Yu Save Lukim Skin Tasol Bilong Man?
WANPELA yangpela man nem bilong em Hains (Heinz) i birua long waspapa bilong em na em i tingting long kilim em i dai, tasol em i pret long mekim. Sampela yia bihain em i tingting long kilim i dai skin bilong em yet, tasol em i pret long mekim dispela tu. Em i insait long pasin bilong stil, na em i brukim lo na wok bisnis long drak, na em i go kalabus. Bihain marit bilong em i bagarap.
Nau Hains i lukim pasin bilong kisim drak. Em i mekim wok mani bilong lukautim em yet wantaim famili bilong em. Marit bilong em i kamap gutpela na em i pas gut wantaim waspapa bilong em. Wanem samting i senisim pasin bilong em? Em i kirap long lainim tok bilong Baibel wantaim ol Witnes Bilong Jehova. Isi isi em i senisim pasin bilong em.
Planti manmeri i bin save long Hains long bipo ol i ting em i no inap tru long senisim pasin bilong em. Tasol God i no ting olsem. Em i save Hains na ol narapela manmeri wankain olsem em, ol inap tanim bel na bai em i kisim bek ol. Long wanem: “Ol man i save lukluk long bodi. Tasol [God i] save lukim tingting na laik bilong man na [em i] skelim ol.”—1 Samuel 16:7.
Long dispela samting tingting bilong God na ol man i narapela narapela kain. Yumi save skelim skin tasol bilong man. Yumi save tok, ‘tingting yumi kisim long man taim yumi lukim em long namba wan taim, em yumi save holim oltaim.’ Yumi save lukim skin bilong man na skelim em, em i gutpela man o nogat. Tasol God em inap skelim bel bilong man, olsem na em i skelim stret man na em i no tingim nem o lain bilong em. Olsem na God i bin salim pikinini bilong em, Krais Jisas, i kam long raun bilong “kisim bek olgeta manmeri, bai ol i ken save long as bilong tok tru.” (1 Timoti 2:4) Long dispela rot, ol Kristen i dediket pinis ol inap kamap “wanwok bilong God” taim ol i wok strong long autim gutnius bilong Kingdom long olgeta manmeri. (1 Korin 3:9) Tasol ol Kristen i sot long sampela save—ol i no inap skelim bel bilong man. Olsem na ol i mas was gut na ol i no ken tingim nem o lain bilong man na ol i mas abrusim pasin bilong lukim skin tasol bilong man.
Brata bilong Jisas, em Jems, em i save dispela pasin inap bagarapim ol kongrigesen Kristen bilong pastaim. Em i tok: “Ol brata bilong mi, yupela i bilip long Bikpela bilong yumi Jisas Krais, em Bikpela bilong ol gutpela samting bilong heven. Olsem na nogut yupela i wok long mekim gut long ol man i gat nem, na yupela i givim baksait long ol man nating. Sapos wanpela man em i bilas gut tru na em i gat ring gol long pinga bilong en, em i go insait long haus lotu bilong yupela. Na sapos wanpela rabisman, bilas bilong en i bruk bruk nabaut na i nogut tasol, em tu i go insait long haus lotu. Orait ating yupela bai i mekim gut long man i bilas gut tru . . . Yupela i kamap olsem jas i skelim ol man long tingting nogut tasol.” Olsem wanem? Sampela taim yumi mekim kain pasin olsem na yumi no skelim gut ol man i kam long Haus Kingdom long namba wan taim?—Jems 2:1-4.
Jisas Em i Gutpela Piksa
Jisas em i no lukim ol manmeri i olsem sinman na ol i no inap tanim bel na bai em i kisim bek ol. Nogat. Em i ting olsem ating ol i laik long tanim bel na senisim pasin sapos ol i kisim ol gutpela helpim bilong kirapim bel bilong ol. Olsem na em “i bin givim laip bilong em yet bilong baim bek olgeta manmeri.” (1 Timoti 2:6) Taim em i autim tok, em i tingim gut olgeta man i gat gutpela bel; em i no tingim wanpela i samting nating o i man nogut. Pasin bilong em long skelim ol manmeri i kamapim long ples klia em i no hambak na ting em i winim ol narapela man long stretpela pasin.—Luk 5:12, 13.
Em i no wankain olsem ol Farisi, em Baibel i stori long ol na i tok: “Na sampela saveman bilong lo, ol i man bilong lain Farisi, ol i lukim Jisas i kaikai wantaim ol dispela man bilong mekim sin na ol man bilong kisim takis. Na ol i askim ol disaipel bilong Jisas olsem, ‘Watpo em i save kaikai wantaim ol man bilong kisim takis na ol man bilong mekim sin?’ Jisas i harim dispela tok, na em i tokim ol dispela saveman olsem, ‘Ol man i no gat sik i no save go long dokta. Nogat. Ol sikman tasol i save go long dokta. Olsem tasol, mi no kam bilong singautim ol stretpela man. Nogat. Mi kam bilong singautim ol man bilong mekim sin.’ ”—Mak 2:16, 17.
