Pasin Bilong Lukautim Lain Bilong God Long Taim Bilong Ol Kristen
“Bipo God i tingting pinis long . . . em bai i bungim olgeta samting long Krais, ol samting bilong heven na bilong graun tu.”—EFESUS 1:9, 10.
DISPELA wok bilong bungim “olgeta samting bilong heven” em i kirap long yia 33 C.E., taim “Israel tru bilong God” i kamap nupela. (Galesia 6:16; Aisaia 43:10; 1 Pita 2:9, 10) Bihain long taim bilong ol aposel, wok bilong bungim dispela lain em i go liklik, long wanem, Satan i tromoi pikinini bilong “gras nogut,” olsem ol man i bikhet na givim baksait long bilip tru, namel long ol Kristen tru (em Jisas i bin kolim ol olsem “wit”). Tasol bihain bihain, taim bilong “las de” i kam klostu na long dispela taim Israel tru bilong God i kamap ples klia gen, na long 1919 dispela lain i kisim wok bilong lukautim olgeta samting bilong Jisas.a—Matyu 13:24-30, 36-43; 24:45-47; Daniel 12:4.
2 Long taim bilong Namba Wan Pait, ol Kristen God i bin makim ol i mekim ol strongpela wok, olsem Moses na Elaija i bin mekim.b (KTH 11:5, 6) Kirap long 1919 ol i bin autim gutnius long ol man bilong graun i birua long ol, na ol i bihainim pasin bilong Elaija na ol i no pret long mekim dispela wok. (Matyu 24:9-14) Na kirap long 1922 ol i bin tokaut long kot bilong Jehova bai painim ol man, olsem Moses i bin kamapim ol samting nogut tru bilong God long ol Isip bilong bipo. (KTH 15:1; 16:2-17) Liklik hap lain bilong ol dispela Kristen God i bin makim, long nau ol i olsem as bilong lain bilong nupela taim, em lain Witnes Bilong Jehova.
Lain Bilong Bosim Ol Kristen i Mekim Wok
3 Kirap long taim lain Kristen i kamap nupela, ol disaipel bilong Jisas em God i bin makim, ol i stretim gut ol wok bilong ol. Taim ol disaipel i wok long kamap planti, ol i kamapim ol kongrigesen long ol taun na ol i makim ol man long kamap elda. (Taitus 1:5) Bihain long yia 33 C.E., 12-pela aposel ol i mekim wok olsem wanpela lain bilong bosim ol Kristen. Ol i go pas long mekim wok bilong autim tok na ol i no pret. (Aposel 4:33, 35, 37; 5:18, 29) Ol i stretim wok bilong tilim kaikai long ol Kristen ol i sot long kaikai, na taim ol i kisim tok olsem sampela man long Samaria i laik harim gutnius, ol i salim Pita na Jon i go helpim ol dispela lain. (Aposel 6:1-6; 8:6-8, 14-17) Barnabas i kisim Pol i go long ol bilong kamapim klia long ol olsem dispela man pastaim em i bin mekim nogut long ol Kristen, nau em i kamap wanpela disaipel bilong Jisas. (Aposel 9:27; Galesia 1:18, 19) Na taim Pita i autim tok pinis long Kornilius na ol wanhaus bilong em, em i go bek long Jerusalem na em i stori long ol aposel na ol narapela brata Juda olsem spirit holi i bin soim em long ol samting God i laik bai em i mekim long dispela lain.—Aposel 11:1-18.
4 Orait bihain ol man i mekim nogut tru long lain bilong bosim ol Kristen. Ol i kalabusim Pita na ol i laik kilim em i dai, tasol wanpela ensel i kam helpim em. (Aposel 12:3-11) Nau long namba wan taim, wanpela man i no bilong ol 12-pela aposel em i kisim bikpela wok long Jerusalem. Taim Pita i lusim kalabus, em i tokim wanpela lain ol i bung long haus bilong mama bilong Jon Mak: “Yupela i mas tokim Jems [em brata bilong Jisas] na ol brata long ol dispela samting.”—Aposel 12:17.
