Soim Tenkyu Long Samting Jehova na Jisas i Mekim Long Yu

Yu pilim olsem wanem taim wanpela pren i givim yu wanpela naispela presen? Ating yu amamas tru na yu laik soim pren bilong yu olsem yu tenkyu tru long dispela presen. Jehova na Jisas i givim yumi wanpela presen i nambawan tru. Em wanem samting? Olsem wanem yumi inap soim olsem yumi tenkyu long dispela presen?

1. Wanem wanpela rot em yumi ken soim tenkyu long samting Jehova na Jisas i mekim long yumi?

Baibel i tok promis olsem “olgeta man husat i bilip long [Jisas]” ol inap stap laip oltaim oltaim. (Jon 3:16) Hau bai yumi mekim olsem? Yumi mas soim olsem yumi bilip long Jisas long rot bilong ol disisen na ol samting yumi mekim. (Jems 2:17) Taim yumi soim bilip bilong yumi long ol samting yumi mekim, yumi strongim pasin pren bilong yumi wantaim Jisas na Papa bilong em, Jehova.—Jon 14:21.

2. Wanem spesel bung i helpim yumi long soim tenkyu bilong yumi long samting Jehova na Jisas i mekim?

Long nait paslain long Jisas i dai, em i tokim ol aposel bilong em long narapela rot bilong soim tenkyu bilong ol long sakrifais bilong em. Em i tokim ol long mekim wanpela spesel bung em Baibel i kolim olsem “Kaikai Bilong Bikpela,” narapela nem em Memorial bilong tingim indai bilong Krais. (1 Korin 11:20) Jisas i kamapim dispela bung na bai ol aposel—na olgeta Kristen i kamap bihain long ol—i mas tingim olsem em i bin givim laip bilong em long helpim yumi. Jisas i tok long dispela spesel bung olsem: “Yupela i mas mekim olsem yet bilong tingim mi.” (Luk 22:19) Taim yu go long bung bilong Memorial, yu soim olsem yu tenkyu long dispela bikpela pasin laikim Jehova na Jisas i mekim long yumi.

KISIM SAMPELA SAVE MOA

3. Yumi ken mekim wanem bilong soim tenkyu bilong yumi?

Piksaim long tingting olsem yu wok long draun na wanpela i kam seivim yu. Bai yu lusim tingting tasol long samting em i mekim long yu? O bai yu painim rot long soim olsem yu pilim tru samting em i mekim.

Yumi gat dinau long Jehova, long laip em i givim yumi. Ritim 1 Jon 4:8-10, na stori long ol dispela askim:

• Wai na sakrifais bilong Jisas em wanpela spesel presen?

• Yu pilim olsem wanem long samting Jehova na Jisas i mekim long yu?

Hau bai yumi soim tenkyu bilong yumi long samting Jehova na Jisas i mekim long yumi? Ritim 2 Korin 5:15 na 1 Jon 4:11; 5:3. Taim yu ritim pinis ol dispela skripsa, stori long dispela askim:

• Olsem skripsa i tok, yumi ken mekim wanem bilong soim tenkyu bilong yumi?

4. Bihainim pasin bilong Jisas

Narapela rot bilong soim tenkyu bilong yumi em long rot bilong bihainim pasin bilong Jisas. Ritim 1 Pita 2:21, na stori long dispela askim:

• Long wanem ol rot yu inap bihainim gut lek mak bilong Jisas?

5. Kam long Memorial bilong tingim indai bilong Krais?

Bilong lukim wanem samting i bin kamap long fes Kaikai Bilong Bikpela, ritim Luk 22:14, 19, 20. Na stori long ol dispela askim:

• Wanem samting i kamap long bung bilong Kaikai Bilong Bikpela?

• Bret na wain i makim wanem samting?—Lukim ves 19 na 20.

Jisas i laik bai ol disaipel bilong em i mekim Kaikai Bilong Bikpela wanpela taim long olgeta yia long dispela det em dai. Olsem na ol Witnes Bilong Jehova i save bung wantaim wanpela taim long olgeta yia bilong tingim indai bilong Jisas long pasin em i tokim ol long bihainim. Bilong kisim save long dispela spesel miting, pilaim VIDIO. Na stori long dispela askim.

VIDIO: Tingim Dai Bilong Jisas (1:41)

• Wanem samting i save kamap long Memorial?

Bret na wain i olsem piksa na i makim sampela samting. Bret i makim bodi bilong Jisas i no gat sin we em i givim olsem sakrifais bilong helpim yumi. Wain i makim blut bilong Jisas

OL BIKPELA POIN

Yumi soim tenkyu bilong yumi long samting Jisas i mekim long yumi long rot bilong bilip long em, na go long Memorial bilong tingim indai bilong em.

Riviu

• Bilip long Jisas, dispela i makim wanem samting?

• Olsem wanem bai yu soim tenkyu bilong yu long ol samting Jehova na Jisas i mekim long yu?

• Wai na em i bikpela samting long go long Memorial bilong tingim indai bilong Krais?

MEKIM WOK PAINIMAUT

Indai bilong Krais i kirapim yumi long mekim wanem?

Em i Yusim Bodi Bilong Em Long Onarim Jehova (9:28)

Kisim sampela save moa long pasin bilong bilip, na hau yumi inap soim bilip bilong yumi.

“Bilip Long Ol Tok Promis Bilong Jehova” (Wastaua, Oktoba 2016)

Long stori “Mi pilim olsem mi stap klin na mi amamas long laip bilong mi,” kisim save long hau wanpela meri i kisim save long sakrifais bilong Krais na dispela i senisim laip bilong em.

“Baibel i Save Senisim i Stap Bilong Man” (Wastaua, Ogas 1, 2011)

Skelim wai na liklik lain tasol i save kisim bret na wain long taim bilong Memorial.

“Wai na Bung Bilong Kaikai Bilong Bikpela Em Ol Witnes Bilong Jehova i Save Mekim i No Wankain Long Ol Narapela Lotu?” (Atikol long websait)