Lain Long i Stap Pren Tru Olsem Brata Brata
“Yupela i mas kisim pasin bilong i stap pren tru bilong ol arapela manmeri bilong God.”—2 PITA 1:5-7.
BIPO wanpela dokta i go lukim pikinini meri bilong em long bung bilong winim skul long Skul Gileat bilong Sosaiti Was Taua, taim meri i lain pinis long mekim wok misineri. Dokta i no wanpela Witnes Bilong Jehova, tasol em i lukim olgeta manmeri long dispela bung ol i amamas na em i ting sik i no painim tumas kain manmeri olsem. Bilong wanem ol i amamas? Bilong wanem lain bilong Jehova i amamas long taim ol i bung wantaim, olsem long kongrigesen o long kibung sekit o kibung distrik samting? Ol i amamas, long wanem, narapela i stap pren tru bilong ol narapela, olsem brata brata. Ating long dispela as tasol na sampela i bin tok, i no gat narapela lain bilong lotu ol i amamas long ol samting bilong lotu olsem lain Witnes Bilong Jehova.
2 Na i stret yumi mas lukim dispela kain pasin namel long ol, long wanem, aposel Pita i tok: “Yupela i bin bihainim tok i tru, na long dispela pasin yupela i bin mekim yupela yet i kamap klin long ai bilong God. Na yupela i save laikim tru ol arapela manmeri bilong God. Orait nau yupela i mas wok strong moa long laikim ol na givim bel bilong yupela olgeta long ol.” (1 Pita 1:22) Dispela hap tok “stap pren tru,” long tok Grik ol i kolim phi·liʹa [filia], na insait bilong en i wankain liklik olsem narapela tok Grik, em a·gaʹpe, na insait bilong dispela i olsem “laikim ol arapela.” (1 Jon 4:8) Sampela taim Baibel i senisim nabaut dispela tupela hap tok. (Long dispela stori na stori i kam bihain long en bai yumi toktok long dispela tupela tok Grik.)
3 Wanpela saveman i tok, dispela tok phi·liʹa i makim pasin bilong i stap pren tru long narapela, tasol dispela tok a·gaʹpe i makim wanpela kain pasin i stap long tingting bilong man. Baibel i tok, yumi mas laikim o sori (a·gaʹpe) long ol birua, tasol yumi no i stap pren (phi·liʹa) bilong ol. Bilong wanem? Long wanem, Baibel i tok: “Sapos yumi poroman wantaim ol man nogut, bai ol i bagarapim gutpela pasin bilong yumi.” (1 Korin 15:33) Na tok bilong Pita i kamapim klia olsem tupela tok i narapela narapela kain. Em i tok: “Yupela i mas kisim pasin bilong i stap pren tru (phi·liʹa) bilong ol arapela manmeri bilong God, . . . na yupela i mas kisim pasin bilong givim bel bilong yupela (a·gaʹpe) long ol arapela.”—2 Pita 1:5-7; lukim Jon 21:15-17.a
Pasin Bilong i Stap Pren Tru
4 Baibel i stori long sampela i bin stap pren tru long narapela, na ol i no tingim liklik samting tasol bilong narapela na ol i mekim, nogat; ol i tingim ol gutpela pasin bilong narapela, na nau ol i stap pren tru bilong ol. Yumi ken tingim Krais Jisas na aposel Jon. Jisas i stap pren bilong olgeta gutpela aposel bilong em na em i laikim ol, na i gat as na em i mekim olsem. (Luk 22:28) Em i kamapim dispela laik bilong em long ol taim em i wasim lek bilong ol, na long dispela pasin em i lainim ol long bihainim pasin daun. (Jon 13:3-16) Tasol em i stap pren moa yet long aposel Jon, na planti taim Jon i bin toktok long dispela samting. (Jon 13:23; 19:26; 20:2) Yumi ken save, i gat as na Jisas i laikim tumas Jon. Ating Jon i bin mekim sampela gutpela pasin pren long Jisas, na em i amamas long ol gutpela pasin bilong Jisas. Dispela pasin bilong Jon i kamap klia long ol tok em i raitim long Baibel. Planti taim em i toktok long pasin bilong sori na bilong laikim narapela na givim bel long narapela. Jon i pilim tru ol gutpela pasin bilong Jisas long ol samting bilong spirit, winim ol narapela disaipel, na em i kamapim dispela long Jon sapta 1 na sapta 13 na sapta 17, na planti taim em i stori long i stap bilong Jisas taim em i no bin kam daun yet long graun.—Jon 1:1-3; 3:13; 6:38, 42, 58; 17:5; 18:37.
