Autim Bilip Bilong Yu na Bai God i Ken Kisim Bek Yu
“Olgeta manmeri i singaut long nem bilong Jehova, bai em i kisim bek ol.”—ROM 10:13, NW.
STORI bilong Baibel long ol samting i bin kamap bipo em i stori long sampela “de bilong Jehova.” Bikpela Tait Wara i bin kamap long taim bilong Noa, na bagarap i painim Sodom na Gomora, na Jerusalem i bagarap long yia 607 B.C.E. na 70 C.E., em ol bikpela De bilong Jehova i mekim man i pret nogut tru. Em taim bilong givim strafe long ol lain i bikhet long Jehova. (Malakai 4:5, NW; Luk 21:22) Long ol dispela taim, planti ol i dai long pasin nogut bilong ol. Tasol sampela i abrusim bagarap. Jehova i bin salim toksave i go long ol bilong toksave long ol man nogut olsem bikpela bagarap i laik kamap, na em i givim rot long ol man i gat stretpela bel na ol inap painim rot bilong abrusim bagarap.
2 Dispela samting i kamap ples klia tru long taim bagarap i painim Jerusalem long yia 70 C.E. Inap 900 yia paslain long dispela taim, profet Joel i bin tok profet long dispela bagarap, olsem: “Bai mi mekim ol narakain samting i kamap long graun na long skai olsem ol mak bilong dispela De. Blut na paia na bikpela smok bai i kamap. Na san bai i kamap tudak na mun bai i kamap retpela olsem blut. Na bihain bai De bilong Bikpela i kamap. Long dispela bikpela De olgeta manmeri bai i pret nogut tru.” Olsem wanem wanpela man inap abrusim bagarap na i stap gut long kain taim nogut tru olsem? Spirit holi i givim tingting long Joel na em i tok: “Samting bai kamap olsem, olgeta manmeri i singaut long nem bilong Jehova ol i no ken bagarap; ol man i bin abrusim bagarap ol bai stap long maunten Saion na long Jerusalem, olsem Jehova i tok pinis, na ol man Jehova i bin singautim ol, ol i stap namel long ol man i winim bagarap.” (NW)—Joel 2:30-32.
2, 3. (a) Long Pentikos, ol i kamapim wanem tok profet olsem toksave i go long ol man? (b) Kirap long Pentikos bilong yia 33 C.E., ol man i mas mekim wanem bambai ol i ken singaut long nem bilong Jehova?
3 Long Pentikos bilong yia 33 C.E., aposel Pita i givim tok long bikpela lain i stap long Jerusalem, em ol Juda na ol narapela lain ol i bihainim lotu Juda, na Pita i kamapim tok profet bilong Joel bilong soim ol dispela lain i harim tok bilong em olsem wanpela truim bilong dispela tok profet bai kamap long taim bilong ol: “Bai mi mekim ol narakain samting i kamap antap long skai, na bai mi wokim ol mirakel long graun daunbilo olsem ol mak bilong dispela De. Blut na paia na bikpela smok bai i kamap. Na bai san i kamap tudak, na mun bai i kamap retpela olsem blut. Na bihain bai De bilong Bikpela i kamap, em de Bikpela bai i soim bikpela strong na lait bilong en. Na long dispela taim olgeta manmeri i singaut long Bikpela long helpim ol [olsem singaut long nem bilong Jehova], em bai i kisim bek ol na bai ol i stap gut.” (Aposel 2:16-21) Ol lain i harim tok bilong Pita, olgeta i aninit long Lo Bilong Moses, olsem na ol i save pinis long nem bilong Jehova. Pita i tokim ol olsem, kirap long dispela taim, ol man i singaut long nem bilong Jehova ol i mas mekim sampela samting moa. Wanpela bikpela samting tru, em ol i mas kisim baptais long nem bilong Jisas, em dispela man ol birua i bin kilim em i dai na bihain God i kirapim em bek na em i kisim laip long heven na i no inap i dai.—Aposel 2:37, 38.
