“Em Bai i Pinisim Dai”
“Em i pinisim pinis olgeta arapela birua, orait em bai i pinisim dai tu.”—1 KORIN 15:26.
1, 2. (a) Aposel Pol i tok wanem samting bai painim ol man i dai pinis? (b) I gat wanem askim long ol man i dai pinis bai kirap bek, em Pol i toktok long en?
WANPELA tokaut, ol i kolim Tokaut Bilong Ol Aposel, i tok: “Mi bilip long . . . bodi bai kirap bek, na laip i stap oltaim.” Ol Katolik na ol Talatala tu ol i save kolim kolim dispela tok, tasol ol i no save olsem ol bilip bilong ol i wankain olsem tok bilong ol saveman bilong lain Grik—i no wankain long ol samting ol aposel i bin bilip long en, nogat. Tasol aposel Pol i bin sakim tok bilong ol saveman bilong ol Grik—em i no bilip olsem yumi gat wanpela tewel. Tasol em i bilip strong olsem ol man inap stap laip gen bihain long taim ol i dai, na spirit holi i kirapim em long raitim dispela tok: “Em i pinisim pinis olgeta arapela birua, orait em bai i pinisim dai tu.” (1 Korin 15:26) Dispela i makim wanem samting bai painim ol man bilong graun i save dai?
2 Bilong bekim dispela askim, yumi ken lukim gen tok bilong Pol long 1 Korin sapta 15 i tok long ol man i dai pinis bai kirap bek. Yu bai tingim bek olsem: Long ol ves i stap paslain, Pol i kamapim klia olsem tok bilong kirap bek em i wanpela bikpela as tok bilong lotu Kristen. Orait nau em i kamapim wanpela askim: “Ating wanpela man bai i askim olsem, ‘Ol man i dai pinis, bai ol i kirap bek olsem wanem? Bai ol i gat wanem kain bodi taim ol i kirap bek?’ ”—1 Korin 15:35.
Wanem Kain Bodi?
3. Bilong wanem sampela man i sakim dispela tok olsem man i dai pinis bai kirap bek?
3 Taim Pol i kamapim dispela askim, ating em i laik daunim bilip em Pleto i bin kamapim. Pleto i bin skulim ol man olsem man i gat wanpela tewel i no save dai na dispela tewel i stap yet taim bodi i dai. Ating ol man i go bikpela long dispela bilip ol i ting olsem dispela tok bilong lotu Kristen olsem man i dai pinis bai kirap bek em i olsem wanpela bilip i no gat wok long en. Ol i ting sapos tru tewel i stap yet taim man i dai pinis, orait i gat wanem as na man i mas kirap bek? Na tu, taim bodi i kamap das pinis, olsem wanem dispela bodi inap kirap bek? Ol i ting em i no inap. Wanpela man bilong kamapim as bilong ol tok bilong Baibel, em Heinrich Meyer, em i tok, sampela Korin i tok pait long dispela tok, long wanem, ol i ting ‘bodi i kamap graun pinis em i no inap kamap bodi gen.’
4, 5. (a) Ol man i lusim bilip, bilong wanem ol tok ol i kamapim bilong daunim tok bilong kirap bek em i kranki stret? (b) Kamapim insait bilong tok piksa bilong Pol long “pikinini wit” nating. (c) Ol man God i bin makim ol na ol i dai na kirap bek, God i mas givim wanem kain bodi long ol?
4 Pol i kamapim long ples klia olsem dispela tingting bilong ol em i kranki stret. Em i tok: “Dispela em wanem kain kranki tok? Yu save, taim yu planim pikinini bilong wit samting, dispela pikinini i mas i dai pastaim, na bai em i kisim laip. Na dispela pikinini yu planim, maski em i pikinini wit o wanem samting, em i pikinini nating, na em i no luk wankain olsem dispela wit samting bai i kamap bihain. Na long laik bilong em yet, God i save givim han na skin na ol lip samting long olgeta kain pikinini kaikai na gras na diwai samting, na dispela i olsem bodi ol i kisim. Olsem na olgeta i save kisim bodi i narakain long ol arapela.” (1 Korin 15:36-38) Bodi bilong ol man taim ol i stap long graun, God i no ken kirapim bek dispela bodi. Senis i mas kamap.
