Armagedon Em Samting Bilong Amamas Long En!

1-2. (a) Wai na Armagedon em samting yumi ken amamas long en? (b) Yumi bai skelim wanem ol askim long dispela stadi?

SAMPELA manmeri i yusim dispela tok “Armagedon” taim ol i stori long nuklia woa o bikpela disasta bai kamap long graun. Tasol Baibel i yusim dispela tok Armagedon bilong stori long samting yumi ken amamas long en! (Rev. 1:3) Pait bilong Armagedon i no inap bagarapim ol manmeri, nogat, em bai kisim bek ol! Bilong wanem yumi tok olsem?

² Baibel i kamapim klia olsem Armagedon bai pinisim ol gavman bilong graun na kisim bek ol manmeri. Dispela pait bai pinisim ol manmeri nogut na kisim bek ol stretpela manmeri. Em bai pinisim ol manmeri husat i wok long bagarapim graun. (Rev. 11:18) Bilong helpim yumi long kliagut long ol dispela poin, yumi ken skelim 4-pela askim: Armagedon em wanem samting? Wanem ol samting bai kamap paslain stret long Armagedon? Olsem wanem yumi inap abrusim bagarap long Armagedon? Klostu nau Armagedon bai kamap, olsem na hau bai yumi inap stap gut yet long bilip?

 3. (a) Wanem mining bilong dispela tok “Armagedon”? (b) Olsem Revelesen 16:14, 16 i kamapim, wai na yumi inap tok olsem Armagedon i no makim wanpela ples tru?

³ Ritim Revelesen 16:14, 16. Dispela tok “Armagedon” i kamap wanpela taim tasol long Baibel, na dispela tok i kam long wanpela tok Hibru, mining bilong en “Maunten Bilong Megido.” (Rev. 16:16; ftn.) Megido em wanpela siti long Israel bilong bipo. (Jos. 17:11) Tasol Armagedon i no makim wanpela ples tru i stap long graun, nogat. Em i makim samting bai kamap na “ol king bilong olgeta hap graun” bai bung wantaim long birua long God. (Rev. 16:14) Tasol long dispela atikol, yumi bai yusim dispela tok “Armagedon” bilong makim pait bai kamap bihain tasol long ol king bilong olgeta hap graun i bung wantaim. Hau na yumi save olsem Armagedon i no wanpela ples tru? Namba 1 risen: I no gat wanpela maunten i gat nem Megido. Namba 2 risen: Ples daun i stap raunim olpela taun Megido em liklik tumas na i no inap long “ol king bilong olgeta hap graun” wantaim ol ami na ol masin bilong pait i ken i go bung long en. Namba 3 risen: Long dispela stadi, yumi bai kisim save olsem Armagedon bai stat taim “ol king” bilong graun i pait long ol manmeri bilong God em ol i stap long olgeta hap bilong graun.

 4. Bilong wanem God i givim nem Armagedon long laspela pait bilong em?

⁴ Bilong wanem Jehova i kolim Megido taim em i stori long laspela pait bilong em? Megido i stap klostu long Veli Bilong Jesril, na em ol ples we planti pait i bin kamap long en. Sampela taim Jehova yet i helpim ol manmeri bilong em long winim ol dispela pait. “Klostu long wara bilong Megido,” God i helpim Hetman Barak long daunim ami bilong Kenan em Sisera i go pas long ol. Barak na profet meri Debora i tok tenkyu long Jehova i helpim ol long winim pait. Tupela i singsing olsem: “Long skai, ol sta i pait . . . long Sisera. Tait wara bilong Kison i karim ol i go.”—Het. 5:19-21.

 5. Olsem wanem pait bilong Armagedon bai i no wankain long pait em Barak i bin mekim?

⁵ Barak na Debora i pinisim singsing bilong tupela olsem: “O Jehova, olgeta birua bilong yu i ken bagarap, tasol ol manmeri i laikim yu i ken lait olsem lait bilong san i kamap long moning.” (Het. 5:31) Long Armagedon, God bai pinisim ol birua bilong em na kisim bek ol manmeri husat i laikim em. Tasol wanpela samting i no wankain long dispela 2-pela pait. Long Armagedon, ol manmeri bilong God i no inap pait. Na tu, ol i no inap holim ol samting bilong pait! Ol bai sanap ‘strong taim ol i stap isi na trastim’ Jehova na lain ami bilong em long heven.—Ais. 30:15; Rev. 19:11-15.