4. Ol Kristen i bin autim wanem tok long ol man?
4 Kirap long taim bilong Pentikos, ol Kristen i autim tok long ol man long Jisas, em i kirap bek pinis. (1 Korin 1:23) Ol i tokaut olsem ol manmeri inap kamap olsem pikinini bilong God Jehova long spirit na kam insait long nupela lain “Israel tru bilong God,” em wanpela lain bilong spirit bai ol i ‘tokaut long olgeta gutpela pasin God i bin mekim long ol.’ (Galesia 6:16; 1 Pita 2:9) Ol manmeri bilong dispela lain ol i stap gut long God i go inap long taim ol i dai, bai ol i kisim laip long heven na i no inap i dai moa, na bai ol i stap king wantaim Jisas long Kingdom bilong em long heven. (Matyu 24:13; Rom 8:15, 16; 1 Korin 15:50-54) Na tu, ol dispela Kristen i mas tokaut long ol man long bikpela De bilong Jehova i laik kamap. Ol i mas toksave long ol Juda olsem wanpela bikpela hevi tru bai painim ol, i winim olgeta narapela hevi i bin painim Jerusalem na lain Juda i kam inap long dispela taim. Tasol i gat sampela manmeri bai abrusim bagarap. Husat dispela lain? Em ol manmeri i bin singaut long nem bilong Jehova.
“Long Taim Bilong Las De”
5. Wanem ol samting i kamap long nau na i truim tok profet bilong Baibel?
5 Planti samting i bin kamap long dispela taim bipo i olsem piksa bilong ol samting yumi lukim long nau. Kirap long yia 1914, ol man bilong graun i stap long wanpela bikpela taim tru em Baibel i kolim olsem “taim bilong las de,” na taim bilong “pasin bilong dispela graun i laik pinis.” (Daniel 12:1, 4; 2 Timoti 3:1-5, 13; Matyu 24:3-8, NW) Long taim bilong yumi, ol pait nogut tru, bagarapim nabaut ol man, pasin bilong ol manmeri i bagarap, ol samting long graun i bagarap, ol dispela samting i truim tok profet bilong Baibel. Ol i olsem mak Jisas i bin tok profet long en na i makim olsem klostu nau na laspela bikpela De bilong Jehova bai kamap, em De bilong mekim olgeta manmeri i pret nogut tru. Long dispela taim, pait bilong Armagedon bai kamap, em laspela samting bilong dispela taim bilong “bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.”—Matyu 24:21; KTH 16:16.
6. (a) Jehova i wok long mekim wanem bilong kisim bek ol manmeri i gat pasin daun na bai ol i no ken bagarap? (b) Yumi inap painim we ol tok bilong Pol long ol samting yumi mas mekim bilong abrusim bagarap?
6 Dispela bikpela bagarap i wok long kam klostu moa, na insait long dispela taim Jehova i wok long mekim ol samting bilong kisim bek ol manmeri i gat pasin daun na ol i no ken bagarap. Nau long dispela “taim bilong las de,” em i bin bungim ol laspela manmeri bilong kam insait long lain Israel bilong spirit, na kirap long 1935 samting em i kirapim ol wokboi bilong em long graun long bungim lain “planti manmeri tru . . . i no inap man i kaunim namba bilong ol. Dispela ol manmeri ol i bilong olgeta lain man na bilong olgeta kantri na bilong olgeta kain skin na bilong olgeta tok ples.” Dispela lain bai i winim dispela “bikpela hevi” na i stap laip yet. (KTH 7:9, 14) Tasol ol wan wan man na meri ol i mas mekim wanem na bai ol inap tru long abrusim bagarap long dispela taim? Aposel Pol i bekim dispela askim. Long Rom sapta 10, em i givim sampela gutpela tok long yumi long rot bilong abrusim bagarap long dispela taim—em ol tok i stret long taim bilong em na i stret tu long taim bilong yumi.
Wanpela Beten Long God i Ken Kisim Bek Ol Man
7 Taim Pol i raitim Buk Rom, long dispela taim Jehova i rausim pinis lain Israel. Tasol Pol i tok: “Bel bilong mi i laikim tumas bai God i kisim bek ol Israel, na oltaim mi save prea long God long dispela samting.” Em i laik bai ol wan wan Juda inap kisim stretpela save long laik bilong God na bai em i ken kisim bek ol. (Rom 10:1, 2) Na Jehova i laik kisim bek ol manmeri bilong olgeta hap bilong graun em ol i bilip, olsem Jon 3:16 i makim: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” Ofa bilong Jisas i opim rot bambai God i ken kisim bek ol. Olsem long taim bilong Noa na ol narapela taim bilong kot i kamap bihain long en, Jehova i salim lain bilong em long autim “gutnius” long ol man na makim rot bilong ol i ken abrusim bagarap na i stap laip.—Mak 13:10, 19, 20.
