Skul Gileat i Salim Namba 100 Klas i Go

WASTAUA Baibel Skul Bilong Gileat i bin mekim bikpela wok bilong autim gutnius bilong Kingdom bilong God long olgeta hap long nau. Skul Gileat i bin kirap lainim ol misineri long 1943, na kirap long dispela taim i kam inap nau ol misineri i bin winim skul ol i mekim wok long planti kantri, winim 200. Long Mas 2, 1996, namba 100 klas i winim skul.

Winim 2-pela mita ais i bin pundaun long taim ol sumatin i bin skul long hap bilong Wastaua Edukesen Senta long Patesen, Nu Yok. Na ais i bin pundaun tu long de bilong bung bilong makim olsem ol sumatin i winim skul. Tasol ol manmeri i pulap tru long ples bung, na sampela manmeri moa i harim ol tok bilong program long Pateson na Walkil na Bruklin​—⁠inap 2,878 manmeri olgeta.

Theodore Jaracz bilong Komiti Bilong Wok Tisa bilong Lain Bilong Bosim Ol Witnes, em i mekim wok siaman. Em i tok amamas long ol manmeri i kam long planti kantri, na em i singautim ol long sanap na mekim singsing namba 52. Ol manmeri i sindaun bilong harim tok, ol i givim bel long singsing bilong litimapim nem bilong Jehova taim ol i mekim singsing “Nem Bilong Papa Bilong Yumi,” bilong buk singsing Mekim Singsing Long Jehova. Dispela singsing, na ol tok bilong siaman long yumi mas mekim wok long skul yumi kisim bilong litimapim nem bilong Jehova, i olsem as bilong ol tok bilong program i kamap bihain.

Sampela Tok Bilong Baibel

Long namba wan hap bilong program sampela wokman bilong Jehova bilong longtaim ol i mekim sampela sotpela tok i go long ol sumatin i winim skul. Richard Abrahamson, em wanpela brata i wok long nambawan ofis na em i bin kirap long 1940 long mekim wok bilong Jehova long olgeta taim, em i tokim klas olsem: “Wok Yet Long Stretim Tingting.” Em i bin tokim ol, kirap long taim ol i kamap Kristen i kam inap nau ol i bin stretim sampela tingting bilong ol long sampela taim, na long 5-pela mun bilong skul long Gileat tu. Olsem na i gat wanem as na ol i mas wok yet long stretim tingting bilong ol?

Brata i tok, insait bilong dispela hap tok em aposel Pol i kolim long 2 Korin 13:11 [NW] em olsem “wok yet long mekim ol samting, long olgeta taim larim Jehova i stretim yumi bilong kamap klin, harim gut olgeta tok, bambai yumi inap bihainim gut olgeta tok bilong Jehova.” Long ol longwe kantri ol sumatin i winim skul bai go long en, ol nupela traim na hevi bai painim ol bilong traim bilip bilong ol. Ol i mas lain long wanpela nupela tok ples, na lain long ol narapela kain pasin na sindaun, na lain long mekim wok autim tok long narapela narapela kain ples. Na long haus misineri na long nupela kongrigesen bilong ol, bai ol i sindaun na wok wantaim ol man i gat ol narapela narapela pasin. Sapos ol i bihainim gut ol tok bilong Baibel long ol dispela samting, na ol i givim bel long stretim tingting bilong ol, bai ol i “wok yet long amamas [NW],” olsem aposel Pol i tok.

John Barr, em wanpela bilong ol 5-pela brata bilong Lain Bilong Bosim Ol Witnes ol i mekim tok long program, em i kisim nem bilong tok bilong em long 1 Korin 4:⁠9. Em i tokim ol manmeri olsem ol Kristen i stap long ai bilong ol ensel na ol man. Em i tok: “Sapos Kristen i tingim dispela samting em bai save, pasin em i mekim olsem Kristen em i bikpela samting, long wanem, ol samting em i toktok long en na ol samting em i mekim, em inap mekim ol samting long ol man i lukim em, ol man bilong graun na ol ensel tu. Mi ting em i bikpela samting long yupela ol brata sista long namba 100 klas bilong Gileat i mas tingim dispela samting taim yupela i go long ol longwe kantri long olgeta hap bilong graun.”

Brata Barr i tokim ol 48 sumatin long ol i mas save, taim ol i helpim ol man i olsem sipsip long kisim save long tok i tru, “amamas i save kamap namel long ol ensel bilong God taim wanpela man bilong mekim sin em i tanim bel.” (Luk 15:⁠10) Em i stori long 1 Korin 11:​10, na em i kamapim olsem tingting bilong yumi long ol lo bilong Jehova inap mekim sampela samting long ol brata na sista bilong yumi em yumi inap lukim, na dispela inap mekim sampela samting tu long ol ensel em yumi no inap lukim. I gutpela yumi mas tingim dispela samting!

