“Ol Man i Dai Pinis Bai i Kirap Bek”
“Biugel bai i krai, na ol man i dai pinis bai i kirap, na ol i no inap bagarap moa. Na yumi man i no i dai yet, yumi bai i senis na i kamap narakain.”—1 KORIN 15:52.
1, 2. (a) Long rot bilong profet Hosea, God i mekim wanem tok promis i mekim gut bel bilong yumi? (b) Olsem wanem yumi inap save God i gat laik long kirapim bek ol man i dai pinis na bai ol i stap laip gen?
OLSEM WANEM? I gat wanpela long famili bilong yu i bin i dai? Sapos olsem, orait yu save pinis long ol hevi i dai inap kamapim. Tasol ol Kristen i save tingim tok promis God i bin mekim long rot bilong profet Hosea na dispela i mekim gut bel bilong ol: “Mi bai kisim bek ol long ples bilong ol man i dai pinis. Dai, mi bai . . . pinisim yu olgeta. Ples bilong ol man i dai pinis, mi bai . . . bagarapim yu olgeta.”—Hosea 13:14.
2 Long ol man i no bilip tumas, dispela tingting olsem man i dai pinis bai kamap laip gen, em i kranki stret. Tasol God i Gat Olgeta Strong, em i gat strong inap tru long wokim kain mirakel olsem! Tasol bikpela tok tru i kamap i olsem: God i gat laik long kirapim bek ol man i dai pinis o nogat. Stretpela man Jop i askim olsem: “Ol man i dai pinis, ol inap kisim laip gen?” Orait nau em i bekim dispela askim na mekim isi bel bilong ol man, olsem: “Bai yu singautim mi, na bai mi bekim tok long yu. Bai yu gat bikpela laik tru long ol samting yu bin wokim.” (Jop 14:14, 15, NW) Dispela tok “bikpela laik tru” i makim olsem strongpela laik tru. (Skelim wantaim Song 84:2.) Em nau, Jehova i amamas tru long tingim taim bilong kirapim bek ol man i dai pinis—em i gat bikpela laik long lukim gen ol gutpela man i dai pinis, em ol i stap laip long tingting bilong em.—Matyu 22:31, 32.
Jisas i Givim Save Long Yumi Long Tok Bilong Kirap Bek
3, 4. (a) Jisas i givim wanem save long yumi long dispela bilip olsem ol man i dai pinis ol bai kirap bek? (b) Bilong wanem Jisas i kirap bek olsem wanpela spirit na em i no kamap man gen?
3 Ol bilipman bilong bipo olsem Jop ol i gat hap save tasol long dispela bilip olsem man i dai pinis bai kirap bek. Tasol Krais Jisas i helpim yumi long save tru long dispela gutpela samting bai kamap bihain. Em i soim yumi long bikpela wok em yet bai mekim. Em i tok: “Man i bilip long Pikinini, em i gat laip i stap gut oltaim oltaim.” (Jon 3:36) Ol bai kisim dispela laip we? Bikpela hap lain i bilip, ol bai kisim dispela laip long graun. (Song 37:11) Tasol Jisas i tokim ol disaipel bilong em: “Yupela liklik lain sipsip, yupela i no ken pret. Papa bilong yupela em i tok pinis long em bai i stap king bilong yupela na givim kingdom bilong en long yupela.” (Luk 12:32) Kingdom bilong God i bilong heven. Olsem na dispela tok promis i makim olsem “liklik lain” i mas kamap spirit na stap wantaim Jisas long heven. (Jon 14:2, 3; 1 Pita 1:3, 4) Em gutpela samting tru ol inap wet long en! Na Jisas i givim save long aposel Jon olsem dispela “liklik lain” ol inap olsem 144,000 tasol.—KTH 14:1.
