Husat Ol i Wokman Bilong God Long Nau?
“God wanpela tasol i save mekim mipela inap long dispela wok. Na em yet i bin mekim mipela inap long i stap wokman bilong nupela kontrak.”—2 KORIN 3:5, 6.
1, 2. Olgeta Kristen long taim bilong ol aposel ol i gat wanem wok ol i mas mekim? Wanem senis i kamap?
LONG taim bilong ol aposel, olgeta Kristen i insait long wanpela bikpela wok—ol i gat wok bilong autim gutnius. Olgeta dispela Kristen, God i bin makim ol long spirit holi na ol i wokman bilong nupela kontrak. Sampela ol i gat sampela wok moa ol i mas mekim, olsem mekim wok tisa insait long kongrigesen. (1 Korin 12:27-29; Efesus 4:11) Ol papamama i gat ol bikpela wok ol mas mekim insait long famili. (Kolosi 3:18-21) Tasol olgeta ol i insait long dispela bikpela wok bilong autim tok. Long tok Grik ol i raitim Ol Skripsa Kristen long en, dispela wok em i wanpela wok bilong helpim ol man, olsem di·a·ko·niʹa.—Kolosi 4:17.
2 Bihain, senis i kamap. Wanpela lain pris pasto i kamap, em ol i makim ol yet tasol bilong holim dispela wok bilong autim tok. (Aposel 20:30) Long ol man i tok ol i Kristen, wan wan tasol i insait long dispela lain pris pasto. Planti ol i stap olsem man nating bilong lotu. Tru, dispela lain nating bilong lotu i bin skul olsem i gat sampela wok ol i mas mekim, olsem givim mani bilong lukautim ol pris pasto long ol samting bilong skin, tasol ol yet i no save autim tok—planti i stap olsem man bilong harim tasol ol tok.
3, 4. (a) Ol man insait long Kristendom ol i kamap wokman bilong lotu olsem wanem? (b) Insait long Kristendom, ol i tingim husat ol i wokman bilong lotu? Bilong wanem ol samting i narapela kain insait long lain Witnes Bilong Jehova?
3 Ol pris pasto i tok ol i wokman (di·aʹko·nos, “wokboi”) bilong God.a Bilong kamap wokman olsem, ol i save go long ol skul bilong lainim ol man long kamap pris o pasto na ol i kisim namba i makim ol long mekim dispela wok. Wanpela buk (The International Standard Bible Encyclopedia) i tok: ‘Long rot bilong sampela bilaspasin bilong lotu, ol pris na pasto i kisim namba long autim tok bilong Baibel o mekim ol sakramen, o tupela wok wantaim.’ Husat i makim ol long kamap wokman bilong lotu? Wanpela buk (The New Encyclopædia Britannica) i tok: ‘Long ol misin i gat bisop, bisop tasol i gat namba long makim man long kamap wokman bilong lotu. Long misin Presbitirian, ol lain elda i mekim.’
4 Olsem na long ol lotu bilong Kristendom, wan wan man tasol i holim wok olsem wokman bilong lotu. Tasol insait long lain Witnes Bilong Jehova i no olsem. Bilong wanem? Long wanem, long lain Kristen long taim bilong ol aposel, olgeta man i stap wokman bilong God.
Husat Ol i Wokman Tru Bilong God?
5. Olsem Baibel i tok, husat i holim wok olsem wokman bilong God?
5 Olsem Baibel i tok, olgeta man i lotuim Jehova—maski ol i stap long heven o graun—ol i wokman bilong God. Ol ensel i bin mekim wok bilong helpim Jisas. (Matyu 4:11; 26:53; Luk 22:43) Na ol ensel i save ‘helpim ol man God i laik kisim bek ol.’ (Hibru 1:14; Matyu 18:10) Jisas em i wanpela wokman bilong helpim ol man. Em i tok: “Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol.” (Matyu 20:28; Rom 15:8) Ol man i bihainim Jisas ol i mas ‘bihainim pasin bilong em,’ olsem na ol tu i mas stap wokman bilong helpim ol man.—1 Pita 2:21.
