Aristarkus—Wanpela Gutpela Poroman
APOSEL Pol i gat planti gutpela wanwok em inap bilip tru long ol, na wanpela bilong ol em Aristarkus. Yu inap tingim wanem samting taim yu harim nem bilong em? Yu tingim wanpela samting? Yu save long ol samting em i bin mekim insait long wok bilong ol Kristen bilong pastaim? Tru, Aristarkus em wanpela man long Baibel yumi no save gut tumas long em, tasol em i bin insait long sampela samting em Ol Skripsa Grik i stori long en.
Orait, Aristarkus em husat? Em i bin mekim wanem wok wantaim Pol? Olsem wanem yumi inap tok olsem Aristarkus i gutpela poroman bilong Pol? Na yumi inap lain long wanem samting taim yumi skelim ol samting em i bin mekim?
Namba wan taim nem bilong Aristarkus i kamap em long Buk Aposel long taim bikpela lain manmeri i belhat na ol i singaut bikmaus nabaut long taun Efesus. (Aposel 19:23-41) Wok bilong wokim ol piksa bilong god meri Artemis long silva em wanpela wok bisnis Demitrius na ol narapela wanwok bilong em long Efesus i save kisim bikpela winmani long en. Tasol taim Pol i autim gutnius long dispela taun, planti manmeri tru i lusim pasin bilong lotuim god giaman Artemis. Olsem na Demitrius i kirapim bel bilong ol narapela man i save wokim ol samting long silva na em i tokim ol olsem, wok bilong Pol long autim gutnius i nogutim wok bilong ol long kisim mani, na tu, wok bilong em i mekim na pasin bilong lotuim god Artemis bai pinis.
Ol i no painim Pol, na ol i belhat nogut tru, olsem na ol i holim tupela poroman bilong Pol, em Aristarkus na Gaius, na pulim tupela i go insait long ples kibung. Bagarap i laik painim tupela, olsem na ol pren bilong Pol i tok strong long em “i no ken i go insait long ples kibung.”
Tingim sapos dispela hevi i bin painim yu yet. Inap tupela aua dispela bikpela lain manmeri ol i wok long singaut bikmaus nabaut olsem, “Artemis bilong yumi Efesus em i nambawan tru”! Aristarkus na Gaius i stap namel tru long ol bikpela lain manmeri i banisim ol na i strong long bagarapim ol, na tupela i no inap mekim wanpela tok bilong helpim ol yet, na tupela i mas pret tru taim dispela samting i painim ol. Ating tupela i bin tingting, ol bai abrusim bagarap o nogat. Gutpela tru, ol i bin abrusim bagarap. Tru tumas, stori Luk i raitim i kirapim tru tingting bilong ol man i kaunim, na dispela i mekim na sampela saveman i tok, ating sampela man i bin lukim dispela samting i kamap na ol i bin kamapim long Luk, o Aristarkus na Gaius yet i bin kamapim long em.
Bihain kuskus bilong taun i sarapim ol manmeri na ol i pasim maus. Taim ofisa i tokim ol manmeri olsem Aristarkus na Gaius i no gat asua, ating bel bilong tupela i stap isi, na ol i lukim ol manmeri pastaim ol i bin bikmaus na i sanap banisim tupela, ol i go nabaut.
Sapos kain hevi olsem i bin painim yu, bai yu pilim olsem wanem? Bai yu tok birua inap painim yu long dispela wok, olsem na yu no laik i stap poroman bilong Pol long wok misineri, na bai yu ting i gutpela sapos yu stap nating na yu inap i stap bel isi? Aristarkus i no ting olsem! Em i bilong Tesalonaika, na ating em i save pinis bai hevi i painim em taim em i autim gutnius. Long sampela yia i go pinis taim Pol i autim tok long taun bilong Aristarkus, bikpela pait i kamap long dispela hap tu. (Aposel 17:1-9; 20:4) Tasol Aristarkus i stap gut long Pol na i no lusim em.
Kirap Long Grik i Go Long Jerusalem
Sampela mun bihain long dispela pait bilong ol man bilong wokim ol samting long silva, Pol i stap long Grik na klostu em i laik kisim sip i go olsem long Siria na i go long Jerusalem, na long dispela taim “em i harim tok olsem ol Juda i bin pasim tok long kilim em i dai.” (Aposel 20:2, 3) Husat i bin stap wantaim Pol long dispela taim nogut? Em Aristarkus tasol!
Dispela nupela hevi i mekim na Pol, Aristarkus, na ol poroman bilong ol i senisim tingting, na ol i go long Masedonia na bihain ol i go olsem long nambis bilong Esia Maina, na ol kisim sip long Patara na i go long Fonisia. (Aposel 20:4, 5, 13-15; 21:1-3) As bilong dispela raun em bilong karim ol kontribusen ol Kristen long Masedonia na Akaia i bin givim bilong helpim ol brata bilong ol long Jerusalem ol i sot long ol samting. (Aposel 24:17; Rom 15:25, 26) Bikpela lain i raun wantaim, long wanem, ating ol narapela narapela kongrigesen i bin makim ol bilong mekim dispela wok. Na tu, taim bikpela lain olsem i raun bai i no gat planti hevi tumas i painim ol.