5 Pol i tok, kirap bek i wankain olsem pikinini bilong wit taim em i wok long putim kru. Liklik pikinini bilong wit i no luk wankain olsem kru na ol lip i kamap long en. Wanpela buk (The World Book Encyclopedia) i tok: “Taim pikinini bilong wit i kirap long putim kru, em i pulim bikpela hap wara. Orait nau wara i kamapim planti senis insait long dispela pikinini. Na wara i mekim na insait bilong pikinini wit em kru i save kamap long en, em i solap na i brukim skin bilong dispela pikinini wit.” I olsem pikinini bilong wit i dai na i no stap moa olsem—kru i kamap na i putim ol lip, na nau em i kamap olsem liklik diwai samting. “God i save givim han na skin na ol lip samting long olgeta kain pikinini kaikai,” olsem: Em i putim sampela lo bilong bosim ol pikinini kaikai taim ol i wok long i go bikpela, na olgeta wan wan pikinini kaikai i kisim bodi i kain olsem em yet. (Stat 1:11) Na olsem tasol, ol Kristen God i bin makim, pastaim ol i stap man na ol i dai. Orait bihain, long wanpela taim God i makim, em i kirapim bek ol long nupela bodi olgeta. Olsem Pol i tokim ol Filipai: “Jisas Krais . . . bai i senisim ol dispela bodi i save givim ol kain kain hevi long yumi, na ol bodi bilong yumi bai i kamap gutpela moa moa yet olsem bodi bilong em yet.” (Filipai 3:20, 21; 2 Korin 5:1, 2) Ol bai kirap bek long bodi spirit na ol bai stap long ples bilong ol spirit.—1 Jon 3:2.
6. Bilong wanem i stret yumi ken ting olsem God inap givim gutpela bodi spirit long ol man i kirap bek pinis?
6 Yu ting dispela samting i hatwok tumas long bilip long en? Nogat. Pol i stori olsem bodi bilong ol animal i kain kain. Na tu, em i skelim ol ensel long heven wantaim ol man i gat skin bilong graun. Em i tok: “Ol samting bilong skai i gat kain bodi bilong ol, na ol samting bilong graun tu i gat kain bodi bilong ol.” Na ol samting God i bin wokim na i no gat laip, ol tu i kain kain. “Ol wan wan sta tu i gat kain bilas bilong ol yet.” Pol i mekim dispela tok planti handet yia paslain long taim ol saveman i painim sampela kain sta—sampela i blupela, na sampela i retpela na i bikpela tru, na sampela i waitpela na i liklik. Em nau, i stret yumi ken ting olsem God inap givim gutpela bodi spirit long ol man em i bin makim na ol i kirap bek.—1 Korin 15:39-41.
7. Wanem insait bilong dispela tok, “bodi i gat strong”? Na olsem wanem long dispela tok, “laip oltaim”?
7 Orait nau Pol i tok: “Pasin bilong man i dai pinis na i kirap bek, em i olsem tasol. Bodi yumi planim, em i save bagarap. Bodi i kirap bek, em i no inap bagarap.” (1 Korin 15:42) Bodi bilong graun, maski em i gutpela olgeta, em inap bagarap. Ol inap kilim i dai. Yumi ken save long dispela samting, long wanem, Pol i tok, Jisas i kirap bek na “em i no inap i go bek long matmat moa na i sting.” (Aposel 13:34) Em i no inap kamap laip gen na kisim bodi bilong graun em inap bagarap, maski dispela bodi i gutpela olgeta. Bodi God i givim long ol man em i bin makim ol na ol i kirap bek, dispela bodi i gat strong—em i no inap dai o sting. Pol i tok moa: “Bodi yumi planim, em i samting nogut. Bodi i kirap bek, em i gutpela tru. Bodi yumi planim, em i no gat strong. Bodi i kirap bek, em i gat strong. Bodi yumi planim, em i bilong graun. Bodi i kirap bek, em i bilong heven.” (1 Korin 15:43, 44) Na Pol i tok: “Dispela bodi i save dai, em i mas senis na i stap laip oltaim.” Dispela laip oltaim ol i kisim, em laip bilong i stap oltaim oltaim na i no save dai; em i no inap bagarap. (1 Korin 15:53; Hibru 7:16) Long dispela rot, ol man i kirap bek ol i “stap wankain olsem dispela man bilong heven,” em Jisas, em yet i bin wokim rot bilong ol i ken kirap bek.—1 Korin 15:45-49.
