Bihainim Ol Tok Bilong Jehova

“Yu wanem man o meri i save pret long Bikpela na i save bihainim tok bilong en, yu ken amamas.”​​—SNG. 128:1.

1, 2. Bilong wanem yumi ken save olsem yumi inap i stap amamas?

STAP AMAMAS​​—olgeta manmeri i laik i stap olsem. Tasol ating bai yu wanbel long tok olsem laik bilong i stap amamas na pasin bilong wok strong long kisim amamas i no makim olsem man i stap amamas.

² Tasol yumi inap i stap amamas. Song 128:1 i tok: “Yu wanem man o meri i save pret long Bikpela na i save bihainim tok bilong en, yu ken amamas.” Yumi inap i stap amamas sapos yumi lotuim God na mekim ol samting em i laik yumi mas mekim. Dispela inap mekim wanem long ol pasin bilong yumi?

Soim Olsem Ol Narapela Inap Bilip Long Yu

 3. Olsem wanem pasin bilong i stap olsem man ol narapela inap bilip long em i poroman wantaim dediket bilong yumi long God?

³ Ol man i save pret long Jehova ol i stap olsem man ol narapela inap bilip long ol, olsem yumi save bilip long Jehova. Jehova i bin truim olgeta tok promis em i bin mekim long ol Israel bilong bipo. (1 Kin. 8:56) Dediket yumi mekim long God em i nambawan bikpela tok promis yumi inap mekim, na sapos yumi beten oltaim dispela bai helpim yumi long truim dispela tok promis. Yumi ken beten olsem Devit, man bilong raitim song: “God, olgeta samting mi promis pinis long yu, em yu bin harim. . . . Orait long olgeta de bai mi bihainim ol promis bipo mi tokim yu long en, na oltaim bai mi singim song bilong litimapim nem bilong yu.” (Sng. 61:​5, 8; Sav. 5:​4-6) Bilong stap pren bilong God, yumi mas i stap man ol narapela inap bilip long en.​​—Sng. 15:​1, 4.

 4. Jepta na pikinini meri bilong em i ting olsem wanem long tok promis Jepta i mekim long Jehova?

⁴ Long taim bilong ol hetman bilong Israel, Jepta i tok promis olsem sapos Jehova i helpim em long winim ol Amon, em bai givim namba wan man o meri i kam bungim em taim em i kam bek long pait olsem “ofa bilong paia i kukim olgeta.” Jepta i gat wanpela pikinini meri tasol, na dispela pikinini i kam bungim em. Jepta na pikinini meri bilong em husat i no marit, tupela i bilip strong long Jehova na ol i truim tok promis bilong Jepta. Long Israel em i bikpela samting long ol meri i mas marit na karim pikinini, tasol pikinini meri bilong Jepta i orait long i stap singel na mekim wok bilong God long haus lotu bilong Jehova.​—Het. 11:​28-​40.

 5. Olsem wanem Hana i stap olsem meri ol narapela inap bilip long em?

⁵ Hana i pret long God na em i stap olsem meri ol narapela inap bilip long em. Em i sindaun long ples maunten bilong Efraim wantaim man bilong em bilong lain Livai, em Elkana, na narapela meri bilong Elkana, Penina. Penina i karim pinis sampela pikinini na em i tok bilas long Hana, husat i no karim yet pikinini, na em i tok bilas moa yet long em taim famili i go long haus lotu. Long wanpela taim olsem, Hana i tok promis olsem sapos em i karim wanpela pikinini man, em bai givim dispela pikinini long Jehova. I no longtaim na em i kisim bel na karim wanpela pikinini man na givim nem Samuel long em. Taim Samuel i lusim susu pinis, Hana i bringim em long God long Silo, na em i givim Samuel long Jehova i go “inap em i dai.” (1 Sml. 1:11) Hana i truim tok promis bilong em, maski em i no bin save olsem bihain em bai karim sampela pikinini moa.​​—1 Sml. 2:​20, 21.