5 Na pasin bilong pren tru i stap tu namel long aposel Pol na gutpela poroman bilong em Timoti. Narapela i pilim tru gutpela pasin bilong narapela. Pol i save tokaut long gutpela pasin bilong Timoti olsem: “Em i save wanbel wantaim mi na oltaim em i save tingting long painim rot bilong helpim yupela. . . . Yupela i save long gutpela pasin bilong Timoti. . . . Em i bin helpim mi long wok bilong gutnius, olsem pikinini i save helpim papa.” (Filipai 2:20-22) Pol tupela Timoti i stap gutpela pren tru na dispela i kamap klia long planti tok Pol i bin mekim long Timoti, olsem: “Yu mas was gut long dispela wok God i bin givim long yu. Givim baksait long olkain toktok nabaut i no bihainim tingting bilong God.” (1 Timoti 6:20; lukim tu 1 Timoti 4:12-16; 5:23; 2 Timoti 1:5; 3:14, 15.) Sapos yumi skelim pas Pol i raitim long Timoti na pas em i raitim long Taitus bai yumi save em i moa pren wantaim Timoti. Na Timoti tu i gat wankain tingting long Pol, olsem Pol i tok long 2 Timoti 1:3, 4: “Oltaim mi save tingting long yu . . . Wara bilong ai bilong yu i bin pundaun, na mi laikim tumas long lukim yu gen, bai mi ken amamas tru.”
6 Na Baibel i stori tu long Devit na Jonatan, tupela i bin stap pren tru. Bihain long taim Devit i kilim i dai Goliat, Jonatan “i givim bel bilong en moa yet long Devit na em i laikim Devit tru olsem em i laikim em yet.” (1 Samuel 18:1) Jonatan i lukim Devit i givim bel long litimapim nem bilong Jehova, na em i no pret long pait wantaim traipela Goliat, olsem na Jonatan i kamap pren tru bilong Devit.
7 King Sol i painim rot bilong kilim i dai Devit, na Jonatan i laik helpim Devit, maski Jonatan yet inap kisim bagarap long mekim olsem. Jonatan i pikinini bilong Sol, tasol Jehova i no makim em bilong kamap king bihain long Sol; Jehova i makim Devit. Tasol Jonatan i no bel nogut long Devit long dispela samting. (1 Samuel 23:17) Na Devit i laikim tumas Jonatan tu, na taim Jonatan i dai, Devit i bel hevi tru na i tok: “Mi sori tru long yu, Jonatan, brata bilong mi. Mi laikim yu tumas na yu bin laikim mi tu. Laik bilong yu i strong moa yet na i winim tru laik bilong ol meri i laikim mi.” Narapela i tingim gutpela pasin bilong narapela, na dispela i as na tupela i stap pren tru.—2 Samuel 1:26.
8 Na yumi ken tingim stori bilong Baibel long Naomi tupela Rut, em narapela i laikim tru narapela. Rut i tokim Naomi: “Yu no ken tokim mi long lusim yu na yu no ken pasim mi long i go wantaim yu. Olgeta ples yu go long en, mi tu bai mi go long en. Olgeta ples yu stap long en, mi tu bai mi stap long en. Lain bilong yu bai i kamap lain bilong mi. Na God bilong yu bai i kamap God bilong mi.” (Rut 1:16) Rut i lukim gutpela pasin bilong Naomi na harim em i givim biknem long Jehova, na yumi ken ting dispela i as na Rut i pren gut long em.—Lukim Luk 6:40.
