“Beten Long God i Helpim Ol”
JEHOVA em i man bilong “harim beten.” (Buk Song 65:2) Sapos man i givim bel tru long Jehova na beten long em, Jehova i save harim beten bilong em, na taim em i beten askim Jehova long helpim ol narapela, Jehova i save harim dispela beten.
Tasol bilong wanem yumi mas beten askim God long helpim ol narapela? Na yumi mas beten askim God long helpim ol olsem wanem? Taim yumi beten askim God long helpim ol narapela, dispela samting i kirapim yumi long bihainim moa yet wanem ol pasin bilong God?
Bilong Wanem Yumi Mas Beten Bilong Helpim Ol Narapela?
Baibel i tok lain bilong Jehova i mas beten askim God long helpim ol narapela. Taim aposel Pol i beten em i save beten askim God long helpim ol narapela. (Kolosi 1:3; 2 Tesalonaika 1:11) Na disaipel Jems i tok: “Yupela i mas [beten] long God i helpim ol.”—Jems 5:16.
Taim yumi askim God long helpim ol wokboi bilong em, dispela kain beten i gat strong. Tok bilong Jems 5:13-18 i helpim yumi long save long dispela samting, long wanem, ol dispela ves i tok sapos wanpela Kristen i gat sik long spirit, long nem bilong Jehova ol elda bilong kongrigesen mas “putim wel long bodi bilong em, na ol i mas [beten] long God i ken mekim em i kamap orait gen.” Taim ol elda i beten olsem, dispela beten inap strongim dispela man i gat hevi, na bai em i bilip tru olsem Jehova bai harim ol beten bilong em yet. (Buk Song 23:5; 34:18) Ol elda i save beten bilong helpim kain man olsem, na ol i save kamapim sampela tok bilong Baibel tu i olsem gutpela wel bilong helpim em long kamap strong gen long spirit.
Jems i tok moa olsem: “Sapos ol i bilip long God na ol i [beten], orait Bikpela bai i mekim orait dispela sikman na kirapim em gen.” Sapos ol elda i ‘bilip long God na ol i beten,’ beten bilong ol inap helpim dispela man i gat sik long spirit. Na sapos em i larim tok bilong Baibel i helpim em, orait God bai “kirapim em” na em bai kamap strong gen long spirit. Tasol olsem wanem sapos dispela man i bin mekim bikpela rong na nau em i no stap strong moa long samting bilong spirit? Sapos dispela man i hevi long rong em i bin mekim na em i tanim bel, orait Jehova bai lusim tingting long dispela rong bilong em.
Olsem na Jems i tok: “Yupela wan wan i mas autim sin bilong yupela long ol arapela manmeri bilong God. Na yupela i mas [beten] long God i helpim ol, na bai God i mekim yupela i kamap orait gen. Sapos stretpela man i [beten], orait [beten] bilong en i gat bikpela strong, na em inap tru long helpim ol arapela. Elaija . . . em i [beten] strong long God i no ken larim ren i kam daun, na ren i no kam daun long graun inap long tripela yia na 6-pela mun. Na bihain em i [beten] gen, na skai i larim ren i kam daun na kaikai i kamap gen long ol gaden.” (1 King 17:1-7; 18:1, 42-45) Sapos wanpela stretpela man i beten na dispela beten i stret wantaim laik bilong God, dispela beten i gat strong.—1 Jon 5:14, 15.
Beten Askim God long Helpim Ol Olsem Wanem?
Taim yumi beten askim Jehova long helpim wanbilip bilong yumi, maski yumi askim em long wanem wanem samting em bai harim dispela beten. Olsem: Pol i askim ol brata long beten askim God long helpim em bambai em inap autim gut tok bilong gutnius. (Efesus 6:17-20) Sapos yumi save traim i painim wanpela brata bilong yumi, yumi ken mekim wanem? Yumi ken beten askim God long helpim em na bai em ‘i no mekim wanpela pasin nogut.’ Na yumi ken askim God long sambai long em long taim bilong traim na ‘tekewe em’ long man nogut, em Satan. (2 Korin 13:7; Matyu 6:13) Na sapos wanpela brata i gat sik bilong skin, yumi ken askim Jehova long strongim em bambai em inap karim dispela hevi bilong em.—Buk Song 41:1-3.
Long olgeta taim i stret long yumi beten askim Jehova long helpim ol brata i karim hevi long han bilong ol birua. Pol na sampela brata i raun wantaim em ol i karim bikpela hevi tru long han bilong ol man i mekim nogut long ol, na Pol i tokim ol Kristen long Korin: “Yupela i mas helpim mipela long [beten]. Na God bai i harim [beten] bilong planti manmeri na em bai i helpim mipela. Na planti manmeri bai i lukim, na ol bai i tenkyu long God long ol samting em i mekim bilong helpim mipela.” (2 Korin 1:8-11; 11:23-27) Maski yumi stap long kalabus, yumi ken beten askim God long helpim ol narapela brata em ol man i mekim nogut long ol, long wanem, Jehova i save “putim yau long beten bilong ol stretpela man.”—Sindaun 15:29.