 6. Hau bai Jehova i daunim ol birua bilong em long Armagedon?

⁶ Hau bai God i daunim ol birua bilong em long Armagedon? Em i gat planti rot bilong pinisim ol birua. Em inap yusim ol bikpela guria, ren ais, na laitning. (Jop 38:22, 23; Ese. 38:19-22) Em inap mekim ol birua i kilim ol yet i dai. (2 Sto. 20:17, 22, 23) Em inap yusim ol ensel long kilim ol manmeri nogut. (Ais. 37:36) Maski God i yusim wanem rot long daunim ol birua, em bai winim pait. Em bai pinisim olgeta birua na kisim bek ol stretpela manmeri.—Prov. 3:25, 26.

7-8. (a) Olsem 1 Tesalonaika 5:1-6 i kamapim, ol lida bilong graun bai tokaut long wanem samting? (b) Wai na dispela tokaut em tok giaman i nogut tru?

⁷ Tokaut bilong “bel isi na gutpela sindaun” bai kamap paslain stret long “de bilong Jehova.” (Ritim 1 Tesalonaika 5:1-6.) Long 1 Tesalonaika 5:2, “de bilong Jehova” i makim “traipela hevi tru.” (Rev. 7:14) Hau bai yumi save olsem traipela hevi tru i laik kirap? Baibel i tok wanpela narapela kain tokaut bai kamap. Dispela tokaut bai makim olsem traipela hevi tru i laik kirap.

⁸ Em tokaut bilong “bel isi na gutpela sindaun.” Wai na ol lida bilong graun bai mekim dispela tokaut? Yu ting ol lida bilong lotu bai joinim ol? Ating. Tasol ol spirit nogut bai stiaim ol long mekim dispela tok giaman. Dispela tok i nogut tru bikos ol man bai ting olsem ol bai gat gutpela sindaun, tasol ol i no save olsem traipela hevi tru i laik kamap. Yes, “bagarap bai kamap long ol wantu tasol, olsem pen i save kamap long meri i laik karim pikinini.” Olsem wanem long ol manmeri i stap gut long Jehova? Ating ol bai kirap nogut, tasol ol bai stap redi pinis long bungim dispela hevi.

 9. Yu ting Jehova bai pinisim olgeta samting long graun bilong Satan long seim taim? Eksplenim.

⁹ Jehova i no inap pinisim olgeta samting long graun bilong Satan long seim taim, olsem em i bin mekim long taim bilong Noa. Em bai pinisim wanpela samting pastaim, na bihain em bai pinisim olgeta narapela samting. Pastaim, em bai bagarapim Bikpela Babilon, em olgeta lotu giaman. Long Armagedon, em bai pinisim olgeta samting Satan i bosim, olsem wok politik, wok militeri, na ol wok bisnis. Yumi ken skelim gut dispela samting.

10. Olsem Revelesen 17:1, 6, na 18:24 i kamapim, wai na Jehova bai bagarapim Bikpela Babilon?

¹⁰ “Panismen bai painim dispela bikpela pamukmeri.” (Ritim Revelesen 17:1, 6; 18:24.) Bikpela Babilon i bin kirapim planti manmeri long bagarapim nem bilong God. Em i skulim ol manmeri long ol tok giaman i bagarapim gutnem bilong God. Long sait bilong bilip, em i mekim pasin pamuk wantaim ol king bilong graun. Em i yusim strong na namba bilong em long giamanim ol manmeri na kisim mani bilong ol. Em i kapsaitim blut bilong planti manmeri, na em i kapsaitim tu blut bilong ol wokman bilong God. (Rev. 19:2) Olsem wanem Jehova bai bagarapim Bikpela Babilon?