8. Olsem Pol i bin mekim, ol Kristen tru bilong nau i soim olsem ol i belgut long wanem ol lain? Ol i mekim olsem wanem?
8 Pol i belgut long ol Juda na ol man bilong ol narapela lain wantaim, olsem na oltaim em i wok long painim rot bilong autim tok. Em “i laik kirapim tingting bilong ol Juda na ol Grik bai ol i bilip long Jisas.” Em i tokim ol elda long Efesus: “Mi no surik long autim olkain gutpela tok inap long helpim yupela. Na long ol bung bilong ol manmeri na long olgeta haus bilong yupela tu, mi bin skulim yupela. Em yupela i save. Oltaim mi bin autim tok strong long ol Juda na long ol Grik, long yumi mas tanim bel i go long God, na yumi mas bilip long Bikpela bilong yumi Jisas.” (Aposel 18:4; 20:20, 21) Long nau tu, ol Witnes Bilong Jehova i save wok strong long autim tok long ol lain i tok ol i Kristen na olgeta narapela lain tu, “i go inap long olgeta hap bilong graun.”—Aposel 1:8; 18:5.
Autim “Dispela Tok Bilong Bilip”
9 Sapos man i laik kisim laip i stap oltaim, em i mas i gat kain bilip i save stap strong oltaim. Pol i kamapim tok bilong Lo 30:14 na em i tok: “ ‘Dispela tok i stap klostu tru long yupela, insait long bel bilong yupela, na long maus bilong yupela.’ Em dispela tok bilong bilip mipela i save tokaut long en.” (Rom 10:8) Taim yumi autim dispela “tok bilong bilip,” em i wok long pas strong moa yet long bel bilong yumi. Dispela samting i bin painim Pol, na ol narapela tok em i mekim ol inap helpim yumi long tingting strong long kamap wankain olsem em long pasin bilong kamapim bilip bilong yumi long ol man: “Sapos yu tokaut klia long Jisas em i Bikpela, na sapos long bel bilong yu yu bilip long God i bin kirapim bek em long matmat, orait bai God i kisim bek yu.” (Rom 10:9) Taim yumi kisim baptais, yumi save tokaut long dispela samting long ai bilong ol man, tasol i no long dispela taim tasol—yumi mas wok yet long tokaut, olsem yumi mas wok strong long tokaut long ol man long olgeta gutpela samting bilong tok i tru. Dispela kain tok i tru i kamapim tok long gutpela nem bilong Bikpela King Jehova; long King Mesaia na Man bilong baim bek yumi, em Bikpela bilong yumi Krais Jisas; na long ol gutpela tok promis bilong ol samting Kingdom bai mekim.
10 Ol man i no laik kisim na bihainim dispela “tok bilong bilip,” God i no inap kisim bek ol, olsem aposel Pol i tok: “Long bel yumi save bilip na God i kolim yumi stretpela manmeri. Na long maus yumi save autim bilip bilong yumi na God i kisim bek yumi. Buk bilong God i gat tok long dispela samting olsem, ‘Ol man i bilip long em, ol bai i no inap kisim sem.’ ” (Rom 10:10, 11) Yumi mas kisim stretpela save long dispela “tok bilong bilip” na wok long mekim i kamap strong insait long bel bilong yumi, bambai bel i ken kirapim yumi long autim dispela tok long ol man. Jisas yet i tokim yumi: “Ol manmeri bilong dispela taim ol i save givim baksait long God na mekim ol kain kain pasin nogut. Na sapos wanpela man bilong ol em i sem long mi na long tok bilong mi, orait bihain, taim Pikinini Bilong Man i stap long bikpela lait bilong Papa bilong en na em i kam wantaim ol ensel bilong God, em bai i sem long dispela man tu.”—Mak 8:38.