4 Tasol olsem wanem dispela lain 144,000 inap go long heven? “Long gutnius bilong em, [Jisas] i mekim olgeta manmeri i save long laip i save stap oltaim.” Long rot bilong blut bilong em, Jisas i opim “nupela rot i gat laip” bilong i go insait long heven. (2 Timoti 1:10; Hibru 10:19, 20) Pastaim em i dai, olsem Baibel i tok profet pinis. (Aisaia 53:12) Orait bihain, olsem aposel Pita i tok, “dispela man Jisas, God i kirapim em pinis long matmat.” (Aposel 2:32) Tasol Jisas i no kirap bek olsem wanpela man bilong graun, nogat. Em i bin tok: “Dispela bret mi bai givim long em, em i bodi bilong mi. Mi givim bai ol manmeri bilong graun ol i ken kisim laip.” (Jon 6:51) Sapos em i bin kisim bek dispela bodi bilong em, orait ofa bilong em bai i no gat strong. Olsem na “long graun em i stap man, na ol i kilim em i dai, tasol em i kirap bek na em i stap spirit.” (1 Pita 3:18) Long dispela rot Jisas i “baim bek yumi [“liklik lain”] bilong oltaim oltaim.” (Hibru 9:12) Em i givim pe bilong dispela gutpela laip bilong em long God olsem ofa bilong baim bek ol sinman bilong graun, na ol 144,000 ol i namba wan lain bilong kisim ol gutpela samting bilong en.
5. Ol disaipel bilong Jisas long taim bilong ol aposel ol inap wet long kisim wanem samting?
5 I no Jisas tasol bai kirap bek bilong kisim laip long heven. Pol i tokim ol wanlain Kristen bilong em long Rom olsem God i bin makim ol long spirit holi bilong kamap pikinini bilong Em na bilong kisim wok king wantaim Krais, tasol bilong i stap yet olsem man God i bin makim, ol i mas stap strong inap long pinis. (Rom 8:16, 17) Na Pol i tok: “Yumi pas wantaim Krais na yumi bin dai olsem em i bin i dai. Olsem tasol bai yumi pas wantaim em na kirap bek tu olsem em i bin kirap.”—Rom 6:5.
Bilong Helpim Bilip Bilong Kirap Bek
6. Bilong wanem sampela man long Korin i laik daunim bilip bilong kirap bek? Aposel Pol i mekim wanem long dispela?
6 Tok bilong kirap bek em i insait long “skul [ol i bin] kisim pastaim”—em i wanpela as tok bilong lotu Kristen. (Hibru 6:1, 2) Tasol sampela long Korin ol i wok long daunim dispela tok. Sampela insait long kongrigesen i bin kisim tingting bilong ol saveman bilong ol Grik, na ol i save tok: “Man i dai pinis, em i no inap kirap bek.” (1 Korin 15:12) Taim tok bilong dispela samting i kamap long aposel Pol, em i kamapim sampela tok bilong helpim dispela bilip olsem ol man i dai pinis bai kirap bek, na em i helpim moa yet bilip bilong samting ol Kristen God i bin makim ol i wet long en. Orait nau yumi ken skelim tok bilong Pol olsem i stap long 1 Korin sapta 15. Sapos yu bin kaunim dispela sapta olgeta, olsem stori i kamap paslain long dispela i tokim yumi long mekim, dispela bai helpim yu.
7. (a) Pol i toktok long wanem bikpela samting? (b) Husat ol i lukim Jisas taim em i kirap bek pinis?
7 Long namba wan na namba tu ves bilong 1 Korin sapta 15, Pol i kamapim sampela tok bilong kirapim dispela bikpela tok bilong kirap bek. Em i tok: “Ol brata, mi laik kirapim tingting bilong yupela gen long gutnius mi bin autim long yupela. Yupela i kisim pinis dispela gutnius, na yupela i save sanap strong long en. Na . . . long dispela gutnius tasol God i save kisim bek yupela. Em sapos yupela i no bin bilip nating.” Sapos ol Korin i no sanap strong long dispela gutnius, bai i olsem ol i kisim nating tok i tru. Pol i tok moa: “Bikpela tok tru mi bin givim long yupela, em dispela tok mi yet mi bin kisim bipo. Em i olsem. Krais i bin i dai bilong tekewe olgeta sin bilong yumi, olsem tok i stap long buk bilong God. Na ol i putim em long matmat, na long de namba 3 em i kirap bek, olsem tok i stap long buk bilong God. Na bihain em i kamap long Pita, na bihain gen long ol 12-pela aposel. Na bihain planti brata wantaim i lukim em, namba bilong ol i winim 500. Planti moa bilong ol dispela brata i stap yet, tasol sampela i dai pinis [“na slip i stap,” NW]. Na bihain Jems i lukim em. Na bihain gen olgeta aposel i lukim em. Na bihain tru long ol, em i kamap long ai bilong mi tu [“olsem long wanpela nupela pikinini mama i karim hariap tumas na i no taim yet bilong karim,” NW].”—1 Korin 15:3-8.
