“Pasim Olgeta Klos Pait God i Save Givim”
“Yupela i mas pasim olgeta klos pait God i save givim long yumi, na bai yupela inap long sanap strong na sakim olgeta kain pasin bilong trik na giaman Satan i save hait na mekim.”—EFESUS 6:11.
1, 2. Long toktok bilong yu yet, stori long klos pait ol Kristen i mas werim.
ROM i stap strong tru long taim bilong ol aposel. Strong bilong ami i mekim na taun Rom i bosim bikpela hap bilong graun. Wanpela man bilong raitim stori bilong ol samting i bin kamap bipo i tok ami bilong Rom “em i nambawan ami i bin i stap long graun.” Ami bilong Rom i gat ol soldia i bin skul gut long pait na ol i save tren hat tru, tasol narapela samting i helpim ol long winim ol pait em ol klos pait ol i pasim. Aposel Pol i mekim tok piksa long klos pait bilong ol soldia bilong Rom long stori long ol samting ol Kristen i mas kisim bilong winim pait ol i mekim wantaim Satan.
2 Yumi ken lukim stori bilong ol dispela klos pait bilong spirit long Efesus 6:14-17. Pol i tok: “Sanap strong, . . . pasim tok tru olsem let bilong yupela, na pasim stretpela pasin olsem siot kapa i karamapim bros bilong yupela, na yupela i mas redi long autim gutnius bilong God i laik wanbel wantaim ol manmeri, na putim dispela pasin olsem su bilong yupela. Yupela i mas kisim dispela olgeta samting bilong pait, na yupela i mas kisim tu pasin bilong bilip, na holim strong olsem hap plang, bai yupela inap long mekim i dai olgeta spia paia dispela man nogut Satan i save sutim i kam long yupela. Yupela i mas tingting long God i kisim bek yupela pinis, na dispela tingting i mas i stap olsem hat kapa yupela i putim. Na yupela i mas holim bainat bilong Holi Spirit, em tok bilong God.” Long ai bilong ol man, klos pait Pol i stori long en i save lukautim gut wanpela soldia Rom. Na tu, soldia i save holim wanpela bainat, em nambawan samting em i yusim bilong pait wantaim narapela man.
3. Bilong wanem yumi mas bihainim tok bilong Jisas Krais na bihainim pasin bilong em?
3 Bilong winim pait, ol soldia Rom i gat ol klos pait samting na ol i bin kisim gut trening, tasol narapela bikpela samting em pasin bilong ol long bihainim tok bilong komanda bilong ol. Na long wankain pasin ol Kristen i mas bihainim tok bilong Jisas Krais, em Baibel i kolim “bikman” o komanda i “bosim ol manmeri bilong ol arapela kantri.” (Aisaia 55:4) Na tu em i “het bilong sios,” o kongrigesen. (Efesus 5:23) Jisas i tokim yumi long ol samting yumi mas mekim long pait bilong spirit na em i stap gutpela piksa tru long pasin bilong werim ol klos pait bilong spirit. (1 Pita 2:21) Planti samting bilong pasin bilong Jisas na klos pait bilong spirit i wankain, olsem na Baibel i tokim yumi long “holim” wankain tingting olsem Jisas i bin holim. (1 Pita 4:1) Taim yumi skelim ol wan wan hap bilong klos pait bilong yumi, bai yumi lukim pasin bilong Jisas bilong soim yumi olsem wanem ol wan wan hap bilong klos pait i bikpela samting na olsem wanem em i wok gut.