11. Yumi mas autim gutnius i go inap long wanem mak? Bilong wanem yumi mas mekim olsem?
11 Olsem profet Daniel i bin tok profet long en, nau long dispela taim bilong las de, “ol man i gat gutpela save na tingting” ol i “lait olsem skai i lait tumas” taim ol i autim tok bilong Kingdom i go inap long olgeta hap bilong graun. Ol i wok long “stiaim planti manmeri long bihainim stretpela pasin,” na stretpela save i bin kamap bikpela tru, long wanem, Jehova i wok long kamapim klia moa yet ol tok profet i toktok long dispela taim bilong pinis nau yumi stap long en. (Daniel 12:3, 4) Dispela tok olsem God i laik kisim bek ol man, em i bikpela samting tru bilong helpim olgeta man i laikim tumas tok i tru na stretpela pasin bambai ol i no ken bagarap.
12 Aposel Pol i tok moa olsem: “Ol Juda na Grik i wankain tasol. Bikpela wanpela tasol em i Bikpela bilong yumi olgeta. Na em i save mekim gut tru long olgeta manmeri i singaut long em.” (Rom 10:12) Long nau yumi mas autim “gutnius” long planti hap moa yet—long olgeta lain manmeri, na long olgeta hap bilong graun. Dispela ensel em Kamapim Tok Hait 14:6 i stori long en, em i wok yet long flai i go namel long skai, na em i givim wok long yumi long “autim dispela gutnius [bilong i stap oltaim oltaim] long ol manmeri i stap long graun,” na yumi mas “autim long ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin.” Olsem wanem dispela bai i helpim ol man i givim bel long dispela tok?
Singaut Long Nem Bilong Jehova
13 Pol i kamapim tok bilong Joel 2:32 (NW) na em i tok: “Olgeta manmeri i singaut long nem bilong Jehova, bai em i kisim bek ol.” (Rom 10:13, NW) I stret tru long ol i bin makim dispela tok bilong i stap olsem yia-teks bilong ol Witnes Bilong Jehova bilong 1998! Long nau em i bikpela taim tru long yumi mas bilip long Jehova na wok i go yet, na kamapim nem bilong em na ol gutpela gutpela samting em bai mekim bilong kamapim laik bilong em, olsem nem bilong em i makim! Wankain olsem taim bilong ol aposel, nau tu long taim bilong las de bilong dispela pasin nogut bilong graun, wanpela strongpela singaut i go long ol man, olsem: “Lukaut. . . . Nogut yupela i bagarap wantaim ol dispela lain man bilong mekim ol kain kain pasin nogut.” (Aposel 2:40) Dispela singaut i olsem krai bilong biugel na i go long olgeta hap bilong graun bilong singautim olgeta man i pret long God bambai ol i ken askim Jehova long kisim bek ol wantaim ol man i putim yau long gutnius ol i autim.—1 Timoti 4:16.
14 Orait, taim dispela bikpela De bilong Jehova i painim dispela graun, wanem samting bai kamap? Klostu olgeta man bai ol i no bilip na wetim Jehova i kisim bek ol. Bai ol i “singaut long olgeta maunten na ston olsem, ‘Yupela i mas karamapim mipela, na haitim mipela long pes bilong Man i sindaun long sia king bilong en, na bai Pikinini Sipsip i no ken kam wantaim bikpela belhat bilong en na mekim save long mipela.’ ” (KTH 6:15, 16) Bai ol i bilip na wetim ol bikpela oganaisesen bilong dispela graun i helpim ol, em ol i olsem ol bikpela maunten. Tasol em bai gutpela moa sapos ol i bilip long nambawan strongpela Ston, em God Jehova! (Lo 32:3, 4) King Devit i tok long em olsem: “Bikpela em i strongpela banis bilong mi. Em i olsem ston i haitim mi, na em i save kisim bek mi long han bilong ol birua.” Jehova em i ‘strongpela God bilong kisim bek yumi.’ (Song 18:2; 95:1) Nem bilong em i olsem “wanpela strongpela haus”—i no gat narapela strongpela “haus” olsem bilong lukautim yumi long dispela taim nogut tru i laik kamap. (Sindaun 18:10) Olsem na em i bikpela samting tru long yumi mas skulim planti moa bilong ol dispela 6 bilion manmeri i stap nau long graun long ol i mas singaut long nem bilong Jehova long pasin bilong bilip na stap gut long em.