 6. Olsem wanem pasin bilong Tikikus olsem man ol narapela inap bilip long em i kamap ples klia?

⁶ Tikikus, wanpela Kristen long taim bilong ol aposel, em i man ol narapela i save bilip long em na em i “gutpela wokman tru bilong Bikpela.” (Kl. 4:7) Tikikus i raun wantaim aposel Pol kirap long kantri Grik i go long Masedonia, na long Esia Maina, na ating bihain ol i go long Jerusalem. (Ap. 20:​2-4) Ating em i dispela “brata” i bin helpim Taitus long bungim mani bilong helpim ol wanbilip i sot long ol samting long Judia. (2 Ko. 8:​18, 19; 12:18) Taim Pol i kalabus long namba wan taim long Rom, em i salim Tikikus olsem mausman bilong karim ol pas i go long ol wanbilip long Efesus na Kolosi. (Ef. 6:​21, 22; Kl. 4:​8, 9) Taim Pol i kalabus long namba tu taim long Rom, em i salim Tikikus i go long Efesus. (2 Ti. 4:12) Sapos yumi stap olsem man ol narapela inap bilip long em, yumi tu inap kisim ol gutpela blesing taim yumi mekim wok bilong Jehova.

7, 8. Olsem wanem yumi ken tok Devit na Jonatan i pren tru?

⁷ God i laik yumi stap olsem gutpela pren ol narapela inap bilip long em. (Snd. 17:17) Jonatan, pikinini man bilong King Sol, i kamap pren bilong Devit. Taim Jonatan i harim olsem Devit i bin kilim i dai Goliat, Jonatan “i givim bel bilong en moa yet long Devit na em i laikim Devit tru olsem em i laikim em yet.” (1 Sml. 18:​1, 3) Na Jonatan i givim tok lukaut long Devit taim Sol i laik kilim Devit i dai. Taim Devit i ranawe pinis, Jonatan i go bungim em na i mekim wanpela kontrak wantaim em. Taim Jonatan i toktok long Sol long ol samting bilong Devit, Sol i laik kilim Jonatan i dai, tasol tupela pren i bung gen na strongim pasin pren bilong ol. (1 Sml. 20:​24-​41) Taim ol i bung long laspela taim, Jonatan i strongim Devit long “bilip strong long God.”​​—1 Sml. 23:​16-​18.

⁸ Jonatan i dai taim ol Israel i pait long ol Filistia. (1 Sml. 31:6) Long wanpela singsing sori, Devit i tok: “Mi sori tru long yu, Jonatan, brata bilong mi. Mi laikim yu tumas na yu bin laikim mi tu. Laik bilong yu i strong moa yet na i winim tru laik bilong ol meri i laikim mi.” (2 Sml. 1:26) Dispela pasin laikim i makim pasin laikim i stap namel long tupela gutpela pren na i no makim pasin laikim i stap namel long wanpela man na meri. Devit na Jonatan i pren tru.

Oltaim Mekim Pasin Daun

 9. Olsem wanem Hetman sapta 9 i kamapim olsem pasin daun i bikpela samting?

⁹ Bilong stap pren bilong God, yumi mas “lusim pasin bilong bikhet,” olsem mekim pasin daun. (1 Pi. 3:8; Sng. 138:6) Hetman sapta 9 i kamapim olsem pasin daun em i bikpela samting. Pikinini man bilong Gideon, Jotam, em i tok: “Long wanpela de ol diwai i laik makim wanpela diwai namel long ol long kamap king bilong ol.” Baibel i toktok long diwai oliv, diwai fik, na diwai wain. Ol i makim ol gutpela manmeri em ol i no wok long bosim ol wanlain Israel. Tasol ol liklik diwai i gat nil​—ol i gat wok olsem paiawut tasol​—i makim wok king bilong hambakman Abimelek, em wanpela kilman na em i laik bosim ol man. Em i stap “king bilong Israel inap tripela yia,” na em i dai taim em i no lapun yet. (Het. 9:​8-​15, 22, 50-​54) Em i gutpela moa long mekim pasin daun na “lusim pasin bilong bikhet,” a?

