Givim Bel Long Lukautim Lain Bilong God
“Lukautim gut ol manmeri bilong God. Ol i stap olsem ol sipsip long han bilong yupela. Na yupela mas amamas long mekim dispela wok, olsem God i laik yupela i mekim.”—1 PITA 5:2.
JEHOVA i amamas long lukautim lain bilong em. (Song 23:1-4) Na Krais Jisas i “gutpela wasman bilong ol sipsip,” na em i bin orait long givim nambawan gutpela laip bilong em bilong helpim ol. (Jon 10:11-15) Olsem na aposel Pita i tokim ol elda Kristen long givim bel long lukautim lain bilong God.—1 Pita 5:2.
2 Ol wokman bilong God i mas amamas long mekim wok bilong ol. (Song 110:3) Tasol ol i mas inap long mekim sampela samting moa bilong kamap wasman. Husat inap holim wok wasman? Wasman i gat wanem ol wok? Em i mekim olsem wanem?
Bosim Gut Famili
3 Man i mas inap long mekim ol wok olsem Baibel i makim na bai em i ken “i stap wasman.” (1 Timoti 3:1-7; Taitus 1:5-9) Pol i tok, wasman “i mas bosim gut meri pikinini bilong em yet, na mekim ol pikinini i harim gut tok bilong em na bihainim.” Sapos em i no inap mekim olsem, “em i no inap kisim wok bilong lukautim [kongrigesen] bilong God.” (1 Timoti 3:4, 5) Taim Taitus i bin stap long ailan Krit na em i laik makim sampela man long holim wok wasman, Pol i tokim em: “Yu mas makim ol man i no gat rong long ai bilong ol manmeri, na ol man i gat wanpela meri tasol. Na ol pikinini bilong ol dispela man i mas bilip long Krais, na ol i no ken bihainim ol pasin i doti long ai bilong God, na ol i no ken bihainim pasin bilong bikhet na sakim tok.” (Taitus 1:6) Man i mas inap long bosim gut famili bilong em na bai em inap long i stap wasman long kongrigesen.
4 Ol papa i save bosim gut famili bilong ol na beten na stadi wantaim ol, tasol ol i mas mekim sampela samting moa tu. Ol i mas redi oltaim long helpim famili na mekim pasin sori long ol. Taim mama i karim pikinini, papamama Kristen i mas kirap mekim olsem long em, na tupela i mas bihainim gutpela sedyul. Tupela i save, sapos ol i mekim gut dispela samting long em, em bai lain long ol samting ol Kristen i mas mekim long olgeta de. Sapos papa i mekim gut dispela wok bilong em, em inapim wanpela mak bilong kisim wok elda.—Efesus 5:15, 16; Filipai 3:16.
5 Papa Kristen i mas bihainim tok bilong Pol olsem: “Yupela i no ken bagarapim tingting bilong ol pikinini . . . na mekim ol i belhat . . . Yupela i mas mekim gutpela pasin . . . na stretim gut ol pikinini na skulim ol long tok bilong Bikpela.” (Efesus 6:4) Long pasin sori papa i mas stadi wantaim mama na ol pikinini na lainim ol long ol tok bilong Baibel “na stretim gut ol” pikinini na bai ol i ken kisim save long tingting bilong Jehova. (Lo 4:9; 6:6, 7; Sindaun 3:11; 22:6) Taim ol i bung wantaim long haus bilong ol na i stap bel isi, papa i tingting long ol na putim yau long tok bilong ol wan wan. Em i ken givim askim long ol na bai ol i ken kamapim tingting bilong ol yet sapos ol i gat sampela tingting o hevi samting. Em i no save tru wanem tingting i stap long bel bilong ol, olsem na em i ken wok long kamapim dispela tingting bilong ol. Sindaun 18:13 i tok: “Putim gut yau pastaim, na bihain yu ken bekim tok. Sapos yu no mekim olsem, orait yu mekim longlong pasin.” Long nau, ol samting i save painim pikinini long olgeta de i narapela kain long ol samting i bin painim papamama taim ol yet i pikinini, olsem na papa i mas wok long kisim save long wanem tingting o hevi i stap long bel bilong ol pikinini na bai em inap helpim ol.—Lukim Jems 1:19.