5 Paslain long dispela, Judas Iskariot, em dispela aposel i bin kamapim Jisas, em i bin kilim i dai skin bilong em yet, olsem na ol i kisim tingting olsem ol i mas givim “wok bilong en” olsem aposel long wanpela man em i bin wokabaut wantaim Jisas taim em i mekim wok bilong autim tok, na em i bin lukim Jisas i dai na kirap bek. Tasol taim ol i kilim i dai Jems, em brata bilong Jon, i no gat wanpela i kisim ples bilong em olsem wanpela bilong ol 12-pela aposel. (Aposel 1:20-26; 12:1, 2) Tasol bihain, taim Baibel i mekim narapela tok long lain bilong bosim ol Kristen, em i soim yumi olsem dispela lain i go bikpela. Taim wanpela tok pait i kamap, olsem ol man bilong ol narapela lain i bihainim Jisas ol i mas aninit long Lo Bilong Moses o nogat, ol i salim pas long “ol aposel na ol hetman bilong sios” i stap long Jerusalem na bai ol yet i ken stretim dispela tok. (Aposel 15:2, 6, 20, 22, 23; 16:4) Olsem wanem na nau i gat “ol hetman” insait long lain bilong bosim ol Kristen? Baibel i no tokim yumi, tasol dispela i gutpela samting bilong helpim lain Kristen. Ol i bin kilim i dai Jems na kalabusim Pita, na dispela i kamapim klia olsem bihain ol man inap kalabusim o kilim i dai ol aposel. Sapos kain hevi olsem i kamap, orait ol narapela elda i winim pinis mak na ol i gat save long ol wok samting bilong lain bilong bosim ol Kristen, ol inap mekim stret wok bilong lukautim ol kongrigesen olsem ol aposel i bin mekim.
6 Taim Pol i kam long Jerusalem long yia 56 C.E. samting, em i kam ripot long Jems, na Baibel i tok “olgeta hetman bilong sios tu i kam bung long dispela taim.” (Aposel 21:18) Bilong wanem Baibel i no tok long sampela aposel i bin i stap long dispela bung? Long dispela samting tu, Baibel i no tokim yumi. Tasol bihain, wanpela man bilong raitim stori bilong ol samting i bin kamap bipo, em Yusibius, em i tok, paslain long yia 66 C.E., “ol man i wok long pasim tok long kilim i dai ol aposel i stap yet, na ol i mas ranawe lusim Judia. Tasol long strong bilong Krais ol i go long olgeta hap na autim tok na skulim ol man.” (Eusebius, Buk III, V, v. 2) Tru, tok bilong Yusibius i no hap bilong Baibel, tasol dispela tok i stret wantaim tok Baibel i mekim long dispela samting. Olsem: Long yia 62 C.E., Pita i stap pinis long Babilon—em i longwe tru long Jerusalem. (1 Pita 5:13) Tasol long yia 56 C.E., na i go inap long yia 66 C.E., i gat wanpela lain bilong bosim ol Kristen em i mekim wok long Jerusalem.
Lain Bilong Lukautim Wok Long Nau
7 Kirap long yia 33 C.E. na i go inap long taim bilong bikpela hevi tru i bin painim Jerusalem, ol Juda Kristen tasol i insait long lain bilong bosim ol Kristen. Taim Pol i go long Jerusalem long yia 56 C.E., em i kisim save olsem planti Juda Kristen long Jerusalem ol i “strong moa long bihainim lo bilong Moses,” maski ol i “bilip long Bikpela bilong yumi Jisas Krais.”c (Jems 2:1; Aposel 21:20-25) Ating ol dispela Juda i ting, wanpela man i no bilong lain Juda em i no inap i stap insait long lain bilong bosim ol Kristen. Tasol long taim bilong yumi i gat narapela senis i kamap insait long dispela lain. Long nau, ol Kristen God i bin makim na ol i insait long dispela lain, olgeta i man bilong ol narapela lain, na Jehova i bin mekim gut tru long wok bilong ol long lukautim lain Kristen.—Efesus 2:11-15.
8 Kirap long taim ol i kamapim Sosaiti Was Taua Bilong Pensilvenia long 1884 na i kam inap long 1972, presiden bilong Sosaiti i holim bikpela strong insait long oganaisesen bilong Jehova, tasol Lain Bilong Bosim Ol Witnes ol i wok wantaim ol dairekta bilong Sosaiti. Oganaisesen i bin kisim planti blesing insait long ol dispela yia, na dispela i kamapim klia olsem Jehova i orait long dispela pasin bilong stretim wok bilong oganaisesen bilong em. Namel long 1972 na 1975, Lain Bilong Bosim Ol Witnes i go bikpela inap long 18 man. Pasin bilong lukautim oganaisesen i wok long kamap wankain olsem pasin i stap long lain Kristen bilong pastaim—Lain Bilong Bosim Ol Witnes i kisim bikpela wok moa bilong lukautim oganaisesen, na sampela bilong dispela lain ol i dairekta bilong Sosaiti Was Taua Bilong Pensilvenia.