10. Herot i no “litimapim nem bilong God” na dispela i skulim yu long wanem samting?

¹⁰ Long taim bilong ol aposel, kros i kamap namel long King Herot Agripa bilong Judia na ol manmeri bilong Tair na Saidon, em ol i laik mekim pasin sekan wantaim Herot. Long wanpela de taim Herot i mekim wanpela tok, ol i singaut: “Em i maus bilong wanpela god. Em i no maus bilong man.” Herot i no sakim pasin bilong ol long litimapim nem bilong em, na ensel bilong Jehova i paitim em na em i dai long wanpela sik nogut tru, long wanem, “em i no laik litimapim nem bilong God.” (Ap. 12:​20-​23) Olsem wanem sapos yumi save gut long mekim ol tok o skulim gut ol man long ol tok i tru bilong Baibel? God i inapim yumi long mekim dispela wok, olsem na gutpela yumi litimapim nem em, a?​​—1 Ko. 4:​6, 7; Jem. 4:6.

Sanap Strong na No Ken Pret

11, 12. Olsem wanem stori bilong Enok i soim olsem Jehova i save strongim bel bilong ol wokman bilong em na ol i no pret?

¹¹ Sapos long pasin daun yumi bihainim tok bilong Jehova, em bai strongim bel bilong yumi na yumi no pret. (Lo 31:​6-8, 23) Enok, em i namba 7 man i kamap long lain tumbuna pikinini bilong Adam, em i gat strongpela bel na em i wokabaut wantaim God long rot bilong bihainim stretpela pasin namel long ol manmeri nogut long taim bilong em. (Stt. 5:​21-​24) Jehova i strongim Enok long autim strongpela tok long ol man, long wanem, ol i mekim ol tok na pasin nogut. (Ritim Jut 14, 15.) Olsem wanem? Yu gat strongpela bel bilong tokaut long kot bilong God?

¹² Long rot bilong Bikpela Tait long taim bilong Noa, Jehova i mekim kot na givim strafe long ol man nogut. Tasol tok profet bilong Enok i strongim yumi, long wanem, i no longtaim na ol planti tausen ensel bilong God bai bagarapim ol man nogut long nau. (KTH 16:​14-​16; 19:​11-​16) Jehova i save harim beten bilong yumi na strongim bel bilong yumi long autim tok bilong em, maski yumi mas tokaut long kot bilong em o tokaut long ol gutpela blesing bai kamap taim Kingdom i bosim graun.

13. Bilong wanem yumi ken bilip olsem God inap strongim bel bilong yumi na givim strong long yumi bilong karim ol hevi i save daunim yumi?

¹³ God i mas strongim bel bilong yumi na givim yumi strong bilong karim ol hevi i save daunim yumi. Taim Iso i kisim tupela meri bilong lain Hit, papamama bilong em “Aisak na Rebeka i bel pen tru.” Rebeka i tok: “Mi les pinis long ol dispela meri bilong lain Hit. Sapos [pikinini man bilong mipela] Jekop tu i maritim wanpela meri bilong lain Hit olsem dispela tupela meri i stap hia, orait mobeta mi dai.” (Stt. 26:​34, 35; 27:46) Aisak i kirap mekim ol samting na salim Jekop i go painim wanpela meri namel long ol manmeri i lotuim Jehova. Aisak na Rebeka i no inap senisim ol samting Iso i bin mekim, tasol God i givim savetingting, strongpela bel, na strong long ol bilong i stap gut long Em. Sapos yumi beten askim Jehova long helpim yumi, em bai mekim wankain pasin long yumi.​​—Sng. 118:5.

14. Olsem wanem wanpela yangpela meri Israel i soim olsem em i gat strongpela bel?

¹⁴ Planti handet yia bihain, ami bilong Siria i holimpas wanpela yangpela meri Israel na em i kamap wokmeri long haus bilong Naman, wanpela kepten bilong ami bilong Siria. Kepten hia i gat sik lepra. Yangpela meri i bin harim tok bilong ol mirakel God i bin mekim long rot bilong profet Elisa, na long strongpela bel em i tokim meri bilong Naman olsem: ‘I gutpela sapos bikman bilong mi bai go long Israel na bai profet bilong Jehova i ken oraitim sik lepra bilong em.’ Naman i go long Israel, na long rot bilong mirakel em i kamap orait gen. (2 Kin. 5:​1-3) Dispela yangpela meri i olsem gutpela piksa long ol yangpela em ol i wetim Jehova i strongim bel bilong ol long autim tok long ol tisa, wanklas, na ol narapela!