8, 9. (a) Bilip long kirap bek em i bikpela samting o olsem wanem? (b) Ating wanem taim Jisas i bin kamap long ai bilong ‘500 brata’?
8 Ol Kristen i kisim pinis gutnius, i no olsem sapos ol i laik ol i ken bilip olsem Jisas i kirap bek pinis, nogat. Planti man i bin lukim Jisas taim em i kirap bek pinis na ol inap tokaut olsem “Krais i bin i dai bilong tekewe olgeta sin bilong yumi” na em i kirap bek pinis. Wanpela man olsem, em Pita. Long dispela nait Judas i bin kamapim Jisas long ol birua na ol i holim em, Pita i tok em i no save long Jisas, olsem na bihain, taim Jisas i kamap long ai bilong Pita, ating dispela i mekim gut tru bel bilong em. Taim Jisas i kirap bek pinis, em i kamap tu long ai bilong “ol 12-pela aposel” wantaim, na ating dispela i bin helpim ol long daunim pret bilong ol na i strongim bel bilong ol long tokaut strong olsem Jisas i kirap bek pinis.—Jon 20:19-23; Aposel 2:32.
9 Na Krais i kamap tu long ‘planti brata wantaim, namba bilong ol i winim 500.’ Long Galili tasol em i gat bikpela lain disaipel olsem. Olsem na ating Jisas i bin kamap long ol long dispela taim em Matyu 28:16-20 i stori long en, em long taim Jisas i bin givim wok long ol long kamapim ol disaipel. Ol dispela man inap tokaut klia tru olsem Jisas i kirap bek pinis! Sampela i stap laip yet long yia 55 C.E. taim Pol i raitim dispela namba wan pas i go long ol Korin. Tasol tingim: Ol manmeri bilong dispela lain em ol i bin i dai, Pol i tok, i olsem ol i “slip i stap.” Long dispela taim bipo, ol i no bin kirap bek yet bilong i go long heven na kisim prais bilong ol.
10. (a) Taim Jisas i bung laspela taim wantaim ol disaipel bilong em, em i tokim ol long mekim wanem? (b) Olsem wanem Jisas i kamap long Pol “olsem long wanpela nupela pikinini mama i karim hariap tumas na i no taim yet bilong karim”?
10 Narapela man i lukim Jisas i kirap bek pinis, em Jems, em pikinini bilong Josep na mama bilong Jisas, em Maria. Taim Jisas i no kirap bek yet, Jems i no bilip long em. (Jon 7:5) Tasol taim Jisas i kamap long ai bilong em, em nau, Jems i bilip na ating em i mekim sampela wok bilong helpim ol narapela brata bilong em long bilip long Jisas. (Aposel 1:13, 14) Taim em i laik go antap long heven na em i bung laspela taim wantaim ol disaipel bilong em, Jisas i givim wok long ol olsem ol i mas “autim tok . . . i go inap long olgeta hap bilong graun.” (Aposel 1:6-11) Bihain, em i kamap long Sol bilong Tarsus, em i save mekim nogut tru long ol Kristen. (Aposel 22:6-8) Jisas i kamap long Sol “olsem long wanpela nupela pikinini mama i karim hariap tumas na i no taim yet bilong karim.” I olsem Sol i kirap bek pinis na kisim laip olsem spirit planti handet yia paslain long taim tru bilong kirap bek, na em inap lukim Bikpela bilong em i gat biknem pinis. Taim Jisas i kamap long Sol, dispela i mekim na kwiktaim em i lusim dispela rot em i bihainim long biruaim ol Kristen na em i senisim tru pasin bilong em. (Aposel 9:3-9, 17-19) Sol i kamap aposel Pol, na em i mekim bikpela wok tru bilong helpim lotu Kristen.—1 Korin 15:9, 10.
