“Ol Man i Dai Pinis, Ol Bai Kirap Bek Olsem Wanem?”

1-2. Wai na olgeta Kristen i laik kisim sampela save long kirap bek bilong ol lain bai kisim laip long heven?

PLANTI manmeri em ol i mekim wok bilong Jehova long nau i bilip long kisim laip oltaim long graun. Tasol hap lain bilong ol dispela Kristen em God i makim na ol i stap yet long graun, ol i bilip long kirap bek na kisim laip long heven. Ol dispela Kristen i laik tru long save long laip bilong ol long heven bai olsem wanem, tasol olsem wanem long ol Kristen i bilip long kisim laip long graun? Olsem dispela atikol bai kamapim, long rot bilong ol lain husat bai kirap bek na kisim laip long heven, ol lain i bilip long kisim laip long graun ol tu bai kisim ol blesing. Maski yumi bilip long kisim laip long heven o long graun, yumi laik kisim sampela save long kirap bek bilong ol lain bai kisim laip long heven.

² Long taim bilong ol aposel, God i kirapim sampela disaipel bilong Jisas long raitim ol tok i stori long bilip bilong kirap bek na kisim laip long heven. Aposel Jon i tok: “Yumi stap pikinini bilong God. Tasol inap long nau yumi no save yumi bai kamap wanem kain long bihain. Yumi save olsem taim God i kamap ples klia, yumi bai wankain olsem em.” (1 Jon 3:2) So ol Kristen em God i makim, ol i no save ol bai kamap wanem kain taim ol i kirap bek na kisim laip olsem ol spirit long heven. Tasol ol bai lukim Jehova taim ol i kisim blesing bilong ol. Baibel i no stori long olgeta liklik samting long kirap bek bilong i go long heven, tasol aposel Pol i kamapim sampela tok long dispela samting. Ol lain em God i bin makim, ol bai stap wantaim Krais “taim em i pinisim olgeta gavman na olgeta wok bos na olgeta samting i gat strong.” Jisas bai pinisim tu “dai, dispela laspela birua.” Na bihain Jisas—wantaim ol wanwok bilong em—bai putim em yet na olgeta samting aninit long Jehova. (1 Kor. 15:24-28) Dispela em taim bilong bikpela amamas!b

 3. Olsem 1 Korin 15:30-32 i kamapim, Pol i bilip long kirap bek na dispela i helpim em long mekim wanem?

³ Pol i bilip long kirap bek na dispela i helpim em long sanap strong na karim kain kain hevi. (Ritim 1 Korin 15:30-32.) Em i tokim ol Korin olsem: “Long olgeta de dai i laik painim mi.” Pol i tok tu olsem: “Mi bin pait wantaim ol wel animal long Efesus.” Ating em i stori long em i bin pait wantaim ol animal tru tru long wanpela stediam long Efesus. (2 Kor. 1:8; 4:10; 11:23) O ating em i stori long ol Juda i birua long em na ol narapela man em ol i olsem “ol wel animal.” (Apo. 19:26-34; 1 Kor. 16:9) Maski wanem samting i bin kamap, Pol i bin karim ol bikpela hevi. Tasol em i bilip olsem gutpela samting bai painim em long bihain.—2 Kor. 4:16-18.

 4. Olsem wanem bilip bilong kirap bek i strongim ol Kristen long nau? (Lukim fran pes piksa.)

⁴ Yumi stap long haptaim nogut. Sampela bratasista bilong yumi i karim hevi long pasin raskol. Ol narapela i stap long ol hap we i gat ol bikpela woa i kamap na ol i no pilim seif. Sampela narapela i mekim wok bilong Jehova long ol kantri we gavman i putim tambu long wok lotu bilong yumi, tasol ol i autim tok yet maski gavman inap kalabusim ol o kilim ol i dai. Ol dispela bratasista i givim bel yet long mekim wok bilong Jehova, na ol i stap gutpela eksampel long yumi inap bihainim. Ol i save olsem maski ol inap lusim laip bilong ol long nau, Jehova i promis long givim gutpela samting moa long ol long bihain.