11. (a) “Retpela wel animal” i makim wanem samting? (b) Olsem wanem God bai yusim wel animal long bagarapim Bikpela Babilon?

¹¹ Jehova bai yusim “10-pela kom” bilong “retpela wel animal” long bagarapim “bikpela pamukmeri.” Wel animal em Yunaitet Nesen, na 10-pela kom i makim ol gavman i sapotim Yunaitet Nesen. Long taim God yet i makim, ol dispela gavman bai tanim na bagarapim Bikpela Babilon. Ol bai tekewe olgeta mani kago bilong em na kamapim ples klia ol pasin nogut bilong em, na long dispela rot i olsem ol i “rausim olgeta samting bilong em na mekim em i stap skin nating.” (Rev. 17:3, 16) Dispela bagarap bai painim em kwiktaim—olsem insait long wanpela de tasol—na ol sapota bilong em bai kirap nogut. Em i save apim nem bilong em yet na tok: “Mi stap kwin, mi no wanpela wido, na i no gat wanpela taim bai mi krai sori.”—Rev. 18:7, 8.

12. Jehova i no inap larim ol lain bilong graun i mekim wanem long ol manmeri bilong em? Bilong wanem?

¹² God i no inap larim ol lain bilong graun i bagarapim ol manmeri bilong em. Ol i amamas long holim nem bilong em, na ol i bihainim tok bilong em long ranawe lusim Bikpela Babilon. (Apo. 15:16, 17; Rev. 18:4) Ol i bin wok strong long helpim ol narapela long ranawe lusim Bikpela Babilon. Olsem na ol manmeri bilong Jehova i no inap “kisim hap bilong ol pe nogut bilong [Bikpela Babilon].” Maski i olsem, ol i mas sanap strong long bilip na redi long neks hevi bai kamap.

13. (a) Gok em husat? (b) Olsem Esekiel 38:2, 8, 9 i kamapim, wanem samting bai kirapim Gok long kam bung long ples ol i kolim Armagedon?

¹³ Gok i pait. (Ritim Esekiel 38:2, 8, 9.) Taim God i bagarapim pinis olgeta oganaisesen bilong ol lotu giaman, wanpela lain tasol bai stap yet, em ol manmeri bilong God. Satan bai belhat nogut tru. Em bai kamapim dispela belhat taim em i yusim ol tok gris—“tok i no klin”—long kirapim ol kantri long bung na redi long pait long ol manmeri bilong Jehova. (Rev. 16:13, 14) Ol dispela kantri i kisim nem olsem “Gok bilong graun Magok.” Taim ol dispela kantri i kirapim pait long lain bilong God, i olsem ol i kam bung long ples em Baibel i kolim olsem Armagedon.—Rev. 16:16.

14. Gok bai luksave long wanem samting?

¹⁴ Gok bai trastim “ol man”—ol ami bilong em. (2 Sto. 32:8) Yumi bai trastim God bilong yumi Jehova—dispela i olsem longlong pasin long ai bilong ol man. Bilong wanem? Bikos Bikpela Babilon i gat bikpela strong, tasol ol god bilong em i no bin seivim em long han bilong “wel animal” na “10-pela kom”! (Rev. 17:16) Olsem na ol kantri bai pilim olsem em isi tru long daunim yumi. Ol bai pait long lain bilong Jehova “olsem ol klaut i karamapim graun.” (Ese. 38:16) Tasol ol dispela kantri bai luksave olsem ol i stap namel long wanpela trap. Wankain olsem Fero long Solwara Retsi, Gok bai luksave olsem em i pait long Jehova.—Kis. 14:1-4; Ese. 38:3, 4, 18, 21-23.

15. Jisas bai mekim wanem long pait bilong Armagedon?

¹⁵ Krais na ol ami bilong em long heven bai sambai long ol manmeri bilong God na bagarapim na pinisim tru ol kantri na ol ami bilong ol. (Rev. 19:11, 14, 15) Tasol olsem wanem long nambawan birua bilong Jehova, em Satan, em man i giamanim ol kantri na kirapim ol long mekim pait bilong Armagedon? Jisas bai tromoi em na ol spirit nogut bilong em i go daun long hul i no gat as, na ol bai stap kalabus inap 1 tausen yia.—Rev. 20:1-3.