Bilip Long Kirap Bek Em i Bikpela Samting
11. Olsem wanem Pol i kamapim long ples klia olsem dispela tok ‘man i dai pinis i no inap kirap bek,’ em i giaman tasol?
11 Planti man i lukim Jisas taim em i kirap bek pinis, olsem na yumi save, Jisas i kirap bek tru. Pol i tok: “Mipela i save autim tok long Krais i bin i dai na God i kirapim em bek. Na bilong wanem sampela namel long yupela i save tok olsem, ‘Man i dai pinis, em i no inap kirap bek’?” (1 Korin 15:12) Ol dispela man ol i gat tupela tingting na sampela askim long tok bilong kirap bek, tasol i no dispela samting tasol ol i mekim, nogat. Ol i save tokim ol narapela olsem ol i no bilip long kirap bek. Olsem na Pol i kamapim long ples klia olsem tok bilong ol i kranki stret. Em i tok, sapos tru God i no bin kirapim bek Krais, orait tok ol Kristen i autim em i giaman tasol, na ol man i tokaut olsem Krais i kirap bek pinis ol i man bilong “tok giaman long samting God i mekim.” Sapos tru God i no bin kirapim Krais, orait Krais i no bin givim pe long God bilong baim bek ol man, na ol Kristen i ‘stap yet long sin bilong ol.’ (1 Korin 15:13-19; Rom 3:23, 24; Hibru 9:11-14) Na ol Kristen ‘i dai pinis na slip i stap’—em sampela i bin i dai bilong holimpas bilip bilong ol—ol i lus pinis na i no gat wanpela gutpela samting ol inap wet long kisim. Sapos ol i no inap kisim laip bihain long taim ol i dai, bai ol Kristen i stap olsem tarangu lain stret! Ol i karim nating ol pen na hevi.
12. (a) Wanem insait bilong dispela tok olsem Krais em i “kirap paslain long ol arapela man i dai pinis, olsem namba wan kaikai i redi long gaden”? (b) Krais i mekim wanem na bai i gat rot long ol man i dai pinis i ken kirap bek?
12 Tasol i no olsem, nogat. Pol i tok moa: “Krais i dai pinis, na tru tumas God i bin kirapim em bek.” Na tu, “em i kirap paslain long ol arapela man i dai pinis, olsem namba wan kaikai i redi long gaden.” (1 Korin 15:20) Taim ol Israel i bihainim tok bilong Jehova na ol i kisim namba wan hap kaikai i redi long gaden na givim long em, Jehova i mekim gut long ol na em i mekim gaden bilong ol i karim planti kaikai moa. (Kisim Bek 22:29, 30; 23:19; Sindaun 3:9, 10) Dispela tok bilong Pol olsem Krais em i “namba wan kaikai i redi long gaden,” em i makim olsem bihain sampela man moa bai kirap bek na kisim laip long heven. Pol i tok: “Wanpela man i bin kamapim pasin bilong i dai, na olsem tasol wanpela man i bin kamapim pasin bilong kirap bek. I olsem. Olgeta man bilong lain bilong Adam ol i save dai. Na olsem tasol olgeta man bilong lain bilong Krais bai ol i kisim laip.” (1 Korin 15:21, 22) Jisas i givim nambawan gutpela laip bilong em olsem man bilong baim bek ol manmeri, na dispela i opim rot bilong ol i ken kirap bek na lusim kalabus bilong sin na dai.—Galesia 1:4; 1 Pita 1:18, 19.a
13. (a) Ol man i dai pinis, wanem taim ol i mas kirap bek na go long heven? (b) Sampela man God i bin makim ol na ol i dai pinis, olsem wanem na ol i no “slip i stap”?
