Tok Bilong Stiaim Yu Long Stap Bel Isi Wantaim Ol Narapela

“Yupela i mas wok yet . . . long fogivim narapela, na mekim olsem maski sapos i gat as na wanpela i gat tok long narapela.”—KOLOSI 3:13.

Yumi olgeta i save popaia. Yumi inap mekim samting i bagarapim bel bilong ol narapela o ol inap mekim samting i bagarapim bel bilong yumi. Olsem na yumi mas lusim rong bilong narapela narapela. Taim yumi fogivim man i rongim yumi, yumi no ken bel nogut moa long em. Yumi no ken “bekim pasin nogut long man i mekim pasin nogut” long yumi, na yumi no ken kamapim rong bilong man i rongim yumi long olgeta taim. (Rom 12:17) Tasol olsem wanem sapos bel bilong yumi i bagarap stret na yumi no inap lusim tingting long rong man i mekim long yumi? Yumi mas toktok wantaim em long pasin rispek na stretim dispela hevi namel long yumi yet. Yumi laik mekim ol samting bilong i stap wanbel wantaim, i no bilong strongim sait bilong yumi.—Rom 12:18.

“Yupela i mas daunim yupela yet na tingim olsem ol arapela i winim yupela.”—FILIPAI 2:3.

Taim yumi mekim pasin daun na pasin rispek, ol man bai amamas long stap wantaim yumi. Ol i save olsem yumi bai mekim gutpela pasin na tingim ol na yumi no inap min long bagarapim bel bilong ol. Tasol sapos yumi tingim olsem yumi winim ol narapela o oltaim yumi strong long ol narapela i bihainim tingting bilong yumi tasol, yumi inap mekim na yumi no stap wanbel wantaim ol narapela. Ol man bai i no laik stap wantaim yumi, na yumi bai i no gat planti pren.

“God i save mekim wankain pasin long olgeta man. Na em i save laikim man husat i save pret long em na bihainim stretpela pasin maski em i bilong wanem lain.”—APOSEL 10:34, 35.

Krieta bilong yumi i no tingim sampela lain i winim ol arapela lain bikos long kantri bilong ol, tokples bilong ol, namba bilong ol, o skin kala bilong ol, nogat. “Long rot bilong wanpela man em i kamapim olgeta lain man.” (Aposel 17:26) Olsem na olgeta man na meri, ol i brata na susa. Taim yumi soim rispek na mekim gutpela pasin long ol narapela, yumi mekim ol i amamas, yumi yet i amamas, na yumi amamasim Krieta bilong yumi.

“Yupela i mas kisim . . . pasin isi.”—KOLOSI 3:12.

Sapos yumi gat pasin isi, ol narapela bai amamas long stap wantaim yumi. Ol bai pilim olsem ol inap toktok wantaim yumi na stretim yumi tu, long wanem, ol i save yumi no inap kros. Na taim wanpela i kros long yumi, pasin bilong yumi long bekim tok long pasin isi inap daunim kros bilong em. Provep 15:1 i tok: “Taim man i bekim tok long pasin isi, dispela i save pinisim bikpela belhat, tasol hatpela tok i save kirapim man long belhat.”

“Amamas bilong givim samting i winim amamas bilong kisim samting.”—APOSEL 20:35.

Planti manmeri long nau ol i gat pasin bilong gridi na ol i save tingim ol yet tasol. Tasol ol man i gat pasin bilong givim ol samting long ol arapela, ol i save stap amamas. (Luk 6:38) Ol manmeri i gat pasin bilong givim ol samting long ol arapela ol i save stap amamas, long wanem, ol i laikim ol man moa winim mani kago. Dispela pasin laikim i save kirapim ol long soim tenkyu na amamas bilong ol taim wanpela i givim ol samting long ol. (Kolosi 3:15) Askim yu yet, ‘Mi amamas long stap wantaim ol manmeri i gat pasin bilong gridi na pasin bilong i no tok tenkyu o mi amamas long stap wantaim ol manmeri i gat pasin bilong givim ol samting na pasin bilong tok tenkyu?’ Yumi kisim wanem skul long dispela? Pasin yu laik bai ol narapela i mekim long yu, yu mas mekim wankain pasin long ol.—Matyu 7:12.