6 Taim papa i save pinis long tingting o hevi bilong ol pikinini, papa mas lukim sampela tok long Baibel “em i gutpela samting tru bilong skulim yumi long tok tru na . . . stretim . . . tingting . . . na . . . wokabaut . . . na . . . skulim yumi long ol pasin i stret long ai bilong God.” Nau papa i mas lainim ol pikinini long bihainim ol dispela tok bilong Baibel na bai “dispela tok i mekim [ol] manmeri bilong God i kisim tru olgeta gutpela pasin, na [ol] i . . . redi long mekim olgeta kain gutpela wok.”—2 Timoti 3:16, 17; Song 78:1-4.
7 Ol wanskul i save putim hevi long sampela yangpela Kristen, olsem na papa i mas beten wantaim ol na beten askim God long helpim ol. Nau ol pikinini yet bai lain long beten na askim God long sambai long ol. Wanpela yangpela meri i gat 13 krismas em i dediket long God na em i laik kisim baptais, na em i tok, ol wanskul i bin tok bilas long em, na taim em i mas tokim ol long lo bilong Baibel long blut, ol i paitim em na spetim em. (Aposel 15:28, 29) Em i tok: “Mi beten askim Jehova long helpim mi long i stap isi. Mi tingim tok papamama i bin lainim mi long en long taim famili i bin stadi, olsem long i stap isi na no ken kros long taim nogut olsem.”—2 Timoti 2:24.
8 Na sapos elda i no gat pikinini, em tu i ken helpim famili o ol wanhaus bilong em long ol samting bilong spirit na skin; em i ken helpim meri bilong em na husat wanblut moa i stap long haus. (1 Timoti 5:8) Man i mekim gutpela wok bos olsem, em i bihainim mak bilong elda bilong kongrigesen. Elda i mas ting olsem wanem long wok bilong em?
“Wok Strong” Long Bosim Wok
9 Aposel Pol i bin stap wasman long kongrigesen Kristen i stap aninit long Krais. (Efesus 3:2, 7; 4:15) Na Pol i tokim ol narapela wasman long Rom olsem: “Sapos wanpela man i gat save bilong autim tok . . . , orait em i mas autim tok inap long mak bilong bilip bilong en. Sapos wanpela man i gat save bilong helpim ol arapela manmeri bilong God, orait em i mas mekim tru wok bilong helpim ol. Sapos man i gat save bilong mekim wok tisa, orait em i mas mekim tru wok tisa. Sapos man i gat save bilong strongim bel na tingting bilong ol man, orait em i mas mekim tru wok bilong strongim bel na tingting bilong ol. Man i givim ol samting long helpim ol manmeri i sot, orait em i mas givim planti long ol. Man i bosim wanpela wok, em i mas wok strong long bosim gut dispela wok. Man i sori long ol arapela na i helpim ol, em i mas amamas na helpim ol.”—Rom 12:6-8.
10 Na Pol i tokim ol Tesalonaika: “Mipela i bin mekim wankain pasin long yupela olsem papa i save mekim long ol pikinini bilong en, na . . . kirapim tingting bilong yupela na strongim bel bilong yupela. Na . . . tokaut long yupela i mas wokabaut long pasin . . . bilong God.” (1 Tesalonaika 1:1; 2:11, 12) Pol i givim dispela tok long ol long pasin isi na pasin sori. Em i tokim ol: “Taim mipela i stap wantaim yupela, . . . mipela i bin stap olsem meri i givim susu long ol pikinini bilong en. Mipela i laikim yupela tumas, . . . Na mipela i redi tu long givim laip bilong mipela bilong helpim yupela, long wanem, yupela i bin kamap pren tru bilong mipela.” (1 Tesalonaika 2:7, 8) Pol i mekim pasin olsem bilong papa long ol brata sista, na ol elda tu i mas mekim olsem long kongrigesen.