Pol Em Man Bilong Pren Gut
9 Olsem yumi stori pinis long en, Pol i stap gutpela pren bilong Timoti na i laikim tumas em, tasol em i laikim ol narapela brata tu na em i pren gut wantaim ol. Em i tokim ol elda long Efesus olsem: “No ken lusim tingting long pasin mi bin mekim. . . . Taim mi skulim yupela, wara bilong ai bilong mi i kapsait.” Tru tumas, ol i pren tru bilong em na em i laikim ol tru. Na ol i gat wankain tingting long Pol tu, olsem na taim ol i harim olsem em i no ken kam bek gen, “olgeta i krai planti, na ol i holimpas Pol na i givim kis long em.” (Aposel 20:31, 37) Ol i amamas long ol samting Pol i bin mekim bilong helpim ol. Em i kamapim bel bilong em long ol brata bilong Korin tu na em i tokim ol: “Mipela i givim bel . . . moa yet long yupela. . . . Mipela i laikim tumas yupela. Tasol yupela yet i pasim bel bilong yupela, na yumi no stap wanbel tru. . . . Yupela i mas mekim wankain pasin olsem mipela i mekim long yupela. Yupela tu i mas givim bel . . . long mipela.”—2 Korin 6:11-13.
10 Olsem na yumi save, planti brata long Korin i no bin pren tumas long Pol, na ol i no pilim ol gutpela pasin bilong em. Sampela i toktok planti na i tok: “Yumi lukim em i no gat strong tru, na em i no save tru long pasin bilong autim tok.” (2 Korin 10:10) Olsem na Pol i tokim ol: “Mi ting mi no aninit liklik long ol dispela ‘namba wan aposel’ bilong yupela.” Na em i tokaut long ol long ol traim na hevi em i bin karim, olsem yumi kaunim long 2 Korin 11:5, 22-33.
11 Yumi save Pol i bin pren gut long ol man em i bin helpim ol, long wanem, em i tok: “Mipela i laikim yupela tumas, olsem na mipela i . . . redi tu long givim laip bilong mipela bilong helpim yupela, long wanem, yupela i bin kamap pren tru bilong mipela.” (1 Tesalonaika 2:8) Em i laikim tru ol dispela nupela brata, na em i laik save ol i karim yet ol hevi o olsem wanem, olsem na em i salim Timoti i go, na Timoti i tok ol i stap strong, na nau Pol i amamas. (1 Tesalonaika 3:1, 2, 6, 7) Wanpela buk (Insight on the Scriptures) i tok: “Pol i pren gut wantaim ol brata em i save helpim ol.”
As Bilong Pasin Bilong i Stap Pren Tru
12 Tru tumas, sapos brata i amamas long narapela i helpim em, o em i amamas long gutpela wok narapela i bin mekim na em i pilim tru, dispela i as na tupela i kamap pren tru olsem brata brata. Olgeta Kristen i dediket pinis long Jehova ol i gat sampela gutpela pasin yumi ken amamas long en na bai yumi kamap pren bilong ol na laikim tru ol. Yumi olgeta i tingim Kingdom na stretpela pasin bilong God i namba wan samting, na i gat 3-pela samting yumi olgeta i wok long sakim, olsem: Satan wantaim ol spirit nogut, na pasin bilong dispela graun em Satan i bosim, na laik nogut bilong skin. Olgeta brata bilong yumi i wok strong long daunim dispela 3-pela samting, na yumi mas pilim tru dispela samting ol i mekim. I gat tupela lain tasol em olgeta man bilong graun inap insait long en, em lain bilong Jehova na lain bilong Satan. Ol brata sista i dediket pinis ol i bilong Jehova, wankain olsem yumi, olsem na yumi mas laikim ol olsem pren tru bilong yumi.