 5. Wanem tingting kranki inap mekim na yumi no holimpas bilip bilong kirap bek?

⁵ Pol i givim tok lukaut long ol Kristen long sakim wanpela tingting kranki em planti man i gat olsem: “Sapos ol man i dai pinis i no inap kirap bek, orait ‘yumi kaikai na dring, long wanem, tumora bai yumi dai.’” Dispela tingting i bin stap paslain long taim bilong Pol. Ating em i kolim tok bilong Aisaia 22:13 we i kamapim tingting bilong ol Israel. Ol i no mekim ol samting bilong i go klostu long God, nogat, ol i laikim tasol ol amamas. Ol Israel i gat dispela tingting olsem ‘yumi kisim amamas long nau bikos tumora yumi inap dai,’ planti man long nau tu i holim wankain tingting olsem. Tasol samting nogut i bin painim ol Israel na dispela i stap olsem tok lukaut long yumi long nau.—2 Sto. 36:15-20.

 6. Olsem wanem bilip bilong kirap bek i mas stiaim yumi long makim ol gutpela pren?

⁶ Yumi save olsem Jehova bai kirapim bek ol man i dai pinis, so dispela i mas stiaim yumi long makim ol gutpela pren. Ol Kristen long Korin i gat wok long sakim pasin bilong bung wantaim ol lain em ol i no bilip long kirap bek. Yumi inap kisim wanem skul long dispela? I no gat gutpela samting bai kamap sapos oltaim yumi bung wantaim ol pren em ol i tingting tasol long kisim amamas bilong nau. Pasin bilong bung wantaim ol kain pren olsem inap bagarapim tingting na pasin bilong wanpela Kristen. Na dispela inap kirapim em long mekim sin—em inap mekim ol pasin em God i heitim tru. Olsem na Pol i tok: “Yupela i mas kisim gutpela tingting na kirap bihainim stretpela pasin na no ken wokabaut long pasin bilong sin.”—1 Kor. 15:33, 34.

 7. Ating sampela i gat wanem askim long kirap bek olsem i stap long 1 Korin 15:35-38?

⁷ Ritim 1 Korin 15:35-38. Wanpela husat i laik mekim ol man i gat tupela tingting long kirap bek, ating em i givim dispela askim: “Ol man i dai pinis, ol bai kirap bek olsem wanem?” I gutpela yumi skelim bekim bilong Pol bikos planti man long nau i gat kain kain tingting long samting i painim ol daiman. Tasol Baibel i skulim yumi long wanem samting?

 8. Wanem tok piksa inap helpim yumi long kliagut moa long kirap bek bilong ol lain bai kisim laip long heven?

⁸ Taim man i dai, bodi bilong em i save sting na tanim i kamap graun gen. Tasol God inap kirapim bek dispela man na givim bodi i stret long em; God inap mekim olsem bikos em Man husat i bin wokim dispela yunives. (Stt. 1:1; 2:7) Pol i mekim wanpela tok piksa bilong soim olsem taim God i kirapim bek ol lain husat bai kisim laip long heven, em bai givim nupela bodi long ol. Tingim “wanpela liklik sid” o “sid bilong wit.” Taim man i planim sid bilong wit long graun, dispela sid i save putim nupela kru na gro i go antap. Taim dispela wit i kamap bikpela, em i no wankain moa olsem dispela liklik sid. Pol i mekim dispela tok piksa bilong soim olsem “long laik bilong God yet, em i save givim bodi” long man.