6. Wanem tok bilong Jisas i makim olsem ol disaipel bilong em ol i mas i stap wokman?
6 Taim Jisas i laik go antap long heven, em i tokim ol disaipel bilong em: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” (Matyu 28:19, 20) Ol disaipel bilong Jisas i mas stap man bilong kamapim disaipel—olsem wokman bilong God. Ol nupela disaipel ol i kamapim ol bai lain long bihainim olgeta tok Jisas i givim long ol, na tu, dispela tok bilong go mekim ol man i kamap disaipel. Ol disaipel tru bilong Jisas, maski ol i man o meri, bikpela man pinis o pikinini, ol i mas stap wokman bilong God.b—Joel 2:28, 29.
7, 8. (a) Wanem ol skripsa i soim olsem olgeta Kristen tru ol i wokman bilong God? (b) Wanem ol askim i kamap long pasin bilong kamap wokman bilong God?
7 Stret wantaim dispela tok, olgeta disaipel bilong Jisas em ol i bung i stap long de Pentikos bilong yia 33 C.E., ol man na meri, olgeta i autim tok bilong “ol strongpela wok bilong God.” (Aposel 2:1-11) Na aposel Pol i tok: “Long bel yumi save bilip na God i kolim yumi stretpela manmeri. Na long maus yumi save autim bilip bilong yumi na God i kisim bek yumi.” (Rom 10:10) Pol i no givim dispela tok long wanpela lain pris pasto, nogat. Dispela tok i go long olgeta man long ‘Rom, em God i bin singautim ol na ol i stap lain manmeri bilong em.’ (Rom 1:1, 7) Olgeta “manmeri bilong God i stap long taun Efesus na i bihainim tru Krais Jisas,” ol tu i mas ‘redi long autim gutnius bilong God, na putim dispela pasin olsem su bilong ol.’ (Efesus 1:1; 6:15) Na olgeta man i harim ol tok bilong pas i go long ol Hibru, ol i mas ‘tokaut long bilip bilong ol na long ol gutpela samting ol i wetim i stap, na ol i no ken pret na surik.’—Hibru 10:23.
8 Tasol man i kamap wokman bilong God long wanem taim? O yumi ken tok, wanem taim em i kisim namba long kamap wokman bilong God? Na husat i givim dispela namba long em?
Kamap Wokman—Wanem Taim?
9. Wanem taim Jisas i kisim namba bilong kamap wokman bilong God? Husat i givim dispela namba long em?
9 Orait yumi laik save, wanem taim man i kisim namba long kamap wokman bilong God na husat i givim dispela namba long em? Bilong bekim dispela askim, yumi ken tingim Jisas Krais. Em i no bin winim bikpela skul bilong lotu o kisim setifiket i tokaut olsem em i wanpela wokman bilong God, na i no gat wanpela man long graun i bin givim namba long em long mekim dispela wok. Olsem na i gat wanem as na yumi ken tok em i wanpela wokman tru bilong God? Yumi ken tok olsem, long wanem, tok bilong Aisaia i bin kamap tru long em: “Spirit bilong Bikpela i kam i stap long mi, long wanem, Bikpela yet i kapsaitim wel long het bilong mi bilong makim mi bilong i go [autim] gutpela tok.” (Luk 4:17-19; Aisaia 61:1) Dispela tok i makim olsem Jisas i bin kisim wok bilong autim gutnius. Husat i bin givim dispela wok long em? Spirit bilong Jehova i bin makim em bilong mekim dispela wok, olsem na yumi ken save God Jehova yet i bin givim dispela namba long em long stap wokman. Dispela samting i bin kamap long wanem taim? Spirit bilong Jehova i kam long Jisas taim em i kisim baptais. (Luk 3:21, 22) Olsem na taim em i kisim baptais, em i kisim namba bilong kamap wokman bilong God.
