“Ol Pasin Holi Spirit i Kamapim” i Givim Glori Long God

“Yupela i mas wok yet long karim planti kaikai na soim olsem yupela i disaipel bilong mi, na long dispela rot Papa bilong mi i kisim glori.”​—JON 15:8.

1, 2. (a) Yumi gat wanem ol rot long strongim ol narapela? (b) Wanem presen i kam long Jehova i save helpim yumi long mekim gut moa wok bilong em?

TINGIM tupela stori: Wanpela sista Kristen i luksave olsem wanpela yangpela sista i tingting planti. Em i stretim rot long autim tok wantaim em. Taim tupela i wok wantaim, yangpela sista i tokaut long wari bilong em. Bihain long dispela de yet, yangpela sista i beten na tenkyu long Jehova long dispela sista i tingim em; em i kisim helpim long taim stret. Long narapela hap, tupela marit i kam bek long narapela kantri we ol i bin go bilong mekim wok autim tok. Taim tupela i stap long wanpela bung na amamas long stori long ol ekspiriens, wanpela yangpela brata i putim yau i stap. Sampela yia bihain, taim em i redi long go long narapela kantri bilong mekim wok autim tok, em i tingim tupela marit na stori bilong ol we i bin kirapim laik bilong em long kamap misineri.

² Ating ol dispela samting i kirapim yu long tingim wanpela husat i bin mekim bikpela samting long laip bilong yu o tingim wanpela em yu yet i bin helpim em. Tru, ating tok narapela i mekim wanpela taim tasol i no inap mekim bikpela senis long laip bilong man long olgeta taim, nogat, tasol long olgeta de, yumi gat rot long kirapim na strongim ol narapela. Tingim sapos i gat wanpela samting em inap helpim yu long mekim gut moa ol samting na i helpim tu pasin bilong yu, na nau yu inap helpim gut ol brata na mekim gut moa wok bilong God. Em bai gutpela tru, a? Jehova i givim wanpela kain presen olsem long yumi​—em holi spirit. (Luk 11:13) Taim spirit bilong God i wok insait long laip bilong yumi, em i kirapim yumi long kamapim ol gutpela pasin i helpim olgeta wok bilong God yumi save mekim. Em wanpela gutpela presen tru!​—Ritim Galesia 5:​22, 23.

 3. (a) Taim yumi kisim “ol pasin holi spirit i kamapim,” olsem wanem dispela i givim glori long God? (b) Bai yumi skelim wanem ol askim?

³ Ol pasin bilong holi spirit i kamapim klia pasin bilong Man i as bilong dispela spirit, em God Jehova. (Kol. 3:​9, 10) Jisas i tokaut long as na ol Kristen i mas wok strong long bihainim pasin bilong God taim em i tokim ol aposel olsem: “Yupela i mas wok yet long karim planti kaikai . . . na long dispela rot Papa bilong mi i kisim glori.”a (Jon 15:8) Taim yumi kisim “ol pasin holi spirit i kamapim,” ol tok na pasin bilong yumi i kamapim klia dispela samting, na dispela i givim glori long God. (Mat. 5:16) Olsem wanem ol pasin holi spirit i kamapim i narapela kain long ol pasin bilong dispela graun em Satan i bosim? Yumi ken mekim wanem bilong kisim ol pasin bilong holi spirit? Bilong wanem em inap hatwok long yumi mekim olsem? Bai yumi skelim ol dispela askim taim yumi stori long 3-pela pasin em holi spirit i save kamapim​—pasin laikim, amamas, na bel isi.

Pasin Laikim Olsem Baibel i Makim

 4. Jisas i skulim ol disaipel bilong em long kamapim wanem kain pasin laikim?

⁴ Pasin laikim em holi spirit i kamapim i narapela kain tru long pasin laikim em ol manmeri bilong graun i save kamapim. Em i narapela kain olsem wanem? Wanpela bikpela stiatok i as bilong en. Jisas i stori long dispela samting long Bikpela Tok Long Maunten. (Ritim Matyu 5:​43-48.) Em i kamapim olsem ol sinman i save mekim pasin laikim long ol narapela olsem ol narapela i mekim long ol. Bilong kamapim dispela kain pasin laikim, i no olsem man i daunim sampela laik bilong em yet, nogat, em i mekim tasol wankain pasin long ol narapela olsem ol i mekim long em. Sapos yumi laik ‘soim olsem yumi pikinini bilong Papa i stap long heven,’ yumi mas i stap narapela kain. Yumi no ken mekim pasin long ol narapela olsem ol i mekim long yumi, nogat, yumi mas tingim na mekim pasin long ol narapela olsem Jehova i save mekim. Tasol olsem wanem yumi inap laikim ol birua bilong yumi, olsem Jisas i tokim yumi long mekim?