13 Pol i tok moa: “Tasol yumi olgeta bai yumi kirap bek na kisim laip long taim bilong yumi yet. Namba wan em Krais. Na bihain, taim em i kam bek, yumi olgeta lain bilong en bai yumi kirap bek.” (1 Korin 15:23) Krais i kirap bek long yia 33 C.E. Tasol ol disaipel bilong em God i bin makim ol—em ‘olgeta lain bilong Krais’—ol i mas wet i go inap bihain liklik long taim Jisas i kam bek olsem king, em tok profet bilong Baibel i makim olsem dispela samting i bin kamap long 1914. (1 Tesalonaika 4:14-16; KTH 11:18) Olsem wanem long ol man i stap laip yet long taim Jisas i stap pinis olsem king? Pol i tok: “Yupela harim. Mi laik autim wanpela tok hait long yupela. Bai yumi olgeta i no i dai. Tasol bai yumi olgeta i senis na i kamap narakain. Dispela bai i kamap wantu tasol, long taim bilong las biugel i krai. Yes, biugel bai i krai, na ol man i dai pinis bai i kirap, na ol i no inap bagarap moa. Na yumi man i no i dai yet, yumi bai i senis na i kamap narakain.” (1 Korin 15:51, 52) Em nau, yumi save ol man God i bin makim ol, i no olgeta bilong ol i mas slip i stap long matmat na wetim God i kirapim bek ol, nogat. Ol man i dai nau long taim Krais i kam i stap, wantu tasol ol bai kirap bek.—KTH 14:13.
14. Olsem wanem ol man God i makim pinis ol i “kisim baptais bilong kamap man i dai pinis”?
14 Pol i tok: “Sapos nogat, orait long wanem as na sampela man i kisim baptais bilong kamap man i dai pinis? Sapos ol man i dai pinis i no inap kirap bek, bilong wanem ol i kisim baptais bilong kamap man i dai pinis? Bilong wanem bagarap i laik painim mipela tu long olgeta aua?” (1 Korin 15:29, 30, NW) Dispela tok bilong Pol i no makim olsem sampela man i stap laip ol bai kisim baptais bilong helpim ol man i dai pinis, olsem sampela Baibel i tok, nogat. Baptais em i insait long wok bilong kamapim ol disaipel Kristen, na ol man i dai pinis ol i no inap kamap disaipel. (Jon 4:1) Pol i stori long ol Kristen i stap laip, em ‘long olgeta aua bagarap i laik painim’ planti bilong ol, olsem i bin painim Pol yet. Ol Kristen God i bin makim, ol i ‘baptais long i dai bilong Krais.’ (Rom 6:3) Kirap long taim God i makim ol pinis, i olsem ol i wok long kisim “baptais”—ol i bihainim wanpela rot i bringim ol i go long i dai i wankain olsem i dai bilong Krais. (Mak 10:35-40) Ol i mas i dai, tasol ol i gat tingting olsem ol inap kirap bek na kisim gutpela laip tru long heven.—1 Korin 6:14; Filipai 3:10, 11.
15. Ating wanem ol samting nogut i bin painim Pol na klostu em i kisim bagarap? Bilip bilong em long kirap bek i bin helpim em olsem wanem long karim ol dispela hevi?
15 Orait nau Pol i tokaut olsem klostu ol bikpela bagarap tru i painim em, olsem na em i tok: “Olgeta de mi pilim olsem mi dai pinis.” Tasol nogut sampela i tok em i giaman, olsem na Pol i mekim sampela tok moa: “Yumi olgeta i stap long Krais Jisas na mi save amamas tru long yupela, olsem na mi no haitim dispela tok long yupela.” Narapela Baibel (The Jerusalem Bible) i raitim dispela ves olsem: “Ol brata, bagarap i laik painim mi long olgeta de, na mi tokaut long dispela samting, long wanem, mi amamas tru long yupela, em dispela amamas mi holim long Krais Jisas, Bikpela bilong yumi.” Long ves 32, Pol i stori long wanpela bagarap klostu i bin painim em—em i stori long taim em i bin “pait long ol wel animal long Efesus.” Bilong kilim i dai ol man nogut, planti taim ol Rom i save tromoi ol i go long ol wel animal nogut long ples bilong pilai spot. Sapos Pol i bin pait wantaim ol wel animal tru, orait ating em i abrusim bagarap long strong bilong Jehova tasol. Tasol sapos em i no bilip olsem man i dai pinis inap kirap bek, na em i laik bihainim rot em inap kisim dispela kain bagarap long en, orait em i mekim pasin longlong tru. Sapos man i no bilip olsem em inap stap laip gen bihain long taim em i dai, orait i no gat as na em i karim ol hevi i save kamap long mekim wok bilong God. Pol i tok: “Sapos ol man i dai pinis ol i no inap kirap bek, orait mobeta ‘yumi kaikai na dring, long wanem, tumora bai yumi dai.’ ”—1 Korin 15:31, 32; lukim 2 Korin 1:8, 9; 11:23-27.