Yumi mas beten askim Jehova long helpim ol brata i holim bikpela wok insait long oganaisesen bilong Em. Sampela brata olsem em ol brata i gat wok long bosim oganaisesen na redim ol kaikai bilong spirit yumi save kisim long rot bilong lain ‘gutpela wokboi.’ (Matyu 24:45-47) I stret yumi mas beten askim God long helpim ol brata long Lain Bilong Bosim Ol Witnes Bilong Jehova; yumi ken beten askim God long “givim gutpela tingting” long ol.—Efesus 1:16, 17.
Bihainim Moa Yet Ol Gutpela Pasin Kristen
Taim yumi beten bilong helpim ol brata, yumi kamapim bel bilong yumi, olsem yumi tingim gut ol narapela man na yumi sori long ol na yumi no tingim yumi yet tasol. Sapos yumi tingim gut ol brata sista na yumi sori long ol, yumi bihainim tok bilong Pol, em i tok man i givim bel tru long narapela man, dispela man “i no save tingting tumas long em yet.” (1 Korin 13:4, 5) Taim yumi beten askim God long helpim ol narapela, yumi no “lukautim ol samting bilong [yumi] tasol. Nogat. [Yumi] lukautim ol samting bilong ol arapela manmeri . . . na helpim ol long i stap gut.” (Filipai 2:4) Taim yumi beten na askim Jehova long helpim ol brata long samting bilong spirit, dispela samting i helpim yumi long pas gut wantaim ol brata na laikim tru ol brata, em dispela pasin i wanpela mak bilong ol man i stap disaipel tru bilong Jisas.—Jon 13:34, 35.
Taim yumi beten askim Jehova long helpim ol narapela, dispela i helpim yumi long bihainim moa yet pasin bilong sori long ol. (1 Pita 3:8) Yumi save amamas wantaim ol long samting ol i amamas long en, na yumi save pilim pen wantaim ol long hevi bilong ol. Long skin bilong man, sapos wanpela han i kisim bagarap, narapela han i helpim dispela han na i wok long pinisim pen bilong en. (Lukim 1 Korin 12:12, 26.) Na i wankain tu long lain brata sista—taim yumi beten askim Jehova long helpim ol brata sista i karim hevi, yumi pilim hevi bilong ol na yumi sori moa yet long ol, na yumi tingim ol. Sapos yumi no beten askim Jehova long helpim ol brata, yumi yet yumi lus long gutpela samting, long wanem, God Jehova na Krais Jisas i no ken lusim ol.—1 Pita 5:6, 7.
Taim yumi beten bilong helpim ol brata, dispela samting i helpim yumi long bihainim moa yet ol gutpela pasin bilong God. Dispela samting i helpim yumi long pilim tingting bilong ol na bai yumi no les kwik long ol. Sapos yumi kros long ol na yumi beten askim God long helpim ol, dispela beten bai kirapim yumi long lusim pasin bilong kros, na bai yumi kisim ol gutpela tingting i kirapim yumi long mekim pasin sori na amamas. Sapos yumi beten askim Jehova long helpim ol brata dispela samting i kamapim pasin wanbel insait long lain bilong Jehova.—2 Korin 9:13, 14.
Wok Yet long Beten Askim God long Helpim Ol Brata
Olsem Pol i bin mekim, yumi tu yumi ken askim ol narapela long beten bilong helpim yumi. Ol brata i ken beten wantaim yumi, na taim ol yet i beten, ol inap beten long God na kolim nem bilong yumi na stori long hevi bilong yumi na askim God long helpim yumi. Na yumi ken save God bai helpim yumi, long wanem Baibel i tok: “Sapos traim i kamap long ol man i bihainim God, orait Bikpela i save long rot bilong kisim bek ol long dispela traim.”—2 Pita 2:9.
Ol dispela Witnes Bilong Jehova i beten askim Jehova long helpim yumi, traim na hevi i save painim ol tu na ating hevi bilong ol i bikpela na i winim hevi i painim yumi. Tasol ol i tingim hevi bilong yumi na ol i beten askim Bikpela King bilong oltaim long helpim yumi, na ating ol i pilim tru hevi bilong yumi na aiwara i kam daun tu. (Lukim 2 Korin 2:4; 2 Timoti 1:3, 4.) Yumi pilim tru gutpela pasin ol i mekim bilong helpim yumi! Yumi pilim tru dispela samting na yumi tingim ol narapela samting yumi stori pinis long en, olsem na yumi mas beten askim God long helpim ol brata.