Dispela i no soim olsem Jisas i orait long rong bilong ol dispela lain. Tasol em i save, ol man inap kirap nating na bihainim rot nogut, long wanem ol i no save em i rot nogut o sampela samting ol i no inap bosim i subim ol long bihainim. Em i pilim hevi bilong ol, olsem na em i “sori tru long ol, long wanem, ol i olsem ol sipsip i no gat wasman.” (Mak 6:34) Em i sori long ol, olsem na em i no tingim pasin nogut ol i mekim; em i tingim bel bilong ol, ating ol i gat gutpela bel.
Taim Jisas i wok wantaim ol disaipel bilong em, em i no lukim skin tasol bilong ol. Ol i sinman na planti taim ol i save popaia, tasol Jisas i no ting em yet i stretpela man na olgeta taim em i kotim ol long ol liklik rong bilong ol. Em i save ol i laik bihainim gutpela pasin, o yumi ken tok, bel bilong ol i gutpela. Tasol ol i mas i gat samting bilong helpim ol na bilong strongim ol gutpela laik long bel bilong ol. Jisas i save mekim planti samting bilong helpim na strongim ol olsem. Em i bihainim pasin bilong God na em i no lukim skin tasol bilong man; em i save lukim bel bilong man, olsem ol laik na tingting bilong em. Olsem wanem? Yumi wok long bihainim dispela gutpela pasin bilong em?
Yu Save “Skelim Olgeta Samting long Pasin i Stret”?
Wanpela taim wanpela lain ol i ting ol i stretpela man ol i bungim Jisas na toktok planti, long wanem em i wokim mirakel long de Sabat. Em i tok: “Yupela i no skelim ol samting long ai nating. Yupela i mas skelim olgeta samting long pasin i stret.” Bilong wanem ol i no amamas taim ol i lukim Jisas em man bilong wokim mirakel na em i “mekim orait” wanpela man? Bilong wanem ol i “belhat” long em na tingim em i man bilong brukim lo bilong Sabat? Long wanem ol i skelim samting long ai nating na dispela i kamapim tingting nogut bilong ol. Ol i ting ol yet i stretpela man na ol i no skelim man long pasin i stret.—Jon 7:23, 24.
Olsem wanem yumi inap popaia olsem? Taim wanpela man i tanim bel na kam bek long kongrigesen o wanpela ausaitman i wok long lainim tok i tru na kamap strong long ol samting bilong spirit, sapos yumi no amamas long dispela samting, orait yumi no skelim ol samting long pasin i stret. Sampela taim ating yumi lukim ol narapela kain klos o bilas man i pasim na yumi ting em i no inap long kamap wanpela Witnes. Tasol planti ol man em bipo ol i putim ol kain kain klos na bilas nogut na sampela ol i bihainim pasin bilong graun ol i bin kamap Witnes Kristen Bilong Jehova. Taim kain man olsem i wok long senisim pasin bilong em, yumi no ken “skelim ol samting long ai nating,” na bai yumi no tingim gutpela laik na tingting i stap long bel bilong em.
Gutpela sapos yumi bihainim gutpela pasin Jisas i makim, em yumi ken beten askim God long helpim ol, na yumi ken helpim ol long kamap strongpela Kristen. Ating yumi hatwok long lukim sampela gutpela samting long ol em yumi ken amamas long en. Tasol sapos Jehova i pulim ol i go klostu long em long rot bilong Krais, yumi husat na bai yumi givim baksait long ol na skelim ol long tingting bilong yumi yet? (Jon 6:44) Sapos yumi ting yumi stretpela man na yumi skelim wanpela man, na yumi no save long bel bilong em o ol hevi bilong em, ating bai yumi tok em i man nogut. Yumi no ken mekim pasin olsem, nogut God i mekim wankain pasin long yumi na em i tok, yumi man nogut.—Lukim Matyu 7:1-5.
Yumi ken helpim na strongim ol nupela man na soim gutpela pasin ol i ken bihainim, na yumi no ken mekim hatpela pasin long ol. Yumi mas mekim gutpela pasin long ol nupela manmeri, tasol yumi no ken litimapim nem bilong man em i gat nem long dispela graun. Em olsem yumi tingim nem o lain bilong man. Na tu dispela pasin i mekim olsem yumi no strong long samting bilong spirit. Na olsem wanem long dispela man yet? Sapos yumi litimapim nem bilong em, yu ting dispela inap lainim em long mekim pasin daun? O dispela bai mekim na em i sem?—Wok Pris 19:15.