 5. Olsem wanem yumi ken mekim pasin laikim long ol man i birua long yumi?

⁵ Tingim wanpela eksampel long Baibel. Taim Pol na Sailas i autim tok long Filipai, ol hetman i arestim ol, paitim ol nogut tru, na kalabusim ol na pasin lek bilong tupela long hap plang. Na ating woda tu i mekim nogut long ol. Taim guria i kamap na ol sen bilong ol i lus, yu ting ol i gat tingting long bekim wankain pasin woda i bin mekim long ol? Nogat. Ol i tingim tru woda. Pasin bilong ol long daunim laik bilong ol yet na laikim ol narapela i kirapim ol wantu long helpim woda, na dispela i opim rot long woda na famili olgeta bilong em long kisim bilip. (Apo. 16:​19-34) Planti brata bilong yumi long nau, ol tu i bin mekim wankain pasin na “blesim ol man husat i mekim nogut long [ol].”​—Rom 12:14.

 6. Olsem wanem yumi ken kamapim pasin bilong daunim laik bilong yumi yet na laikim ol brata? (Lukim blok long pes 21.)

⁶ Pasin laikim yumi mekim long ol wanbilip i bikpela moa. “Yumi gat wok long givim laip bilong yumi long helpim ol brata.” (Ritim 1 Jon 3:​16-18.) Tasol planti taim yumi ken mekim ol liklik samting bilong kamapim pasin laikim. Olsem: Sapos yumi mekim sampela tok o pasin i bagarapim bel bilong brata, orait yumi ken go pas long mekim samting bilong kamap wanbel gen, long dispela rot yumi soim pasin laikim. (Mat. 5:​23, 24) Tasol olsem wanem sapos wanpela i bagarapim bel bilong yumi? Yumi redi long lusim rong bilong em, o sampela taim yumi save tingting long dispela rong na bel nogut i stap? (Sng. 86:5) Pasin laikim em holi spirit i kamapim inap helpim yumi long lusim tingting long ol liklik rong, na amamas long fogivim narapela olsem “Jehova i amamas long fogivim” yumi.​—Kol. 3:​13, 14; 1 Pita 4:8.

7, 8. (a) Olsem wanem pasin bilong laikim ol manmeri i poroman wantaim pasin bilong laikim tru God? (b) Olsem wanem yumi ken strongim pasin bilong yumi long laikim tru Jehova? (Lukim piksa daunbilo.)

⁷ Olsem wanem yumi inap kisim pasin bilong daunim laik bilong yumi yet na laikim ol brata? Yumi ken mekim olsem long rot bilong strongim pasin bilong yumi long laikim tru God. (Efe. 5:​1, 2; 1 Jon 4:​9-11, 20, 21) Hap taim yumi lusim bilong i stap klostu long Jehova long rot bilong ritim Baibel, tingim tingim long bel ol samting, na beten, dispela i pulapim bel bilong yumi long ol gutpela samting na i strongim pasin bilong yumi long laikim Papa bilong yumi long heven. Tasol yumi mas yusim gut taim bilong yumi na bai yumi ken i go klostu long God.

⁸ Olsem: Tingim olsem sapos i gat wanpela aua tasol bilong de we yu inap ritim Baibel, tingim tingim long bel ol tok bilong en, na beten long Jehova, na i tambu long mekim olsem long narapela taim. Yu bai wok strong tru na bai i no gat wanpela samting i pasim yu long i go klostu long Jehova insait long dispela haptaim. Tru, i no gat wanpela man inap pasim yumi long beten long God, na planti bilong yumi inap ritim Baibel long taim yumi yet i laik mekim olsem. Tasol yumi mas mekim ol samting na bai ol wok bilong wan wan de i no ken pasim taim bilong yumi long i go klostu long God. Olsem wanem? Yu save yusim gut taim bilong yu long olgeta wan wan de na bai yu gat taim bilong i go klostu long Jehova?