15 I stret aposel Pol i askim olsem: “Tasol sapos ol i no bilip long em, olsem wanem bai ol i askim em long helpim ol [olsem singaut long em].” (Rom 10:14) Yumi ken ting i gat planti tausen manmeri i stap yet, em yumi inap helpim ol long pilim tru “tok bilong bilip” bambai ol inap singaut long Jehova bilong em i ken kisim bek ol. Bilip em i bikpela samting tru. Long narapela pas bilong em, Pol i tok: “Man i no bilip long God, em i no inap bihainim laik bilong God. Long wanem, man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.” (Hibru 11:6) Tasol olsem wanem planti milion moa inap kirap na bilip long God? Long pas Pol i raitim long ol Rom, em i askim olsem: “Sapos ol i no harim tok long em, olsem wanem bai ol i bilip long em?” (Rom 10:14) Orait olsem wanem? Jehova i save wokim rot bambai ol inap harim dispela tok? Em i save mekim tru! Harim narapela tok bilong Pol: “Na sapos i no gat wanpela i autim tok long ol, olsem wanem bai ol i harim?”
16. Insait long rot God i bin wokim bilong helpim ol man, bilong wanem i mas i gat ol man bilong autim tok?
16 Tok bilong Pol i kamapim klia tru olsem i mas i gat ol man bilong autim tok. Jisas i bin makim olsem i mas i gat ol man bilong autim tok i go “inap long dispela taim i pinis.” (Matyu 24:14; 28:18-20) Wok bilong autim tok em i wanpela bikpela samting insait long rot God i bin wokim bilong helpim ol man long singaut long nem bilong Jehova bambai ol i ken abrusim bagarap na i stap gut. Klostu olgeta man insait long ol lain ol i kolim Kristen, ol tu i no mekim wanpela samting bilong litimapim gutpela nem bilong Jehova. Planti ol i paul tru long dispela na ol i ting i gat tupela moa i pas wantaim em, olsem dispela bilip bilong god Triwan. Na tu, planti ol i wankain olsem ol man em Song 14:1 na 53:1 i toktok long ol: “Ol longlong man i save tok long ol yet olsem, ‘I no gat God i stap.’ ” Ol i mas save, Jehova em God i stap laip, na ol i mas save long olgeta samting Jehova bai mekim olsem nem bilong em i makim, bambai ol i ken abrusim bagarap na i stap gut long taim bilong dispela bikpela hevi tru i laik kamap.
Ol Man i Autim Tok, “Lek Bilong Ol i Naispela Tru”
17. (a) Bilong wanem i stret Pol i kamapim wanpela tok profet long God bai kisim bek lain bilong em? (b) Yumi mas mekim wanem na bai ‘lek bilong yumi i naispela tru’?
17 Aposel Pol i mekim laspela bikpela askim olsem: “Na olsem wanem bai ol i autim tok sapos i no gat wanpela i salim ol i go? Olsem buk bilong God i tok: ‘Ol manmeri i autim gutnius bilong ol gutpela samting, lek bilong ol i naispela tru!’ ” (Rom 10:15, NW) Pol i kisim dispela tok long Aisaia 52:7 (NW), em hap bilong wanpela tok profet i makim taim bilong yumi, kirap long yia 1919. Long nau tu, Jehova i salim “man . . . bilong bringim gutpela tok i kam, . . . em man bilong autim tok bilong bel isi, na gutpela tok bilong samting i gutpela moa, em man bilong autim tok long God i kisim bek ol.” “Ol wasman” God i bin makim ol long spirit holi na ol poroman bilong ol, ol i bihainim tok bilong God na ol i wok long singaut na amamas. (Aisaia 52:7, 8) Long nau, ol manmeri i autim tok long God i laik kisim bek ol man, sampela taim lek bilong ol i pen na das i pulap long en taim ol i wokabaut i go long haus bilong ol man, tasol ol i amamas na pes bilong ol i lait! Ol i save pinis, Jehova i bin givim wok long ol long autim gutnius bilong bel isi na bilong mekim gut bel bilong ol man i krai sori, na ol i helpim ol dispela manmeri long singaut long nem bilong Jehova na bai ol inap wetim em i kisim bek ol.