9 Bihain long 1975, sampela namel long dispela 18 man ol i dai pinis. Ol i winim pinis strong bilong dispela graun na ol i ‘sindaun wantaim Jisas long sia king bilong em’ long heven. (KTH 3:21) Long dispela as na sampela as moa, long nau i gat 10-pela insait long Lain Bilong Bosim Ol Witnes—wanpela bilong ol i bin i go insait long dispela lain long 1994. Klostu olgeta i lapun pinis. Tasol ol dispela brata em God i bin makim long spirit holi, ol i kisim gutpela helpim long mekim bikpela wok bilong ol. Ol i kisim we dispela helpim? Bilong bekim dispela askim, yumi ken tingim sampela nupela pasin i bin kamap insait long lain bilong God long nau.
Israel Bilong God i Kisim Helpim
10 Long 1884, klostu olgeta manmeri i bung wantaim lain Israel bilong God ol i bilong lain Kristen God i bin makim. Tasol isi isi i gat narapela lain i wok long kamap, na long 1935 ol i kisim save olsem dispela lain em ol dispela “planti manmeri tru,” em Kamapim Tok Hait sapta 7 i stori long en. Ol i gat tingting long i stap oltaim long graun, olsem na dispela lain em ‘ol samting bilong graun’ Jehova i laik bungim aninit long Krais. (Efesus 1:10) Dispela lain em “ol arapela sipsip” bilong tok piksa bilong Jisas long ol banis sipsip. (Jon 10:16) Bihain long 1935, planti arapela sipsip moa yet i kam insait long oganaisesen bilong Jehova. Ol “i spit i kam olsem klaut win i bringim i kam antap long solwara, na olsem ol pisin i flai i kam bek long haus bilong ol.” (Aisaia 60:8) Dispela bikpela lain i wok long i go bikpela moa, na lain God i bin makim ol i wok long i dai na lain bilong ol i go liklik, olsem na sampela bilong ol arapela sipsip em ol i winim mak, nau ol i kisim sampela bikpela wok insait long lain Kristen. Wanem ol wok?
11 Long olgeta taim, “lain manmeri i holi,” em lain bilong Jehova, ol i gat bikpela wok long tokaut long olgeta gutpela pasin Jehova i bin mekim. Pol i toktok long dispela wok na em i kolim olsem wanpela ofa bilong haus bilong God, na ol man bilong kamap “pris bilong lain bilong king,” Jisas i givim wok long ol long autim tok na skulim ol man. (Kisim Bek 19:5, 6; 1 Pita 2:4, 9; Matyu 24:14; 28:19, 20; Hibru 13:15, 16) Tasol Wastaua (tok Inglis) bilong Ogas 1, 1932, i kamapim sampela tok bilong kirapim ol manmeri em Jonadap i olsem piksa bilong ol na bai ol i ken insait long dispela wok. Na tru tumas, planti bilong dispela ol arapela sipsip ol i insait pinis long dispela wok. Long nau, klostu olgeta wok bilong autim tok, em ol arapela sipsip i mekim—em bikpela hap bilong dispela wok bilong ol long i “stap long haus bilong [God] na mekim wok bilong en” long san na long nait. (KTH 7:15) Na i wankain tu long taim lain bilong Jehova long nau ol i bin kirap nupela long mekim wok bilong ol—ol elda bilong kongrigesen em ol Kristen God i bin makim, olsem ol “sta” long han sut bilong Krais Jisas. (KTH 1:16, 20) Tasol Wastaua (tok Inglis) bilong Me 1, 1937, i tokaut olsem ol arapela sipsip em ol inapim mak, ol inap holim wok olsem wokman bilong lukautim kongrigesen (olsem wasman siaman). Sapos i gat sampela man insait long kongrigesen em ol i bilong lain God i bin makim tasol ol i no inap mekim dispela wok, orait ol arapela sipsip ol i ken mekim. Long nau, klostu olgeta elda bilong ol kongrigesen ol i bilong lain arapela sipsip.