“Amamas Em Holi Spirit i As Bilong En”

 9. Amamas em holi spirit i kamapim i wanem kain?

⁹ Ol pasin holi spirit i kamapim i save stap strong long olgeta taim, dispela em i wanpela gutpela samting. Amamas, em namba tu pasin yumi bai skelim, em wanpela pasin i save stap strong olsem. Amamas i olsem wanpela strongpela plaua em inap gro long hap we graun i drai na i strong. Long olgeta hap bilong graun, planti wokboi bilong God i ‘bin kisim tok bilong God maski ol man i givim hevi long ol. Na ol i bin mekim wantaim amamas em holi spirit i as bilong en.’ (1 Tes. 1:6) Sampela narapela i karim ol hevi na i sot long ol samting ol i nidim. Tasol Jehova i strongim ol long rot bilong spirit bilong em na bai ol inap ‘sanap strong na i no les kwik, na ol i ken mekim wantaim amamas.’ (Kol. 1:11) Wanem samting i as bilong dispela amamas?

10. Wanem samting i as bilong amamas bilong yumi?

¹⁰ Ol mani samting bilong dispela graun bilong Satan “i bilong stap sotpela taim tasol,” tasol ol gutpela samting Jehova i givim, ol bai stap oltaim. (1 Tim. 6:17; Mat. 6:​19, 20) Jehova i tok promis long yumi inap i stap amamas inap oltaim oltaim. Yumi amamas long i stap insait long wanpela lain bratasista Kristen i stap long olgeta hap. Na bikpela samting moa, pasin bilong yumi long pas gut wantaim God i as bilong amamas bilong yumi. Yumi gat wankain tingting olsem Devit, husat i bin stap olsem ranaweman, em i singsing na litimapim nem bilong Jehova, olsem: “Laip bilong dispela graun i gutpela, tasol marimari bilong yu i nambawan tru. Olsem na mi litimapim nem bilong yu. Bai mi tenkyu long yu na litimapim nem bilong yu inap mi dai.” (Sng. 63:​3, 4) Maski ol hevi i painim yumi, yumi amamas na litimapim nem bilong God long bel bilong yumi.

11. Bilong wanem em i bikpela samting long yumi mekim wok bilong Jehova wantaim amamas?

¹¹ Aposel Pol i tokim ol Kristen olsem: “Amamas oltaim long Bikpela. Mi tok gen, yupela i mas amamas!” (Fili. 4:4) Bilong wanem em i bikpela samting long ol Kristen i mekim wok bilong Jehova wantaim amamas? Long wanem, Satan i bin sutim tok long wok bos bilong Jehova. Satan i tok i no gat wanpela man i mekim wok bilong God long laik bilong em yet. (Jop 1:​9-11) Sapos yumi mekim wok bilong Jehova olsem wanpela wok yumi mas mekim na i no gat amamas, ofa yumi mekim bilong givim biknem long Jehova bai i no gutpela olgeta. Olsem na yumi wok strong long bihainim tok bilong man bilong raitim song, em i tok: “Yupela i mas belgut long Bikpela na lotu long em. Yupela singim song bilong amamas na go klostu long em.” (Sng. 100:2) Taim bel bilong yumi i kirapim yumi long mekim wok bilong God wantaim amamas, dispela i givim glori long God.

12, 13. Yumi ken mekim wanem bilong daunim bel hevi?

¹² Tasol sampela taim ol gutpela wokboi bilong Jehova i save bel hevi na ol i hatwok long ting olsem ol gutpela samting bai kamap. (Fili. 2:​25-30) Wanem samting bai helpim yumi long kain taim olsem? Efesus 5:​18, 19 i tok: “Yupela i mas wok yet long larim holi spirit i pulap long yupela. Na singsing long ol arapela long ol song na ol singsing i litimapim nem bilong God na ol song bilong lotu. Na long bel bilong yupela, singsing na mekim musik long Jehova.” Olsem wanem yumi ken bihainim dispela tok?