11 Ol elda i mas i gat pasin isi na pasin sori, na ol i mas amamas long mekim wok wasman bilong ol. Pita i tok ol elda “i mas lukautim gut ol manmeri bilong God,” na ol “i mas amamas long mekim dispela wok,” na no ken mekim “bilong kisim pe,” nogat; ol “i mas i gat laik tru long mekim dispela wok.” (1 Pita 5:2) Wanpela saveman, em William Barclay, i tok: ‘Sapos man i mas mekim wanpela wok, na em i no amamas long mekim, na taim em i mekim, em i bel nogut na pes drai, wok bilong em i no inap kamap gut. Tasol Pita i tok taim ol elda i mekim wok bilong ol, ol i mas amamas tru long mekim.’—Song 2:11.
Amamas Long Mekim Wok
12 Pita i tok, ol wasman “i mas amamas long mekim” wok bilong ol. Wasman Kristen i tingim gut ol brata sista na em i amamas long lukautim ol, na em i wok aninit long Gutpela Wasman Krais Jisas. Em i mas daunim sampela laik bilong em yet na bai em i ken mekim gut dispela samting. Em i mas larim Jehova i bosim em. Jehova i Bikpela Wasman bilong “lukautim gut spirit” o laip bilong ol wasman. (1 Pita 2:25) Wasman i orait na amamas long bihainim tok bilong Jehova na helpim ol narapela man long sampela tok bilong Baibel. Sapos em yet i bin mekim wok long ol tok bilong Baibel inap longtaim liklik, em bai i save long planti skripsa, tasol ating sampela hevi inap kamap na em bai hatwok pastaim long tingim sampela tok bilong Baibel bilong stretim dispela hevi. Na sampela man bai givim askim long em, na em i save long bekim, tasol gutpela sapos em i ken painim sampela tok bilong Wastaua o narapela buk na em i ken bekim dispela tok long man. Olsem bai em i mekim wok tisa long tupela kain pasin: Em i ken lainim man long painim bekim bilong askim bilong em, na em i ken lainim man long tingim oganaisesen bilong Jehova na ol buk bilong dispela oganaisesen.
13 Sapos elda i laik helpim man long sampela kain hevi samting, tasol ol buk bilong Sosaiti i no bin stori long dispela kain hevi, elda i ken mekim wanem? Em i mas beten askim Jehova long givim sampela tingting long em, na em i mas painim sampela tok bilong Baibel i stori long ol lo bilong dispela samting. Na em i ken tokim man long bihainim tingting bilong Jisas long dispela kain hevi. Ating em i ken tokim man: “Sapos Bikpela Tisa Jisas i mas stretim dispela hevi, yu ting em bai mekim wanem?” (1 Korin 2:16) Ating dispela tok bai helpim man na bai em yet i ken tingim sampela samting em i ken mekim bilong stretim hevi bilong em. Tasol i no gutpela tumas sapos yumi tokim man long tingting bilong yumi yet, na em bai ting dispela i tok bilong Baibel! Sapos elda i no inap tingim sampela tok bilong Baibel, em i ken toktok wantaim ol narapela elda long dispela samting. Ating ol bai kamapim long taim ol i gat miting bilong ol. (Sindaun 11:14) Sapos ol i mekim olsem, ating ol bai tingim sampela tok ol i wanbel long en.—1 Korin 1:10.
Mas i Gat Pasin Isi
14 Elda i mas mekim pasin isi long taim em i skulim ol man o givim tok long ol bilong stretim ol. Pol i tok: “Ol brata, sapos . . . wanpela i bin mekim sin, . . . yupela i mas mekim pasin isi long dispela man na helpim em long stretim pasin bilong em.” (Galesia 6:1) Dispela tok “stretim pasin,” long tok Grik i olsem ol dokta i “mekim gut bun i bruk,” nogut bihain brukpela bun i stap olsem na bai dispela man i karim hevi. Saveman W. E. Vine i tok, ol man i gat strong long spirit ol i olsem ol dokta bilong oraitim dispela man i gat sik long samting bilong spirit, olsem stretim bun na oraitim em.