Aristarkus i kisim gutpela wok long poromanim Pol kirap long Grik na i go long Jerusalem. Tasol long narapela raun bilong ol, ol bai kirap long Juda na i go olgeta long Rom.
Raun Bilong Ol Long i Go Long Rom
Nau raun bilong ol i narapela kain liklik. Pol i bin stap long kalabus long Sisaria inap tupela yia, na em i singaut long Sisar i ken harim kot bilong em, na ol i salim em i go long Rom olsem wanpela kalabus. (Aposel 24:27; 25:11, 12) Tingim bel hevi ol poroman bilong Pol i bin kisim. Kirap long Sisaria na i go long Rom em i longwe tru, na ol i bel hevi, long wanem, ol i no save wanem samting bai kamap. Husat inap go wantaim em bilong helpim em? Ol i makim tupela man bilong mekim dispela wok, o tupela yet i gat laik long mekim. Dispela tupela man em Aristarkus na Luk, em man i bin raitim Buk Aposel.—Aposel 27:1, 2.
Olsem wanem Luk na Aristarkus tupela wantaim ol inap kalap long wanpela sip long namba wan raun bilong ol i go long Rom? Man bilong raitim ol stori bilong bipo, em Giuseppe Ricciotti, em i tok: “Tupela i kalap long sip olsem tupela pasindia . . . o ating ofisa bilong Rom i mekim gut long ol na giaman olsem ol i wokboi bilong Pol, long wanem, lo i orait long ol man bilong Rom i mas i gat sampela wokboi bilong helpim ol.” Ol i stap wantaim Pol na givim ol gutpela tok long em na dispela i mas strongim em tru!
Luk na Aristarkus i kamapim klia olsem ol i laikim tru Pol, na ol i no tingim mani ol i mas tromoi o hevi inap painim ol long dispela samting. Na klostu bagarap i painim ol taim tupela i stap wantaim kalabus poroman bilong ol, na sip i bagarap na ol i go sua long ailan Malta.—Aposel 27:13–28:1.
Wankalabus Bilong Pol
Taim Pol i raitim pas long ol Kolosi na long Filemon long yia 60-61 C.E., Aristarkus na Luk i stap yet wantaim em long Rom. Baibel i kolim Aristarkus na Epafras olsem wankalabus bilong Pol. (Kolosi 4:10, 14; Filemon 23, 24) Olsem na yumi ken ting, wanpela taim Aristarkus i bin kalabus wantaim Pol.
Maski Pol i bin stap kalabus long Rom inap 2-pela yia, ol i orait long Pol i stap long wanpela haus bilong em yet na wanpela soldia i was long em, olsem na em inap autim gutnius long ol man i kam lukim em. (Aposel 28:16, 30) Aristarkus, Epafras, Luk, na ol narapela i helpim Pol na strongim em.
Em i Helpim Gut Pol
Taim yumi skelim ol narapela narapela stori em Aristarkus i insait long en long stori bilong Baibel, yu ting Aristarkus em i wanem kain man? Wanpela man bilong raitim stori, em W. D. Thomas, em i tok, Aristarkus i “narapela kain man—maski ol man i birua long em, em i bilip na sanap strong na i no lusim dispela wok. Em i kamapim olsem em i man bilong laikim God long gutpela taim na long taim bilong hevi na traim tu.”
Pol i tok olsem Aristarkus na ol narapela ol i ‘helpim em gut tru’ (tok Grik, pa·re·go·riʹa), olsem ol i mekim gut bel bilong em. (Kolosi 4:10, 11) Taim em i mekim gut bel bilong Pol na strongim em, Aristarkus i stap olsem gutpela poroman long taim bilong hevi. Em i bin raun wantaim Pol na i stap pren bilong em inap sampela yia, na ating dispela i givim bikpela amamas long em na i strongim em long ol samting bilong spirit.
Ating kain hevi olsem i bin painim Aristarkus i no painim yumi. Tasol em i bikpela samting long ol manmeri insait long kongrigesen Kristen long nau i ken bihainim wankain pasin long i stap gut long ol brata spirit bilong Krais na oganaisesen bilong Jehova. (Skelim wantaim Matyu 25:34-40.) Sampela wanlotu yumi save long ol, ating bihain hevi bai painim ol o ol bai bel hevi long wanpela i dai, o sik i painim ol, o ol narapela hevi i painim ol. Orait taim yumi pas gut wantaim ol na helpim ol, na mekim gut bel bilong ol, na mekim gutpela tok bilong strongim ol, bai yumi kisim amamas na kamapim olsem yumi stap gut long ol poroman bilong yumi.—Skelim wantaim Sindaun 17:17; Aposel 20:35.