10. Husat em inapim ol wokman Kristen bilong God long holim dispela wok?
10 Olsem wanem long ol disaipel bilong Jisas long taim bilong ol aposel? Namba ol i holim bilong mekim wok bilong God, dispela tu i kam long Jehova. Pol i tok: “God wanpela tasol i save mekim mipela inap long dispela wok. Na em yet i bin mekim mipela inap long i stap wokman bilong nupela kontrak.” (2 Korin 3:5, 6) Ol man i lotuim Jehova, olsem wanem em inapim ol long holim wok olsem wokman bilong em? Tingim Timoti, em Pol i tok em i “wokman bilong God bilong autim gutnius bilong Krais.”—1 Tesalonaika 3:2.
11, 12. Wanem sampela samting i helpim Timoti long kamap wokman bilong God?
11 Ol tok i go long Timoti i helpim yumi long save long ol samting i mekim na em i kamap wanpela wokman bilong God. Pol i tokim em: “Yu mas holim strong dispela tok yu bin kisim na yu save bilip strong long en. Yu save gut long mipela ol manmeri i bin skulim yu long dispela tok. Na yu save, taim yu bin i stap liklik pikinini yet, yu stat long kisim save long ol buk i gat tok bilong God. Dispela ol buk ol inap long givim gutpela tingting long yu, na bai yu bilip long Krais Jisas, na bai God i kisim bek yu.” (2 Timoti 3:14, 15) Save bilong Baibel em i as bilong bilip bilong Timoti, na dispela i bin kirapim em long autim tok long ol man. Bilong kisim dispela save, yu ting Timoti i gat wok long kaunim Baibel na em tasol? Nogat. I mas i gat man bilong helpim Timoti long kisim stretpela save na kisim gut ol tok em i kaunim. (Kolosi 1:9) Long dispela rot Timoti i “bilip strong.” Em i stat long kisim save long Baibel taim em i “liklik pikinini yet,” olsem na ol namba wan tisa bilong Timoti, em mama na bubu meri bilong em. Papa bilong em i no wanpela bilipman.—2 Timoti 1:5.
12 Tasol i gat sampela samting moa i helpim Timoti long kamap wokman bilong God. Wanpela samting i olsem: Taim em i bung wantaim ol Kristen bilong ol kongrigesen i stap klostu, dispela i strongim bilip bilong em. Olsem wanem yumi save olsem? Long wanem, namba wan taim Pol i bungim Timoti, “ol Kristen long Listra na Aikoniam ol i tok long pasin bilong em olsem, Timoti i gutpela man.” (Aposel 16:2) Na tu, long dispela taim bipo i gat sampela brata ol i save raitim pas i go long ol kongrigesen bilong strongim ol. Na ol wasman i save go lukim ol kongrigesen bilong strongim ol. Ol dispela samting i helpim ol Kristen olsem Timoti long kamap strong long ol samting bilong spirit.—Aposel 15:22-32; 1 Pita 1:1.
13. Wanem taim Timoti i kisim namba bilong kamap wokman bilong God? I gat wanem as na yumi ken tok em i wok long kamap strong moa long ol samting bilong spirit?
13 Yumi tingim tok bilong Jisas long Matyu 28:19, 20, na yumi ken save olsem bilip bilong Timoti i bin kirapim em long bihainim pasin bilong Jisas na kisim baptais. (Matyu 3:15-17; Hibru 10:5-9) Dispela baptais i makim olsem Timoti i dediket pinis long God long bel bilong em olgeta. Taim Timoti i kisim baptais, em i kamap wanpela wokman bilong God. Kirap long dispela taim, em i givim laip, na strong, na olgeta narapela samting bilong em long God. Dispela em i wanpela bikpela samting tru long lotu, olsem “wok bilong God,” em i mekim. Tasol Timoti i no malolo na amamas tasol long dispela namba em i holim, nogat. Em i wok long kamap strong moa long ol samting bilong spirit, na em i kamap wanpela strongpela wokman Kristen bilong God. Dispela samting i bin kamap, long wanem, Timoti i bin bung wantaim ol strongpela Kristen olsem Pol, na em i stadi, na em i givim bel long autim tok.—1 Timoti 4:14; 2 Timoti 2:2; Hibru 6:1.
14. Long nau, man em ‘bel bilong em i gutpela tru bilong kisim laip i stap gut oltaim,’ em i kamap wokman bilong God olsem wanem?