16. (a) Dispela tok “yumi kaikai na dring, long wanem, tumora bai yumi dai,” ating em i bin kirap we? (b) Ol man i kisim dispela tingting, wanem samting nogut inap painim ol?
16 Ating Pol i kamapim tok bilong Aisaia 22:13 i stori long tingting bilong ol bikhetman long Jerusalem, em ol i bilip olsem God i makim pinis ol samting i mas painim ol. O ating em i tingim ol bilip bilong ol Epikurian, em ol i no bilip olsem ol man inap i stap laip gen bihain long taim ol i dai—ol i bilip olsem pasin bilong painim ol amamas bilong skin em i nambawan bikpela samting ol i mas mekim. Tasol maski Pol i kisim dispela tok we, dispela tingting olsem yumi mas “kaikai na dring” tasol, em wanpela pasin God i no laikim. Olsem na Pol i toksave olsem: “Yupela i no ken larim ol arapela man i giamanim yupela. Yupela i save long dispela tok, ‘Sapos yumi poroman wantaim ol man nogut, bai ol i bagarapim gutpela pasin bilong yumi.’ ” (1 Korin 15:33) Sapos ol i bung wantaim ol man i sakim tok bilong kirap bek, dispela inap bagarapim ol. Pasin bilong poroman wantaim kain man olsem, ating dispela i bin kamapim sampela hevi insait long kongrigesen bilong Korin em Pol i bin wok long stretim, olsem pasin pamuk, brukim lain, kisim brata i go long kot, na ol i no tingim gut Kaikai Bilong Bikpela.—1 Korin 1:11; 5:1; 6:1; 11:20-22.
17. (a) Pol i givim wanem tok long ol Korin? (b) I gat wanem ol askim i stap yet na yumi mas save long bekim bilong en?
17 Olsem na Pol i tokim ol Korin: “Yupela i mas lusim longlong pasin na tingting stret. Yupela i no ken mekim sin moa. Yupela harim. Sampela bilong yupela ol i no save yet long God. Mi mekim dispela tok bai yupela i ken sem long pasin bilong yupela.” (1 Korin 15:34) Sampela i no bilip strong olsem ol man i dai pinis bai kirap bek, na dispela i mekim na ol i no inap tingting stret—i olsem ol i dring longlong. Ol i mas kirap na tingting stret oltaim. Na olsem tasol, ol Kristen long nau God i makim pinis, ol i mas tingting stret oltaim; ol i no ken larim ol man bilong dispela graun i no bilip tumas i pulim tingting bilong ol. Ol i mas holimpas dispela bilip bilong ol olsem taim ol i dai ol bai kirap bek na go long heven. Tasol sampela askim i stap yet—bilong ol Korin long dispela taim bipo, na bilong yumi long nau. Olsem: Taim ol 144,000 i kirap bek na i go long heven, ol bai gat wanem kain bodi? Na olsem wanem long planti milion man ol i stap yet long matmat na ol i no bin tingting long i go long heven? Wok bilong kirap bek em bai mekim wanem long ol? Long stori i kamap bihain long dispela, bai yumi skelim ol laspela tok bilong Pol long ol samting bilong kirap bek.
[Futnot]
a Wastaua (tok Inglis) bilong Februeri 15, 1991, i stori long pe bilong baim bek ol man.
Yu Tingim Yet?
◻ Jisas i givim wanem save long yumi long dispela tok olsem ol man i dai pinis bai kirap bek?
◻ Husat sampela i bin lukim Jisas taim em i kirap bek pinis?
◻ Bilong wanem sampela i no bilip long kirap bek? Pol i bekim wanem tok long ol?
◻ Bilong wanem ol Kristen God i makim pinis ol i mas bilip olsem ol man i dai pinis bai kirap bek?
[Piksa long pes 15]
Samting i painim pikinini bilong Jairus i kamapim klia olsem man i dai pinis em inap kirap bek
[Piksa long pes 16, 17]
Sapos i no gat kirap bek, orait ol gutpela Kristen i bin dai bilong holimpas bilip, ol i dai nating tasol