12 Olsem wanem? Ating i no stret long givim bikpela wok olsem long ol arapela sipsip? Yumi no ken ting olsem, long wanem, dispela pasin i bin stap long bipo tu. Sampela man bilong ol narapela lain i bihainim lotu bilong ol Juda (ol i sindaun long Israel) ol i bin holim bikpela wok long Israel bilong bipo. (2 Samuel 23:37, 39; Jeremaia 38:7-9) Taim ol Juda i lusim pinis kalabus long Babilon, sampela Netinim (em ol wokman bilong haus bilong God na ol i no bilong lain Israel) ol i kisim sampela bikpela wok long haus bilong God em bipo ol man bilong lain Livai tasol inap mekim. (Esra 8:15-20; Nehemia 7:60) Na Moses tu, em ol i bin lukim em i stap wantaim Jisas long dispela samting olsem driman, em i bihainim ol gutpela tok em Jetro, wanpela man bilong lain Midian, i givim long em. Bihain em i askim Hobap, em pikinini bilong Jetro, long soim rot long ol long ples drai nating ol i mas wokabaut long en.—Kisim Bek 18:5, 17-24; Namba 10:29.
13 Klostu long pinis bilong dispela 40 yia bilong ol long ples drai nating, Moses i beten askim Jehova long makim wanpela man bilong kisim ples bilong em, long wanem, em i save bai em i no ken i go insait long Graun Bilong Promis. (Namba 27:15-17) Jehova i tokim em long sanap long ai bilong olgeta manmeri na makim Josua, na Moses i mekim olsem, maski skin bilong em i strong yet na em i no pinis long dispela taim stret long lukautim ol Israel. (Lo 3:28; 34:5-7, 9) Na ol man bilong nau em God i bin makim long spirit holi, ol i mekim wankain pasin daun olsem Moses na ol i kirap pinis long givim sampela bikpela wok long ol man namel long ol arapela sipsip em ol inapim mak bilong mekim dispela wok.
14 I gat sampela tok profet tu i tok long dispela pasin bilong givim sampela wok moa long ol arapela sipsip insait long oganaisesen. Sekaraia i tok profet olsem wanpela man Filistia i no bilong lain Israel em bai “i stap [hetman] insait long lain bilong Juda.” (Sekaraia 9:6, 7) Em nau, Sekaraia i tok olsem wanpela man pastaim em i birua bilong lain Israel, em bai kirap bihainim trupela lotu na kamap olsem wanpela hetman insait long Graun Bilong Promis. Na tu, taim Jehova i givim tok long Israel bilong God, em i tok: “Ol man bilong ol arapela kantri bai i kam mekim wok bilong yupela. Bai ol i was long ol sipsip samting bilong yupela, na bai ol i brukim graun na planim kaikai. Na bai ol i lukautim tu ol gaden wain bilong yupela. Tasol yupela yet bai i stap olsem ol pris bilong Bikpela, na bai ol i kolim yupela ol wokman bilong God bilong yumi.” (Aisaia 61:5, 6) Dispela “ol man bilong ol arapela kantri” em ol arapela sipsip. Ol i bin kisim sampela bikpela wok na bai ol i mekim planti wok moa yet, taim ol remnan bilong dispela lain God i bin makim ol i dai na go antap long heven na mekim tru wok bilong ol olsem “ol pris bilong Bikpela,” na ol bai raunim sia king bilong Jehova na mekim wok olsem “ol wokman bilong God bilong yumi.”—1 Korin 15:50-57; KTH 4:4, 9-11; 5:9, 10.
“Ol Lain Manmeri i Kamap Bihain”
15 Lain remnan i bin amamas long skulim ol arapela sipsip bambai ol inap mekim planti wok moa. Song 71:18 i tok: “Nau mi lapun pinis na gras bilong mi i waitpela olgeta, tasol God, yu no ken lusim mi. Yu mas i stap wantaim mi na bai mi autim tok bilong bikpela strong bilong yu long ol lain manmeri i kamap bihain.” Wastaua (tok Inglis) bilong Disemba 15, 1948, i stori long dispela ves na i tok, lain Kristen God i bin makim ol i lapun pinis. Na dispela nius i tok moa olsem, dispela lain God i bin makim ol i amamas long ‘wetim lait bilong tok profet bilong Baibel i kamap klia na ol inap lukim nupela lain manmeri i kamap.’ Ol i toktok long wanem lain? Dispela Wastaua i tok: “Jisas i bin kolim ol olsem ‘ol arapela sipsip’ bilong em.” Dispela “lain manmeri i kamap bihain,” em ol manmeri bai stap aninit long wanpela nupela lain bilong stretim ol wok long graun na Kingdom bilong heven bai bosim.