14 Long nau tu ol man i mas mekim wankain samting bilong holim wok Kristen. Long rot bilong Baibel-stadi, man em ‘bel bilong em i gutpela tru bilong kisim laip i stap gut oltaim,’ em i kisim save long God na long ol laik bilong em. (Aposel 13:48) Em i lain long bihainim ol lo bilong Baibel long i stap bilong em na em i beten long God na pilim tru long bel. (Song 1:1-3; Sindaun 2:1-9; 1 Tesalonaika 5:17, 18) Em i save bung wantaim ol wanbilip na em i mekim wok long ol samting em “wokboi i gat gutpela tingting” i putim. (Matyu 24:45-47; Sindaun 13:20; Hibru 10:23-25) Long rot bilong ol dispela skul, em i wok long kamap strong.
15. Wanem samting i kamap taim man i kisim baptais? (Lukim tu sta daunbilo long pes 19.)
15 Dispela man i stadi long Baibel em i kisim pasin bilong laikim tumas God Jehova na em i bilip strong long ofa bilong baim bek man, na bihain em i laik dediketim laip bilong em long Papa bilong em i stap long heven. (Jon 14:1) Em i mekim dispela dediket long rot bilong beten—olsem em wanpela i stap na i beten—na bihain em i kisim baptais bilong kamapim long ples klia em i dediket pinis. Taim em i kisim baptais, em i kisim mak olsem wokman bilong God, long wanem, taim em i kisim baptais, long dispela taim ol man i luksave olsem em i wanpela wokman, olsem wanpela di·aʹko·nos, bilong God i dediket pinis long em. Em i mas stap narapela kain long ol lain bilong dispela graun, na oltaim em i mas i stap olsem. (Jon 17:16; Jems 4:4) Em i bin givim em yet olgeta olsem “ofa i stap laip na i holi na God i save laikim,” na em i no pasim wanpela samting bilong em. (Rom 12:1, NW )c Em i wokman bilong God, na em i bihainim pasin bilong Krais.
Wok Kristen Em i Wanem Samting?
16. Wanem sampela wok Timoti i mekim olsem wanpela wokman bilong God?
16 Timoti i mekim wanem ol wok bilong God? Em i raun wantaim Pol, olsem na em i gat sampela bikpela wok em i mas mekim. Na taim Timoti i kamap elda, em i wok strong long skulim na strongim ol wanlain Kristen bilong em. Tasol nambawan bikpela wok bilong em, na bilong Jisas na Pol tu, em wok bilong autim gutnius na kamapim ol disaipel. (Matyu 4:23; 1 Korin 3:5) Pol i tokim Timoti: “Yu yet yu mas tingting klia oltaim. Yu mas karim ol hevi na pen. Yu mas mekim wok bilong autim gutnius long ol manmeri. Yu gat wok bilong helpim ol manmeri, na yu mas mekim tru dispela wok.”—2 Timoti 4:5.
17, 18. (a) Wanem wok bilong God ol Kristen i save mekim? (b) Wok autim tok em i bikpela wok olsem wanem long wokman Kristen bilong God?
17 Na i wankain tu long ol wokman Kristen bilong God long nau. Ol i mekim wok bilong autim gutnius long ol man—ol i tokim ol man olsem long rot bilong ofa bilong Jisas ol inap abrusim bagarap na stap laip, na ol i lainim ol man i gat pasin daun long singaut long nem bilong Jehova. (Aposel 2:21; 4:10-12; Rom 10:13) Ol i kamapim tok bilong Baibel bilong soim olsem Kingdom tasol inap pinisim hevi bilong ol man na sapos ol i bihainim ol lo bilong God, dispela inap helpim ol long nau tu. (Song 15:1-5; Mak 13:10) Tasol wokman Kristen bilong God i no save autim tok olsem ol man i mas mekim wok bilong stretim hevi bilong ol man, nogat. Em i lainim ol man olsem ‘pasin bilong God inap long helpim yumi long dispela laip nau yumi stap long en, na long laip yumi bai kisim bihain tu.’—1 Timoti 4:8.