8. (a) Olsem wanem yumi save, ol man i dai pinis na kirap bek, ol i wankain olsem long taim ol i stap laip long graun? (b) Taim ol man i dai pinis i kirap bek, dispela i truim wanem ol tok profet?
8 Tru, bodi bilong ol i senis, tasol ol man i kirap bek ol i wankain olsem bipo, taim ol i no dai yet. Taim ol i kirap bek, tingting na ol gutpela pasin Kristen bilong ol bai i wankain olsem bipo. (Malakai 3:3; KTH 21:10, 18) Long dispela samting ol i stap wankain olsem Krais Jisas. Pastaim em i gat bodi spirit na bihain em i kisim skin bilong man. Bihain em i dai na em i kirap bek olsem spirit. Tasol “pasin bilong Jisas Krais i save stap wankain tasol long asde na long nau tu na long olgeta taim bihain.” (Hibru 13:8) Ol man God i makim ol inap kisim gutpela samting tru! Pol i tok: “Tru, dispela bodi i save bagarap, em bai i senis na i stap gut oltaim. Na dispela bodi i save dai, em bai i senis na i stap laip oltaim. Long dispela taim tok i stap long buk bilong God, em bai i kamap tru. Buk bilong God i tok olsem, ‘God i winim pait na em i pinisim dai tru. Dai, we stap strong bilong yu long daunim ol man? Dai, we stap spia bilong yu bilong bagarapim ol man?’ ”—1 Korin 15:54, 55; Aisaia 25:8; Hosea 13:14.
I Gat Kirap Bek Bilong i Stap Long Graun?
9, 10. (a) Long 1 Korin 15:24, dispela tok “olgeta samting i pinis,” em bai kamap long wanem taim? Wanem ol samting bai kamap long dispela taim? (b) Wanem samting i mas kamap bilong pinisim i dai?
9 Olsem wanem long ol planti milion manmeri i no bilong i go long heven na kamap spirit na kisim laip i no save dai? Ol inap kisim laip bihain long taim ol i dai? Tru tumas, ol inap! Pastaim Pol i stori olsem ol man i dai pinis na ol i bilong kirap bek na kisim laip long heven, ol bai kirap bek long taim Krais i kam i stap. Orait nau Pol i stori long ol samting i mas kamap bihain long dispela. Em i tok: “Long dispela taim bai olgeta samting i pinis. Na bai Krais i pinisim olgeta gavman na olgeta strongpela spirit na olgeta samting i gat strong, na bai em i putim kingdom long han bilong God Papa.”—1 Korin 15:23, 24.
10 Taim bilong “olgeta samting i pinis” em bai kamap long pinis bilong Wan Tausen Yia Bilong Krais i Stap King. Long dispela taim, long pasin daun na pasin bilong i stap gut long God, Jisas bai putim Kingdom i go long han bilong God, em Papa bilong em. (KTH 20:4) God bai inapim pinis laik bilong em long “bungim olgeta samting long Krais.” (Efesus 1:9, 10) Tasol pastaim Krais bai pinisim “olgeta gavman na olgeta strongpela spirit na olgeta samting i gat strong” em ol i bikhet long laik bilong God, em i King. Bilong mekim olsem, i gat sampela samting moa i mas kamap—i no dispela bikpela bagarap bai kamap long taim bilong Armagedon na em tasol, nogat. (KTH 16:16; 19:11-21) Pol i tok: “Krais i mas i stap king i go inap em i daunim olgeta birua bilong en. Em i pinisim pinis olgeta arapela birua, orait em bai i pinisim dai tu.” (1 Korin 15:25, 26) Yes, olgeta sin na dai em Adam i bin putim long ol man, bai i tekewe olgeta. Olsem na God i mas kirapim bek olgeta man i stap long “matmat,” em ol man God i tingim ol, na bai i no gat wanpela i stap moa long matmat.—Jon 5:28.
11. (a) Olsem wanem yumi save God inap wokim gen skin bilong ol man i dai pinis? (b) Ol man i kirap bek na kisim laip long graun, ol bai kisim wanem kain bodi?