15 Sapos Kristen i bin popaia na mekim sampela pasin kranki, em bai hatwok long stretim bek tingting bilong em. Na i hatwok tu long ol elda i helpim dispela Kristen long mekim dispela samting. Tasol sapos ol i gat laik long helpim em, na ol i mekim pasin isi long em taim ol i wok long helpim em, ating em bai amamas long samting ol i laik mekim bilong helpim em. Olsem na ol elda Kristen i mas bihainim tok bilong Pol olsem: “Yupela i mas kisim olkain pasin olsem. Yupela i mas sori tru long ol arapela na mekim gut long ol. Yupela i mas daunim yupela yet na mekim pasin isi long ol man, na yupela i no ken belhat kwik long ol man i rongim yupela.” (Kolosi 3:12) Tasol sapos ol elda i laik helpim wanpela Kristen i bin popaia o mekim pasin kranki, na em i no laik harim tok bilong ol, ol i mas mekim wanem? Ol i mas bihainim “pasin bilong isi long ol manmeri.”—1 Timoti 6:11.
Tingting Gut na Mekim Wok
16 Long Galesia 6:1 Pol i tokim ol elda olsem: “Mekim pasin isi long dispela man na helpim em long stretim pasin bilong em.” Na nau Pol i tok moa olsem: “Yupela i mas lukaut gut long yupela yet. Nogut Satan i traim yupela na yupela tu i pundaun long sin.” Sapos elda i no was gut long pasin bilong em yet, bikpela rong inap painim em! Wanpela ripot i tok long wanpela pasto Angliken i bin mekim pasin pamuk long tupela meri, na wanpela nius (The Times) bilong Landon i tok, pastaim ating dispela man i laik givim sampela tok long tupela meri bilong helpim ol, olsem papa o brata bilong ol, na tupela meri i bilip long em, tasol traim i painim em na em i pundaun na mekim rong. Wanpela meri bilong raitim ol nius em i stori long tok bilong Dokta Peter Rutter, em i tok, sampela dokta na loya na pris na bos ol i save mekim pasin pamuk wantaim ol meri ol i gat wok long helpim ol, na dispela samting i stap olsem wanpela bikpela rong long nau.
17 Yumi no ken ting lain bilong Jehova i no inap pundaun olsem. Ol i mas was gut, nogut ol i larim sampela samting i grisim o pulim ol. Wanpela strongpela elda bilong longtaim em i bin i go lukim wanpela sista bilong helpim em, na tupela tasol i stap, na nau elda i pundaun na mekim pasin pamuk. Em i tanim bel, tasol ol i tekewe wok elda long em. (1 Korin 10:12) Orait, olsem wanem elda i ken mekim wok wasman long wanpela sista olsem, na i no gat rong i ken kamap? Olsem wanem ol elda i ken toktok wantaim wanpela sista, na beten na lukim sampela tok bilong Baibel na ol buk, na i no gat ol narapela manmeri i stap klostu?
18 Wanpela samting ol elda i mas tingim i olsem: Husat i bos bilong dispela meri o pikinini ol i laik toktok wantaim em? (1 Korin 11:3) Sapos ol i mas toktok wantaim wanpela yangpela, i gutpela sapos papamama bilong em tu i ken i stap na harim ol tok i kamap. Na sapos wanpela sista marit em i singautim ol elda i kam helpim em long sampela hevi samting na givim sampela tok bilong spirit long em, i gutpela sapos man bilong em i ken i stap long taim ol i toktok wantaim dispela sista. Tasol sapos man i no inap i kam, o sapos em i no insait long tok i tru, o em i man bilong mekim nogut long dispela sista, ol elda i mas mekim wanem? Sapos olsem, orait, nogut wanpela elda tasol i go toktok wantaim sista. Tupela elda wantaim i mas mekim, olsem ol i mekim long sista singel. Na sapos ol i no inap mekim olsem, orait, ating tupela elda i ken toktok wantaim dispela sista long Haus Kingdom long wanpela hap i no gat ol narapela manmeri inap harim ol tok. Ating ol i ken go long wanpela rum samting long Haus Kingdom. Na sapos ol narapela brata sista i stap long Haus Kingdom, ating i no gat samting inap kamap bilong traim elda na pundaunim em.—Filipai 1:9, 10.