18 Tru, planti wokman bilong God i gat sampela wok moa ol i mas mekim, na ating wok bilong ol narapela narapela Kristen i no wankain. Planti ol i gat wok insait long famili ol i mas mekim. (Efesus 5:21–6:4) Ol elda na ol wokman bilong kongrigesen ol i gat wok insait long kongrigesen ol i mas mekim. (1 Timoti 3:1, 12, 13; Taitus 1:5; Hibru 13:7) Planti Kristen ol i helpim wok bilong sanapim ol Haus Kingdom. Sampela ol i mekim gutpela wok olsem volantia long wanpela haus Betel bilong Sosaiti Was Taua. Tasol olgeta wokman Kristen bilong God i gat wok long autim gutnius. I no gat wanpela inap long abrusim dispela wok. Taim man i insait long dispela wok, dispela i kamapim long ples klia olsem em i wanpela wokman Kristen tru bilong God.
Tingting Bilong Wokman Kristen
19, 20. Ol wokman Kristen bilong God i mas wok long kisim wanem kain tingting?
19 Planti wokman, olsem pris pasto, bilong ol lotu bilong Kristendom i laik bai ol man i givim biknem long ol, na ol i save kisim ol bikpela nem bilong ol yet, olsem “pater” samting. Tasol ol wokman Kristen bilong God i save Jehova wanpela tasol em inap long yumi mas givim biknem long em. (1 Timoti 2:9, 10, NW ) Ol wokman Kristen bilong God i no laik antap long ol man o kisim ol bikpela nem, nogat. (Matyu 23:8-12) Ol i save olsem dispela tok di·a·ko·niʹa i makim “wok man i mekim bilong helpim narapela.” I gat wanpela tok i kain olsem dispela tok, em sampela taim Baibel i kolim bilong makim ol wok wanpela i mekim bilong helpim man, olsem wok weita em man i mekim long haus kaikai. (Luk 4:39; 17:8; Jon 2:5) Tasol taim Baibel i kolim dispela tok bilong makim wok Kristen, orait maski dispela tok i makim wanpela wok i gat nem, ol man olsem di·aʹko·nos ol i stap yet olsem wokman tasol.
20 Olsem na i no gat as na wokman Kristen bilong God i ken ting em i samting tru. Ol wokman Kristen tru—maski ol i gat bikpela wok long mekim insait long kongrigesen—ol i wokboi i mekim pasin daun. Jisas i tok: “Man i laik i stap bikman namel long yupela, em i mas i stap wokman bilong yupela. Na man i laik i stap namba wan bilong yupela, em i mas i stap olsem wokboi nating bilong yupela.” (Matyu 20:26, 27) Taim Jisas i laik soim ol disaipel bilong em long stretpela tingting ol i mas kisim, em i wasim lek bilong ol—em i mekim wok olsem wanpela wokboi nating i no gat namba liklik. (Jon 13:1-15) Man! Em wanpela wok ol wokboi nating i save mekim! Olsem na long pasin daun ol wokman Kristen bilong God ol i mekim wok bilong God Jehova na Jisas Krais. (2 Korin 6:4; 11:23) Ol i soim olsem ol i daunim ol yet taim ol i mekim wok bilong helpim ol narapela narapela long lain bilong ol. Na taim ol i autim gutnius, ol i helpim ol man i no bilip.—Rom 1:14, 15; Efesus 3:1-7.
Sanap Strong Long Wok Bilong Autim Tok
21. Pol i karim hevi na sanap strong long wok bilong autim tok, na em i kisim wanem gutpela pe?
21 Bilong stap wokman bilong God, Pol i mas karim hevi na sanap strong. Em i tokim ol Kolosi long em i bin karim bikpela pen na hevi bambai em inap autim gutnius long ol. (Kolosi 1:24, 25) Em i karim dispela pen na sanap strong, olsem na planti man i kisim gutnius na kamap wokman bilong God. Ol i kamap pikinini bilong God na brata bilong Jisas Krais, na ol i kisim tingting long kamap spirit na stap wantaim em long heven. Em gutpela pe tru em i kisim long pasin bilong karim hevi na sanap strong!