11 Bilong mekim olsem, God i mas wokim gen skin bilong ol dispela man bilong graun. Yu ting em i no inap? Nogat, em inap, long wanem, Song 104:29, 30 i tokim yumi olsem: “Taim yu rausim win long ol, ol i dai na kamap graun gen. Yu save givim win long ol na ol i kisim laip.” Tru, ol man i kirap bek bai i wankain olsem bipo taim ol i no dai yet, tasol i no olsem ol i mas i gat dispela bodi yet bilong pastaim, nogat. Olsem God i mekim long ol man i kirap bek na go long heven, olsem tasol God bai givim bodi long ol long laik bilong em yet. Nupela bodi bilong ol bai i no gat sik na em bai wankain liklik long bodi bilong ol taim ol i no dai yet bambai famili bilong ol inap luksave long ol.
12. Ol man bai kirap bek long graun long wanem taim?
12 Ol man i dai pinis na ol i bilong kirap bek long graun, ol bai kirap bek long wanem taim? Marta i tok long brata bilong em i dai pinis, em Lasarus, olsem: “Mi save, em bai i kirap bek long las de, long dispela taim olgeta manmeri bai i kirap bek.” (Jon 11:24) Olsem wanem Marta i save long dispela samting? Long taim bilong em ol man i save tok pait long dispela tok bilong kirap bek—ol Farisi i bilip long en, tasol ol Sadyusi nogat. (Aposel 23:8) Tasol Marta i save pinis olsem ol witnes i stap paslain long taim bilong ol Kristen, ol i bilip olsem ol bai kirap bek long matmat. (Hibru 11:35) Na tu, em inap kisim save long Daniel 12:13 olsem ol man i dai pinis bai kirap bek long las de. O ating Jisas yet i bin lainim em long dispela samting. (Jon 6:39) Dispela “las de” bai kamap long wankain taim olsem Taim Bilong Wan Tausen Yia Bilong Krais. (KTH 20:6) Tingim bikpela amamas tru em bai kamap long dispela “de” taim dispela gutpela samting tru i kirap pinis!—Skelim wantaim Luk 24:41.
Husat Bai Kam Bek?
13. Kamapim Tok Hait 20:12-14 i stori long wanem driman bilong kirap bek?
13 Kamapim Tok Hait 20:12-14 i stori olsem long driman bilong Jon, em i lukim ol man i dai pinis ol i kirap bek—em ol man bilong kisim laip long graun. Em i tok: “Mi lukim ol manmeri i dai pinis, em ol manmeri i gat nem na ol manmeri nating, ol i sanap i stap long pes bilong sia king. Na ol ensel i opim ol buk i gat tok long pasin ol dispela manmeri i bin mekim. Na ol i opim narapela buk tu, em buk bilong laip. Na man i sindaun long sia king i lukim tok i stap long ol dispela buk, na em i skelim pasin bilong ol manmeri i dai pinis. Solwara i larim olgeta man i dai pinis na i stap long en, ol i go. Na Dai wantaim Ples bilong ol man i dai pinis, tupela tu i larim olgeta man i dai pinis na i stap long han bilong tupela, ol i go. Na man i sindaun long sia king em i lukim pasin olgeta wan wan man i bin mekim, na em i skelim ol long kot bilong en. Na bihain em i tromoi Dai wantaim Ples bilong ol man i dai pinis i go daun long dispela bikpela hul i gat paia. Dispela bikpela hul i gat paia em i namba 2 dai.”