Lukautim Bel, Bros, na Lek
4. Wanem wok bilong let bilong ol klos pait bilong soldia? Dispela i makim wanem samting?
4 Pasim tok tru olsem let. Long taim bilong ol man i bin raitim Baibel, ol soldia i save pasim wanpela let ol i wokim long skin bilong bulmakau na braitpela bilong en i olsem 5 i go 15 sentimita. Sampela man bilong tanim tok i tok ves i mas tok olsem “pasim tok tru olsem let yu taitim strong tru long bel bilong yu.” Let bilong soldia i save lukautim hap bel bilong em na bainat i save hangamap long en. Taim soldia i pasim let, dispela i makim olsem em i laik redi long pait. Pol i kolim let bilong soldia bilong makim bikpela wok tok i tru bilong Baibel i mas mekim insait long laip bilong yumi. Tok i tru i mas pas strong long yumi na bai ol samting yumi mekim i wanbel long tok i tru na yumi ken sambai long tok i tru long olgeta taim. (Song 43:3; 1 Pita 3:15) Bilong mekim olsem, yumi mas stadi strong long Baibel na skelim long bel tok bilong en. Lo bilong God i bin “stap insait long bel” bilong Jisas. (Song 40:8) Taim ol birua i sutim ol askim long em, em inap bekim ol tok bilong ol Skripsa i stap long tingting bilong em.—Matyu 19:3-6; 22:23-32.
5. Stori long olsem wanem tok bilong Baibel inap helpim yumi long taim bilong traim o hevi.
5 Taim yumi larim tok i tru bilong Baibel i stiaim yumi, em inap lukautim yumi na yumi no bihainim ol tingting giaman na yumi inap bihainim gutpela tingting na makim ol samting yumi laik mekim. Long taim bilong traim o hevi, ol stiatok bilong Baibel bai strongim yumi long mekim pasin i stret. I olsem yumi bai lukim Nambawan Bikpela Tisa bilong yumi, Jehova, na baksait long yumi “em bai i tokim [yumi] long rot [yumi] mas bihainim.”—Aisaia 30:20, 21.
6. Bilong wanem yumi mas lukautim bel bilong yumi? Olsem wanem stretpela pasin inap lukautim gut bel bilong yumi?
6 Stretpela pasin olsem siot kapa. Siot kapa bilong soldia i save lukautim bel bilong em. Yumi mas lukautim gut tru bel bilong yumi—olsem pasin tru bilong yumi—long wanem, bel bilong yumi i save tingting long mekim pasin nogut. (Stat 8:21) Olsem na yumi mas kisim save na laikim tru ol stretpela lo bilong Jehova. (Song 119:97, 105) Yumi laikim stretpela pasin na yumi sakim tingting bilong graun, em dispela tingting i save givim baksait o daunim strong bilong ol stiatok bilong Jehova. Na tu, taim yumi laikim ol gutpela pasin na yumi no laikim ol pasin nogut, bai yumi no bihainim wanpela rot em inap bagarapim laip bilong yumi. (Song 119:99-101; Amos 5:15) Jisas i stap gutpela piksa long dispela samting, na Baibel i tok long em: “Yu save laikim stretpela pasin, na yu no laikim tru pasin nogut.”—Hibru 1:9.a
7. Bilong wanem soldia Rom i mas i gat gutpela su? Dispela i makim wanem samting?
7 Redi long autim gutnius bilong God i laik wanbel wantaim ol manmeri, na putim dispela pasin olsem su. Ol soldia Rom i mas i gat ol gutpela su, long wanem, planti taim long taim bilong pait ol i mas werim ol klos pait samting, hevi bilong en i olsem 27 kilogram, na ol i mats i go inap 30 kilomita long olgeta de. I stret Pol i kolim su bilong makim pasin bilong yumi long redi long autim tok bilong Kingdom long olgeta man i laik harim. Dispela em i bikpela samting, long wanem, sapos yumi no redi long autim tok olsem wanem ol man bai kisim save long Jehova?—Rom 10:13-15.
8. Olsem wanem yumi ken bihainim pasin bilong Jisas long autim gutnius?
8 Wanem nambawan bikpela wok long laip bilong Jisas? Em i tokim Gavena Pontius Pailat bilong Rom: ‘Mi kam long dispela graun bilong autim tok tru.’ Jisas i bin autim tok long olgeta man i laik harim, na em i laikim tru dispela wok, olsem na wok autim tok em i nambawan samting, winim ol samting bilong skin em i mas kisim. (Jon 4:5-34; 18:37) Olsem Jisas, sapos yumi laik tru long autim gutnius, bai yumi painim planti rot long autim tok long ol man. Na tu, pasin bilong yumi long givim bel long autim tok bai helpim yumi stap strong long ol samting bilong spirit.—Aposel 18:5.
