Jehova Bai Orait Long Husat?

“Wok strong long kisim (laip) . . .  Yumi save, God i save wok insait long yupela. Em yet i kirapim laik bilong yupela, na yupela i ken mekim wok olsem em yet i laikim.”−FILIPAI 2:​12, 13.

 1, 2. Jisas i mekim wanem na God i tok, bel bilong Em i gutpela long Jisas? Bilong wanem yumi mas tingim dispela samting?

BIKPELA samting i kamap−Jon Bilong Baptais i bin autim tok bilong God na givim baptais long wara long ol man i tanim bel, na nau wanpela man i kam long em, em Jon i save em i stretpela man; dispela man em Jisas. Jisas i no gat sin na bai em i mas tanim bel. Nogat. Tasol em i tok em i laik kisim baptais bilong “inapim olgeta stretpela pasin.”−Matyu 3:​1-15.

₂ Jon i bihainim pasin daun na em i givim baptais long Jisas, na taim Jisas i lusim wara i kam antap, nau “heven i op, na em i lukim Spirit bilong God i kam daun olsem wanpela pisin.” Na tu “wanpela maus i singaut long heven olsem, ‘Dispela em i Pikinini bilong mi. Mi laikim em tumas. Bel bilong mi em i gutpela long em.’ ” (Matyu 3:​16, 17; Mak 1:11) Em bikpela samting tru! Sapos yumi laikim tumas wanpela man, yumi laik bai em i ken amamas long yumi. (Aposel 6:​3-6; 16:​1, 2; Filipai 2:​19-22; Matyu 25:21) Olsem na sapos Nambawan Strongpela God i tokim yu, ‘Bel bilong mi i gutpela long yu,’ bai yu amamas tru, a?

 3. Yumi gat wanem askim long kamap gutpela long ai bilong God?

₃ Tasol olsem wanem? I gat rot long nau na man inap kamap kain man Jehova bai orait long em? Olsem wanem long ol man ‘i stap longwe long God, na i no gat wanpela gutpela samting ol i wetim i kamap bihain,’ na “ol i stap ausait long laip bilong God”? (Efesas 2:12; 4:18) Ating kain man olsem em inap mekim sampela samting na bai Jehova i orait long em? Sapos olsem, orait em i mas mekim wanem? Nau yumi ken stori long dispela samting.

Wanem Insait Bilong Dispela Tok Bilong God?

 4. (a) Wanem insait bilong tok Grik ol i tanim olsem “bel bilong mi em i gutpela long em,” em dispela tok God i bin mekim long Jisas? (b) God i kolim dispela tok long Jisas long wanem taim na yumi mas tingim gut?

₄ Long Gutnius em Matyu na Mak na Luk i raitim, taim ol i kolim dispela tok bilong God, olsem “bel bilong mi em i gutpela long [Jisas],” ol i kolim wanpela tok Grik, em euÌdoÌke’o. (Matyu 3:17; Mak 1:11; Luk 3:22) Insait bilong dispela tok i olsem: “Laikim tru, orait long em, amamas long em.” Dispela hap tok Grik i no makim olsem God tasol i belgut long ol man. Nogat. Pol i stori long ol Kristen long Masedonia i hapim samting bilong ol bilong helpim ol narapela, na em i tok “bel bilong ol i gutpela na ol i mekim olsem.” (Rom 10:1; 15:27; 2 Korin 5:8; 1 Tesalonaika 2:8; 3:⁠1) Tasol i no wanpela man i tok em i belgut long Jisas. God yet i tok olsem, na God i mekim dispela tok taim Jisas i baptais pinis. (Matyu 17:5; 2 Pita 1:17) Taim Jisas i yangpela yet na em i no baptais yet, Luk 2:52 i kolim narapela tok Grik (kha’ris) bilong makim olsem God na ol man i “laikim em tumas.”

 5. (a) Olsem wanem yumi ken save, God inap orait long ol sinman? (b) Husat ol i kamap olsem ol man “God i belgut long ol”?

