Ol i Mas Autim Dispela Gutnius Pastaim
“Olgeta lain man i mas harim man i autim gutnius pastaim.”—MAK 13:10.
BILONG wanem ol Witnes Bilong Jehova i strong long autim tok? Ol man bilong olgeta hap ol i save long yumi, olsem yumi man bilong autim tok bilong Baibel long haus bilong ol man na long rot, na long ol narapela taim tu. Taim yumi gat rot, yumi tokaut olsem yumi Witnes, na long gutpela pasin yumi wok long painim rot bilong autim gutnius long ol man. Yumi ken tok, dispela wok bilong autim tok em i mak bilong yumi ol Witnes!—Kolosi 4:6.
2 Tingim dispela: Taim ol man i lukim wanpela lain olsem ol man meri pikinini ol i raun long hap bilong ol na ol i bilas gut na holim paus, yu ting ol man bai ting, ‘Em ol Katolik (o Otodoks) i kam bek gen’? o ol bai ting, ‘Ol Pentikos (o Baptis) i kam bek gen’? Nogat. Ol man i save, long ol dispela lotu i no gat ol famili olgeta i save go long ol haus na autim tok bilong Baibel. Ating sampela lotu i save salim ol “misineri” i go long sampela hap na mekim wok inap tupela yia samting, tasol ol manmeri nating long lain bilong ol i no save mekim dispela wok. Long olgeta hap ol man i save, ol Witnes Bilong Jehova tasol i strong long autim tok, na oltaim ol i painim rot bilong mekim. Na ol man i save gut long ol nius bilong ol, em Wastaua na Kirap!—Aisaia 43:10-12; Aposel 1:8.
Ol i Narapela Kain Long Ol Pris Pasto
3 Planti taim ol nius i stori long planti pris pasto long sampela hap ol i save mekim pasin sem long ol pikinini, na pamuk, na mekim pasin giaman na paulim mani. Ol i gat ol gutpela gutpela haus na ka na gutpela sindaun. Dispela pasin bilong ol i kamap ples klia tru. Wanpela man i raitim singsing, nem bilong en, “Yu Ting Jisas Bai Pasim Hanwas Rolex [em wanpela kain hanwas gol i gat bikpela pe tru bilong en] na Autim Tok Long Televisen?” Na singsing i tok moa: “Sapos Jisas i kam bek long Graun, yu ting Em bai mekim wok politik, na kisim tupela haus, em namba tu haus i stap long Pam Spring [em hap bilong ol maniman long Kalifonia], na Em bai wok long giaman olsem Em i stap rabis?” Tok bilong Jems i stret tru, em i tok: “Yupela i bin kisim ol gutpela gutpela samting na yupela i amamas i stap. Yupela i bin kaikai planti na kamap patpela, na de bilong kilim yupela i dai em i kamap pinis.”—Jems 5:5; Galesia 5:19-21.
4 Na ol pris pasto i save prenim ol lain politik, na ol i save sanap long eleksen, na dispela i kamapim klia olsem ol i wankain olsem ol bikman bilong lotu long taim bilong Jisas. Tasol long ol kantri olsem Amerika na Kanada, mani bilong ol lotu i wok long pinis, long wanem, planti pris pasto i mekim pasin pamuk long ol pikinini na ol bikpela tu, na ol i kamap long kot, olsem na misin bilong ol i mas baim kot bilong ol long bikpela mani tru.—Matyu 23:1-3.
