Belgut Olsem Jehova i Amamas Long Yu

 1. Sampela gutpela wokman bilong Jehova inap pilim olsem wanem?

YUMI belgut long save olsem Jehova i save amamas long lain bilong em! Baibel i tok: “Jehova i save amamas long ol manmeri bilong em.” (Sng. 149:4) Tasol sampela taim, bel hevi inap daunim tru sampela na dispela inap mekim ol i tingting planti olsem, ‘Jehova i amamas long mi o nogat?’ Long taim bilong ol man i raitim Baibel, sampela gutpela wokman na wokmeri bilong Jehova i bin pilim olsem.—1 Sml. 1:​6-10; Jop 29:​2, 4; Sng. 51:11.

 2. Jehova i amamas long husat lain?

² Baibel i kamapim klia olsem maski yumi no gutpela olgeta, yumi inap mekim ol samting na bai Jehova i ken amamas long yumi. Yumi mas mekim wanem? Yumi mas bilip long Jisas Krais na kisim baptais. (Jon 3:16) Long dispela rot, yumi kamapim klia long ol narapela olsem yumi tanim bel long ol sin bilong yumi na yumi tok promis long God olsem yumi bai mekim laik bilong em. (Apo. 2:38; 3:19) Jehova i amamas taim yumi mekim ol dispela samting bilong kamap pren bilong em. Taim yumi wok yet long mekim ol samting bilong inapim tok promis bilong dediket bilong yumi, Jehova bai amamas long yumi na tingim yumi olsem ol gutpela pren bilong em.—Sng. 25:14.

 3. Yumi bai stori long wanem samting?

³ Bilong wanem sampela inap pilim olsem Jehova i no amamas long ol? Long wanem rot Jehova i soim yumi olsem em i amamas long yumi? Na olsem wanem wanpela Kristen i ken strongim bilip bilong em olsem God i amamas long em?

AS NA SAMPELA I PILIM OLSEM JEHOVA I NO AMAMAS LONG OL

4-5. Sapos yumi pilim olsem yumi samting nating, yumi ken bilip tru long wanem samting?

⁴ Kirap long taim yumi liklik pikinini i kam inap long nau, planti bilong yumi i save pilim olsem yumi samting nating. (Sng. 88:15) Wanpela brata nem bilong em Adrián, em i tok: “Oltaim mi save pilim olsem mi samting nating. Mi inap tingim bek long taim mi liklik yet, mi save beten olsem famili bilong mi i mas stap long Paradais, tasol mi yet i save pilim olsem mi no gutpela tumas long stap long hap.” Tony i kamap bikpela long famili em ol i no Witnes, na em i tok: “Papamama bilong mi i no save tokim mi olsem ol i laikim mi o ol i amamas long mi. Olsem na mi pilim olsem mi no inap mekim wanpela samting bilong amamasim ol.”

⁵ Sapos sampela taim yumi pilim olsem yumi samting nating, orait yumi ken tingim olsem Jehova yet i bin kirapim yumi long i go klostu long em. (Jon 6:44) Em i luksave long ol gutpela pasin bilong yumi em ating yumi yet i no bin luksave long en, na em i save gut long yumi wanem kain man o meri tru. (1 Sml. 16:7; 2 Sto. 6:30) Olsem na yumi ken bilip tru long tok Jehova i mekim olsem yumi dia tumas long em.—1 Jon 3:​19, 20.

 6. Aposel Pol i pilim olsem wanem long ol sin em i bin mekim long pastaim?

⁶ Paslain long yumi lainim tok i tru, ating sampela bilong yumi i bin mekim ol samting em nau yumi tingim yet na bel i kotim yumi long dispela. (1 Pita 4:3) Ol Kristen i stap gut long God, ol tu i mas wok strong long daunim ol pasin kranki bilong ol yet. Olsem wanem? Sampela taim bel i save kotim yu? Sapos olsem, orait yu ken kisim bel isi long save olsem ol gutpela wokman bilong Jehova i bin pilim olsem tu. Tingim eksampel bilong aposel Pol, em i bin pilim nogut tru taim em i tingim bek ol bikpela rong em i bin mekim. (Rom 7:24) Tru Pol i bin tanim bel long ol sin em i bin mekim na em i kisim baptais. Maski i olsem, em i tok “ol arapela aposel i winim [em]” na em i “man tru bilong mekim sin winim olgeta arapela sinman.”—1 Kor. 15:9; 1 Tim. 1:15.