₅ Yumi ol man bilong graun yumi gat sin. Olsem wanem? I gat rot na yumi ken kamap gutpela long ai bilong God na em i ken orait long yumi? I gat rot, olsem na yumi amamas. Taim mama i karim pinis Jisas, ol ensel i mekim tokaut olsem: “Litimapim nem bilong God long antap tru! Na long graun ol manmeri God i belgut [tok Grik, euÌdoÌki’as] long ol, ol i ken bel isi.” (Luk 2:​14, NW ) Insait tru bilong dispela tok Grik i olsem ol ensel i tokaut long gutpela blesing bai kam long ol man em God “i gat gutpela tingting long ol” o em i “orait long ol.” Inap longtaim ol Witnes Bilong Jehova i bin tok, long rot bilong dediket na baptais ol sinman bilong graun inap kamap gutpela long ai bilong God, na bai em i orait long ol o belgut long ol, olsem Luk 2:14 i tok.

 6. I gat wanem samting moa yumi mas save long en long kamap gutpela long ai bilong God?

₆ Tasol ating yu save, man i ‘stap birua bilong God na em i mekim pasin nogut’ em i narapela kain tru long man i stap long lain bilong stretpela God bilong yumi na God i orait long em. (Kolosi 1:21; Sam 15:​1-5) Olsem na ating yu amamas long harim tok olsem ol man inap kamap gutpela long ai bilong God na bai God i orait long ol. Tasol ating nau yu laik save, man i mas mekim wanem bambai God i ken orait long em. Sapos yumi skelim sampela samting God i bin mekim long ol man long bipo, dispela inap helpim yumi long save long dispela samting.

Em i Amamas long Ol Man i Kam

 7. Eksodas 12:38 i tok wanem na dispela i helpim yumi long save long tingting bilong God?

₇ Inap planti handet yia paslain long tokaut bilong Luk 2:​14, Jehova i amamas long ol man i kam na lotu long em. Tru, long dispela taim bipo God i kisim lain Isrel tasol i stap olsem lain bilong em na ol i dediket long em. (Eksodas 19:​5-8; 31:​16, 17) Tasol taim lain Isrel i lusim Isip, “planti arapela lain manmeri . . . i go wantaim ol.” (Eksodas 12:38) Ol dispela manmeri i no bilong lain Isrel, tasol ating ol i bin mekim sampela wok wantaim lain bilong God na ol i bin lukim ol hevi i painim ol Isip, na nau ol i laik i go wantaim ol Isrel. Ating bihain sampela i kam insait long lain Isrel na kisim pasin na lotu bilong ol Isrel.

 8. I gat wanem tupela kain man bilong narapela lain ol i bin i stap long Isrel? Bilong wanem ol Isrel i mekim narapela narapela kain pasin long dispela tupela kain man?

₈ Kontrak bilong Lo i kamapim tingting bilong God, em i ting olsem wanem long ol man i no bilong lain Isrel, na i kolim pasin lain bilong God i mas mekim long ol. Sampela manmeri bilong narapela lain ol i go sindaun tasol long graun bilong Isrel, na ol i mas bihainim sampela as lo, olsem ol i mas bihainim lo bilong Sabat na ol i no ken kilim man i dai. (Niemaia 13:​16-21) Ol Isrel i no save kisim ol dispela man olsem brata bilong ol. Nogat. Taim ol i toktok wantaim ol o mekim sampela wok wantaim ol, ol i save was gut, long wanem ol dispela man i no insait yet long lain bilong God. Olsem: Lo i tambuim ol Isrel long baim na kaikai abus i dai nating na blut i stap yet long skin bilong en. Tasol lo i tok, ol man bilong narapela lain, em ol i no kisim pasin na lotu bilong Isrel, ol i ken kaikai. (Diuteronomi 14:21; Esikiel 4:14) Sampela man olsem, ating bihain ol i kisim lotu bilong Isrel na ol i katim skin na kam insait long lain bilong God, olsem sampela man bilong ol narapela lain i bin mekim. Taim ol i mekim olsem, long dispela taim tasol ol Isrel i save kisim ol olsem brata bilong ol long trupela lotu, na nau ol dispela man i mas bihainim olgeta tok bilong Lo. (Levitikas 16:29; 17:10; 19:​33, 34; 24:22) Rut, em meri bilong Moap, na Neman, em lepraman bilong Siria, tupela i no bilong lain Isrel, tasol God i amamas long tupela.−Matyu 1:5; Luk 4:⁠27.