5 Jisas i tok stret long ol bikman bilong lotu long taim bilong em: “Yupela saveman bilong lo na yupela Farisi, yupela lukaut. Yupela i man bilong tupela maus. Yupela i olsem matmat ol i bin penim long waitpela pen. Ausait bilong matmat em i naispela bilong lukim, tasol long insait ol bun bilong man i dai pinis na olgeta samting i doti i pulap i stap. Yupela tu i stap olsem tasol. Ol man i lukim bodi bilong yupela, ol i ting yupela i stretpela man. Tasol long insait yupela i pulap long ol pasin bilong giaman na pasin bilong sakim lo.” Olsem na ol lotu bilong graun olsem lotu Katolik, Talatala, Otodoks, o ol narapela i holim nating nem Kristen, God i no bin givim wok long ol long autim gutnius. Ol i no dispela lain “wokboi i gat gutpela tingting,” em Jisas i bin tok profet long en.—Matyu 23:27, 28; 24:45-47.
Bilong Wanem Yumi Autim Gutnius Pastaim?
6 Long dispela tok bilong Jisas long autim gutnius long olgeta hap, Mak tasol i kolim dispela hap tok “pastaim.” (Mak 13:10; na lukim Matyu 24:14.) Dispela i makim olsem i gat sampela samting bai kamap bihain long dispela wok bilong autim gutnius long olgeta hap. Sampela samting bai kamap, em dispela “bikpela hevi tru,” na bihain long en Krais bai kirap bosim graun.—Matyu 24:21-31; KTH 16:14-16; 21:1-4.
7 Orait, bilong wanem God i laik bai ol i mas autim gutnius pastaim? Wanpela as em olsem: God i gat pasin sori, na pasin i stret, na gutpela tingting na save, na bikpela strong. Long truim bilong tok bilong Jisas long Matyu 24:14 na Mak 13:10, ol dispela pasin bilong Jehova i kamap ples klia tru. Orait, nau yumi ken skelim ol dispela wan wan pasin bilong em na olsem wanem ol i insait long wok bilong autim gutnius.
Gutnius na Sori Bilong Jehova
8 Olsem wanem wok bilong autim gutnius i kamapim klia sori bilong God? I olsem: Dispela tok i no bilong i go long ol man bilong wanpela lain o skin tasol, nogat. Em i gutnius bilong “olgeta lain man.” Aposel Jon i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun [i no wanpela lain tasol], olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim. God i no salim Pikinini bilong en i kam long graun bilong skelim pasin bilong ol manmeri bilong graun olsem jas. Nogat. Em i salim em i kam bilong kisim bek ol.” (Jon 3:16, 17) Dispela gutnius em long nupela taim bai kamap na ol man bai stap bel isi na wanbel, na stretpela pasin bai stap, dispela em i wanpela mak bilong sori bilong God.—2 Pita 3:13.
Gutnius na Strong Bilong Jehova
9 Olsem wanem wok bilong autim gutnius i kamapim klia strong bilong Jehova? Tingim dispela: Em i bin givim wok long husat bilong autim dispela gutnius? Em i givim long ol strongpela misin bilong graun olsem Misin Katolik o sampela misin Talatala? Nogat. Ol i insait long ol wok politik, olsem na ol i no inap kisim dispela wok. (Jon 15:19; 17:14; Jems 4:4) Ol i gat planti mani samting, na ol i prenim ol bikman bilong graun na ol i gat strong long stiaim ol, tasol God Jehova i no tingim dispela strong bilong ol. Na em i no tingim ol tok bilong lotu ol i skulim ol man long en na ol i kisim long ol man tasol. God i no bin mekim wok long strong bilong ol man bambai em i ken kamapim laik bilong em, nogat. Em i no gat wok long dispela samting.—Sekaraia 4:6.
10 Aposel Pol i bin tokim kongrigesen Korin: “Ol brata, yupela i mas tingim taim God i bin singautim yupela na yupela i kamap Kristen. Planti bilong yupela i no bin i stap olsem saveman long ai bilong ol man . . . Na ol man ol arapela i save lukim olsem man i no gat strong, em God i bin kisim bilong semim ol man i gat strong. Na em i kisim ol man i no gat nem long dispela graun, em ol man ol arapela i save lukim olsem ol rabis samting na olsem ol samting nating. Na long dispela pasin God i save mekim ol man i gat biknem na strong i kamap olsem samting nating. Olsem na i no gat wanpela man i ken litimapim nem bilong em yet long ai bilong God.”—1 Korin 1:26-29.