¹³ Taim yumi bel hevi, yumi ken beten long Jehova na wok strong long tingim tingim long bel ol gutpela samting. (Ritim Filipai 4:​6-9.) Sampela i save singsing isi na bihainim musik bilong ol singsing bilong Kingdom, na dispela i save strongim bel bilong ol na helpim ol long tingim ol gutpela samting. Bikpela hevi i painim wanpela brata na dispela i bagarapim tru bel bilong em. Em i tok: “Mi beten oltaim, na tu, mi putim long tingting ol tok bilong sampela singsing bilong Kingdom. Taim mi singsing long tingting o singim strong ol naispela song bilong litimapim nem bilong Jehova, dispela i mekim bel bilong mi i stap isi. Na tu, buk Go Klostu Long Jehova i kamap long dispela taim. Insait long wanpela yia, mi ritim dispela buk tupela taim. Em i olsem marasin i mekim gut bel bilong mi. Mi save olsem Jehova i blesim mi tru.”

‘Bel Isi i Save Bungim Yumi Wantaim’

14. Bel isi em holi spirit i as bilong en i kamapim wanem gutpela samting?

¹⁴ Long ol kibung intenesenel bilong yumi, ol bratasista Kristen bilong kain kain kantri i save amamas long bung wantaim. Dispela i kamapim klia wanpela gutpela samting bilong bel isi bilong lain bilong God​—yumi stap wanbel wantaim. Ol man i lukim dispela samting, ol i kirap nogut olsem ol man em ol i ting ol i save stap birua birua, ol i “wok strong long holimpas pasin wanbel bilong holi spirit na stap bel isi, em pasin i save bungim [ol] wantaim.” (Efe. 4:3) Dispela pasin wanbel i narapela kain tru taim yumi tingim hatwok sampela i bin mekim bilong lusim pasin birua.

15, 16. (a) Bipo Pita i gat wanem kain tingting? Olsem wanem dispela i givim hatwok long em? (b) Olsem wanem Jehova i helpim Pita long stretim tingting bilong em?

¹⁵ I hatwok long ol man bilong kain kain ples na sindaun i stap wanbel wantaim. Bilong save long ol hevi ol man i mas winim bilong stap wanbel olsem, yumi ken skelim stori bilong wanpela man bilong bipo, em aposel Pita. Tok em i mekim i kamapim klia tingting bilong em long ol man bilong ol narapela lain i no bin katim skin, em i tok: “Yupela i save olsem i tambu tru long wanpela Juda i go klostu o toktok wantaim wanpela man bilong narapela lain, tasol God i soim mi olsem mi no ken tok long wanpela man olsem em i doti o em i no klin.” (Apo. 10:​24-29; 11:​1-3) Taim Pita i wok long kamap bikpela, em i kisim wankain tingting olsem ol man long taim bilong em, em i ting Lo i tok olsem em i mas laikim ol wanlain Juda tasol. Em i ting olsem em orait tasol long tingim ol man bilong ol narapela lain olsem ol birua na em i mas nolaik tru long ol.b

¹⁶ Ating Pita i no stap bel isi taim em i go insait long haus bilong Kornilius. Yu ting wanpela man em bipo i bin tingting nogut long ol man bilong ol narapela lain, em inap “wok gut wantaim” ol na “stap bel isi,” em dispela pasin i save bungim ol man wantaim? (Efe. 4:​3, 16) Yes, em inap. Sampela de paslain long dispela, holi spirit bilong God i bin redim bel bilong Pita, na Pita inap stretim tingting na daunim pasin bilong bel nogut long narapela lain. Long rot bilong wanpela visen, Jehova i kamapim klia long Pita olsem taim God i tingim ol man, em i no tingim kala bilong skin na ples bilong ol. (Apo. 10:​10-15) Olsem na Pita inap tokim Kornilius olsem: “Nau mi luksave olsem God i save mekim wankain pasin long olgeta man. Na em i save laikim man husat i save pret long em na bihainim stretpela pasin maski em i bilong wanem lain.” (Apo. 10:​34, 35) Tingting bilong Pita i senis, na em i kamap wanbel tru wantaim “olgeta wanbilip.”​—1 Pita 2:17.