Hap Plang, Hat Kapa, na Bainat
9. Hap plang soldia bilong Rom i save holim i save lukautim em olsem wanem?
9 Bilip olsem hap plang. Tok Grik ol i tanim “hap plang” i makim hap plang i bikpela tru inap haitim klostu olgeta hap bodi. Em inap mekim i dai ol “spia paia” Efesus 6:16 i stori long en. Long taim bilong ol man i bin raitim Baibel, ol soldia i yusim ol spia paia ol i wokim long stik pitpit i gat liklik hap ain i holim kerasin samting i paia. Wanpela saveman i tok ol dispela spia paia “em i samting nogut tru.” Sapos soldia i no gat hap plang, ol dispela spia inap bagarapim o kilim em i dai.
10, 11. (a) Wanem samting i olsem ol “spia paia” em Satan inap yusim bilong bagarapim bilip bilong yumi? (b) Olsem wanem pasin bilong Jisas i soim yumi pasin bilong bilip long taim bilong traim em i bikpela samting?
10 Bilong bagarapim bilip bilong yumi, Satan i save yusim wanem samting i olsem “spia paia”? Em inap kirapim ol man insait long famili, long ples wok, o long skul long mekim nogut o birua long yumi. Laik long kisim planti samting moa bilong skin na mekim pasin pamuk samting i bin bagarapim tru sampela long ol samting bilong spirit. Bilong lukautim yumi yet long ol kain samting olsem, yumi mas kisim “pasin bilong bilip, na holim strong olsem hap plang.” Yumi kisim bilip long rot bilong kisim save long Jehova, toktok oltaim wantaim em long rot bilong prea, na luksave long olsem wanem em i save lukautim na blesim yumi.—Josua 23:14; Luk 17:5; Rom 10:17.
11 Taim Jisas i stap long graun, em i bin soim olsem pasin bilong i gat strongpela bilip long taim bilong hevi em i bikpela samting. Em i trastim tru tingting bilong Papa bilong em na em i amamas long mekim laik bilong God. (Matyu 26:42, 53, 54; Jon 6:38) Maski em i pilim bikpela pen tru long gaden Getsemani, Jisas i tok long Papa bilong em: “No ken bihainim laik bilong mi. Nogat. Yu mas bihainim laik bilong yu tasol.” (Matyu 26:39) Jisas i no lusim tingting olsem pasin bilong stap gut long Papa na mekim Em i amamas i bikpela samting tru. (Sindaun 27:11) Sapos yumi gat kain bilip olsem long Jehova, bai yumi no larim tok bilas o pasin birua i daunim bilip bilong yumi. Bilip bilong yumi bai kamap strong moa sapos yumi bilip long God, soim olsem yumi laikim em, na yumi bihainim ol lo bilong em. (Song 19:7-11; 1 Jon 5:3) Ol samting yumi kisim olsem mani kago o ol samting i mekim bel bilong yumi i kirap em i samting nating taim yumi skelim wantaim ol blesing Jehova bai givim long ol man husat i laikim em tru.—Sindaun 10:22.
12. Hat kapa bilong spirit i lukautim wanem hap bilong yumi? Bilong wanem dispela em i bikpela samting?
12 Tingting long God i kisim bek yupela pinis i stap olsem hat kapa. Hat kapa i save lukautim het na kru bilong soldia—het em hap we ol tingting i kamap. Samting yumi ol Kristen i bilip na wet long en i kain olsem hat kapa, long wanem, em i save lukautim tingting bilong yumi. (1 Tesalonaika 5:8) Tru long rot bilong kisim stretpela save long Tok Bilong God yumi kisim pinis nupela tingting, tasol yumi stap yet olsem sinman i no gat bikpela strong. Em i no hatwok long tingting bilong yumi i kamap nogut. Ol mak ol man bilong dispela graun i laik winim inap pulim tingting bilong yumi o kisim ples bilong ol gutpela samting yumi wetim God long givim long yumi. (Rom 7:18; 12:2) Satan i bin traim pulim Jisas taim em i tok long givim em “olgeta strongpela kantri bilong dispela graun wantaim ol gutpela samting bilong ol.” (Matyu 4:8) Wantu Jisas i tok nogat, na Pol i stori long em olsem: ‘Jisas i save, sapos em i bihainim tok bilong God, bihain em bai i stap gut na amamas moa yet. Em i tingting long dispela na em i stap strong, na karim pen na i dai. Na em i kisim bikpela sem long dispela. Tasol Jisas i no wari long sem em bai i kisim, na em i dai. Na nau em i sindaun long han sut bilong sia king bilong God.’—Hibru 12:2.