16 Baibel i no tokaut klia long wanem taim olgeta Kristen God i bin makim ol bai lusim ol brata bilong ol bilong dispela “lain manmeri i kamap bihain” na ol bai go antap na kisim biknem wantaim Jisas. Tasol dispela lain God i bin makim ol i save dispela taim i klostu pinis. Kirap long yia 1914, ol samting Jisas i bin kolim long bikpela tok profet bilong em long “taim bilong las de” ol i wok long kamap, na dispela i makim olsem klostu nau ol lain bilong dispela graun bai bagarap. (Daniel 12:4; Matyu 24:3-14; Mak 13:4-20; Luk 21:7-24) Liklik taim nau na Jehova bai kamapim nupela taim, na dispela “lain manmeri i kamap bihain” bai ol i ‘kisim kingdom [olsem ol bai stap long graun aninit long kingdom] Papa i bin redim na makim bilong ol pinis, long taim graun i kamap nupela yet.’ (Matyu 25:34) Ol i amamas tru long tingim Paradais bai kamap bek na planti milion manmeri i dai pinis na i stap long matmat ol bai kirap bek. (KTH 20:13) Olsem wanem? Dispela lain God i bin makim ol bai i stap na sekanim ol dispela manmeri i kirap bek long matmat? Bipo, long 1925, Wastaua (tok Inglis) bilong Me 1 i tok: “Yumi no ken tok, God bai mekim olsem olsem, o em i no ken mekim olsem olsem. . . . [Tasol] yumi ken ting olsem ol manmeri bilong Sios [ol Kristen God i bin makim] ol bai go antap long heven paslain long taim bilong kirapim bek ol man i bin i stap gut long God [olsem witnes bilong em paslain long taim bilong ol Kristen].” Na tu, Wastaua bilong Ogas 1, 1990, i toktok long dispela lain God i bin makim, olsem ol bai stap yet long graun na sekanim ol man i kirap bek o nogat, na Wastaua i tok: “I no gat wok long ol i stap long graun inap long dispela taim.”d
17 Tru, yumi no save wanem samting bai painim olgeta wan wan Kristen God i bin makim. Tasol Moses na Elaija i bin i stap wantaim Jisas long dispela driman samting bilong taim bodi bilong Jisas i kamap narapela kain, na dispela i makim olsem olgeta Kristen God i bin makim na ol i kirap bek pinis ol bai stap wantaim Jisas taim em i kam long bikpela lait bilong “givim pe long olgeta manmeri inap long pasin ol i bin mekim,” taim em i skelim ol pinis long kot na givim pe long ol i stret long dispela. Na tu, yumi tingim tok promis bilong Jisas olsem ol Kristen God i bin makim, em ol “i winim pait,” ol bai wok wantaim em long ‘bosim ol lain man strong tru na brukim ol liklik, olsem man i brukim wanpela sospen graun,’ long taim bilong Armagedon. Taim Jisas i kam long bikpela lait, ol bai i sindaun wantaim em na “bosim ol 12-pela lain bilong Israel.” Ol bai wok wantaim Jisas na ‘krungutim Satan aninit long lek bilong ol.’—Matyu 16:27–17:9; 19:28; KTH 2:26, 27; 16:14, 16; Rom 16:20; Stat 3:15; Song 2:9; 2 Tesalonaika 1:9, 10.
18 Olsem Jehova i save mekim long bosim oganaisesen bilong em, em i wok i go bilong “bungim olgeta samting long Krais.” Wok bilong Jehova long bungim “ol samting bilong heven,” klostu em bai pinis. Liklik taim nau na olgeta bilong lain 144,000 bai bungim Jisas long heven bilong mekim ‘marit bilong Pikinini Sipsip.’ Olsem na planti strongpela brata em ol i stap longtaim pinis insait long lain arapela sipsip, em ol i makim ‘ol samting bilong graun,’ ol i bin kisim sampela bikpela wok bilong helpim ol brata bilong ol em God i bin makim. Man! Nau yumi stap long wanpela bikpela taim tru! Yumi amamas tru long lukim ol laik bilong Jehova i wok long kamap, na liklik taim bai em inapim tru ol dispela laik bilong em! (Efesus 1:9, 10; 3:10-12; KTH 14:1; 19:7, 9) Na ol arapela sipsip ol i amamas tru long helpim ol brata bilong ol em God i bin makim, na tupela lain i wok wantaim olsem “wanpela lain sipsip tasol” aninit long “wanpela wasman tasol” na ol i daun long King, em Krais Jisas, na dispela i litimapim nem bilong God Jehova, em King bilong heven na graun!—Jon 10:16; Filipai 2:9-11.
