Baibel i Tok Wanem?

Marit i Bilong i Stap Oltaim?

WANEM as bilong dispela askim? Ol tok promis ol marit i mekim long hap bilong Wes i tok, “bai mi stap wantaim yu long gutpela taim na long taim nogut” na “inap indai i brukim marit bilong mitupela.” Olsem na yumi save marit i bilong i stap oltaim, a? Tru tumas, ol tok promis bilong marit i save tokaut olsem man na meri marit bai stap wantaim inap long olgeta taim ol i stap laip. Tasol planti marit i no bihainim moa ol dispela tok promis. Planti marit moa i wok long bruk​​—⁠sampela i bruk bihain long sampela mun na sampela bihain long planti yia. I gat wanem as na ol man i no moa tingim gut marit bilong ol? Baibel i bekim dispela askim.

Kaunim 2 Timoti 3:​1-3 na skelim dispela tok wantaim ol samting i kamap long nau. Sampela hap bilong ol dispela ves i tok: “Long taim bilong las de planti hevi nogut tru bai i kamap. Ol man bai i laikim ol yet tasol, na ol bai i laikim tumas long kisim mani. . . . Ol bai i no tok tenkyu long ol manmeri i mekim gutpela pasin long ol. Ol bai i givim baksait long ol pasin bilong God. Ol bai i no save long pasin bilong i stap pren bilong ol arapela, na taim ol i kros, bai i no gat rot bilong pinisim kros bilong ol. . . . Ol bai i no bosim laik bilong bodi bilong ol.” Dispela tok profet i stret tru. Long olgeta hap bilong graun ol dispela kain pasin i mekim nogut long ol marit na planti marit i no stap strong, na pasin bilong planti long brukim marit i kamapim long ples klia dispela samting.

Planti man i no tingim marit olsem em i bikpela samting. Taim yumi tingim dispela samting, ating yumi laik save: Yumi mas tingim tru marit olsem em i bikpela samting? Tru marit i mas i stap holi? Ol Kristen i mas ting olsem wanem long marit? Baibel i gat wanem ol tok bilong helpim ol marit long nau?

Olsem Wanem? Tingting Bilong God i Senis?

Long pastaim tru, God i no tok marit i bilong i stap sotpela taim tasol, nogat. Stori bilong em long pasim namba wan man na meri wantaim na tupela i marit em i stap long Stat 2:​21-​24, na i no gat wanpela tok i orait long ol i ken katim marit o lusim poroman. Ves 24 i tok: “Man i save lusim papamama na i pas wantaim meri bilong en, na tupela i kamap wanpela bodi tasol.” Wanem insait bilong dispela skripsa?

Tingim bodi bilong man. Ol narapela narapela hap bilong en na ol bun i pas gut wantaim na ol i pas strong tru. Man! Ol i pas gut tru! Na ol i stap longpela taim! Tasol yumi save kisim bikpela pen taim bagarap i painim yumi! Olsem na long Stat 2:​24, dispela tok “wanpela bodi” i kamapim klia olsem man na meri marit i mas pas gut wantaim na stap wantaim long olgeta taim tupela i stap laip. Na tu, em i givim tok lukaut olsem bikpela hevi bai kamap sapos marit i bagarap.

Tru insait long planti tausen yia i go pinis tingting bilong ol man i senis senis, tasol God i tingim yet marit olsem wanpela samting bilong i stap long olgeta taim man i stap laip. Olsem 2,400 yia i go pinis, sampela man Juda i lusim ol meri bilong ol na ol i maritim ol yangpela meri. God i no amamas long dispela pasin na long rot bilong profet Malakai em i tok: “Yupela i mas lukaut gut bai yupela i no brukim promis yupela i bin mekim wantaim ol meri bilong yupela taim yupela i marit. God, Bikpela bilong yumi Israel, em i tok olsem, ‘Mi no laikim tru pasin bilong brukim marit.’ ”​​—⁠Malakai 2:​15, 16.

Winim 400 yia bihain, Jisas i strongim tingting bilong God long marit taim em i kolim tok bilong Stat 2:​24 na i tok: “Samting God i pasim pinis, em man i no ken katim.” (Matyu 19:​5, 6) Planti yia bihain, aposel Pol i tok: “Meri i no ken lusim man bilong en” na “man tu em i no ken rausim meri bilong en.” (1 Korin 7:​10, 11) Ol dispela skripsa i kamapim klia tingting bilong God long marit.

Olsem wanem? Baibel i orait long wanpela marit i ken pinis? Yes, marit i pinis taim wanpela poroman marit i dai. (1 Korin 7:​39) Na tu, pasin pamuk inap pinisim marit sapos poroman i no gat asua i laik mekim olsem. (Matyu 19:⁠9) Tasol Baibel i kirapim ol man na meri marit long stap wantaim sapos i no gat kain hevi olsem i kamap.

Rot Bilong Mekim Marit i Stap Longpela Taim

God i laik bai marit i stap longpela taim na ol marit i amamas long wokabaut wantaim​—⁠marit i no ken i stap olsem wanpela hevi ol i mas karim. Em i laik bai man na meri marit i mas stretim ol hevi bilong ol na narapela i mas amamas tru long narapela. Baibel i gat ol gutpela tok bilong helpim marit long i stap amamas na i stap longpela taim. Orait nau yumi ken tingim sampela skripsa olsem:

Efesus 4:​26: “Nogut yupela i belhat yet i stap na san i go daun.”a Wanpela man marit i stap amamas em i ting dispela skripsa i save helpim em na meri bilong em long stretim kwik ol liklik kros i kamap namel long tupela. Em i tok: “Sapos yu hatwok long slip bihain long yutupela i kros liklik, dispela i makim olsem i gat sampela samting yutupela i mas stretim. Yu no ken larim dispela hevi i stap yet.” Sampela taim em na meri bilong em ol i save toktok gut long ol hevi i go inap long biknait. Tasol dispela i save helpim tupela. Em i tok moa: “Pasin bilong bihainim ol tok bilong Baibel i save kamapim ol gutpela samting.” Dispela pasin i helpim dispela man na meri bilong em long stap amamas long marit bilong ol inap 42 yia.

Kolosi 3:​13: “Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata.” Wanpela man marit i stori long olsem wanem em na meri bilong em i bihainim dispela tok: “Ol poroman marit inap mekim samting i bagarapim bel bilong narapela maski ol i no mekim wanpela rong, long wanem, olgeta man i gat ol pasin kranki na sampela pasin bilong ol yet em ol narapela i no inap amamas long en. Mitupela i no larim ol dispela samting i bagarapim bel bilong mipela, na dispela i save helpim mipela long i stap wanbel.” Tru tumas, dispela pasin i bin helpim tupela insait long ol 54 yia ol i stap marit!

Pasin bilong bihainim ol kain gutpela tok olsem bilong Baibel i save strongim pasin wanbel namel long man na meri marit. Olsem na ol inap i stap amamas insait long marit, na marit bai stap long olgeta taim ol i stap laip.

[Futnot]