 9. Olsem 1 Korin 15:39-41 i kamapim, i gat wanem kain ol bodi i stap?

⁹ Ritim 1 Korin 15:39-41. Pol i tok ol samting God i wokim i gat kain kain bodi. Olsem, ol samting i gat laip i gat kain kain bodi, olsem ol bulmakau, ol pisin, na ol pis. Em i tok taim yumi lukluk long skai, yumi lukim olsem san na mun ol i no wankain. Na em i tok olsem “glori bilong ol wan wan sta i narapela narapela.” Maski yumi no inap lukim ol long ai tru bilong yumi, ol saientis i tok i gat kain kain sta i stap, sampela i bikpela, sampela i liklik, sampela i ret, sampela i wait, na sampela i yelo olsem san. Pol i tok tu olsem “i gat ol bodi bilong heven na ol bodi bilong graun.” Wanem insait bilong dispela tok? Long graun, bodi bilong yumi i gat mit na blut, tasol long heven i gat bodi bilong spirit, olsem bodi bilong ol ensel.

10. Ol lain i kirap bek na kisim laip long heven bai i gat wanem kain bodi?

¹⁰ Pol i stori long hau sid bilong wit i no wankain long wit i kamap bikpela pinis, na bihain em i tok: “Na i wankain tu long kirap bek bilong ol man i dai pinis. Bodi yumi planim em bilong bagarap; bodi i kirap bek em i no inap bagarap.” Taim man i dai, bodi bilong em i save sting na tanim i kamap graun. (Stt. 3:19) So hau na “bodi i kirap bek em i no inap bagarap”? Tok bilong Pol i no makim ol man em ol i kirap bek na stap laip long graun, olsem ol man em Elaija, Elisa, na Jisas i bin kirapim bek ol, nogat. Pol i tok long man i kirap bek wantaim “bodi bilong heven” olsem wanpela spirit.—1 Kor. 15:42-44.

11-12. (a) Wanem senis i kamap long Jisas taim em i kirap bek? (b) Olsem wanem ol Kristen God i bin makim ol bai kirap bek wankain olsem Jisas?

¹¹ Taim Jisas i stap long graun, em i gat bodi bilong graun. Tasol taim em i kirap bek, em i “kamap wanpela spirit i givim laip” na em i go bek long heven. Olsem tasol, ol Kristen em God i bin makim ol bai kirap bek olsem spirit. Pol i tok: “Yumi stap wankain olsem dispela man God i bin wokim long das, olsem tasol bihain bai yumi stap wankain olsem dispela man i bin go long heven.”—1 Kor. 15:45-49.

¹² Nau Pol i stori long bikpela poin long tok bilong em long kirap bek. Em i bikpela samting long save olsem Jisas i no bin kirap bek wantaim bodi bilong graun. Pol i tok klia olsem: “Bodi bilong graun i no inap insait long Kingdom Bilong God.” (1 Kor. 15:50) Ol aposel na ol narapela em God i bin makim, ol i no inap kirap bek na i go long heven wantaim bodi bilong graun i gat mit na blut. Wanem taim ol bai kirap bek? Pol i tok dispela kirap bek bai kamap long bihain, na em i no samting bai kamap bihain stret long taim ol i dai. Taim Pol i raitim 1 Korin, sampela disaipel i bin “dai pinis,” olsem aposel Jems. (Apo. 12:1, 2) Na ol narapela aposel na ol man God i bin makim ol, bihain ol tu bai “dai.”—1 Kor. 15:6.

13. Wanem ol samting bai kamap na i soim olsem Jisas i kam i stap?

¹³ Jisas na Pol i bin tok profet long wanpela spesel haptaim bai kamap bihain, dispela em haptaim bilong Krais i kam i stap. Dispela haptaim bai i gat ol woa, ol bikpela guria, ol bikpela sik, na ol narapela bikpela hevi i kamap long graun. Kirap long yia 1914 na i kam, yumi lukim truim bilong dispela tok profet bilong Baibel. Tasol i gat narapela bikpela mak bilong dispela haptaim. Jisas i tok ol manmeri bai autim gutnius olsem Kingdom Bilong God i kirap pinis long mekim wok, na ol bai autim dispela gutnius “long olgeta hap bilong graun na bai olgeta lain man i ken harim, na bihain long dispela, pinis bai kamap.” (Mat. 24:3, 7-14) Pol i tok “taim Bikpela i kam i stap,” kirap long dispela taim ol Kristen God i bin makim em ol i “dai pinis,” ol bai kirap bek na kisim laip long heven.—1 Tes. 4:14-16; 1 Kor. 15:23.