[Ol Futnot]
a Lukim Wastaua (tok Inglis) bilong Ogas 1, 1981, pes 16-26.
b Olsem: Kirap long 1914, ol i kamapim wanpela piksa, The Photo-Drama of Creation—i gat 4-pela hap bilong en—long ol haus piksa samting long olgeta hap bilong Wes, na planti manmeri tru ol i go lukim.
c Bilong save olsem i gat wanem as na sampela Juda Kristen i strong moa long bihainim Lo, lukim buk Insight on the Scriptures, em Sosaiti Wastaua bilong Nu Yok i wokim, Volyum 2, pes 1163, 1164.
d Lukim Wastaua, Februeri 1, 1991, pes 30, 31; Disemba 15, 1990 (tok Inglis), pes 30.
Yu Inap Stori Long Dispela?
◻ Wok bilong oganaisesen bilong God i go bikpela olsem wanem long taim bilong ol aposel?
◻ Nau long taim bilong yumi, wanem ol senis i kamap insait long Lain Bilong Bosim Ol Witnes Bilong Jehova?
◻ Wanem ol skripsa i makim olsem i stret ol arapela sipsip insait long oganaisesen bilong Jehova i kisim namba long mekim sampela bikpela wok?
◻ Olsem wanem God i bin bungim “ol samting bilong heven” na ‘ol samting bilong graun’ long Krais?
[Askim Bilong Stadi]
1, 2. (a) Olsem wanem long wok bilong bungim “ol samting bilong heven,” kirap long yia 33 C.E.? (b) Kirap long 1914, olsem wanem ol Kristen God i bin makim ol i bihainim wankain pasin olsem bilong Moses na Elaija?
3. Wanem ol samting i kamap na i soim yumi olsem lain Kristen bilong pastaim ol i stretim gut wok bilong ol?
4. Ol i bin mekim wanem na ol i laik kilim i dai Pita? Tasol olsem wanem em i abrusim bagarap?
5. Taim ol i kilim i dai Jems, wanem senis i kamap insait long lain bilong bosim ol Kristen?
6. Olsem wanem lain bilong bosim ol Kristen i mekim wok yet long Jerusalem, maski ol man i bin insait long en long pastaim ol i no stap moa long dispela taun?
7. Wanem bikpela samting long Lain Bilong Bosim Ol Witnes long nau i narapela kain long lain bilong bosim ol Kristen bilong pastaim?
8, 9. Wanem ol samting i kamap insait long Lain Bilong Bosim Ol Witnes long taim bilong yumi?
10. Nau long taim bilong las de, husat ol i bung wantaim lain em God i bin makim bilong mekim wok bilong Jehova? Wanpela tok profet i tok wanem long dispela?
11. Long nau ol arapela sipsip i kisim wanem ol wok em pastaim ol Kristen God i bin makim ol tasol i bin mekim?
12. Wanem ol stori long Baibel i makim olsem i stret ol arapela sipsip ol inapim pinis mak ol i ken holim ol bikpela wok insait long oganaisesen?
13. Taim dispela lain God i bin makim ol i mekim pasin daun na givim sampela wok bilong ol long ol arapela sipsip em ol inapim pinis mak, ol i bihainim gutpela pasin bilong husat?
14. Wanem ol tok profet i makim olsem ol arapela sipsip bai wok long kisim ol bikpela wok insait long oganaisesen?
15. Nau long dispela taim bilong pinis, wanem lain Kristen ol i kamap “lapun pinis”? Dispela “lain manmeri i kamap bihain” ol i husat?
16. Dispela “lain manmeri i kamap bihain” ol i amamas long wetim wanem ol gutpela samting bai kamap?
17. Wanem ol gutpela wok tru dispela lain God i bin makim ol bai mekim wantaim King Krais Jisas?
18. (a) Olsem wanem long wok bilong ‘bungim ol samting long Krais, em ol samting bilong heven’? (b) Yumi ken tok wanem long wok bilong ‘bungim ol samting bilong graun long Krais’?
[Piksa long pes 16]
Lain bilong bosim ol Kristen bilong bipo i bin mekim wok yet long Jerusalem, maski ol man i insait long en long pastaim ol i no stap moa long dispela taun
[Ol Piksa long pes 18]
Ol strongpela Kristen God i bin makim, ol i olsem gutpela blesing bilong lain bilong Jehova
C. T. Russell 1884-1916
J. F. Rutherford 1916-1942
N. H. Knorr 1942-1977
F. W. Franz 1977-1992
M. G. Henschel 1992-