 7. Yumi mas holim wanem tingting long ol sin yumi bin mekim long pastaim?

⁷ Papa bilong yumi long heven i tok promis long fogivim yumi sapos yumi tanim bel long ol sin bilong yumi. (Sng. 86:5) Olsem na sapos yumi sori tru long ol sin yumi bin mekim long pastaim, orait yumi ken bilip tru long tok bilong Jehova olsem em i fogivim yumi.—Kol. 2:13.

8-9. Olsem wanem yumi ken daunim dispela tingting olsem yumi no inap mekim bikpela wok moa bilong amamasim Jehova?

⁸ Yumi olgeta i laik tru long givim bel olgeta long mekim wok bilong Jehova. Tasol sampela inap pilim olsem ol i no inap mekim bikpela wok moa bilong amamasim God. Wanpela sista nem bilong em Amanda, em i tok: “Mi save tingting olsem, oltaim mi mas mekim planti samting moa bilong soim olsem mi givim bel olgeta long mekim wok bilong Jehova. Planti taim mi laik mekim planti samting moa winim mak bilong mi. Na taim mi no inapim samting mi tingting long mekim, mi save tingting olsem ating Jehova i bel hevi long mi wankain olsem mi bel hevi long mi yet.”

⁹ Olsem wanem yumi ken daunim dispela tingting olsem yumi no inap mekim bikpela wok moa bilong amamasim Jehova? Tingim dispela, Jehova i no save subim yumi long mekim ol samting. Em i no ekspektim yumi long mekim planti samting moa winim ol samting yumi inap mekim. Em i amamas taim yumi givim bel long mekim ol samting em yumi inap mekim bilong lotuim em. Na tu, tingim eksampel bilong ol manmeri long Baibel em ol i bin givim bel olgeta long mekim wok bilong Jehova. Tingim eksampel bilong Pol. Inap planti yia em i wok hat tru long raun i go long ol ples i stap longwe inap planti tausen kilomita, na tu, em i kamapim planti nupela kongrigesen. Tasol taim senis i kamap long sindaun bilong em na em i no inap mekim bikpela wok moa bilong autim tok, yu ting God i no amamas moa long em? Nogat. Pol i wok yet long mekim ol samting em inap mekim, na Jehova i blesim em. (Apo. 28:​30, 31) Olsem tasol, sampela taim ol wok bilong Jehova yumi mekim inap senis. Tasol bikpela samting long Jehova em as na yumi mekim wok bilong em. Orait yumi ken stori long sampela rot Jehova i soim yumi olsem em i amamas long yumi.

LONG WANEM ROT JEHOVA I SOIM YUMI OLSEM EM I AMAMAS LONG YUMI?

10. Long wanem rot yumi ken harim Jehova i tok em i amamas long yumi? (Jon 16:27)

¹⁰ Long rot bilong Baibel. Jehova i save painim ol rot bilong soim lain bilong em olsem em i laikim ol na em i amamas long ol. Baibel i stori long tupela taim Em i bin tokim Jisas olsem Em i laikim em tumas na em i amamas long em. (Mat. 3:17; 17:5) Olsem wanem? Yu laik harim Jehova i tokim yu olsem em i amamas long yu? Jehova i save toktok long yumi long rot bilong ol tok bilong em i stap long Baibel, na i no long rot bilong wanpela nek long heven. Taim yumi ritim ol tok bilong Jisas i stap long Ol Gutnius, i olsem yumi harim Jehova i tokim yumi olsem em i amamas long yumi. (Ritim Jon 16:27.) Jisas i bihainim gut ol pasin bilong Papa bilong em. Olsem na taim yumi ritim stori long Jisas i tokim ol disaipel bilong em olsem em i amamas long ol maski ol i no gutpela olgeta, yumi ken piksaim long tingting olsem Jehova i mekim ol dispela tok long yumi tu.—Jon 15:​9, 15.

11. Taim yumi karim ol hevi, wai na yumi no ken ting olsem Jehova i no amamas moa long yumi? (Jems 1:12)

¹¹ Long rot bilong ol samting em i givim long yumi. Jehova i laik tru long helpim yumi, na wanpela rot em i mekim olsem em long givim yumi ol samting bilong skin yumi nidim. Sampela taim Jehova inap larim yumi karim ol pen na hevi, wankain olsem em i bin mekim long stretpela man Jop. (Jop 1:​8-11) Tasol taim hevi i painim yumi, dispela i no makim olsem God i no amamas moa long yumi, nogat. Ol hevi i kamap i opim rot long yumi inap soim olsem yumi laikim tru God na yumi trastim em. (Ritim Jems 1:12.) Na yumi bai pilim gutpela pasin laikim na sapot bilong em taim em i helpim yumi long sanap strong na karim ol hevi.

