Tingting Stret—Bihainim Gutpela Tingting
TINGIM dispela samting: Jisas Krais i stori olsem ol bikman bilong lotu long Jerusalem bai givim bikpela pen long em na kilim em i dai. Gutpela pren bilong em aposel Pita em i no bilip olsem dispela samting bai kamap. Em i kisim Jisas i go arere na krosim em. Pita i soim olsem em i tingim tru Jisas. Tasol Jisas i ting olsem wanem long tingting bilong Pita? Jisas i tok: “Satan, yu go baksait long mi. Yu laik pasim rot bilong mi. Yu no bihainim tingting bilong God. Nogat. Yu bihainim tingting bilong ol man tasol.”—Matyu 16:21-23.
Man, Pita i mas kirap nogut tru! Em i no helpim na strongim Jisas, em i “laik pasim rot” bilong Bikman bilong em. Olsem wanem dispela samting i kamap? Ating Pita i larim wanpela tingting kranki i pulim em—em i bilip tasol long samting em i laik bilip long en.
No Ken Ting Yu No Inap Pundaun
Wanpela samting inap mekim na yumi no tingting stret em pasin bilong ting yumi no inap pundaun. Aposel Pol i givim tok lukaut long ol wanbilip Kristen bilong em i stap long Korin bilong bipo, olsem: “Sapos wanpela man i ting em i sanap strong, orait em i mas lukaut gut. Nogut em i pundaun.” (1 Korin 10:12) Bilong wanem Pol i tok olsem? Long wanem em i save olsem i no hatwok long tingting bilong ol man i paul—ol Kristen tu tingting bilong ol inap long ‘paul na ol i lusim pasin bilong i stap klin na tingting long Krais tasol.’—2 Korin 11:3.
Dispela samting i bin painim ol tumbuna bilong Pol. Jehova i bin tokim ol: “Ol tingting bilong mi i no olsem tingting bilong yupela ol manmeri. Na ol pasin bilong mi i narakain tru long ol pasin bilong yupela.” (Aisaia 55:8) Ol i bin ting ‘save bilong ol i winim save bilong ol arapela,’ na dispela i bin mekim na ol i kisim bagarap. (Aisaia 5:21) Olsem na i stret yumi mas skelim olsem wanem tingting bilong yumi i ken i stap stret na bai yumi inap abrusim wankain hevi.
Was Gut Long Tingting Bilong Dispela Graun
Tingting bilong dispela graun i bin bagarapim tingting bilong sampela long Korin. (1 Korin 3:1-3) Ol i ting save bilong ol man i bikpela samting winim tok bilong God. Tru, ol saveman bilong Grik long taim bilong ol i smat stret long tingting. Tasol long ai bilong God ol i olsem ol longlong man. Pol i tok: “ ‘Bai mi rausim save bilong ol man i gat gutpela tingting na bai mi pinisim save bilong ol saveman.’ Orait nau bai yumi tok wanem long ol gutpela tingting na save bilong ol saveman bilong dispela graun? Bai yumi tok wanem long ol man i save tumas long lo bilong Moses? Na long ol man i save tumas long pait long toktok? God i bin mekim olgeta save bilong ol man bilong dispela graun i kamap olsem kranki toktok tasol.” (1 Korin 1:19, 20) “Spirit bilong dispela graun” i save stiaim ol dispela kain man, i no spirit bilong God. (1 Korin 2:12) Ol tok na tingting bilong ol i no stret wantaim tingting bilong Jehova.
As bilong ol tingting bilong dispela graun em Satan, em i bin mekim wok long snek bilong giamanim Iv. (Stat 3:1-6; 2 Korin 11:3) Olsem wanem? Em inap bagarapim yet tingting bilong yumi? Yes! Baibel i tok, Satan i “bin pasim tingting” bilong ol manmeri na nau em i wok long “giamanim olgeta manmeri bilong graun.” (2 Korin 4:4; KTH 12:9) Olsem na em i bikpela samting long luksave long ol pasin trik bilong em!—2 Korin 2:11.