13 Na yumi mas mekim olsem long ol elda tu na tingim hatwok ol i mekim long kongrigesen. Ol i gat ol narapela wok olsem yumi tu. Ol i gat famili bilong lukautim, na ol i mas stadi, na go long ol miting, na autim tok. Na ol i mas redim ol samting bilong miting, na mekim pablik-tok, na stretim hevi i kamap insait long kongrigesen, na sampela taim ol i lusim planti aua long stretim sampela hevi. Olsem na yumi “mas givim biknem long ol dispela kain man.”—Filipai 2:29.
Kamapim Klia Olsem Yu Laikim Tru Ol Brata
14 Olsem Jisas na Pol i bin mekim, yumi tu i mas belgut long ol wanlotu bilong yumi na bai Jehova i ken amamas long yumi. Pol i tok: “Yupela i mas givim bel . . . long ol arapela manmeri bilong God, na laikim ol tru olsem ol brata bilong yupela stret.” (Rom 12:10) “Mi no ken raitim sampela tok long yupela long pasin bilong givim bel . . . long ol manmeri bilong God, long wanem, God i skulim yupela pinis long dispela pasin.” (1 Tesalonaika 4:9) “Yupela Kristen, oltaim yupela wan wan i mas givim bel . . . long ol arapela.” (Hibru 13:1) Papa bilong yumi long heven em i amamas taim yumi stap pren tru long ol brata sista ol i olsem ol pikinini bilong em hia long graun!
15 Long bipo ol Kristen i save “givim kis long ol” narapela Kristen taim ol i bungim ol. (Rom 16:16; 1 Pita 5:14) Em mak bilong ol i stap pren tru olsem brata brata! Long nau long planti hap, taim tupela Kristen i bung, pes i lait na i lap, na ol i sekan. Long sampela kantri, olsem Meksiko, narapela i save holim narapela, em mak bilong ol i stap pren tru. Ating dispela pasin bilong i stap olsem brata brata i as na lain bilong Jehova i kamap bikpela long ol dispela kantri.
16 Olsem wanem: Taim yumi go long miting, yumi save mekim pasin pren long ol manmeri? Sapos yumi tingim ol, bai yumi mekim sampela gutpela tok long ol, na sampela i olsem ol i gat hevi tu na yumi mas givim gutpela tok long ol. Baibel i tok yumi mas “strongim bel bilong ol man i save pret na long helpim ol man i no strong.” (1 Tesalonaika 5:14) Em pasin bilong i stap pren tru bilong ol, olsem brata brata. Na yumi ken givim gutpela tok tu long brata i mekim pablik-tok o long wanpela i mekim tok long Miting Bilong Wok o long Skul.
17 Na yumi ken singautim sampela i kam kaikai wantaim yumi long haus bilong yumi, o sapos i gat taim bihain long miting yumi ken mekim olsem. Yumi ken tingim tok bilong Jisas long dispela samting, i stap long Luk 14:12-14. Wanpela brata bipo em i misineri em i bin stap wasman long wanpela kongrigesen na ol famili insait long en i bilong narapela narapela lain. Wasman i pilim olsem ol i no pren gut wantaim, olsem na long olgeta Sande em i singautim narapela narapela famili i kam kaikai wantaim em, na long taim yia i pinis, olgeta i bin kamap pren bilong em.
18 Sapos wanpela brata o sista i sik na em i stap long haus bilong em o long haus sik, gutpela yumi ken mekim sampela pasin sori long em na bai em i ken save yumi tingim em. Yumi ken i go lukim em na toktok wantaim em olsem wanpela pren, o yumi ken toktok wantaim em long telefon, o salim pas long em i gat sampela gutpela tok bilong strongim na mekim gut bel bilong em.
19 Na olsem wanem? Yumi save pren gut long olgeta brata wankain, maski long kala bilong skin o ol i gat bikpela save o namba o nogat, o ol i rabis long ol samting bilong skin o nogat? Yumi save kamap pren tru wantaim ol olsem Pol i tokim ol brata bilong Korin long mekim? Yumi mas tingim ol gutpela pasin tasol bilong ol brata na maski long ol dispela narapela samting bilong ol olsem skin o sindaun samting bilong ol. Na sapos yumi laikim ol olsem brata bilong yumi, orait, taim sampela i kamap strong long wok bilong spirit, bai yumi amamas na yumi no bel nogut long ol.