11 Namel long ol Witnes Bilong Jehova i no gat planti maniman i stap, na i no gat wanpela bikman bilong politik. Ol i no insait long ol wok politik, olsem na ol i no gat strong long stiaim tingting bilong ol gavman samting. Nau long taim bilong yumi, planti taim ol bikman bilong lotu na bilong politik i bin kirapim ol man long mekim nogut tru long ol Witnes. Tasol maski ol lain bilong Hitler na Mussolini na ol Komyunis na ol man bilong litimapim kantri na ol lotu giaman i bin mekim pasin birua nogut tru long ol Witnes, ol i wok long autim gutnius long olgeta hap bilong graun, na lain bilong ol i go bikpela tru.—Aisaia 60:22.
12 Ol Witnes i ting wanem samting i mekim na ol i kamap planti olsem? Jisas i tok promis long ol disaipel: “Bihain Holi Spirit bai i kam i stap long yupela, na yupela bai i kisim strong. Na yupela bai i autim tok bilong mi long Jerusalem, . . . Judia, . . . Samaria, na i go inap long olgeta hap bilong graun.” Na i wankain tu long nau. Strong bilong God—i no save bilong ol man—dispela i as na ol Witnes inap mekim gut wok bilong ol long autim tok long olgeta hap. God i mekim wok long ol man i olsem ol i no gat strong, na long dispela rot em i mekim wanpela bikpela wok tru bilong skulim ol man; kain bikpela wok olsem i no bin kamap bipo.—Aposel 1:8; Aisaia 54:13.
Gutnius na Save Bilong Jehova
13 Ol manmeri i autim gutnius, ol i no mekim bilong kisim pe. Jisas i tok: “Yupela i kisim nating, na i no gat pe bilong en. Olsem na yupela i mas givim nating.” (Matyu 10:8) Olsem na i no gat wanpela Witnes Bilong Jehova i save kisim pe long mekim wok bilong God, na ol i no ting ol i mas kisim. Na long ol miting bilong ol, ol i no save singaut long mani. Ol i amamas long mekim wok bilong God na bai em inap bekim tok long Satan, bipo em i bin sutim tok long God. I olsem dispela birua bilong God i bin tok, ol man i tingim skin bilong ol yet na ol i mekim wok bilong God. Tasol long gutpela tingting na save bilong em, Jehova i bin kamapim wanpela gutpela bekim tru bilong dispela tok Satan i bin sutim long em—em i gat planti milion Witnes Kristen ol i stap gut long em na ol i autim gutnius long ol man long haus bilong ol na long ol rot na long kain kain taim na ples.—Jop 1:8-11; 2:3-5; Sindaun 27:11.
14 Tok promis bilong Kingdom i insait long dispela gutnius ol i autim, na dispela tu i kamapim klia gutpela tingting na save bilong Jehova. Pol i tok: “Mipela i autim tok long gutpela tingting na save bilong God. Taim God i no wokim graun yet, na long save bilong em, em i bin makim rot bilong mekim yumi i sindaun gut wantaim em long heven. Tasol tok bilong dispela rot i bin i stap hait.” “Tok bilong dispela rot i bin i stap hait,” dispela i makim rot bilong God long pinisim pasin bikhet i bin kirap long Iden. Gutpela tingting bilong dispela tok “i bin i stap hait” i kamap ples klia long rot bilong Krais Jisas, em i gat nambawan bikpela wok insait long dispela gutnius bilong Kingdom.a—1 Korin 2:6, 7; Kolosi 1:26-28.
