Askim

Wanpela meri Kristen i stap gut long God em i mas mekim wanem sapos man bilong em i laik katim marit bilong tupela?

Taim God i kamapim pasin bilong marit, em i tok man na meri i mas “pas wantaim.” (Stat 2:​18-24) Ol manmeri i kamap sinman na ol i no gutpela olgeta moa, olsem na ol hevi i wok long kamap insait long planti marit, tasol God i laik bai ol marit i mas pas wantaim. Aposel Pol i tok: “Long ol manmeri i marit pinis, mi givim dispela lo. Em i no lo bilong mi yet. Nogat. Em i lo bilong Bikpela. Em i olsem. Meri i no ken lusim man bilong en. Na sapos em i lusim man pinis, orait em i mas i stap nating. Sapos nogat, em i ken i go bek na wanbel gen wantaim man bilong en. Na man tu em i no ken rausim meri bilong en.”​—⁠1 Korin 7:​10, 11.

Tok bilong dispela ves i tokaut olsem, sampela taim namel long ol man i no gutpela olgeta, wanpela marit bai lusim poroman bilong em. Olsem: Pol i tok sapos wanpela marit i lusim poroman, tupela poroman wantaim ol i mas “i stap nating,” olsem no ken maritim nupela poroman. Bilong wanem? Tru, poroman i lusim em, tasol long ai bilong God tupela i pas yet wantaim. Pol inap tok olsem, long wanem, Jisas i bin makim lo bilong marit ol Kristen i mas bihainim, em i tok: “Sapos meri bilong wanpela man em i no bin mekim pasin pamuk [tok Grik, por·neiʹa], na man i rausim em na i maritim narapela meri, dispela man yet em i mekim pasin pamuk.” (Matyu 19:⁠9) Em nau, Baibel i tok i gat wanpela as tasol bilong katim marit, em “pasin pamuk.” I luk olsem long dispela tupela marit Pol i stori long en, i no gat wanpela i bin mekim pasin pamuk, olsem na taim man o meri i lusim poroman, dispela marit bilong tupela i no pinis long ai bilong God.

Nau Pol i stori long samting i save kamap taim poroman bilong wanpela Kristen tru em i no bilip. Tingim tok bilong Pol: “Sapos man o meri i no bilip em i laik lusim meri o man bilong en, i orait, em i ken lusim. Sapos dispela kain pasin i kamap, orait dispela man o meri i bilip long Krais, em i no olsem kalabus i stap wantaim meri o man bilong en. Nogat. Em i ken larim em i go, long wanem, God i bin singautim yupela long i stap gut wantaim ol arapela.” (1 Korin 7:​12-16) Wanpela meri marit i stap gut long man bilong en, em inap mekim wanem sapos man bilong en (em i no save bilip) i lusim em, na man i laik katim marit long lo bilong gavman?

Ating meri i laik bai man bilong em i stap yet wantaim em. Ating em i laikim yet dispela man, na em i tingim tupela wantaim i mas inapim laik bilong bel na tingting na laik bilong mekim maritpasin, na dispela meri i save em wantaim ol pikinini i mas i gat man bilong lukautim ol long samting bilong skin. Na tu, ating em inap ting olsem bihain man bilong en bai kisim bilip na God bai kisim em bek. Tasol sapos man i mekim samting bilong katim marit (i no gat as bilong en long Baibel), meri i ken “larim em i go,” olsem Pol i tok. Dispela tok i stret tu long wanpela man marit i bilip, tasol em i sakim tingting bilong God long marit na em i strong long lusim meri bilong em.

Tasol long kain taim olsem, ating dispela meri i laik bihainim lo bilong gavman bilong lukautim em yet na ol pikinini bilong em tu. Em i gat laik long ol pikinini i ken i stap yet wantaim em bambai em inap mekim pasin sori long ol, na skulim ol long ol stretpela pasin, na kirapim ol long bilip long ol gutpela tok bilong Baibel. (2 Timoti 3:15) Sapos em i katim marit, dispela inap mekim na em i no inap mekim ol samting i stret long em i mekim. Olsem na ating em bai mekim samting bambai wanpela loya i ken stap olsem maus bilong em na bai kot i orait long em i ken i stap yet wantaim ol pikinini bilong em na tu man bilong em i mas givim mani samting long em bilong lukautim dispela famili em i laik lusim. Long sampela hap, taim wanpela meri i tokaut long kot olsem em i no wanbel long man bilong em i katim marit, em inap sainim sampela kotpepa i makim husat bai kisim ol pikinini, na man i mas givim hamas mani long olgeta taim long lukautim meri wantaim ol pikinini, tasol dispela pepa i no tok olsem meri i wanbel long katim marit olsem man i laik mekim. Tasol long sampela hap ol tok i stap long kotpepa i makim olsem meri i wanbel long katim marit; olsem na sapos man bilong em i bin mekim pasin pamuk na meri i sainim dispela pepa, orait dispela i makim olsem em i laik rausim dispela poroman.