20 Na sapos yumi laikim tru ol brata bilong yumi, bai yumi helpim ol tu long wok bilong autim tok, olsem wanpela singsing bilong yumi (Namba 92) i tok:
“Helpim gut ol man i no gat strong,
Bai ol i no pret long autim tok.
Helpim yangpela manmeri tu
Long daunim pret na i sanap strong tru.”
21 Olsem na yumi no ken lusim tingting long i stap pren tru bilong ol narapela brata sista, na bilong mekim olsem, yumi mas bihainim tok bilong Jisas, em i tok: “Yupela i mas givim ol samting long ol arapela, na bai God i givim ol samting long yupela. Em bai i skelim gutpela moa long yupela. . . . Skel yupela i save givim long ol arapela man, long dispela skel tasol God bai i bekim long yupela.” (Luk 6:38) Sapos yumi stap pren bilong ol narapela brata ol i wokman bilong Jehova olsem yumi tu, na yumi givim biknem long ol, dispela bai helpim yumi tu. Tru tumas, sapos yumi amamas long i stap pren bilong olgeta narapela brata na laikim ol tru, bai yumi ken amamas tru!
[Ol Futnot]
a Lukim narapela stori: “Givim bel (Agape)—Em i Wanem Samting, na Em i No Wanem Samting.”
Bai Yu Bekim Olsem Wanem?
◻ Wanem tupela tok Grik i makim pasin bilong yumi? Wanem insait bilong en?
◻ Wanem as na yumi stap pren wantaim narapela olsem brata brata?
◻ Baibel i stori long husat ol i stap pren tru?
◻ Bilong wanem yumi mas laikim tru ol brata na ol elda?
[Askim Bilong Stadi]
1. Bilong wanem lain bilong Jehova i save amamas long taim ol i bung wantaim?
2, 3. Wanem tupela tok Grik i makim pasin narapela i mas mekim long narapela? Wanem insait bilong dispela tupela tok?
4. Wanem as na Jisas tupela Jon i stap pren tru na narapela i laikim tumas narapela?
5. Olsem wanem long pasin bilong Pol tupela Timoti long i stap pren tru?
6, 7. Devit tupela Jonatan i ting olsem wanem long narapela narapela? Wanem as na tupela i stap pren tru olsem?
8. Husat tupela meri i bin stap gutpela pren tru? Wanem as na tupela i bin stap olsem?
9. Olsem wanem yumi save, Pol i man bilong mekim gutpela pasin pren long ol brata?
10. Ol brata long Korin i sot long wanem gutpela pasin na Pol i tokaut long ol hevi i painim em, olsem yumi lukim long 2 Korin sapta 11?
11. Olsem wanem yumi save Pol i laikim tumas ol Kristen long Tesalonaika?
12. Bilong wanem yumi mas laikim ol brata olsem pren tru bilong yumi?
13. Bilong wanem yumi mas laikim tru ol elda?
14. Wanem sampela skripsa i tok, yumi mas i stap pren tru olsem brata brata?
15. Wanem sampela pasin pren bilong ol brata long taim ol i bung?
16. Taim yumi stap long Haus Kingdom yumi ken mekim wanem bilong kamapim klia olsem yumi laikim tru ol brata?
17. Wanpela elda i mekim wanem bilong helpim kongrigesen long kamap pren wantaim?
18. Yumi ken mekim wanem long ol brata o sista i gat sik samting na ol i ken save yumi laikim tru ol?
19, 20. Yumi mas mekim wanem bilong kamapim klia olsem yumi laikim tru olgeta brata?
21. Sapos yumi stap pren bilong ol narapela, dispela i gutpela olsem wanem?
[Piksa long pes 15]
Aposel Pita i tokim ol brata long kisim pasin bilong i stap pren tru long ol narapela long lain bilong God