16. (a) Hau bai yumi soim olsem yumi “save long God”? (b) Sapos yumi save long Jehova, hau bai dispela i helpim yumi long Armagedon?

¹⁶ Maski yumi stap long tok i tru inap planti yia o nogat, sapos yumi laik abrusim bagarap long Armagedon, orait yumi mas soim olsem yumi “save long God” na “bihainim tok bilong gutnius i stori long Bikpela bilong yumi, Jisas.” (2 Tes. 1:7-9) Yumi inap tok olsem yumi “save long God” sapos yumi save long ol samting em i amamas long en, ol samting em i heitim, na ol lo bilong em. Na tu, yumi soim olsem yumi save long God taim yumi laikim em na bihainim ol tok bilong em, na givim bel olgeta long lotuim em. (1 Jon 2:3-5; 5:3) Taim yumi soim olsem yumi save long God, ‘em bai save’ tu long yumi—em bai kisim bek yumi long Armagedon! (1 Kor. 8:3) Bilong wanem yumi tok olsem? Sapos ‘God i save long yumi,’ dispela i makim olsem em i orait long yumi.

17. Olsem wanem yumi inap “bihainim tok bilong gutnius i stori long Bikpela bilong yumi, Jisas”?

¹⁷ “Tok bilong gutnius i stori long Bikpela bilong yumi, Jisas,” i makim tu olgeta tok Jisas i skulim ol manmeri long en na i stap long Baibel. Yumi bihainim tok bilong gutnius taim yumi larim ol tok bilong en i stiaim yumi. Wok bilong Kingdom i mas i stap namba 1 samting long laip bilong yumi, na yumi mas bihainim ol stretpela lo bilong God, na autim tok bilong Kingdom. (Mat. 6:33; 24:14) Na tu, yumi mas sapotim ol brata bilong Krais taim ol i mekim bikpela asainmen bilong ol.—Mat. 25:31-40.

18. Olsem wanem ol brata bilong Krais bai bekim pasin helpim bilong “ol arapela sipsip”?

¹⁸ Ol Kristen em God i anointim ol long holi spirit, klostu nau ol bai bekim pasin helpim bilong “ol arapela sipsip.” (Jon 10:16) Paslain long Armagedon, olgeta bilong lain 144,000 bai kisim pinis laip long heven na ol i no inap dai moa. Ol bai insait long bikpela lain ami bilong heven na bagarapim Gok, na lukautim “bikpela lain manmeri” em ol i stap gut long God. (Rev. 2:26, 27; 7:9, 10) Bikpela lain manmeri bai amamas tru olsem ol i bin sapotim lain Kristen Jehova i bin anointim long holi spirit taim ol i stap yet long graun!

19-20. Maski kain kain hevi i painim yumi, hau bai yumi inap stap gut yet long bilip na wetim Armagedon?

¹⁹ Yumi stap long taim nogut bilong las de, olsem na hevi i painim planti manmeri bilong Jehova. Maski i olsem, yumi inap sanap strong na karim hevi na stap amamas yet. (Jems 1:2-4) Wanpela samting we inap helpim tru yumi em pasin bilong beten oltaim. (Luk 21:36) Na tu, oltaim yumi mas stadi long Baibel na tingim tingim ol tok bilong en, na skelim tu ol tok profet i stori long ol samting bai kamap long taim bilong yumi. (Sng. 77:12) Taim yumi mekim olsem na givim bel tru long autim tok, bilip bilong yumi bai stap strong!

²⁰ Piksaim amamas bilong yu taim Bikpela Babilon i no stap moa na Armagedon i kamap pinis! Moa yet, tingim bikpela amamas yu bai pilim taim olgeta manmeri i rispektim nem na namba bilong God long mekim wok bos! (Ese. 38:23) Yes, ol manmeri husat i save long God, na bihainim tok bilong Jisas, na sanap strong i go inap long pinis, ol i amamas na wetim Armagedon!—Mat. 24:13.