Klostu olgeta long dispela ples na long kongrigesen bai ol i no save long ol samting bilong marit bilong tupela, olsem ol i bihainim lo bilong Baibel na katim marit o nogat. Tasol taim tupela i no katim yet marit, gutpela sapos dispela meri marit i ken toksave long wasman siaman na narapela elda long kongrigesen (gutpela em i mekim long rot bilong pas) bambai ol i ken save tru long ol samting i kamap sapos sampela askim i kamap long dispela long nau o long bihain.

Yumi lukluk gen long tok bilong Jisas: “Sapos meri bilong wanpela man em i no bin mekim pasin pamuk, na man i rausim em na i maritim narapela meri, dispela man yet em i mekim pasin pamuk.” Sapos man marit i bin mekim pasin pamuk, tasol em i laik i stap yet wantaim meri bilong em (i no gat asua), orait meri i mas tingim; em bai lusim rong bilong man bilong em na slip yet wantaim em o em bai rausim em. Sapos em i laik lusim rong bilong man bilong em na stap yet wantaim em, em i no mekim rong.​—⁠Hosea 1:​1-3; 3:​1-3.

Maski man marit i bin pamuk em i laik katim marit, ating meri marit i laik yet long lusim rong bilong en, na em i laik i stap yet wantaim em. Em i samting bilong meri yet long tingim maus bilong bel na sindaun bilong em na skelim olsem em bai tokaut long kot olsem em i orait o em i no orait long man i katim marit. Long sampela hap, taim wanpela meri i tokaut long kot olsem em i no wanbel long man bilong em i katim marit, em inap sainim sampela kotpepa i makim husat bai kisim ol pikinini, na man i mas givim hamas mani long olgeta taim long lukautim meri wantaim ol pikinini, tasol dispela pepa i no tok olsem meri i wanbel long katim marit bilong tupela. Taim meri i sainim ol kain pepa olsem, dispela i no makim olsem em i laik rausim poroman bilong en. Tasol long sampela hap, taim meri i laik tokaut long kot olsem em i no wanbel long man bilong em i katim marit, ating ol bai askim em long sainim sampela kotpepa i tok em i wanbel long katim marit. Sapos em i sainim ol kain pepa olsem, dispela i makim olsem em i laik rausim dispela poroman i gat asua.

Bilong abrusim sampela tingting kranki inap kamap, long dispela taim tu i gutpela sapos taim kain samting olsem i kamap em i gutpela tingting long meri marit i givim wanpela pas long ol elda bilong kongrigesen i stori long ol samting em i mekim na wanem tingting bilong em long ol dispela samting. Long pas em i ken tokaut olsem em i bin tokim man bilong em olsem em i laik lusim rong bilong em na stap yet olsem meri bilong em. Dispela bai kamapim klia olsem em i no wanbel long katim marit; em no givim baksait long man bilong em, nogat, em i laik lusim rong bilong em. Em i kamapim long ples klia olsem em i laik lusim rong bilong poroman marit na stap yet olsem meri bilong em, orait taim em i sainim ol pepa bilong stretim ol samting bilong mani na husat bai kisim ol pikinini, dispela i no makim olsem em i rausim man bilong em.a

Em i kamapim long ples klia olsem em i laik lusim rong bilong man bilong en, maski man i katim pinis marit bilong tupela. Dispela i mekim na i no stret long tupela i maritim ol narapela poroman. Sapos meri marit i laik lusim rong bilong man bilong em, tasol man i no laik, na bihain meri i laik rausim em, long wanem, em i bin mekim pasin pamuk, nau tupela inap maritim ol narapela poroman. Tok bilong Jisas i makim olsem em i samting bilong poroman marit i no gat asua long makim olsem marit i pinis o nogat.​—⁠Matyu 5:32; 19:9; Luk 16:18.

[Futnot]