Hau Long Beten—Yu Ting Beten Bilong Bikpela Tasol Em Bes Wei Bilong Beten?

Beten Bilong Bikpela i stap bilong stiaim yumi long hau yumi mas beten na wanem ol samting yumi mas beten long en. Jisas i mekim dispela beten bikos ol disaipel bilong em i askim em olsem: “Bikpela, skulim mipela long mekim beten.” (Luk 11:1) Tasol dispela Beten Bilong Bikpela, o Papa Bilong Mipela, em i no wanpela beten tasol em God i orait long en.a Jisas i kolim dispela beten olsem wanpela eksampel bilong ol beten em God i save putim yau long en.

Insait long dispela atikol

• Beten Bilong Bikpela i tok wanem?

• Wanem mining bilong Beten Bilong Bikpela?

• Yu ting pasin bilong kolim Beten Bilong Bikpela em wanpela rot tasol bilong beten?

• Yumi mas beten olsem wanem?

• Ol narapela beten long Baibel

Beten Bilong Bikpela i stap long Matyu 6:9-13, ol tok bilong em i no wankain long ol narapela narapela Baibel trenslesen. Hia em tupela eksampel.

Nupela Taim Trenslesen: “Papa bilong mipela long heven, nem bilong yu i mas i stap holi. Kingdom bilong yu i mas i kam. Laik bilong yu i mas kamap long graun olsem em i save kamap long heven. Givim bret long mipela inap long dispela de; na fogivim ol rong bilong mipela olsem mipela i fogivim ol man i rongim mipela. Na no ken larim mipela i pundaun long traim, tasol kisim bek mipela long han bilong Satan.”

King Jems Pisin Baibel: “Papa bilong mipela i stap long heven, Nem bilong Yu em holi olgeta. Kingdom Bilong Yu i mas i kam. Ol i mas mekim laik bilong Yu long dispela graun, olsem ol i mekim long heven. Givim long mipela tude bret bilong mipela bilong dispela de. Na lusim ol dinau bilong mipela, olsem mipela i lusim ol dinau bilong ol man i gat dinau long mipela. Na no ken bringim mipela i go long ol traim, tasol kisim bek mipela long ol pasin nogut.”b

Ol tok Jisas i skulim ol man long en i stret wantaim ol narapela tok bilong Baibel, so yumi ken bilip olsem ol tok long ol narapela hap bilong Baibel inap kamapim klia mining bilong dispela Beten Bilong Bikpela.

“Papa bilong mipela long heven”

I stret long kolim God olsem “Papa bilong mipela” bikos em i wokim yumi na givim laip long yumi.​—Aisaia 64:8.

“Nem bilong yu i mas i stap holi”

Nem bilong God, Jehova, em yumi mas tingim olsem em i holi tru. Ol manmeri i save mekim holi nem bilong God taim ol i toktok long ol gutpela pasin bilong God na tokim ol narapela long ol samting God i tingting pinis long kamapim.​—Buk Song 83:18; Aisaia 6:3.

“Kingdom bilong yu i mas i kam”

Kingdom Bilong God em wanpela gavman i stap long heven na Jisas em i King bilong en. Jisas i skulim yumi long beten olsem dispela gavman bai mekim wok bos na bosim olgeta hap bilong graun.​—Daniel 2:44; Revelesen 11:15.

“Laik bilong yu i mas kamap long graun olsem em i save kamap long heven”

I no gat pasin nogut o dai long heven, so laik bilong God long graun i olsem, em i laik bai ol manmeri i ken sindaun gut na stap bel isi long graun inap oltaim oltaim.​—Buk Song 37:11, 29.

“Givim long mipela tude bret bilong mipela bilong dispela de”

Long taim bilong Jisas, bret em i kaikai tru bilong ol manmeri. Yumi mas tingim olsem yumi save wetim Krieta bilong yumi long givim yumi ol samting yumi nidim bilong stap laip.​—Aposel 17:24, 25.

“Fogivim ol rong bilong mipela olsem mipela i fogivim ol man i rongim mipela”

Long dispela ves, dispela tok “ol rong” em makim ol sin. (Luk 11:4) Olgeta manmeri i save mekim sin na ol i nidim God long fogivim ol. Tasol sapos yumi laik bai God i fogivim yumi, orait yumi mas redi long fogivim ol sin bilong ol narapela em ol i mekim long yumi.​—Matyu 6:14, 15.

“No ken larim mipela i pundaun long traim, tasol kisim bek mipela long han bilong Satan”

God Jehova i no save traim yumi long mekim rong. (Jems 1:13) Tasol man i save traim yumi em Satan dispela Devil, em man Baibel i kolim em tu olsem “Man Bilong Traim Man.” (1 Jon 5:19; Matyu 4:1-4) Yumi askim Jehova long em i no ken larim yumi pundaun taim wanpela samting i traim yumi long sakim tok bilong em.

Jisas i mekim Beten Bilong Bikpela olsem wanpela eksampel. I no gat wok long yumi kolim olgeta wan wan tok bilong en long beten bilong yumi. Paslain long Jisas i mekim Beten Bilong Bikpela, em i givim tok lukaut olsem: “Taim yupela i beten i stap, no ken kolim ol wankain tok gen na gen.” (Matyu 6:7) Taim em i mekim narapela beten bilong yumi ken bihalinim, em i kolim ol narapela tok.​—Luk 11:2-4.

Bes wei long beten em long autim olgeta tingting na filings bilong yumi long God.​—Buk Song 62:8.

Beten Bilong Bikpela em gutpela eksampel long hau yumi ken beten bambai God i ken harim yumi. Lukim olsem wanem Beten Bilong Bikpela i stret wantaim ol narapela Baibel ves em ol i stori long beten.

• Beten long God wanpela tasol

  Skripsa: “Long olgeta samting, kamapim ol askim bilong yupela long God, mekim long rot bilong ol beten, na long ol prea we yupela i beten strong, na long ol beten bilong tok tenkyu long God.”​—Filipai 4:6.

  Mining: Yumi mas beten long God, i no long Jisas, Maria, o ol santuman o santumeri. Jisas i kirapim Beten Bilong Bikpela wantaim dispela tok, “Papa bilong mipela,” so yumi kisim skul olsem yumi mas beten long God Jehova wanpela tasol.

• Beten long ol samting i stret wantaim laik bilong God

  Skripsa: “Maski wanem wanem samting yumi askim em long en na i stret wantaim laik bilong em, em bai harim yumi.”​—1 Jon 5:14.

  Mining: Yumi ken beten long olgeta kain samting i stret wantaim laik bilong God. Jisas i skulim yumi olsem laik bilong God em i bikpela samting taim em i mekim dispela tok long Beten Bilong Bikpela olsem, “laik bilong yu i mas kamap.” Taim yumi stadi long Baibel, yumi kisim save long samting God i laik mekim long graun na long ol manmeri.

• Beten long ol samting yu nidim

  Skripsa: “Olgeta hevi yu karim, yu mas putim long han bilong Jehova, na em bai strongim yu.”​—Buk Song 55:22.

  Mining: God i save long ol samting yumi nidim. Long Beten Bilong Bikpela, Jisas i kolim sampela samting em yumi ol man i nidim, olsem tasol yumi tu i ken beten long ol samting yumi nidim long wan wan de, long kisim ol tok bilong stiaim yumi taim yumi mekim ol bikpela disisen, long kisim helpim long taim bilong hevi, na long God i ken fogivim ol sin bilong yumi.c