Narapela brata bilong Lain Bilong Bosim Ol Witnes, em Gerrit Lösch, bipo em tu i wanpela sumatin bilong Skul Gileat, em i toktok long sampela skripsa olsem Song 125:​1, 2; Sekaraia 2:​4, 5; na Song 71:21 bilong kamapim olsem Jehova i banisim na “lukautim ol manmeri bilong en.” Olsem wanem? God bai lukautim yumi long taim bilong bikpela hevi tasol? Brata Lösch i tok: “Nogat! Long wanem, Jehova em i kamap pinis olsem ‘banis’ bilong lukautim ol manmeri bilong em. Long yia 1919 lain remnan bilong Israel bilong spirit i gat strongpela laik bilong autim gutnius bilong Kingdom long olgeta hap na bai olgeta lain manmeri i ken harim. Ol i bin stap olsem maus bilong Jerusalem bilong heven. Jehova i tok promis pinis em bai banisim dispela lain na lukautim long taim bilong pinis. Olsem na i no gat wanpela man inap pasim ol.” Dispela i strongim tru bel bilong dispela lain na i strongim tu olgeta manmeri ol i wok wantaim ol long mekim wok bilong God!

Ulysses Glass, em i wanpela tisa bilong Skul Gileat inap longtaim pinis, em i kirapim ol sumatin long ‘inapim gut dispela wok ol i kisim insait long oganaisesen bilong Jehova.’ Dispela wok ol i kisim i stret long save na pasin bilong ol. Em i tok: “Yupela misineri i painim pinis wanpela wok yupela inap mekim insait long oganaisesen bilong Jehova. Em gutpela wok tru, tasol nau yupela i kirap tasol long mekim wok olsem misineri.” Olsem na ol i mas wok strong long mekim wok long save bilong ol bambai ol i ken inapim gut dispela bikpela wok Jehova na oganaisesen bilong em i givim long ol.

Wallace Liverance, em i wanpela tisa bilong Skul Gileat na em i bin mekim wok misineri long Bolivia inap 17 yia, em i mekim laspela tok bilong dispela hap bilong program. Em i askim ol sumatin: “Bai yupela i traim strong bilong God?” Olsem wanem ol inap mekim? Lain Israel i no bihainim stretpela pasin long traim strong bilong God. (Lo 6:16) Brata Liverance i tok: “Olsem na yumi save, i no stret long traim strong bilong God long rot bilong toktok planti o yupela i no bilip strong olsem Jehova i bihainim stretpela pasin bilong mekim ol samting. Taim yupela i kamap long nupela ples wok bilong yupela, sakim dispela pasin nogut.” Tasol wanem pasin i stret long traim strong bilong God? Brata Liverance i tok: “Yupela i mas bilip na bihainim stret olgeta tok bilong God, na putim hevi bilong yupela long han bilong em bambai em i ken helpim yupela.” Olsem yumi lukim long Malakai 3:​10 [NW], Jehova i singautim lain bilong em na i tok: “Traim mi.” Em i bin tok promis long ol olsem sapos long olgeta taim ol i bringim namba ten hap i kam long haus bilong em, em bai blesim ol. Brata i tok: “Gutpela yu gat wankain tingting long wok misineri bilong yu. Jehova i laik bai yu mekim gut wok misineri, olsem na yu ken traim em. No ken lusim ples wok bilong yu. Stretim sampela pasin na tingting bilong yu em God i laik bai yu stretim. Sanap strong. Na bai yu lukim, em bai blesim yu.” Em gutpela tok tru bilong helpim olgeta manmeri i mekim wok bilong Jehova!

Ol i mekim wanpela singsing, na bihain program i senis. Nau ol i toktok wantaim sampela misineri.

Sampela Gutpela Stori Long Wok Bilong Autim Tok

Mark Noumair, em wanpela nupela tisa bilong Skul Gileat, em i tokim ol sumatin long kamapim sampela stori bilong taim ol i bin autim tok long taim bilong skul. Ol dispela stori i kamapim olsem em i bikpela samting long ol yet i mas kirap long painim kain kain rot bilong autim tok long ol man, na ol stori bilong ol i givim sampela gutpela tingting long ol manmeri i sindaun na harim tok bilong ol.

Long taim bilong skul, ol sumatin bilong dispela klas bilong Gileat i amamas long bung wantaim ol brata bilong ol Komiti Bilong Brens bilong 42 kantri, em ol i bin stap long Edukesen Senta long Patesen bilong kisim sampela skul. Planti bilong ol i bin stap long Skul Gileat bipo. Long taim bilong program ol i bin toktok wantaim sampela bilong klas namba 3 na 5 na 51 na 92, na bilong Skul Gileat i bin kamap long Jemani. Man! Ol tok bilong ol i helpim gut ol brata!