14. Husat sampela bai kirap bek?
14 Wok bilong kirap bek bai helpim “ol manmeri i gat nem na ol manmeri nating” ol i bin i stap laip na ol i dai. Ol liklik pikinini tu bai kirap bek! (Jeremaia 31:15, 16) Aposel 24:15 i kamapim narapela bikpela samting, olsem: “God bai i kirapim bek ol man i dai pinis, em ol stretpela man na ol man nogut wantaim.” Sampela man i gat nem namel long ol dispela “stretpela man,” em ol manmeri bilong bipo ol i stap gut long God, olsem Abel, Enok, Noa, Abraham, Sara, na Rahap. (Hibru 11:1-40) Tingim: Bai yu inap toktok wantaim ol dispela manmeri na ol inap tokim yu long ol samting ol yet i bin lukim—em ol samting Baibel i stori long en na i bin kamap long bipo yet! Na sampela “stretpela man,” em ol planti tausen manmeri i save pret long God na ol i dai nau long taim bilong yumi, na ol i no gat tingting long go long heven. Olsem wanem? Wanpela long famili bilong yu o wanpela man o meri yu laikim em tumas em i insait long dispela lain? Yumi save yumi inap lukim ol gen na dispela i mekim gut bel bilong yumi. Tasol ol dispela “man nogut” ol i bilong kirap bek, ol i husat? Em planti milion, o planti bilion, manmeri i dai pinis em rot i no bin op long ol long kisim save long tok i tru bilong Baibel na bihainim.
15. Wanem insait bilong dispela tok olsem ol man i kirap bek, God bai “skelim pasin bilong ol” long ol “tok i stap long ol dispela buk”?
15 Ol man i kirap bek, olsem wanem God bai “skelim pasin bilong ol” long ol “tok i stap long ol dispela buk”? Ol dispela buk i no kamapim ol samting bipo ol i mekim, nogat. Taim ol i dai, ol rong ol i mekim bipo taim ol i no dai yet, i tekewe pinis. (Rom 6:7, 23) Tasol sin bilong Adam bai pas yet long ol man i kirap bek. Olsem na ol dispela buk bai kamapim ol tok bilong God em olgeta i mas bihainim, bambai ofa bilong Krais Jisas inap helpim tru ol. Taim sin bilong Adam i tekewe olgeta, God “bai i pinisim dai” olgeta. Long pinis bilong wan tausen yia, God bai “stap het tru bilong olgeta samting.” (1 Korin 15:28) Ol man bai i no gat wok moa long wanpela Hetpris o Man bilong baim bek ol. Olgeta manmeri bai kamap gutpela olgeta wankain olsem Adam long pastaim.
Kirap Bek Long Taim Stret Bilong Ol
16. (a) Bilong wanem i stret yumi ken ting olsem sampela man i dai pinis ol bai kirap bek pastaim na sampela bai kirap bek bihain? (b) Ating husat bai insait long namba wan lain bilong kirap bek long matmat?
16 Ol man i kirap bek na kisim laip long heven ‘ol bai kirap bek na kisim laip long taim bilong ol yet,’ na olsem tasol, taim ol man i kirap bek na kisim laip long graun, dispela i no inap mekim na planti man tumas i kamap wantaim, nogat. (1 Korin 15:23) Na yumi save, i mas i gat man bilong lukautim ol man i kirap bek nupela. (Skelim wantaim Luk 8:55.) Ol i mas i gat kaikai samting bilong skin, na bikpela samting moa yet, i mas i gat man bilong helpim ol long kisim save long God Jehova na Krais Jisas, em dispela save i bringim ol i go long laip. (Jon 17:3) Sapos olgeta i kirap bek na kisim laip long wankain taim tasol, bai i no gat man inap long lukautim gut ol. I stret yumi ken ting olsem sampela i mas kirap bek pastaim, na sampela bihain, olsem. Ol gutpela Kristen i dai klostu long taim dispela graun bilong Satan i pinis, ating bai ol i kirap bek pastaim. Na yumi ken ting olsem, ol man bilong bipo i bin stap gut long God na ol bai mekim wok olsem ‘pikinini man bilong king,’ ol tu bai kirap bek pastaim.—Song 45:16.
17. Wanem sampela samting bilong kirap bek em Baibel i no stori long en? Bilong wanem ol Kristen i no ken tingting planti tumas long ol kain samting olsem?