 9. Solomon i tok wanem na dispela i kamapim gut tingting bilong God long ol man i no bilong lain Isrel?

₉ Samting i kamap long taim bilong King Solomon tu i makim olsem God i amamas long ol man i no bilong lain Isrel ol i kam long em. King Solomon i wokim haus lotu na taim em i laik makim dispela haus i kamap haus bilong God stret, em i beten na em i tok: “Bambai ol man bilong ol arapela kantri i harim tok long biknem bilong yu, . . . Na sapos wanpela bilong ol i laik lotu long yu na i lusim as ples bilong en na i kam klostu long dispela haus na i beten long yu, orait Bikpela, yu stap long ples bilong yu long heven na yu ken harim beten bilong em . . .  Olsem na bai olgeta lain man long olgeta kantri i ken save long yu na i stap aninit long yu, olsem mipela Isrel, ol manmeri bilong yu, i save mekim.” (1 King 8:​41-43) Tru tumas, Jehova i save amamas long beten bilong ol man bilong narapela lain, em ol i gat gutpela bel na ol i laik tru long save long em. Ating bihain bai ol tu i kisim save long ol lo bilong Em, na bai ol i katim skin na kam insait long lain bilong God na kisim blesing.

 10. Ol Juda i mas mekim wanem long dispela man bilong Itiopia? Em i katim skin na olsem wanem dispela i helpim em?

₁₀ Wanpela man i bin mekim olsem bihain long dispela taim. Dispela man em i bosim olgeta mani samting bilong Kwin Kandesi long ples i stap longwe, em Itiopia. Taim em i harim tok pastaim long pasin na lotu bilong ol Juda, ating pasin na lotu bilong em i no stret na Jehova i no orait long en. Olsem na ol Juda i no ken les kwik long dispela man bilong narapela lain em i stap namel long ol. Ol i mas wetim em i lain pastaim na kisim save long ol lo bilong God na long ol samting em i mas mekim. Em i stadi gut na kamap strong, na em i stretim pasin bilong em bambai em inap katim skin. Aposel 8:27 i tok, “Dispela man i bin kam long Jerusalem bilong lotu.” (Eksodas 12:​48, 49) Dispela i makim olsem em i kisim tru pasin na lotu bilong ol Juda. Olsem na em inap bilip long Jisas na kamap disaipel bilong em na kisim baptais. Long dispela rot em i bihainim laik bilong God olsem God i wok long kamapim.

Ol Man i No Bilip na Kongrigesen Kristen

 11, 12. (a) Wanem senis i kamap taim Itiopia i kisim baptais? (b) Olsem wanem dispela i stret wantaim tok bilong Filipai 2:​12, 13?

₁₁ Jisas i tokim ol disaipel bilong em: “Yupela i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” (Matyu 28:​19, 20) Dispela Itiopia yumi bin stori long em, em i kisim pasin na lotu bilong ol Juda na em i save pinis long Jehova na long spirit holi. Olsem na taim Filip i tokim em long Jisas na helpim em long save Jisas em i Krais na em i Pikinini bilong God na dispela man i bilip, orait em inap kisim baptais. Long dispela rot em i kam insait long lain bilong Jehova, em ol i bihainim Krais, na God i belgut long em o orait long em. God bai skelim ol pasin em i mekim, na em i mas bihainim “olgeta tok” Krais i bin givim long ol Kristen. Nau em i gat bikpela wok, tasol gutpela samting tru inap kamap long dispela rot−em inap kisim laip!

