taim long haus bilong ol man na planti man i les long harim tok. Dispela samting i kamap long kantri Finlan. Misin long Finlan i bin skelim tingting bilong ol man, ol i ting olsem wanem long ol Witnes, na bikpela hap lain tru (inap 70 pesen) ol i tok, ol i no laik bai ol Witnes i kam long haus bilong ol. Tasol liklik hap lain (inap 30 pesen) ol i no strong tumas long sakim ol Witnes, na sampela bilong dispela lain (inap 4 pesen) ol i tok ol i laikim ol Witnes Bilong Jehova. Dispela 4 pesen em i bikpela lain liklik, long wanem i olsem 200,000 manmeri long Finlan ol i laikim ol Witnes. Tasol Witnes long Finlan long nau ol inap olsem 17,303 tasol!
20 Orait, wanpela brata long Finlan i go autim tok na em i bungim wanpela man i tokim em long dispela wok misin i mekim bilong skelim tingting bilong ol man long ol Witnes, na em i tokim dispela brata: ‘Ating yu no save, inap 70 pesen bilong mipela i no laikim yupela ol Witnes. Bilong wanem yupela i wok yet long i kam long haus bilong mipela?’ Brata i bekim tok olsem: “ Tru, planti ol i no laikim mipela, tasol taim misin i skelim dispela samting, inap olsem 4 pesen ol i tok ol i laikim mipela. Mipela wok long painim ol dispela manmeri. Na sapos ol i liklik lain tru inap olsem 1 pesen tasol, bai mipela i wok yet long i go long ol haus bilong painim ol.” Man bilong haus i tingim dispela tok bilong brata na nau em i tok: “Olsem na ating tok bilong yupela em i bikpela samting long ol man?” Brata i tok: “Em i stret. Yu laik harim dispela tok?” Em nau, man i putim yau na harim tok.
Ol Samting Bilong Bihain
21. (a) Yumi mas wok strong long mekim wanem nau long dispela taim? Bilong wanem yumi mas wok strong olsem? (b) Ating bihain bai wanem ol hevi na traim i painim yumi? Tasol profet Habakuk i tok wanem na dispela i strongim bel bilong yumi?
21 Olsem wanem long yumi olgeta long nau? Yumi tingting strong long sanap strong wantaim Jehova na Krais Jisas i go inap long pinis? Ating i no longpela taim moa, tasol yumi mas wok yet long sanap strong! Dispela pasin bilong nau, em Satan i bosim, em i stap yet, na yumi stap namel long ol manmeri i mekim olkain pasin sem na pasin giaman na pasin birua, olsem na yumi mas wok strong long lukautim bilip bilong yumi. (Jut 3, 20, 21) Ating ol man bai putim kain kain hevi na traim long yumi na bai ol i mekim nogut long yumi. Nau tu, planti tausen brata i karim hevi, long wanem ol i stap long kalabus, na ol birua i paitim nogut tru sampela. Ol dispela brata i save amamas long yumi beten askim God long helpim ol. (2 Tesalonaika 3:1, 2) Liklik taim tasol na bai dispela pasin bilong nau i pinis! Olsem Habakuk i tok: “Taim bilong ol dispela samting i mas kamap, em i no yet. . . . Tasol i no longtaim na . . . em bai i kamap. Yu ting bai em i no inap kamap kwik, tasol yu mas wet liklik na em bai i kamap.”—Habakuk 2:3.
22. Sapos yumi strongim bel na karim hevi olsem ol profet long bipo na yumi sanap strong olsem Jop, wanem gutpela samting bai painim yumi?
22 Long gutpela pasin sori, disaipel Jems i tokim yumi: “Ol brata, yupela i mas tingim ol profet bipo ol i bin autim tok long nem bilong Bikpela. Ol birua i bin mekim nogut long ol, tasol ol i bin strongim bel na karim dispela hevi. Yupela i mas kisim dispela pasin bilong ol, na bihainim.” Yumi ol manmeri long nau yumi autim tok long nem bilong Jehova, yumi tu inap karim bikpela hevi na traim na sanap strong, olsem Aisaia na Jeremaia na Daniel na ol arapela i bin mekim long bipo. Yumi inap karim hevi na sanap strong olsem Jop. Jop i sanap strong na em i bin kisim gutpela pe tru! Long marimari na sori bilong Jehova yumi tu yumi inap kisim kain gutpela pe olsem—sapos yumi stap strong i go inap long pinis. Na ol samting i mas painim yumi olgeta wan wan olsem Jems i tok: “Ol man i bin strongim bel na karim hevi, ol i save stap gut na amamas i stap.”—Jems 5:10, 11; Jop 42:10-13.
Bai Yu Bekim Wanem Tok?
◻ Bilong wanem Jisas i tok yumi mas sanap strong?
◻ I gat wanem as na Jehova i bin strongim bel na karim hevi?
◻ Stori long sampela gutpela samting bilong bikpela wok yumi bin mekim long 1989.
◻ Ol brata long Polan i bin sanap strong na nau ol i kisim wanem gutpela pe?
◻ Olsem wanem ol Witnes i bin sanap strong long traim long Lebanon na Kolombia na Itali?
[Sat long pes 20-23]
RIPOT BILONG WOK BILONG OL WITNES BILONG JEHOVA LONG 1989
(Lukim buk o magasin)