18 Maski ol man i ‘bilipim dispela tok yumi autim long ol’ o ol i sakim, tasol tok bilong Pol i stret yet, em i tok: “Ating ol i no harim dispela gutnius? Nogat. Ol i harim pinis. Yumi save, ‘Ol manmeri long olgeta hap bilong graun i harim pinis nek bilong ol. Na tok bilong ol i go inap long olgeta ples.’ ” (Rom 10:16-18) “Skai i soim yumi [o, tokaut] olsem God i nambawan tru,” na dispela i kamap klia long ol samting em i bin wokim. Na olsem tasol ol Witnes bilong em long graun i mas tokaut long “taim . . . God, Bikpela bilong yumi, i laik mekim gut long ol manmeri bilong en na mekim save long ol birua bilong ol . . . [na] strongim bel bilong ol manmeri i sori na i krai.”—Song 19:1-4; Aisaia 61:2.
19. Wanem samting bai kamap long ol manmeri i “singaut long nem bilong Jehova” long nau?
19 Bikpela De bilong Jehova bilong mekim ol man i pret nogut tru, em i wok long kam klostu moa yet. “Klostu bai taim nogut i kamap, em De bilong Bikpela. Em i taim bilong Bikpela i mekim save long olgeta lain . . . Long dispela taim God I Gat Olgeta Strong bai i salim bikpela bagarap i kam long [ol man]. Sori tumas, dispela De bai i nogut tru.” (Joel 1:15; 2:31) Yumi beten olsem planti tausen manmeri moa bai pilim tru olsem taim i sot pinis na ol bai givim bel long gutnius na kam insait long lain bilong Jehova. (Aisaia 60:8; Habakuk 2:3) Yumi ken tingim ol narapela De bilong Jehova i bin kamapim bikpela bagarap na pinisim ol man nogut—long taim bilong Noa, na taim bilong Lot, na long taim bilong ol Israel na Juda em ol i bikhet na lusim Jehova. Nau yumi stap klostu tru long taim bilong bikpela hevi tru, i winim ol dispela narapela hevi i bin kamap. Long dispela taim, traipela raunwin bilong Jehova bai rausim olgeta pasin nogut long dispela graun na opim rot bilong Paradais i ken kamap, em bel isi bai stap long en inap oltaim oltaim. Olsem wanem long yu? Bai yu “singaut long nem bilong Jehova” na stap gut long em? Sapos yu mekim olsem, yu ken amamas! Yu inap tingim tok promis bilong God yet olsem em bai kisim bek yu na yu no ken bagarap.—Rom 10:13, NW.
Bai Yu Bekim Olsem Wanem?
◻ Bihain long Pentikos bilong yia 33 C.E., ol Kristen i autim wanem ol nupela tok?
◻ Ol Kristen i mas mekim wanem bilong putim yau long “tok bilong bilip”?
◻ Wanem insait bilong dispela tok “singaut long nem bilong Jehova”?
◻ Ol manmeri i autim tok bilong Kingdom, olsem wanem “lek bilong ol i naispela tru”?
1. Kirap long bipo yet, wanem ol toksave i bin go long ol man?
7. (a) Yumi inap tingim wanem gutpela samting olsem Rom 10:1, 2 i makim? (b) Olsem wanem na Jehova inap salim lain bilong em long autim “gutnius” i go long planti man moa?
9. (a) Rom 10:8, 9 i kirapim yumi long holim wanem kain bilip? (b) Wanem taim yumi mas autim bilip bilong yumi? Yumi mas mekim olsem wanem?
10. Olsem Rom 10:10, 11 i tok, yumi mas mekim wanem long dispela “tok bilong bilip”?
12. Olsem wanem tok bilong Rom 10:12 i stret wantaim wok bilong ensel em Kamapim Tok Hait 14:6 i stori long en?
13. (a) Wanem yia-teks bilong yumi bilong 1998? (b) Olsem wanem na dispela yia-teks i stret tru long nau?
14. Yumi mas singaut long wanem bikpela Ston bambai em i ken kisim bek yumi?
15. Olsem Rom 10:14 i makim, yumi mas ting olsem wanem long pasin bilong bilip?
18. Rom 10:16-18 i tok wanem long samting bai kamap long wok bilong autim gutnius?
[Ol Piksa long pes 18]
Lain bilong God ol i tokaut long ol gutpela pasin bilong em long Pueto Riko, Senegal, Peru, Papua Niugini—yes, long olgeta hap bilong graun