Gutnius na Stretpela Pasin Bilong God
15 Dispela tok “pastaim” long Mak 13:10 em i bikpela samting taim yumi tingim stretpela pasin. Jehova em i God bilong mekim pasin i stret, tasol em i mekim pasin sori wantaim. Long rot bilong profet Jeremaia em i tok: “Oltaim mi save . . . mekim gutpela na stretpela pasin long ol [man]. Mi Bikpela, mi save amamas long mekim dispela kain pasin.”—Jeremaia 9:24.
16 Olsem wanem Jehova i kamapim klia stretpela pasin bilong em long wok bilong autim gutnius? Orait, yumi ken tok piksa long wanpela mama i wokim gutpela kek em ol bai kaikai taim sampela lain i kam lukim ol long apinun. Sapos em i lusim i stap long haus kuk na em i no toksave long ol pikinini, yu ting ol bai mekim wanem? Bipo yumi olgeta i stap pikinini, a? Yumi save, wanpela pikinini bai subim pinga long kek bilong traim swit bilong en! Orait, sapos mama i no bin toksave long pikinini pastaim, i no gat wanpela as tru na bai em i ken paitim pikinini. Tasol sapos em i bin tokaut klia olsem ol bai kaikai kek bihain, taim ol lain i kam lukim ol, na pikinini i no ken holim o kaikai, orait sapos pikinini i bikhet, i stret mama i givim strafe long em.—Sindaun 29:15.
17 Jehova i gat stretpela pasin na em i no ken bagarapim ol man nogut hariap—pastaim em i mas givim toksave long ol. Olsem na kirap long yia 1919, bihain long taim Namba Wan Pait i kirapim pinis ol hevi olsem “pen i save kamap pastaim long meri i laik karim pikinini,” Jehova i salim ol Witnes bilong em i go long olgeta hap na ol i strong long autim gutnius long ol man. (Matyu 24:7, 8, 14) Ol lain bilong graun i no inap tok, ol i no bin harim dispela toksave.
Ol i Autim Gutnius Inap Long Wanem Mak?
18 Wanpela buk (Last Places—A Journey in the North) i kamapim klia dispela bikpela wok ol i mekim bilong skulim ol man long Baibel. Man bilong raitim buk i tok, wanpela taim em i bin skelim mep bilong ailan Fula, em wanpela bilong ol ailan Setlan long hap not bilong Skotlan. Mep i makim olsem i gat planti olpela sip i bagarap pinis na ol rip na ol narapela samting i stap insait long solwara long arere bilong ailan. Em i tok, ol dispela samting long mep i ‘toksave long ol sip olsem ol i no ken i kam long dispela hap. Ol dispela samting i olsem ol bom i hait i stap na i redi long bagarapim ol sip. Olsem na ol man bilong raun long bot na lukim ples, na ol wokman bilong gavman, ol i pret long kam. Tasol sampela de bihain mi kisim save olsem ol dispela samting nogut i no pasim ol Witnes Bilong Jehova.’ Na em i tok, ‘Ol i bin raun long hap bilong ol skwota long ol biktaun na long ol kantri i stap rabis na bai ol i ken kisim ol man i kam insait long bilip bilong ol, na ol i mekim tu long ailan Fula i stap ausait tru long solwara.’ Em i tok, sampela mun bipo, ol i bin putim wanpela Wastaua klostu long dua bilong wanpela man bilong dispela ailan, nem bilong em Andrew. Na em i tok, ‘Wanpela wik bihain mi lukim wanpela [Kirap! long tok ples Denmak] long ol ailan Fero [long solwara Not Si], na tupela mun bihain mi lukim wanpela [Wastaua long tok ples Denmak] long Nuk, long Grinlan.’ Dispela tok i kamapim long ples klia tru olsem ol Witnes Bilong Jehova i wok strong long autim tok long ol dispela hap bilong not!
Olsem Wanem na Ol i Autim Tok Yet?
