Kirap Bek Bilong Jisas​—Em i Bin Kamap Tru?

HERODOTUS, em wanpela saveman Grik i bin stap olsem 2,500 yia i go pinis, em i stori long ol Isip i bin stap long taim bilong em. Em i tok: “Long ol bikpela kaikai bilong ol maniman, bihain long kaikai wanpela man i save karim raun wanpela imis bilong bodi bilong daiman i stap insait long kofin, ol i penim na sapim gut olsem samting tru tru, longpela bilong en inap wanpela o tupela kiubit. Em i soim dispela imis long olgeta man i stap long kaikai, na em i tok, ‘Yupela dring na amamas, tasol lukim gut dispela samting, taim yu dai bai yu stap wankain olsem dispela.’”

I no ol Isip tasol i gat dispela kain tingting long laip na indai. Long nau planti man i save mekim dispela tok: “Yumi mas kaikai na dring na amamas.” Sapos laip bilong yumi i save pinis olgeta long taim yumi dai, orait nau long taim yumi stap laip yet yumi mas amamas. Bilong wanem bai yumi wok strong long mekim ol pasin i stret? Sapos laip bilong yumi i pinis olgeta long taim yumi dai, orait i stret long yumi painim amamas long nau. Aposel Pol i bin mekim wankain tok olsem. Em i stori long pasin bilong ol man i no bilip long kirap bek, na i tok: “Sapos ol man i dai pinis i no inap kirap bek, orait ‘yumi kaikai na dring, long wanem, tumora bai yumi dai.’”—1 Korin 15:32.

Tru, Pol yet i no bilip olsem taim man i dai em i pinis olgeta inap oltaim bihain. Em i bilip tru olsem ol man i dai pinis ol inap i stap laip gen, na ol i gat rot long i stap oltaim na ol i no ken i dai moa. As bilong dispela bilip em wanpela bikpela samting tru i bin kamap, em kirap beka bilong Krais Jisas, na Pol i bilip olsem dispela samting i bin kamap tru tru na i no gat wanpela man inap sakim. Dispela kirap bek em i nambawan bikpela samting i bin kamap na i strongim bilip bilong ol disaipel bilong pastaim.

Tasol kirap bek bilong Jisas i helpim yumi olsem wanem? Na olsem wanem yumi ken save kirap bek i bin kamap tru? Orait yumi ken lukim olsem wanem Pol i bin stori long ol dispela samting taim em i raitim pas i go long ol Kristen long Korin.

Sampela Kristen long Korin ol i gat tupela tingting long dispela samting, na sampela i no bilip liklik olsem ol man i dai pinis bai kirap bek. Long namba wan pas Pol i raitim i go long ol Kristen long Korin, em i kolim ol samting ol bai lus long en sapos tru tru i no gat kirap bek. Em i tok: “Sapos i tru i no gat kirap bek bilong ol man i dai pinis, orait Krais tu i no bin kirap bek. Tasol sapos Krais i no bin kirap bek, orait wok yumi mekim long autim tok i no gat as bilong en, na bilip bilong yumi i no gat as bilong en. Na tu, mipela bai kamap olsem man i tok giaman long samting God i mekim . . . Bilip bilong yupela em i no inap helpim yupela liklik. Yupela i stap yet long sin bilong yupela. Na olgeta man husat i bin pas wantaim Krais na i dai, ol tu i pinis olgeta.”—1 Korin 15:13-18.

“Em i kamap long 500 brata wantaim . . . Bihain long dispela em i kamap long Jems, na bihain em i kamap long olgeta aposel. Na las tru em i kamap long mi.”—1 Korin 15:6-8.

I no gat wanpela man inap daunim tok Pol i mekim long kirap bilong dispela ves i stap antap: Sapos ol man i dai pinis ol i no inap kirap bek, orait Krais husat i bin i dai, em i no bin kirap bek na kisim bek laip. Na sapos Krais i no bin kirap bek, orait wanem samting bai kamap? Wok bilong autim gutnius bai i no gat as bilong en—em wanpela bikpela tok giaman tasol. Long wanem, kirap bek bilong Krais em i wanpela bikpela samting long bilip Kristen, na em i insait long sampela bikpela as tok bilong Baibel olsem God i stap nambawan bos, nem bilong Em, Kingdom bilong em, na wok bilong kisim bek yumi. Sapos tru Krais i no bin kirap bek, orait ol tok em Pol na ol narapela aposel i bin autim i olsem ol toktok nating i no gat as bilong en, na i no inap helpim ol man.

Ol narapela samting tu inap kamap. Sapos tru Krais i no bin kirap bek long matmat, orait bilip Kristen bai i no gat as bilong en, i olsem wanpela tok giaman i as bilong en. Na tu, i olsem Pol na ol narapela i bin mekim tok giaman long Jisas i bin kirap bek, na tu, long man em ol i tok Em i bin kirapim bek Jisas, em God Jehova. Na dispela tok olsem Krais “i bin i dai bilong kisim bek yumi long sin” em bai i no tru—long wanem, sapos Seivia i no bin kirap bek long matmat, em i no inap kirapim bek ol narapela man. (1 Korin 15:3) Dispela i makim olsem ol Kristen i bin dai, na ol narapela i bin dai bikos ol i holimpas bilip, yu ting ol i bin holim wanpela bilip giaman olsem ol bai kirap bek long matmat?

