Askim

Long 2 Korin 6:​14, Pol i stori long husat taim em i kolim dispela tok “ol haiden” o “ol man i no bilip” (NW)?

Namba 2 Korin 6:14 i tok: “Ol haiden [“ol man i no bilip,” NW ] ol i narakain, olsem na yupela i no ken pas wantaim ol na wok bung wantaim ol.” Sapos yumi ritim ol skripsa i stap klostu, i klia olsem Pol i stori long ol man husat i no insait long kongrigesen Kristen. Ol narapela ves Pol i bin raitim na kolim dispela tok “ol man i no bilip” i sapotim dispela tingting.

Olsem: Pol i krosim ol Kristen husat i kotim ol brata spirit long ai bilong “ol man i no bilip.” (1 Korin 6:⁠6) Long dispela ves ol man i no bilip em ol jas i mekim kot long taun Korin. Long namba tu pas bilong em, Pol i tok Satan ‘i bin pasim tingting bilong ol man i no bilip.’ I olsem “hap laplap” i pasim tingting bilong ol man i no bilip na ol i no ken save long gutnius. Ol dispela man i no bilip ol i no bin mekim wanpela samting bilong kirap lotuim Jehova. Pastaim Pol i bin stori long ol olsem: “Sapos man i tanim bel i go long Bikpela, orait God i save rausim dispela hap laplap i bin pasim tingting bilong en.”​—⁠2 Korin 3:16; 4:⁠4.

Sampela man i no bilip ol i man bilong mekim pasin nogut o ol i lotuim ol god giaman. (2 Korin 6:​15, 16) Sampela i birua long ol wokboi bilong Jehova, tasol i no olgeta. Sampela i soim olsem ol i laik save long tok i tru. Planti ol i marit long ol Kristen na ol i amamas long stap wantaim ol. (1 Korin 7:​12-14; 10:27; 14:​22-25; 1 Pita 3:​1, 2) Tasol, olgeta taim Pol i kolim dispela tok “man i no bilip” bilong makim ol man husat i no insait long kongrigesen Kristen, em dispela kongrigesen ol man i “bilip long Bikpela” i insait long en.​—⁠Aposel 2:41; 5:14; 8:​12, 13.

Stiatok i stap long 2 Korin 6:14 em i bikpela helpim long stiaim ol Kristen long olgeta samting bilong laip, na planti taim ol i kolim dispela tok bilong givim gutpela tok kaunsel long ol Kristen i laik marit. (Matyu 19:​4-6) Kristen i dediket na baptais pinis i bihainim savetingting sapos em i no painim wanpela poroman marit namel long ol man i no bilip, long wanem, tingting bilong ol long wanem samting i stret, ol mak ol i laik winim, na ol bilip bilong ol i narapela kain tru long ol trupela Kristen.

Tasol olsem wanem long ol man husat i stadi long Baibel na ol i bung wantaim kongrigesen Kristen? Olsem wanem long ol pablisa i no baptais yet? Ol i man i no bilip? Nogat. Ol man husat i kisim tok i tru bilong gutnius na ol i wok long winim ol mak bilong kisim baptais, yumi no ken kolim ol olsem ol man i no bilip. (Rom 10:10; 2 Korin 4:13) Paslain long em i baptais, Baibel i tok Kornilius “i save bihainim gut pasin God i laikim” na em “i save aninit long God.”​—⁠Aposel 10:⁠2.

Tru, tok kaunsel bilong Pol long 2 Korin 6:14 i no makim ol pablisa i no baptais yet, tasol olsem wanem, yu ting em i savetingting long wanpela Kristen husat i dediket pinis long prenim wanpela man husat i kamap pablisa i no baptais yet na tingting long maritim em? Nogat, dispela i no savetingting. Bilong wanem i olsem? Long wanem, yumi mas tingim tok kaunsel Pol i mekim long ol meri Kristen, man bilong ol i dai pinis. Pol i tok: “Sapos em i laik maritim wanpela man, orait em i ken maritim em. Tasol em i mas maritim man i bilip long Bikpela.” (1 Korin 7:39) Bilong bihainim dispela tok, ol Kristen i dediket pinis i mas painim poroman marit namel long ol man “i bilip long Bikpela.”