Was Gut Long “Olgeta Pasin Bilong Trik na Giaman”
Aposel Pol i mekim tok lukaut tu long “olgeta pasin bilong trik na giaman.” (Efesus 4:14) Em i bin bungim ol “giaman wokman” em ol i giaman long autim tok i tru tasol ol i paulim tok. (2 Korin 11:12-15) Bilong inapim samting ol i tingting long en, ol kain man olsem inap mekim wok long ol samting i helpim tingting bilong ol, ol tok em ol man bai pilim tru long bel, na ol i save sutim ol tok kranki na tok giaman.
Ol man i laik paulim ol narapela, ol i save yusim kain tok olsem “sect” (liklik lotu nating) bilong daunim ol narapela. Long wanpela ripot ol i givim i go long Parliamentary Assembly of the Council of Europe ripot i tok olsem, taim ol bikman i skelim ol nupela lotu, “i gutpela ol i no yusim dispela tok.” Bilong wanem? Ol i pilim olsem tok “cult” (lotu bilong wanpela man) em i no gutpela tok. Dispela i wankain olsem tok ol saveman Grik i bin mekim long aposel Pol, ol i tok em i “man bilong toktok nabaut.” I olsem ol i laik tok em i wanpela man bilong mauswara, olsem man i save kamapim ol toktok nabaut em i harim ol narapela i mekim. Tasol Pol i no olsem, nogat; em i save “autim gutnius bilong Jisas na em i tokim ol long Jisas na long pasin bilong kirap bek long matmat.”—Aposel 17:18.
Olsem wanem? Ol samting ol man i save mekim bilong paulim ol narapela i save wok gut? Yes. Ol dispela samting i bikpela samting bilong kirapim pasin bilong bel nogut long narapela lain na lotu, long rot bilong en ol i paulim tingting ol man i holim long ol lain bilong narapela ples na lotu. Planti man i bin mekim wok long ol dispela kain rot bilong mekim nogut long sampela lain nating. Adolf Hitler i bin mekim wok long ol dispela kain rot taim em i tok ol Juda na ol narapela liklik lain ol i nogut, na ol i wanpela lain i laik daunim gavman. No ken larim dispela kain tok giaman i bagarapim tingting bilong yu.—Aposel 28:19-22.
No Ken Giamanim Yu Yet
I no hatwok long giamanim yumi yet. Ating i hatwok long lusim o skelim gut wanpela tingting bilong yumi yet em yumi laikim tumas. Bilong wanem? Long wanem, bel bilong yumi i save pas strong long ol tingting bilong yumi yet. Orait nau ating yumi kamapim sampela as na yumi gat ol dispela kain tingting—em ol tingting kranki—na long dispela rot yumi giamanim yumi yet.
Dispela samting i bin painim ol Kristen long taim bilong ol aposel. Ol i save long tok bilong Baibel, tasol ol i no larim dispela i bosim tingting bilong ol. Ol i “giamanim [ol] yet.” (Jems 1:22, 26) Wanpela samting inap soim olsem yumi larim dispela kain pasin bilong giamanim yumi yet i pulim yumi em sapos yumi belhat taim wanpela i daunim ol bilip bilong yumi. I no gutpela sapos yumi belhat, em i gutpela tingting long skelim na harim gut tok ol narapela i mekim maski yumi save olsem tingting bilong yumi i stret.—Sindaun 18:17.
Kisim “Save Gut Long God”
Yumi inap mekim wanem bilong holim tingting i stret? I gat planti samting bilong helpim yumi, tasol yumi mas wok strong long kisim. Saveman King Solomon i tok: “Pikinini, yu mas harim tok bilong mi na putim gut long tingting bilong yu. Yu mas putim yau gut long olgeta tok i save givim yu gutpela tingting. Na yu mas wok strong long kisim gutpela save. Na yu mas askim gutpela tingting na save long kam long yu, olsem yu singautim wanpela man i kam bilong helpim yu. Na yu mas wok hat long painim gutpela tingting, olsem man i wok long painim silva ol i bin haitim insait long graun na olsem man i wok long painim mani samting ol i bin haitim. Sapos yu mekim ol dispela samting, orait bai yu save tru long pasin bilong stap aninit long Bikpela, na bai yu save gut long God.” (Sindaun 2:1-5) Tru tumas, sapos yumi yet i wok strong long putim tok i tru bilong God long Baibel long bel na tingting bilong yumi, bai yumi kisim gutpela tingting na save na pasin bilong skelim gut ol samting. Taim yumi mekim olsem, yumi wok long painim ol samting i gutpela moa, winim silva o ol narapela samting i gat bikpela pe.—Sindaun 3:13-15.