₁₂ Bihain Pol i raitim pas na em i tok, olgeta Kristen i mas ‘pret na guria na wok strong long kisim laip.’ Tasol ol inap long mekim, long wanem “God i save wok insait long [ol]. Em yet i kirapim laik bilong [ol], na [ol] i ken mekim wok olsem em yet i laikim [euÌdoÌki’as].”−Filipai 2:​12, 13.

 13. Ol Kristen bilong pastaim i mekim wanem long ol man i no kirap kwik long kisim baptais olsem Itiopia i bin mekim?

₁₃ Tasol sampela man i kam bung wantaim ol Kristen bilong pastaim ol i no bihainim pasin bilong dispela Itiopia. Ol i no kirap kwik long mekim ol samting ol i mas mekim bambai ol inap kisim baptais. Sampela ol i no bilong lain Juda na ol i no bin kisim pasin na lotu bilong Juda, olsem na ol i gat liklik save tasol long Jehova na long ol pasin bilong em, o ol i no save long em; na lo bilong ol i no stret wantaim lo bilong em. Orait, ol Kristen i mas mekim wanem long ol? Ol i mas bihainim pasin bilong Jisas. Em i no orait long man i mekim rong. (Jon 5:14) Tasol em i no save sakim ol man i laik i kam long em na ol i laik stretim pasin bilong ol na bihainim pasin God i laikim.−Luk 15:​1-7.

 14, 15. Ol Kristen, em spirit holi i bin makim ol, ol i save go long ol miting long Korin, na wanem kain man moa ol i save go? Ol kain man olsem, ating olgeta i kamap strong wankain o olsem wanem?

₁₄ Sapos yumi skelim sampela tok Pol i mekim taim em i stori long ol miting long Korin yumi ken save, ol Kristen i no bin sakim ol man i wok long kisim save long God. Pol i stori long ol strong o presen bilong spirit holi God i givim long ol Kristen bilong pastaim bilong makim olsem ol i gat blesing bilong God, na Pol i stori long “ol bilipman” na “ol man i no bilip.” (1 Korin 14:22) “Ol bilipman” em ol man i bilip long Krais na ol i bin kisim baptais. (Aposel 8:13; 16:​31-34) “Planti Korin ol i harim tok bilong Pol, na ol i bilip na kisim baptais.”−Aposel 18:⁠8.

₁₅ Long 1 Korin 14:​24, Baibel i tok ‘ol man i no bilip, o i no save gut,’ ol tu i go long ol miting long Korin na ol Kristen i amamas long ol i kam.a Ating sampela i stadi gut na wok strong long bihainim ol tok bilong God long Baibel na sampela, nogat. Ating sampela i save mekim yet pasin i no stret. Na sampela, ating ol i bilip liklik na ol i senisim pinis sampela pasin bilong ol, na maski ol i no baptais yet, ating ol i kirap pinis long tokim ol narapela man long ol tok ol i bin kisim save long en.

 16. Ol kain man olsem, sapos ol i bung wantaim ol Kristen long ol miting, dispela inap helpim ol olsem wanem?

₁₆ Tasol ol dispela man i no baptais ol i no “Kristen man.” (1 Korin 7:39) Sapos bipo ol i bin mekim pasin i no stret o ol i bin mekim sampela rong long spirit, ating ol i no inap stretim kwik pasin bilong ol na bihainim ol lo bilong God. Tasol taim ol i wok long stretim pasin bilong ol, sapos ol i no gat tingting nogut na ol i no wok long bagarapim bilip bilong kongrigesen o pasin bilong kongrigesen long i stap klin, orait ol Kristen i save amamas long ol i kam bung wantaim ol. Ol samting ol i lukim na harim long ol miting inap “sutim bel” bilong ol na stretim ol, na ‘olgeta tok i stap hait long bel bilong ol bai i kamap ples klia.’−1 Korin 14:​23-25; 2 Korin 6:⁠14.