13. Yumi ken mekim wanem na bilip bilong yumi long ol samting yumi wetim long bihain i ken i stap strong?
13 Bilip kain olsem bilong Jisas yumi no inap kisim nating. Sapos yumi wok long tingim ol samting bilong dispela graun yumi laik winim na yumi no tingting long ol gutpela samting yumi wetim long bihain, orait bilip bilong yumi long ol promis bilong God bai i go slek. Bihain yumi inap lusim bilip olgeta. Tasol sapos oltaim yumi skelim long bel ol promis bilong God, bai yumi amamas yet long ol gutpela samting yumi bilip na wetim Jehova i mekim long yumi.—Rom 12:12.
14, 15. (a) Wanem samting i olsem bainat bilong yumi? Olsem wanem yumi inap yusim? (b) Kamapim stori i soim olsem wanem bainat bilong spirit inap helpim yumi long sakim ol traim.
14 Bainat bilong holi spirit. Tok bilong God i stap long Baibel i olsem bainat i gat tupela sap bilong katim, olsem rausim, ol giaman bilong ol lotu na helpim ol man i gat gutpela bel long kamap fri long samting bilong spirit. (Jon 8:32; Hibru 4:12) Dispela bainat bilong spirit inap lukautim yumi taim ol traim o ol apostet i laik bagarapim bilip bilong yumi. (2 Korin 10:4, 5) Yumi ken amamas olsem “spirit bilong God yet i bin kamapim olgeta tok i stap long buk bilong God . . . na em i mekim yumi i redi long mekim olgeta kain gutpela wok”!—2 Timoti 3:16, 17.
15 Taim Satan i traim em long ples drai nating, Jisas i mekim gutpela wok long bainat bilong spirit bilong sakim ol tingting giaman na ol traim. Long olgeta tok Satan i kamapim, Jisas i tok: “Buk bilong God i gat tok olsem.” (Matyu 4:1-11) David, wanpela Witnes Bilong Jehova long Spen, i bin luksave olsem Baibel i bin helpim em long winim traim. Taim em i gat 19 krismas, wanpela meri i gat naispela skin i wok wantaim em long wanpela kampani i save klinim ol samting. Dispela meri i tok em i gutpela tupela i “ken amamas wantaim.” David i sakim dispela meri na em i askim bos long givim wok long em long narapela hap we dispela samting i no ken kamap gen. David i tok: “Mi tingim samting Josep i bin mekim. Em i sakim pasin pamuk na wantu em i ranawe. Mi bin mekim wankain samting.”—Stat 39:10-12.
16. Stori bilong wanem yumi mas kisim trening na bai yumi ken “autim stret tok tru bilong God.”
16 Na tu Jisas i bin yusim bainat bilong spirit bilong helpim ol narapela long lusim umben bilong Satan. Jisas i tok: “Dispela tok mi givim yupela, em i no bilong mi yet. Nogat. Em i bilong God, em i bin salim mi na mi kam.” (Jon 7:16) Bilong mekim gutpela wok tisa olsem Jisas i bin mekim, yumi mas kisim trening. Saveman Josifas, em wanpela Juda, i stori long ol soldia Rom olsem: “Long olgeta de olgeta soldia i trening, na ol i mekim save long dispela trening, wankain olsem ol i pait wantaim narapela kantri. Dispela i as na long taim bilong pait skin bilong ol i no les kwik.” Long pait bilong spirit, yumi mas yusim Baibel. Na tu yumi ‘mas wok strong long kamap wokman tru, na bai God i laikim wok bilong yumi. Olsem na bai yumi autim stret tok tru bilong God, na bai yumi no gat sem long ai bilong en.’ (2 Timoti 2:15) Na yumi pilim bikpela amamas taim yumi yusim Baibel bilong bekim askim bilong wanpela man i gat laik long harim tok!
Prea Long Olgeta Kain Taim
17, 18. (a) Olsem wanem prea i helpim yumi long sakim Satan? (b) Kamapim wanpela stori i soim olsem pasin bilong prea inap helpim tru man.