Wanem mining bilong dispela tok “man i bilip long Bikpela”? Pol i bin stori long kain man olsem long Rom 16:​8-10 na Kolosi 4:⁠7. Sapos yu ritim ol dispela ves bai yu lukim em i kolim ol dispela man olsem ‘wanwok,’ ‘pren tru,’ ‘brata tru,’ na ‘gutpela wokman tru.’

Man i kamap “wokman tru bilong Bikpela” long wanem taim? Em i kamap wokman tru taim long laik bilong em yet em i mekim wok bilong wokman na em i daunim laik bilong em yet. Jisas i tok: “Sapos wanpela man i laik bihainim mi, orait em i mas daunim laik bilong em yet, na em i mas karim diwai . . . bilong en na bihainim mi.” (Matyu 16:24) Man i kirap bihainim Krais na em i givim em yet long mekim laik bilong God taim em i dediketim em yet long God. Bihain, em i kisim baptais na em i kamap wokman tru na God Jehova i orait long em.a Olsem na bilong “maritim man i bilip long Bikpela,” yu mas maritim man i kamapim long ples klia olsem em i wanpela bilipman tru, na em i wanpela “wokman bilong God na Bikpela Jisas Krais” i dediket pinis.​—⁠Jems 1:⁠1.

Yumi laik tok amamas long man i wok long stadi long Baibel wantaim ol Witnes Bilong Jehova na em i wok long kamap strong. Tasol em i no dediket yet long Jehova na tokaut olsem em bai lusim sampela samting bilong em yet na mekim wok bilong God long laip bilong em. Em i wok yet long mekim ol senis em i mas mekim. Em i mas mekim olgeta samting man i mas mekim bilong kamap wanpela Kristen i dediket na baptais pinis paslain long em i tingting long mekim narapela bikpela samting, olsem marit.

Yu ting em i gutpela tingting long wanpela Kristen i prenim wanpela man husat i stadi long Baibel na i luk olsem em i wok long kamap strong, na yu tingting long wet long em i baptais pastaim na bihain yutupela i marit? Nogat. Sapos man i stadi long Baibel i save olsem wanpela Kristen i dediket pinis i gat laik long maritim em, tasol Kristen hia i no laik maritim em inap long em i kisim baptais pastaim, dispela inap mekim na man bai paul long wanem as tru tru na em i laik baptais.

Ol man i save stap pablisa i no baptais yet inap sotpela taim tasol, inap em i kamap strong na winim mak bilong kisim baptais. Olsem na dispela tok kaunsel bilong maritim ol man i bilip long Bikpela i stret na i no putim hevi long man. Tasol olsem wanem sapos man o meri i bikpela inap long marit, na em i bin go bikpela insait long wanpela famili Kristen, na em i bin wok wantaim kongrigesen inap sampela yia, na em i stap olsem pablisa i no baptais yet? Sapos olsem, wanem samting i pasim em long givim laip bilong em long Jehova olsem dediket? Bilong wanem em i no mekim yet? Em i gat tupela tingting? Yumi no ken tok olsem em i man i no bilip, tasol tu yumi no ken tok olsem em i “man i bilip long Bikpela.”

Tok Pol i mekim long marit em bilong helpim yumi. (Aisaia 48:17) Taim man na meri wantaim i dediket pinis long Jehova na ol i laik marit, orait ol samting bilong spirit bai i mekim na tok promis ol i mekim taim ol i marit bai i gat strongpela as bilong en. Ol i gat wankain tingting long ol samting ol i laik mekim na long wanem samting i bikpela samting. Dispela i helpim ol tru long i stap amamas wantaim. Na tu, taim ol i “maritim man i bilip long Bikpela,” dispela i soim olsem ol i stap gut long Jehova, na ol bai kisim ol blesing i save stap oltaim, long wanem, ‘man i mekim stretpela pasin, God i save bekim stretpela pasin tasol long em.’​—⁠Song 18:⁠25.

[Futnot]

[Piksa long pes 31]

‘Man i mekim stretpela pasin, God i save bekim stretpela pasin tasol long em’