17. Olsem wanem pasin wanbel i stap namel long lain bilong God i narapela kain?

¹⁷ Samting i painim Pita i helpim yumi long kliagut long bikpela senis i wok long kamap namel long lain bilong God long nau. (Ritim Aisaia 2:​3, 4.) Planti milion manmeri “bilong olgeta kantri na bilong olgeta lain na bilong olgeta lain pipol na bilong olgeta tokples,” ol i bin stretim tingting bilong ol na bai i stret wantaim “laik bilong God, em dispela laik em i gutpela, na em i orait, na i gutpela olgeta.” (Rev. 7:9; Rom 12:2) Planti bilong ol i bin insait tru long pasin birua, kros pait, na i no wanbel, em ol pasin bilong graun bilong Satan. Tasol long rot bilong stadi long Baibel na helpim ol i kisim long holi spirit, ol i lain long “mekim ol samting i save kamapim bel isi.” (Rom 14:19) Pasin wanbel dispela i kamapim i litimapim nem bilong God.

18, 19. (a) Olsem wanem yumi olgeta wan wan inap strongim bel isi na pasin wanbel bilong kongrigesen? (b) Bai yumi skelim wanem samting long stadi i kamap bihain long dispela?

¹⁸ Yumi olgeta wan wan inap mekim wanem bilong strongim bel isi na pasin wanbel insait long lain bilong God? Insait long planti kongrigesen i gat ol brata na sista i bin kam long ol narapela kantri. Ating pasin bilong ples bilong sampela i narapela kain na ol i no save gut long tokples bilong yumi. Yumi traim long kamap pren bilong ol? Baibel i tok yumi mas mekim olsem. Pol i raitim pas long kongrigesen long Rom, insait long dispela kongrigesen i gat ol Juda na ol man bilong ol narapela lain. Em i tok: “Yupela i mas welkamim ol arapela brata, olsem Krais i bin welkamim yumi, na mekim olsem bilong givim glori long God.” (Rom 15:7) Olsem wanem? I gat wanpela long kongrigesen em yu inap save gut moa long em?

¹⁹ Yumi ken mekim wanem samting moa na bai holi spirit inap wok insait long laip bilong yumi? Stadi i kamap bihain long dispela bai bekim dispela askim, na bai yumi skelim ol narapela pasin em holi spirit i kamapim.

[Ol Futnot]

Bai Yu Bekim Olsem Wanem?

• Olsem wanem yumi ken kamapim pasin bilong daunim laik bilong yumi yet na laikim ol brata?

• Bilong wanem em i bikpela samting long yumi mekim wok bilong God wantaim amamas?

• Olsem wanem yumi ken strongim bel isi na pasin wanbel bilong kongrigesen?

[Blok long pes 21]

“Ol i Trupela Kristen”

Wanpela buk (Between Resistance and Martyrdom​—Jehovah’s Witnesses in the Third Reich) i stori long ol Witnes long taim bilong Hitler. Buk i kamapim tok bilong wanpela yangpela man Juda i kalabus, em i stori long namba wan taim em i bungim ol Witnes Bilong Jehova bihain long em i kamap long banis kalabus nogut long Neuengamme, em i tok:

“Taim mipela ol Juda i bin lusim kalabus bilong Dachau na i kam long dispela banis kalabus, ol narapela Juda i kirap haitim olgeta samting ol i gat na bai ol i no ken serim wantaim mipela. . . . Bipo, taim mipela i no stap long kalabus, mipela i save helpim narapela narapela. Tasol insait long kalabus, we dai inap painim man hariap, olgeta i tingim ol yet tasol. Tasol tingim samting ol Sumatin Bilong Baibel i mekim. Long dispela taim ol i wok hat tru long stretim sampela paip bilong wara. Ples i kol tru, na inap de olgeta ol i sanap long wara i kol olsem ais. Mipela i no save olsem wanem ol inap karim dispela hevi. Ol i tok Jehova i givim strong long ol. Olsem mipela, ol tu i mas kaikai bret bilong ol, long wanem, ol i hangre. Tasol ol i mekim wanem? Ol i bungim olgeta bret bilong ol, kaikai hap bilong en, na givim narapela hap long ol wanbilip bilong ol husat i bin lusim Dachau na nau tasol ol i kam long dispela hap. Ol i welkamim ol na givim kis long ol. Paslain long ol i kaikai, ol i beten. Bihain ol i belgut na amamas. Ol i tok ol i no hangre moa. Long dispela taim mi tingting: Ol i trupela Kristen.”

[Ol Piksa long pes 19]

Yu save yusim gut taim bilong yu na bai yu gat taim bilong i go klostu long Jehova, maski yu gat ol narapela wok?