Gutpela tingting na save i bikpela samting bilong kisim tingting i stret. Baibel i tok: “Bai yu kisim planti gutpela tingting na bai yu belgut long gutpela save bilong yu. Pasin bilong tingting gut bai i banisim yu na gutpela save bai i was long yu. Na bai yu no bihainim ol man i save mekim pasin nogut na i save mekim tok i no stret. Ol dispela man i save lusim stretpela rot na i wokabaut long rot i tudak.”—Sindaun 2:10-13.
Em i bikpela samting long larim tingting bilong God i stiaim yumi long taim bilong hevi. Pasin bilong belhat o pret bai mekim na i hatwok long kisim stretpela tingting. Solomon i tok: “Taim ol i mekim nogut long wanpela man na daunim em, maski em i gat gutpela tingting, em bai kirap mekim pasin kranki.” (Saveman 7:7, NW ) Na ating yumi inap kirap tu na ‘kros long Bikpela yet.’ (Sindaun 19:3) Olsem wanem yumi inap mekim olsem? Long rot bilong sutim tok long God long ol hevi bilong yumi na yusim ol olsem eskius bilong mekim ol samting i no stret wantaim ol lo na stiatok bilong em. I no gutpela long yumi ting olsem olgeta samting yumi mekim i gutpela, olsem na long pasin daun i gutpela yumi ken harim tok bilong ol man i gat gutpela tingting em ol i laik helpim yumi long rot bilong Baibel. Na sapos inap, yumi mas redi long lusim ol tingting bilong yumi em yumi laikim tru taim yumi kisim save olsem ol i no stret.—Sindaun 1:1-5; 15:22.
“Wok Yet Long Askim God”
Yumi stap long wanpela taim i nogut tru. Pasin bilong beten oltaim long Jehova na askim em long soim rot long yumi em i bikpela samting sapos yumi laik skelim gut ol samting na bihainim gutpela tingting. Pol i tok: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” (Filipai 4:6, 7) Sapos yumi sot long gutpela tingting na save long karim ol hevi o traim, yumi mas “beten long God i givim tingting long [yumi], na bai God i givim [yumi]. God i save givim planti samting long olgeta man, na em i no save tok kros long man i askim em.”—Jems 1:5-8.
Pita i luksave olsem ol wanbilip Kristen i mas bihainim gutpela tingting, olsem na em i laik ‘kirapim ol long tingim gen ol dispela samting.’ Em i laik bai ol i ‘mas tingim gen tok bilong samting i laik kamap bihain, em ol profet bilong God i bin autim. Na ol i mas tingim tu lo bilong Bikpela, em Man bilong kisim bek ol,’ Jisas Krais. (2 Pita 3:1, 2) Sapos yumi mekim olsem na tingting bilong yumi i stret wantaim Tok Bilong Jehova, bai yumi kisim tingting i stret na bihainim gutpela tingting.
[Ol Piksa long pes 21]
Ol Kristen bilong pastaim i larim gutpela tingting bilong God i stiaim tingting bilong ol, i no tingting bilong ol man
[Ol Kredit Lain]
Philosophers left to right: Epicurus: Photograph taken by courtesy of the British Museum; Cicero: Reproduced from The Lives of the Twelve Caesars; Plato: Roma, Musei Capitolini
[Ol Piksa long pes 23]
Pasin bilong beten na stadi long Tok Bilong God i bikpela samting