Pol i tok: “Sapos long dispela laip tasol yumi bilip long Krais, orait yumi stap tarangu lain stret.” (1 Korin 15:19) Olsem ol narapela Kristen, Pol i bin lus long planti samting, ol man i bin mekim nogut long em, em i bin karim planti hevi, na em i no pret long i dai, long wanem, em i bilip long kirap bek na ol gutpela samting bai kamap long dispela rot. Tasol ol dispela hevi em i karim bai i no gat as bilong en sapos bilip bilong kirap bek i giaman tasol!

Pol i no bin ting dispela bilip Kristen em i wanpela bilip giaman. Em i save Jisas i bin kirap bek long matmat, na em i tokaut long ol Korin long ol samting i bin kamap, olsem, “Krais i bin i dai bilong kisim bek yumi long sin olsem Rait Holi i tok. Na ol i bin planim em, na long namba 3 de em i kirap bek olsem Rait Holi i tok. Na em i kamap long Sifas, na bihain em i kamap long ol 12-pela aposel.”b Na Pol i tok moa: “Bihain long dispela em i kamap long 500 brata wantaim. Planti bilong ol i stap yet wantaim yumi, tasol sampela ol i dai pinis. Bihain long dispela em i kamap long Jems, na bihain em i kamap long olgeta aposel. Na las tru em i kamap long mi.”—1 Korin 15:3-8.

Long kirap bilong tok bilong em, Pol i tokaut olsem Krais i bin i dai bilong kisim bek yumi long sin, na ol i planim em, na em i kirap bek. Wanem samting i mekim na Pol i bilip tru long dispela? Wanpela as em olsem planti man i bin lukim long ai bilong ol yet. Taim Jisas i kirap bek pinis, em i kamap long wan wan man (long Pol tu), na long ol liklik grup, na long bikpela lain manmeri inap 500, ating pastaim planti bilong ol i no bilip tumas taim ol i harim tok olsem Jisas i kirap bek pinis! (Luk 24:1-11) Planti bilong ol dispela aiwitnes i bin stap laip yet long taim bilong Pol, na ol man inap askim ol long stori long samting ol i bin lukim. (1 Korin 15:6) Ating yumi no inap bilip sapos i gat wanpela o tupela aiwitnes, tasol i gat winim 500 aiwitnes, olsem na yumi no inap tok ol i giaman, a?

Tingim, tupela taim Pol bin stori olsem Jisas i bin i dai, ol i planim em, na em i kirap bek “olsem Rait Holi i tok.” Ol dispela samting i bin kamap i soim olsem ol tok profet long Ol Skripsa Hibru i stori long Mesaia, ol i bin kamap tru, na i kamapim klia olsem Jisas em dispela Mesaia God i bin promis long salim i kam.

Maski i gat planti aiwitnes na Baibel tu i tok profet long en, long bipo i kam inap long nau i gat sampela man em ol i gat tupela tingting long kirap bek bilong Jisas. Sampela i tok, ol disaipel i bin stilim bodi bilong em na bihain ol i tok, ol i bin lukim em i kirap bek. Tasol ol disaipel bilong em i no gat strong o namba bilong rausim ol soldia Rom i bin sanap na was i stap long ai bilong matmat. Na sampela man i tok, sampela man i driman olsem Jisas i bin kamap long ol. Tasol yumi save dispela tok bilong ol i no tru, long wanem, Jisas i bin kamap long planti manmeri long ol narapela narapela taim. Na tu, yu ting samting ol i bin lukim nating olsem driman em inap kukim pis na tilim long ol man, olsem Jisas i bin mekim long Galili? (Jon 21:9-14) Yu ting wanpela piksa nating long driman inap singautim ol man long kam tatsim skin bilong em?—Luk 24:36-39.

I gat sampela man i tok, ol disaipel i wokim trik bilong giamanim ol man na mekim ol i ting olsem Jisas i kirap bek. Tasol sapos ol i mekim olsem, dispela bai helpim ol olsem wanem? Taim ol disaipel i tokaut long Jisas i bin kirap bek, dispela i mekim na ol man i tok bilas long ol, mekim nogut long ol, na kilim ol i dai. Bilong wanem ol bai karim planti hevi olsem bilong strongim wanpela tok giaman? Na moa yet, ol i bin kirap pastaim long autim dispela tok long Jerusalem long ai bilong ol man i birua long ol em ol man husat i wok long painim rot bilong kotim ol.

Kirap bek bilong Jisas em samting i bin strongim tru ol disaipel long autim tok long samting ol i bin lukim i kamap long Bikpela bilong ol, maski ol man i mekim nogut tru long ol. Dispela kirap bek i kamap olsem as bilong bilip Kristen. Ol Kristen bilong pastaim i no inap redi long dai bilong helpim wanpela gutpela tisa nating em ol man i bin kilim em i dai, nogat. Tasol ol i redi long dai bilong tokaut long kirap bek bilong Jisas, long wanem, i klia tru olsem em i Krais, em Pikinini Bilong God, em man i stap laip na i gat bikpela strong, na em i wok long helpim ol na soim rot long ol. Kirap bek bilong em i makim olsem ol tu bai kirap bek long dai. Sapos tru Jisas i no bin kirap bek, orait bai i no gat lotu Kristen. Sapos Jisas i no bin kirap bek, ating bai yumi no harim nem bilong em o stori bilong em.

Tasol olsem wanem kirap bek bilong Krais i helpim yumi long nau?