17 Pol i stori pinis long olgeta klos pait bilong spirit, na bihain em i stori long narapela bikpela samting. Bilong sakim Satan, ol Kristen i mas “strong long mekim ol kain kain beten na askim God long helpim [ol].” Ol i mas mekim hamas taim? Pol i tok: “Long strong bilong Holi Spirit yupela i mas prea oltaim.” (Efesus 6:18) Taim ol traim, ol hevi, o ol samting i mekim yumi bel hevi, prea inap strongim tru yumi. (Matyu 26:41) Jisas “i save mekim prea na beten long God. Em i save, God inap long kisim bek em, na em i no mas i dai, olsem na em i beten strong long God, na em i singaut strong na i krai planti. Em i save daunim laik bilong em yet na i aninit long God, olsem na God i harim beten bilong em.”—Hibru 5:7.
18 Wanpela meri, nem bilong em Milagros, man bilong em i gat bikpela sik, na winim 15 yia Milagros i wok long lukautim em. Dispela meri i tok: “Taim mi pilim bel hevi mi save prea long Jehova. I no gat narapela inap helpim mi moa winim Jehova. Tru sampela taim mi pilim olsem mi no inap karim moa dispela hevi. Tasol taim mi prea pinis long Jehova, mi kisim nupela strong na mi no bel hevi moa.”
19, 20. Yumi mas kisim wanem samting bilong winim tru pait yumi mekim wantaim Satan?
19 Satan i save taim bilong em i sot, olsem na em i wok strong moa long daunim yumi. (KTH 12:12, 17) Yumi mas sakim dispela strongpela birua na ‘bilip long Krais na ran strong long resis.’ (1 Timoti 6:12) Bilong mekim olsem, yumi mas kisim bikpela strong, em strong i winim strong bilong yumi yet. (2 Korin 4:7) Na tu yumi mas kisim helpim bilong holi spirit bilong God, olsem na yumi mas prea long kisim dispela spirit. Jisas i tok: “Yupela papa i save mekim planti pasin nogut, tasol yupela i save tumas long givim ol gutpela samting long ol pikinini bilong yupela. Olsem na yupela i ken save tru, Papa bilong yupela i stap long heven em bai i amamas long givim Holi Spirit long ol man i askim em.”—Luk 11:13.
20 Olsem na em i klia tru yumi mas putim olgeta klos pait Jehova i save givim. Bilong werim dispela klos pait yumi mas kisim ol pasin God i laikim, olsem bilip na stretpela pasin. Yumi mas laikim tru tok i tru olsem samting i raunim yumi olsem let, na yumi mas redi long autim gutnius long olgeta taim, na yumi mas tingim ol gutpela samting yumi wetim long bihain. Yumi mas lain long mekim gutpela wok long bainat bilong spirit. Taim yumi putim olgeta klos pait God i save givim, bai yumi winim tru dispela pait yumi mekim wantaim ol spirit nogut, na bai yumi litimapim nem holi bilong Jehova.—Rom 8:37-39.
[Futnot]
a Tok profet bilong Aisaia i tok Jehova “i bin pasim stretpela pasin olsem siot kapa.” Olsem na em i laik bai ol wasman bilong kongrigesen i mas mekim stretpela kot na bihainim stretpela pasin.—Aisaia 59:14, 15, 17.
Bai Yu Bekim Olsem Wanem?
• Husat i stap nambawan gutpela piksa long pasin bilong putim ol klos pait bilong spirit? Bilong wanem i gutpela long yumi skelim gut pasin bilong em?
• Olsem wanem yumi ken lukautim tingting na bel bilong yumi?
• Olsem wanem yumi ken lain long mekim gutpela wok long bainat bilong spirit?
• Bilong wanem yumi mas prea long olgeta taim?
[Ol Piksa long pes 17]
Pasin bilong stadi oltaim long Baibel inap kirapim yumi long autim gutnius long olgeta taim
[Ol Piksa long pes 18]
Strongpela bilip bilong ol gutpela samting yumi wetim i save helpim yumi taim ol traim i painim yumi
[Ol Piksa long pes 19]
Olsem wanem? Yu save yusim “bainat bilong holi spirit” taim yu autim tok?