Ol i stori long amamas bilong ol misineri taim ol i lukim ol manmeri i litimapim nem bilong Jehova ol i kamap planti long ples wok bilong ol, olsem pastaim ol i liklik lain tasol na bihain ol i kamap planti tausen. Ol i stori long wok ol i mekim bilong kisim gutnius i go long ol haus i stap longwe longwe long hap bilong ol maunten Andis na long ol liklik ples long hap bilong het bilong wara Amason. Ol i stori long wok bilong autim tok long ol man i no save long rit rait. Ol i stori long hatwok bilong ol yet long lain long nupela tok ples na ol sumatin i ken ting ol i mas lain inap hamas mun samting pastaim na bai ol inap autim tok na mekim ol pablik-tok samting long ol tok ples olsem tok Saina. Na ol i mekim sampela soim bilong autim tok long tok ples Spen na Saina. Ol i kamapim klia olsem ol misineri inap mekim gutpela wok tru sapos ol i no lain long tok ples tasol bilong ol man, tasol ol i lain tu long tingting bilong ol man. Ol i stori olsem: Long planti kantri i stap rabis sindaun bilong ol man i nogut, na ol i tok: “Ol misineri i mas save, planti man i stap olsem, long wanem, ol man i bin mekim nogut long ol. Olsem na i gutpela sapos ol misineri i gat wankain tingting olsem Jisas​—⁠em i sori long ol man ol i bin stap olsem sipsip i no gat wasman.”

Ol i mekim wanpela singsing na nau A. D. Schroeder, em bilong Lain Bilong Bosim Ol Witnes, em i mekim wanpela tok. Em i wanpela tisa bilong Skul Gileat taim skul i kirap long 1943. Em i mekim gutpela tok bilong pinisim program, nem bilong en “Litimapim Nem Bilong Jehova Olsem Nambawan Bikpela King.” Brata Schroeder i mekim gutpela tok long Song 24, na tok i kamapim klia long olgeta manmeri i harim tok olsem em i gutpela samting tru long ol inap litimapim nem bilong Jehova olsem Nambawan Bikpela King.

Ol sumatin i kisim pepa o setifiket bilong skul na ol i mekim laspela singsing, na bihain Karl Klein bilong Lain Bilong Bosim Ol Witnes i mekim beten bilong pinisim program. Em gutpela program tru na i strongim bel bilong ol manmeri i harim!

Long ol de bihain long bung bilong makim namba 100 klas i winim skul, ol 48 misineri i go long ol nupela ples wok bilong ol long 17 kantri. Tasol i no olsem nau tasol ol i kirap mekim wok bilong autim tok, nogat. Inap planti yia pinis ol i mekim dispela wok Kristen long olgeta de. Taim ol i go insait long Skul Gileat, ol sumatin i gat olsem 33 krismas na ol i mekim dispela wok long olgeta de inap 12-pela yia samting. Sampela bilong ol i bin wok long ol haus Betel bilong Sosaiti Was Taua. Na sampela i bin mekim wok olsem wasman bilong raun. Sampela sumatin i bin mekim wok long sampela longwe kantri long Afrika, Yurop, Saut Amerika, ol ailan bilong solwara, na ol i bin autim tok long ol lain man i gat narapela tok ples na ol i stap long kantri bilong ol. Tasol nau bai ol inap bungim nek bilong ol wantaim ol planti narapela misineri na tok: ‘Bai mipela i mekim wok bilong God long wanem wanem hap bilong graun i gat bikpela wok i stap.’ Ol i gat strongpela laik long litimapim nem bilong Jehova.

[Blok long pes 27]

Ol Samting Bilong Ol Sumatin:

Hamas kantri ol i kam long en: 8

Hamas kantri ol bai go long en: 17

Hamas sumatin: 48

Krismas bilong ol, averes: 33.75

Hamas yia long tok i tru, averes: 17.31

Hamas yia long wok painia, averes: 12.06

[Piksa long pes 26]

Namba 100 Klas Bilong Wastaua Baibel Skul Bilong Gileat

Nem bilong ol brata sista i stap daunbilo. Namba wan lain i sanap paslain, na namba 6 lain i sanap baksait tru. Taim yu kaunim nem bilong ol na lukim pes bilong ol, kirap long han kais na i go long han sut.

(1) Shirley, M.; Grundström, M.; Genardini, D.; Giaimo, J.; Shood, W.; Phair, P.; Buchanan, C.; Robinson, D. (2) Pine, C.; Kraus, B.; Racicot, T.; Hansen, A.; Beets, T.; Berg, J.; Garcia, N.; Fleming, K. (3) Whinery L.; Whinery, L.; Harps, C.; Giaimo, C.; Berg, T.; Mann, C.; Berrios, V.; Pfeifer, C. (4) Randall, L.; Genardini, S.; Kraus, H.; Fleming, R.; D’Abadie, S.; Shirley, T.; Stevenson, G.; Buchanan, B. (5) Robinson, T.; Garcia, J.; Harps, P.; Racicot, D.; D’Abadie, F.; Phair, M.; Stevenson, G.; Shood, D. (6) Beets, L.; Pfeifer, A.; Berrios, M.; Pine, J.; Mann, L.; Randall, P.; Grundström, J.; Hansen, G.