19 Tru, i hatwok long go long ol haus na autim tok long ol man yu no save long ol, maski yu bin i stap Witnes inap planti yia. Orait, wanem samting i mekim na ol dispela Kristen i wok yet long autim tok? Ol i dediket pinis long God na ol i save ol i mas mekim wok bilong em. Pol i tok: “Autim gutnius em wok Bikpela i givim mi na mi mas mekim. Mi no inap lusim dispela wok. Sapos mi no autim gutnius, bai mi stap nogut tru.” Dispela tok ol Kristen i autim, em inap givim laip long man, olsem na ol i no inap pasim dispela tok. Wanpela lo long Baibel i tok, sapos man i save wanpela bagarap bai kamap na em i no toksave long ol man, em bai i gat asua sapos ol i bagarap. Ol Witnes i tingim dispela na ol i strong long autim gutnius long ol man.—1 Korin 9:16; Esekiel 3:17-21.
20 Orait, ol i autim gutnius olsem wanem? Wanem as na lain bilong ol Witnes i go bikpela? Wanem sampela hap bilong dispela wok na wanem samting bilong oganaisesen bilong ol i makim olsem ol i trupela lotu? Stori i kam bihain bai bekim ol dispela askim.
[Ol Futnot]
a Bilong kisim sampela save moa long gutpela tingting na save bilong God na ‘dispela tok i bin i stap hait,’ lukim buk Insight on the Scriptures, Volyum 2, pes 1190, em Sosaiti Wastaua bilong Nu Yok i wokim.
Yu Tingim Yet?
◻ Wanem samting i makim ol Witnes Bilong Jehova i narapela kain long ol pris pasto?
◻ Olsem wanem wok bilong autim tok i kamapim klia sori na strong na save bilong God?
◻ Olsem wanem wok bilong autim gutnius i kamapim klia stretpela pasin bilong God?
◻ Wanem samting i mekim na ol Witnes i wok strong yet long autim tok?
[Askim Bilong Stadi]
1, 2. Wanem wanpela mak bilong ol Witnes Bilong Jehova? Olsem wanem em i wanpela mak?
3, 4. Planti taim ol nius samting bilong graun i save mekim wanem kain tok long ol pris pasto bilong ol misin?
5. Olsem wanem yumi ken save, ol pris pasto i no dispela lain “wokboi i gat gutpela tingting”?
6. Wanem ol samting liklik taim bai kamap?
7. Bilong wanem God i laik bai ol i autim dispela gutnius pastaim?
8. Olsem wanem wok bilong autim gutnius em i kamapim klia sori bilong God? (1 Jon 4:7-16)
9. Bilong wanem Jehova i no makim ol strongpela misin bilong graun long autim gutnius?
10. Jehova i givim wok long husat bilong autim gutnius?
11. Wanem samting i makim ol Witnes i narapela kain long ol narapela lotu?
12. Wanem samting i mekim na ol Witnes i kamap planti?
13. (a) Bilong wanem ol Witnes i mekim dispela wok long laik bilong ol na ol i no kisim pe long en? (b) Olsem wanem Jehova i bin bekim tok Satan i bin sutim long em?
14. Wanem dispela tok ‘i bin i stap hait,’ em Pol i toktok long en?
15. Olsem wanem yumi save, Jehova em i God bilong mekim pasin i stret? (Lo 32:4; Song 33:5)
16. I gat wanem tok piksa i makim olsem man i gat pasin i stret em bai givim toksave pastaim na bihain em bai mekim kot long ol man?
17. Kirap long yia 1919, olsem wanem Jehova i bin kamapim klia tru stretpela pasin bilong em?
18. (a) Olsem wanem yumi save, ol Witnes i autim tok long ol longwe hap? (b) Yu save long sampela longwe hap moa ol i autim tok long en?
19, 20. (a) Wanem samting i kirapim ol Witnes long wok yet long autim tok? (b) Wanem ol askim bihain bai yumi bekim?
[Ol Piksa long pes 15]
Maski ol man i stap long ol longwe hap tru, ol Witnes Bilong Jehova i laik autim tok long ol