14. Wanem samting bai painim ol Kristen em God i bin makim em ol i dai long haptaim em Krais i kam i stap?

¹⁴ Long nau, ol Kristen em God i bin makim ol na ol i stap gut long God i go inap long taim ol i dai, ol bai kirap bek wantu tasol na kisim laip long heven. Pol i strongim dispela tok long 1 Korin 15:51, 52 olsem: “I no olgeta bilong yumi bai dai, tasol yumi olgeta bai senis wantu tasol, olsem man i blinkim ai, long taim laspela trampet i krai.” Dispela tok bilong Pol i wok long kamap tru long nau! Taim ol dispela brata bilong Krais i kirap bek ol bai kisim bikpela amamas; “oltaim [ol] bai stap wantaim Bikpela.”—1 Tes. 4:17.

15. Ol man em ol i senis wantu tasol “olsem man i blinkim ai,” ol bai mekim wanem wok?

¹⁵ Ol man em ol i senis wantu tasol “olsem man i blinkim ai,” Baibel i tokim yumi long wok ol bai mekim long heven. Jisas i tokim ol: “Man husat i winim pait na i mekim ol samting olsem mi save mekim i go inap long pinis, mi bai givim em namba long bosim ol manmeri bilong graun, na em bai bosim ol manmeri wantaim stik ain na brukim ol i go liklik liklik olsem sospen graun i bruk. Dispela namba i wankain olsem mi bin kisim long Papa bilong mi.” (Rev. 2:26, 27) Ol bai bihainim Komanda bilong ol na mekim ol wok ol i mas mekim—em long bosim ol manmeri wantaim stik ain.—Rev. 19:11-15.

16. Ol Kristen God i bin makim na ol man i stap gut long Jehova, hau bai ol inap daunim strong bilong dai?

¹⁶ Tru tumas, ol Kristen em God i bin makim, ol bai daunim strong bilong dai. (1 Kor. 15:54-57) Taim ol i kirap bek, ol bai helpim wok bilong pinisim pasin nogut long olgeta hap bilong graun long pait bilong Armagedon. Planti narapela milion man na meri Kristen bai “winim dispela traipela hevi tru” na ol bai go insait long nupela taim. (Rev. 7:14) Dispela ol lain i abrusim bagarap na stap laip long graun, ol bai stap olsem aiwitnes bilong narapela kirap bek—em kirap bek bilong planti bilion manmeri husat i bin dai long bipo. Tingim bikpela amamas yumi bai pilim taim dispela samting i kamap! (Apo. 24:15) Na olgeta manmeri i stap gut long Jehova, ol bai i no inap dai moa—dai em samting yumi kisim long rot bilong Adam. Ol bai stap laip oltaim.

17. Taim yumi tingim tok bilong 1 Korin 15:58, yumi mas mekim wanem long nau?

¹⁷ Olgeta Kristen long nau i ken amamas tru long gutpela tok em Pol i bin mekim long ol Kristen long Korin long bilip bilong kirap bek. I gat planti gutpela risen na yumi ken bihainim tok bilong Pol long bisi tru long “mekim planti wok bilong Bikpela.” (Ritim 1 Korin 15:58.) Sapos yumi stap gut long God na mekim dispela wok, yumi tu bai insait long ol gutpela blesing bai kamap bihain. Laip bilong yumi long bihain bai gutpela tru winim ol samting yumi bin tingting long en. Dispela bai kamapim klia olsem hatwok bilong yumi long mekim wok bilong Bikpela i no lus nating.