Bilong Kisim Laip, Wok Oltaim long i Stap Gut long Ai Bilong God

 17. Wanem samting i kamap long taim bilong ol aposel na dispela i truim tok bilong Luk 2:⁠14?

₁₇ Ol Kristen long taim bilong ol aposel, em ol i baptais pinis, ol i autim tok long ol man na long dispela rot planti tausen man na meri ol i harim dispela gutpela tok. Ol i harim tok, na ol i bilip, na tanim bel, na ol i kisim baptais na “autim bilip” bilong ol na God i kisim bek ol. (Rom 10:​10-15; Aposel 2:​41-44; 5:14; Kolosi 1:23) Ol dispela Kristen bilong pastaim, em ol i baptais pinis, Jehova i belgut long ol na orait long ol. Yumi ken save long dispela samting, long wanem em i kapsaitim spirit holi long ol na makim ol, na em i kisim ol i stap olsem ol pikinini bilong em long spirit. Aposel Pol i raitim tok olsem: “Bipo yet em i marimari long yumi, na i makim yumi bilong kisim yumi long wok bilong Jisas Krais na putim yumi i stap pikinini bilong God. Long laik [euÌdoki’an] bilong em yet em i mekim olsem.” (Efesas 1:⁠5) Olsem na 100 yia i no pinis yet na dispela samting ol ensel i bin tokaut long en taim mama i karim Jisas em i kirap long kamap tru, olsem: Ol manmeri “God i belgut long ol” ol i ken bel isi.−Luk 2:⁠14.

 18. Ol Kristen, em spirit holi i bin makim ol, bilong wanem ol i mas was gut oltaim bambai God i ken belgut yet long ol?

₁₈ Bilong holimpas dispela bel isi, ol dispela man “God i belgut long ol” ol i mas “pret na guria na wok strong long kisim [laip].” (Filipai 2:12) Em hatwok, long wanem ol i stap sinman yet bilong graun. I gat planti samting bilong traim ol na pulim ol long mekim pasin i no stret. Sapos ol i pundaun na mekim rong, God i no ken belgut moa long ol. Olsem na long pasin sori God Jehova i putim ol wasman bilong lukautim kongrigesen na helpim ol long samting bilong spirit.−1 Pita 5:​2, 3.

 19, 20. God i mekim wanem bilong helpim ol Kristen i baptais pinis bambai ol inap i stap wokboi yet bilong em na em i ken belgut long ol?

₁₉ Ol dispela elda bilong kongrigesen bai bihainim gutpela tok bilong Pol, em i tok: “Sapos yupela i lukim wanpela man i mekim wanpela sin, orait yupela man i bihainim Holi Spirit yupela i mas stretim bek isi isi bel bilong dispela man. Yupela i no ken bikhet long em. Yupela olgeta wan wan yupela lukaut. Nogut Seten i traim yu tu.” (Galesia 6:⁠1) Yumi save, man i baptais pinis em i gat bikpela wok moa long bihainim ol lo bilong God, wankain olsem man bilong narapela ples em i kisim lotu bilong Isrel na katim skin. Tasol sapos Kristen i baptais pinis em i mekim rong, i gat sampela man i stap insait long kongrigesen em ol inap helpim em long pasin sori.

₂₀ Sapos wanpela long kongrigesen i mekim bikpela rong, orait tupela o tripela elda i ken wok wantaim long helpim em. Jut i raitim tok olsem: “Yupela i mas sori long sampela man ol i lusim bilip liklik. Ol i olsem i stap long paia. Olsem na kwiktaim tumas yupela i mas kisim bek ol. Yupela i mas pret na mekim pasin bilong sori long sampela man. Tasol pasin bilong olpela bel bilong ol em i olsem klos i doti tru. Yupela i mas stap longwe long dispela pasin.” (Jut 22, 23) Kristen i baptais pinis, sapos ol elda i helpim em olsem, orait Jehova inap belgut yet long em, na em inap kisim dispela bel isi, em ol ensel i bin tokaut long en taim mama i karim Jisas.

 21, 22. Sapos wanpela Kristen i mekim rong na em i no tanim bel, wanem samting bai kamap? Ol Kristen i stap gut long God ol i mas mekim wanem?