15. Obadia, bosboi bilong Ahap, i mekim wanem samting i soim olsem em i gat strongpela bel?

¹⁵ God i strongim bel bilong yumi na dispela i helpim yumi long sanap strong long taim ol man i mekim nogut long yumi. Tingim bosboi bilong King Ahap, em Obadia, em i bin stap long taim bilong profet Elisa. Taim Kwin Jesebel i tok long kilim i dai ol profet bilong God, Obadia i haitim “50 long narapela hul na 50 long narapela hul.” (1 Kin. 18:13; 19:18) Olsem wanem? Long strongpela bel bai yu helpim ol wanbilip Kristen em ol narapela i mekim nogut long ol, olsem Obadia i helpim ol profet bilong Jehova?

16, 17. Aristarkus na Gaius i mekim wanem taim ol man i mekim nogut long ol?

¹⁶ Sapos ol birua i mekim nogut long yumi, yumi ken bilip tru olsem Jehova bai helpim yumi. (Ro. 8:​35-​39) Ausait long wanpela ples bung long Efesus, wanpela bikpela lain, ating ol i olsem planti tausen manmeri ol i kros na singaut bikmaus na ol i kam bilong bagarapim Aristarkus na Gaius, em ol wanwok bilong aposel Pol. Demitrius, em man bilong wokim ol samting long silva i kirapim dispela kros pait. Demitrius na ol wanwok bilong em ol i bin mekim ol liklik piksa bilong haus lotu bilong god meri Artemis, na gutpela wok bisnis bilong ol i laik bagarap, long wanem, wok autim tok bilong Pol i mekim na planti manmeri long dispela taun i no moa lotuim ol dispela piksa. Ol i kisim Aristarkus na Gaius i go long ples bung na ol i wok long singaut: “Artemis bilong yumi Efesus em i nambawan tru.” Ating Aristarkus na Gaius i ting ol bai dai, tasol kuskus bilong taun i tokim ol manmeri long stap isi.​—Ap. 19:​23-​41.

¹⁷ Sapos kain samting olsem i bin painim yu, bai yu painim rot na laip i no hatwok olsem? I no gat wanpela samting i kamapim olsem Aristarkus o Gaius i pret. Aristarkus i bilong Tesalonaika, olsem na em i save wok bilong autim tok inap kirapim ol man long mekim nogut long em. Paslain long dispela, taim Pol i autim tok long Tesalonaika ol man i kirap birua long ol. (Ap. 17:5; 20:4) Aristarkus na Gaius i bihainim tok bilong Jehova, olsem na em i givim strong long ol na i strongim bel bilong ol long sanap strong taim ol man i mekim nogut long ol.

Tingim Ol Narapela

18. Olsem wanem Prisila na Akwila i “lukautim ol samting” bilong ol narapela?

¹⁸ Maski ol man i mekim nogut long yumi long nau o nogat, yumi mas tingim ol wanwok Kristen. Prisila na Akwila i bin “lukautim ol samting” bilong ol narapela. (Ritim Filipai 2:4.) Ating dispela tupela gutpela marit i bin givim ples slip long Pol long Efesus, em dispela ples we Demitrius, em man bilong wokim ol samting long silva, i bin kirapim dispela hevi em yumi bin stori long en. Ating dispela hevi i bin kirapim Akwila na Prisila long “redi long i dai bilong helpim” Pol. (Ro. 16:​3, 4; 2 Ko. 1:8) Long nau, yumi wari long ol brata bilong yumi em ol narapela i mekim nogut long ol, na dispela i kirapim yumi long ‘bihainim pasin bilong ol snek, na tingim gut pastaim ol samting.’ (Mt. 10:​16-​18) Yumi was gut na mekim yet wok bilong yumi, na yumi no kamapim nem bilong ol brata o kamapim sampela tok hait long ol man i mekim nogut long ol.