No Ken Putim Mak i Antap Winim Mak God i Putim
Tingting bilong yumi i sot. Yumi save skelim skin tasol bilong man, tasol Jehova inap skelim bel bilong man. (1 Stori 28:9) Sapos yumi save long dispela samting, dispela bai helpim yumi na yumi no ken kamap olsem ol Farisi, em ol i ting ol yet i stretpela man, na bai yumi no wok long subim ol man long bihainim ol tingting na pasin yumi yet yumi ting i stret. Sapos yumi skelim ol manmeri olsem God i save mekim, bai yumi no putim mak long ol i antap na i winim mak God i putim long ol. God i kolim pinis ol samting em i laik bai ol man i mas mekim na yumi no ken “kalapim dispela tok” bilong God. (1 Korin 4:6) Dispela em bikpela samting ol elda Kristen i mas tingim.—1 Pita 5:2, 3.
Bilong kamapim gut dispela samting, yumi ken stori long klos. Baibel i tok, na em lo bilong God, olsem Kristen i mas pasim klos i klin na i stret, em “ol gutpela klos samting, inap tasol long ol.” (1 Timoti 2:9; 3:2) Sampela yia i go pinis ol elda long wanpela kongrigesen i bin ‘kalapim tok bilong God,’ long wanem ol i bin tokim olgeta brata i mekim pablik-tok long putim waitpela siot tasol, maski ol man bilong dispela hap i orait long man i putim siot i gat kala. Taim brata bilong narapela kongrigesen i kam mekim tok, sapos em i pasim siot i gat kala, ol i save tokim em long senisim na putim waitpela siot, na ol i save putim sampela waitpela siot i stap long Haus Kingdom bilong kain taim olsem. Tru tumas, yumi mas was gut, nogut yumi strong long ol narapela man i mas bihainim laik bilong yumi! Tok bilong Pol i stret, em i tok: “Yupela i mas isi isi long olgeta man na larim ol i lukim dispela gutpela pasin bilong yupela.”—Filipai 4:5.
Ol Gutpela Samting Inap Kamap Sapos Yu No Lukim Skin Tasol
Sapos yumi save olsem yumi no inap lukim laik na tingting i stap long bel bilong ol manmeri, dispela bai helpim yumi long i stap gut wantaim ol narapela insait long kongrigesen na wantaim ol man ausait tu. Dispela bai helpim yumi long kisim stretpela tingting long ol narapela, na yumi no ken ting ol i gat tingting nogut long wanem “bipo yumi tu i no gat gutpela tingting na yumi save sakim tok. Satan i bin giamanim yumi na yumi no bin bihainim rot bilong God. I olsem yumi stap wokboi nating bilong ol kain kain pasin bilong bel i kirap na ol kain kain laik bilong bodi.” (Taitus 3:3) Sapos yumi tingim dispela samting, dispela bai helpim yumi long givim bel long autim tok long olgeta manmeri, maski long skin i olsem ol i no inap harim tok. Ol i laik harim tok i tru o nogat, em samting bilong ol. Wok bilong yumi em bilong autim tok long ol.
Planti Witnes Bilong Jehova, bipo ol olsem Hains, ol i amamas long ol brata sista long kongrigesen Kristen i bin sekanim ol na mekim gut long ol long namba wan taim ol i lukim ol, na ol i no bin skelim ol long ai tasol.
Tingim Frank, em i bin go long Haus Kingdom long wanpela Sande long hap bilong saut long Jemani. Ol manmeri long miting i lukim wanem kain man? Ol i lukim wanpela yangpela man i gat mausgras na longpela gras, ol klos bilong em i doti, planti man i save em i man bilong go long ol ba bilong dring spak na man bilong kaikai smok—em i no save lukautim pren meri bilong em na tupela pikinini bilong em, em meri i bin karim tupela wantaim. Tasol ol brata i mekim gutpela pasin long em long miting. Em i amamas tru na em i go bek long wik bihain. Nau ol i lukim wanem kain man? Ol i lukim wanpela yangpela man i klin na em i putim klos i klin. Long namba 3 wik ol i lukim dispela yangpela man i lusim pinis smok, na em i kisim pren meri na tupela pikinini bilong em i kam wantaim em. Long namba 4 Sande, ol i lukim dispela yangpela man na meri i bin rejistaim marit bilong tupela na nau tupela i marit stret. Long namba 5 Sande ol i lukim dispela yangpela man em i lusim pinis olgeta lotu giaman. Na inap olsem 4-pela yia bihain wanpela Witnes i tok, “dispela famili i bihainim gutpela pasin na taim yu lukim ol bai yu ting olsem ol i bin i stap brata sista bilong yumi inap planti yia pinis.”
Sapos yu lukim skin tasol bilong wanpela buk, yu no inap save em i gutpela buk o nogat, na i wankain sapos yu lukluk long ausait tasol bilong wanpela haus. Na olsem tasol, skin bilong wanpela man i no save kamapim ol gutpela pasin bilong em. Sapos ol Kristen i bihainim pasin bilong God long skelim man, bai ol i no lukim skin tasol bilong man na skelim em. God i save tingim ‘insait bilong bel’ na yumi ken amamas long dispela na tenkyu long em.—1 Pita 3:3, 4.