22, 23. (a) Bilong wanem ol wokman Kristen bilong God long nau ol i mas kisim pasin bilong karim hevi na sanap strong? (b) Wanem ol gutpela samting i save kamap long pasin bilong Kristen long karim hevi na sanap strong?
22 Long nau, man i wokman tru bilong God em i mas karim hevi na sanap strong. Planti ol i karim sik o hevi bilong lapun long olgeta de. Ol papamama i wok strong—planti ol i no gat poroman marit—long mekim bikpela long ol pikinini bilong ol. Ol pikinini long skul ol i strongim bel na sakim ol samting nogut i laik pulim ol. Planti Kristen i gat bikpela hevi tru long mani. Na planti ol i kisim nogut long han bilong ol narapela o kain kain hevi i painim ol, long wanem, yumi stap long taim bilong “planti hevi nogut tru.” (2 Timoti 3:1) Em nau, klostu 6 milion wokman bilong Jehova long nau ol i ken wanbel long tok bilong aposel Pol, em i tok: “Mipela i stap wokman bilong God, olsem na oltaim mipela i save soim gutpela pasin bilong mipela long olgeta manmeri. Mipela i save sanap strong tru long ol kain kain hevi i save kamap long mipela.” (2 Korin 6:4) Ol wokman Kristen bilong God ol i no les na lusim wok bilong ol, nogat. Yumi mas amamas tru long ol i karim hevi na sanap strong.
23 Olsem Pol i bin kisim gutpela samting long pasin bilong karim hevi na sanap strong, gutpela samting inap kamap long yumi tu. Taim yumi karim hevi na sanap strong, dispela i save helpim yumi long pas gut wantaim Jehova na mekim em i belgut tru. (Sindaun 27:11) Yumi strongim bilip bilong yumi yet na kamapim ol disaipel, na lain brata Kristen i go bikpela moa. (1 Timoti 4:16) Jehova i bin strongim ol wokman bilong em na mekim gut long wok bilong ol long dispela taim bilong las de. Olsem na wok bilong bungim ol laspela manmeri bilong ol 144,000 i kamap pinis, na planti milion manmeri moa ol i gat tingting long kisim laip oltaim long graun i kamap Paradais. (Luk 23:43, NW; KTH 14:1) Tru tumas, dispela wok Kristen Jehova i bin givim long yumi em i save kamapim marimari bilong em. (2 Korin 4:1) Yumi olgeta i mas holimpas dispela wok, na tenkyu olsem ol gutpela samting i bin kamap long en, em bai stap oltaim oltaim.—1 Jon 2:17.
[Ol Futnot]
a Tok Grik di·aʹko·nos em i as bilong nem “dikon,” em nem bilong wanpela bikman bilong misin.
b Ol brata i winim ol mak, ol tasol i mekim wok olsem wokman bilong kongrigesen, o “wokman bilong sois” (tok Grik di·aʹko·nos), olsem 2 Timoti 3:8-12 i stori long en.
c Tru, tok bilong Rom 12:1 i bilong ol Kristen God i bin makim ol, tasol em i stret tu long “ol arapela sipsip.” (Jon 10:16) Ol i ‘stap wantaim ol manmeri bilong Bikpela, na ol i save aninit long em na laikim em tru na mekim wok bilong em.’—Aisaia 56:6.
Yu Inap Stori Long Dispela?
• Olgeta Kristen long taim bilong ol aposel ol i mekim wanem wok?
• Wanem taim Kristen i kisim namba long i stap wokman bilong God? Husat i givim dispela namba long em?
• Wokman Kristen bilong God i mas wok long kisim wanem kain tingting?
• I gat wanem as na wokman Kristen bilong God i mas sanap strong taim hevi i painim em?
[Ol Piksa long pes 16, 17]
Taim Timoti i liklik pikinini yet ol i lainim em long Tok Bilong God. Em i kisim namba long i stap wokman bilong God taim em i kisim baptais
[Piksa long pes 18]
Baptais i makim olsem man i dediket pinis long God na i makim olsem man i kisim namba long i stap wokman bilong God
[Piksa long pes 20]
Ol wokman Kristen bilong God ol i redi long mekim wok bilong helpim ol narapela