17 Tasol yumi no ken mekim strongpela tok long ol dispela samting. Long planti askim i kamap, i no gat bekim long Baibel. Baibel i no tokaut long olgeta liklik liklik samting olsem wanem rot na wanem taim na wanem ol hap ol man i dai pinis bai kirap bek. Na em i no tokim yumi long olsem wanem ol man i kirap bek inap kisim haus, na kaikai, na klos. Na yumi no save tru tru long ol samting Jehova bai mekim bilong lukautim na mekim bikpela long ol pikinini i kirap bek long matmat o long lukautim ol pren na ol wanblut bilong yumi i kirap bek. Tru, yumi laik save long ol kain samting olsem—em pasin bilong yumi ol man—tasol nogut yumi tromoi bikpela hap taim long kisim bekim bilong ol askim i no gat bekim bilong en long dispela taim nau. Yumi mas putim tingting i go long stap gut long Jehova na mekim wok bilong em, na long kisim laip i stap oltaim. Ol Kristen God i bin makim ol i save tingting olsem bihain ol bai kirap bek na kisim gutpela laip tru long heven. (2 Pita 1:10, 11) Ol “arapela sipsip” i gat tingting long kisim laip oltaim long graun aninit long Kingdom bilong God. (Jon 10:16; Matyu 25:33, 34) I gat planti liklik liklik samting bilong kirap bek yumi no save long en, olsem na yumi mas bilip tasol na wet long Jehova. Gutpela laip na amamas yumi inap kisim bihain em i stap gut long han bilong dispela Man em inap givim olgeta samting long yumi ‘inap long yumi stap gut.’—Song 145:16; Jeremaia 17:7.
18. (a) Pol i toktok long wanem pait i win? (b) I gat wanem as na yumi bilip tru olsem man i dai pinis bai kirap bek?
18 Pol i pinisim tok bilong em olsem: “Yumi tenkyu long God. Long strong bilong Bikpela bilong yumi Jisas Krais, God i save strongim yumi na yumi winim pait.” (1 Korin 15:57) Yes, wok bilong ofa bilong Krais Jisas bilong baim bek ol man em i winim pait na i daunim i dai yumi bin kisim long Adam. Dispela wok bilong winim pait bilong daunim i dai em i helpim ol man God i bin makim, na “ol arapela sipsip” tu. Tru, ol arapela sipsip i stap long nau ol i wetim wanpela samting ol man bilong bipo i no inap wetim. Ol i insait long dispela bikpela lain olsem lain “planti manmeri tru,” em ol i wok long kamap planti moa, olsem na ol inap winim taim bilong “bikpela hevi” klostu bai kamap, na dai i no inap painim ol! (KTH 7:9, 14) Tasol sapos sampela i mas i dai, long wanem, “taim nogut i save painim yumi olgeta,” o ol boi bilong Satan i kilim ol i dai, orait ol inap bilip strong olsem bihain bai ol i kirap bek.—Saveman 9:11.
19. Olgeta Kristen long nau ol i mas tingim wanem tok bilong strongim ol?
19 Olsem na yumi wetim dispela gutpela taim bihain, taim dai i pinis olgeta. Yumi bilip strong long tok promis bilong Jehova olsem em bai kirapim bek ol man i dai pinis, na dispela i helpim yumi long kisim stretpela tingting long ol samting. Maski wanem samting i painim yumi long dispela laip nau—olsem i dai inap painim yumi—i no gat wanpela samting inap tekewe dispela gutpela pe Jehova i tok promis pinis long givim long yumi. Olsem na laspela tok Pol i givim long ol Korin long 2,000 yia i go pinis bilong strongim ol, em i stret yet long yumi long nau, olsem: “Olsem na, ol brata tru bilong mi, yupela i mas i stap strong, na i no ken surik liklik. Yupela i save olsem, hatwok yupela i save mekim long Bikpela, em bai i no inap lus nating. Olsem na oltaim yupela i mas wok strong long mekim wok bilong Bikpela.”—1 Korin 15:58.
Yu Inap Stori Long Dispela?
◻ Olsem wanem Pol i bekim dispela askim olsem ol man God i bin makim na ol i kirap bek, ol bai kisim wanem kain bodi?
◻ Dai bai pinis olgeta long wanem rot na long wanem taim?
◻ Husat sampela bai kirap bek na kisim laip long graun?
◻ Yumi mas i gat wanem tingting long ol samting Baibel i no stori long en?
[Piksa long pes 20]
Pikinini bilong wit i “dai” taim em i senis na i kamap narapela samting
[Ol Piksa long pes 23]
Ol gutpela man na meri bilong bipo yet, olsem Abel, Enok, Noa, Abraham, Sara, na Rahap, ol bai kirap bek
[Piksa long pes 24]
Bikpela amamas bai kamap taim ol man i dai pinis ol i kirap bek!