₂₁ Tasol sampela taim Kristen i mekim rong na em i no tanim bel. Wan wan tasol i mekim olsem. Sapos em i no tanim bel, orait ol elda i mas rausim em long klinpela kongrigesen, nogut em i bagarapim kongrigesen. Dispela samting i bin painim wanpela man bilong Korin em i baptais pinis. Em i bagarapim marit na em i no laik lusim dispela pasin i no stret. Pol i toksave long kongrigesen olsem: “ ‘Yupela i no ken pren wantaim ol man bilong bagarapim marit.’ Mi no tok long lusim tru olgeta man bilong dispela graun ol i save bagarapim marit, na ol man i save mangal na pulim samting bilong narapela man, na ol man i save bihainim pasin bilong god giaman. Sapos yupela i laik lusim tru ol dispela, bai yupela i mas lusim dispela graun olgeta. Tasol as bilong tok mi bin raitim em i olsem: Sapos wanpela man yupela i save kolim brata em i bagarapim marit, o em i mangal long samting bilong narapela man, o em i bihainim pasin bilong god giaman, o em i tok bilas, o em i spak, o em i pulim samting bilong narapela man, orait yupela i no ken pren wantaim em. Nogat. Yupela i no ken kaikai tu wantaim kain man olsem.”−1 Korin 5:​9-11.

₂₂ Dispela man long Korin em i bin kisim baptais na God i orait long em na em i bin kam insait long lain bilong God, olsem na taim ol i rausim em long kongrigesen, dispela i no liklik samting. Pol i tok ol Kristen i no ken pren wantaim em o poromanim em, long wanem pastaim em i bilong God na God i belgut long em, tasol em i givim baksait pinis long dispela samting. (Lukim 2 Jon 10, 11.) Pita i stori long ol kain rauspela man olsem na em i tok: “Mobeta ol i no bin kisim save long rot bilong stretpela pasin. Long wanem nau ol i save long dispela rot, na ol i bin kisim dispela lo holi, tasol ol i givim baksait pinis long en. Dispela pasin i kamap long ol, em i olsem wanpela trupela tok olsem, ‘Dok i go bek long traut bilong en.’ Na narapela tu i tok, ‘Pik i waswas pinis long wara, tasol em i go tantanim nabaut long graun malumalum.’ ”−2 Pita 2:​21, 22.

 23. Long taim bilong ol aposel, planti Kristen i stap gut long God o olsem wanem?

₂₃ Nau Jehova i no inap orait moa long kain man olsem, long wanem ol i bin mekim rong na ol i no tanim bel na kongrigesen i rausim ol. (Hibru 10:38; lukim tu 1 Korin 10:⁠5.) Wan wan tasol i mekim kain pasin olsem na kongrigesen i rausim ol. Tasol ol manmeri em God i bin “marimari” long ol na “mekim bel bilong [ol] i stap isi,” na ‘long laik bilong em yet em i kisim ol i stap pikinini bilong em,’ planti ol i bin i stap gut long God.−Efesas 1:​2, 5, 8-10.

 24. Tasol i gat wanem samting moa nau yumi ken stori long en?

₂₄ Na i wankain long taim bilong yumi tu. Tasol nau yumi ken stori long rot bilong helpim ‘ol man i no bilip o i no save gut’ na bai God i ken orait long ol. Na yumi ken stori long ol samting yumi ken mekim sapos ol i pundaun na mekim rong. Tok i kamap bihain bai stori long ol dispela samting.

[Futnot]

Yu Tingim?

◻ Olsem Baibel i tok, long wanem taim na long wanem rot ol man inap kamap gutpela long ai bilong God na bai em i orait long ol?

◻ God i ting olsem wanem long ol man bilong narapela ples ol i stap wantaim lain bilong em? Ol Isrel i no ken sakim ol dispela man, tasol bilong wanem ol i mas was gut?

◻ Ol man “i no bilip” ol i save go long ol miting bilong ol Kristen long Korin, olsem na yumi save long wanem samting?

◻ God i bin mekim wanem bilong helpim ol Kristen i baptais pinis bambai ol inap stap wokboi yet bilong em na em i ken belgut yet long ol?