19. Dorkas i mekim wanem ol gutpela samting bilong helpim ol narapela?

¹⁹ Yumi inap mekim kain kain samting bilong lukautim ol samting bilong ol narapela. Ating sampela Kristen i sot long sampela samting, na yumi inap givim dispela samting long ol. (Ef. 4:28; Jem. 2:​14-​17) Long taim bilong ol aposel long kongrigesen long Jopa, i gat wanpela gutpela meri i helpim ol narapela, nem bilong em Dorkas. (Ritim Aposel 9:​36-​42.) Oltaim Dorkas “i save mekim ol gutpela pasin na em i save helpim ol manmeri i sot long ol samting,” na em i wokim tu ol klos na saket samting bilong ol meri em man bilong ol i dai pinis na i sot long ol samting. Taim em i dai long 36 C.E., ol dispela meri em man bilong ol i dai pinis ol i bel hevi tru. Long rot bilong aposel Pita, God i kirapim bek Dorkas, na yumi ken ting olsem i go inap long Dorkas i dai gen, em i amamas long autim gutnius na mekim ol gutpela wok bilong helpim ol narapela. Yumi amamas tru long ol kain gutpela meri Kristen i stap namel long yumi, a?

20, 21. (a) Olsem wanem pasin bilong strongim bel bilong ol narapela na pasin bilong tingim ol narapela i wok wantaim? (b) Yu inap mekim wanem bilong strongim bel bilong ol narapela?

²⁰ Yumi tingim ol narapela long rot bilong strongim ol. (Ro. 1:​11, 12) Sailas, wanwok bilong Pol, em i strongim ol narapela. Taim ol i stretim pinis tok pait long pasin bilong katim skin long 49 C.E., lain hetman long Jerusalem i salim ol mausman bilong karim wanpela pas i go long ol bilipman long ol narapela hap. Sailas, Judas, Barnabas, na Pol i bringim pas i go long Antiok. Long dispela hap, Sailas na Judas i “givim planti gutpela tok long ol Kristen, na long dispela pasin tupela i strongim bel bilong ol.”​​—Ap. 15:32.

²¹ Bihain, ol i kalabusim Pol na Sailas long Filipai, tasol long rot bilong wanpela guria ol inap long autim tok long dispela hap na woda na famili bilong em i kamap bilipman. Paslain long Sailas na Pol i lusim dispela taun, ol i strongim ol brata. (Ap. 16:​12, 40) Olsem Pol na Sailas, wok strong long strongim ol narapela long rot bilong ol tok bilong yu na pasin bilong yu long givim bel long autim tok. Tru tumas, sapos yu gat “wanpela tok bilong strongim bel” bilong ol narapela, orait “autim” dispela tok.​​—Ap. 13:15.

Wokabaut Yet Long Rot Jehova i Makim

22, 23. Olsem wanem ol stori bilong Baibel inap helpim tru yumi?

²² Yumi mas amamas long ol stori tru bilong ol manmeri i stap long tok bilong Jehova, em “God bilong strongim bel bilong ol man”! (2 Ko. 1:​3, Baibel Byington) Sapos yumi laik ol dispela stori i helpim yumi, yumi mas bihainim ol tok ol dispela stori i skulim yumi long en na larim holi spirit bilong God i stiaim yumi long laip bilong yumi.​​—Ga. 5:​22-​25.

²³ Pasin bilong tingim tingim long bel ol stori bilong Baibel bai helpim yumi long kamapim ol pasin God i laikim. Dispela bai strongim pasin bilong yumi long pas gut wantaim Jehova, em Man i save givim yumi ‘gutpela save na tingting na mekim yumi amamas.’ (Sav. 2:26) Na yumi tu i ken mekim bel bilong God i amamas. (Snd. 27:11) Yumi mas strong long mekim olsem long rot bilong bihainim tok bilong Jehova.

Bai Yu Bekim Olsem Wanem?

• Olsem wanem yu inap i stap olsem man ol narapela i ken bilip long em?

• Bilong wanem yumi mas mekim pasin daun?

• Olsem wanem ol stori bilong Baibel inap helpim yumi long strongim bel?

• Olsem wanem yumi ken tingim ol narapela?

[Piksa long pes 8]

Jepta na pikinini meri bilong em i truim tok promis bilong Jepta, maski i hatwok long mekim

[Piksa long pes 10]

Yupela ol yangpela i bin lain long wanem samting long yangpela meri Israel?

[Piksa long pes 11]

Olsem wanem Dorkas i bin helpim ol wanlain Kristen?