19 Sapos ol wasman i mekim gut wok bilong ol long lukautim gut lain bilong God ol i olsem sipsip, ol bai kamap strong long ol samting bilong spirit na ol bai bihainim stretpela rot. Ol elda Kristen i wankain olsem aposel Pol: Ol i gat strongpela tingting long lukautim gut ol brata sista. (2 Korin 11:28) Long nau em i taim nogut, olsem na ol elda i gat bikpela wok long lukautim ol brata sista, na yumi mas amamas long dispela gutpela wok bilong ol. (1 Timoti 5:17) Jehova i givim ol elda long yumi olsem “ol presen,” na ol i amamas long mekim wok bilong ol, na yumi litimapim nem bilong Jehova, em i givim “olgeta gutpela samting long yumi,” olsem “olgeta presen i gutpela tru,” na em yet i olsem Bikpela Wasman bilong yumi.—Efesus 4:8; Jems 1:17.
Bai Yu Bekim Olsem Wanem?
◻ Olsem wanem man i ken bosim gut famili bilong em?
◻ Kolim sampela gutpela pasin ol elda i mas bihainim.
◻ Olsem wanem ol elda i ken bihainim pasin daun na pasin isi taim ol i givim tok long man bilong stretim em?
◻ Wanem samting i ken helpim man long stretim rong bilong em?
◻ Ol elda i ken mekim wanem na bai traim i no ken pundaunim ol?
[Askim Bilong Stadi]
1. Bilong wanem ol elda i mas amamas long lukautim gut lain bilong God?
2. Yumi gat wanem askim long wok bilong ol wasman?
3. Olsem wanem man i mas save long lukautim gut famili bilong em na bai em i ken kisim wok elda?
4. Papamama i mas beten na stadi wantaim ol pikinini, tasol wanem samting moa tupela i mas mekim?
5. Olsem wanem papa i ken “stretim gut ol pikinini na skulim ol”?
6. Bilong wanem papa i mas lukim tok bilong Baibel na bai em inap stretim pikinini?
7. Papa i mas mekim wanem na bai pikinini tu i ken lain long mekim olsem?
8. Elda i no gat pikinini, em i ken mekim wanem gutpela wok bos?
9. Ol wan wan elda i mas mekim wanem long wok em i holim?
10. Wanem gutpela pasin bilong Pol long lukautim lain bilong God na ol elda i ken bihainim?
11. Ol elda i mas i gat wanem tingting long wok bilong ol?
12. Ol elda i mas mekim wanem na i olsem ol i amamas long mekim wok bilong ol?
13. Elda i ken mekim wanem bilong helpim man i gat hevi o askim?
14, 15. Sapos wanpela Kristen i popaia na “mekim sin,” ol elda i mas mekim wanem?
16, 17. Taim ol elda i gat wok long helpim wanpela Kristen, ol i mas was gut long wanem samting?
18. (a) Bilong wanem i gutpela sapos ol elda i tingim husat i bos bilong meri o yangpela ol i laik toktok wantaim em? (b) Sapos ol elda i mas givim tok long wanpela sista, ol i mas mekim wanem?
19. Wanem gutpela samting i ken kamap sapos ol elda i mekim gut wok bilong ol? Yumi mas amamas na tenkyu long husat i givim ol elda long yumi?
[Piksa long pes 18]
Elda i mas bosim gut famili bilong em yet
[Piksa long pes 21]
Elda i mas mekim wok wasman bilong em long pasin isi na gutpela tingting