12. Yumi inap kisim wanem skul long stori bilong Dmitrii?

¹² Tingim stori bilong Dmitrii, em wanpela brata long Esia. Ol i pinisim em long wok, na em i no inap painim wok mani inap planti mun. Olsem na em i mekim bikpela wok moa long autim tok, na long dispela rot em i soim olsem em i trastim Jehova. Planti mun i lus na em i no painim yet wok mani. Bihain em i kisim wanpela bikpela sik na dispela i mekim na em i slip tasol long bet. Em i pilim olsem em i no gutpela man marit na papa, na em i tingting olsem ating Jehova i no amamas moa long em. Orait wanpela apinun, pikinini meri bilong em i prinim wanpela pepa i gat tok bilong Aisaia 30:15 i stap long en, em i tok: “Yupela bai kamap strong sapos yupela i stap isi na trastim mi.” Em i bringim pepa i go long bet bilong papa na em i tokim em olsem, “Dedi, taim yu bel hevi, yu ken tingim dispela skripsa.” Dispela i kirapim Dmitrii long luksave olsem Jehova i lukautim famili bilong em na ol i gat inap kaikai, klos, na ples slip. Em i tok: “Samting mi mas mekim em long stap isi na wok yet long trastim God bilong mi.” Sapos yu bungim wankain hevi olsem, yu ken bilip tru olsem Jehova i tingim yu na em bai helpim yu long sanap strong na karim hevi.

13. Jehova inap yusim husat long soim yumi olsem em i amamas long yumi, na em inap mekim long wanem rot?

¹³ Long rot bilong ol wanbilip. Jehova i save yusim ol bratasista bilong yumi long soim yumi olsem em i amamas long yumi. Olsem, em inap kirapim ol narapela long mekim ol tok bilong strongim yumi long taim stret yumi nidim. Dispela samting i kamap long wanpela sista long Esia taim em i karim bikpela hevi tru. Ol i pinisim em long wok, na tu, em i kisim bikpela sik. Bihain man bilong em i mekim wanpela bikpela sin, olsem na ol i pinisim em long wok elda bilong em. Dispela sista i tok: “I hatwok long mi kliagut long as na ol dispela samting i kamap. Mi tingting olsem ating mi bin mekim wanpela bikpela rong na Jehova i no amamas moa long mi.” Sista bilong yumi i beten strong long Jehova long helpim em long bilip olsem Em i amamas long em. Hau Jehova i helpim em? Dispela sista i tok: “Ol elda long kongrigesen i toktok wantaim mi na ol i strongim mi long bilip olsem Jehova i laikim mi tru.” Bihain em i beten gen na askim Jehova long helpim em. Em i tok: “Long dispela wankain de, mi kisim wanpela pas i kam long sampela bratasista long kongrigesen. Taim mi ritim ol tok ol i raitim bilong mekim isi bel bilong mi, mi pilim olsem Jehova i harim beten bilong mi.” Tru tumas, planti taim Jehova i soim yumi olsem em i amamas long yumi long rot bilong ol gutpela tok ol narapela i mekim long yumi.—Sng. 10:17.

14. Wanem narapela rot Jehova i soim yumi olsem em i amamas long yumi?

¹⁴ Narapela rot Jehova i soim yumi olsem em i amamas long yumi em long rot bilong yusim ol wanbilip long givim tok kaunsel long yumi taim yumi nidim. Olsem, long taim bilong ol aposel, Jehova i yusim aposel Pol long raitim 14 pas i go long ol wanbilip Kristen. Long ol dispela pas, em i mekim ol tok kaunsel bilong stretim ol, tasol em i mekim long gutpela pasin. Bilong wanem Jehova i kirapim Pol long raitim tu ol tok kaunsel long ol pas bilong em? Jehova em i gutpela Papa husat “i save laikim tru” ol pikinini bilong em, olsem na em i save stretim ol. (Prov. 3:​11, 12) So taim yumi kisim ol tok kaunsel em Baibel i as bilong en, yumi ken tingim dispela olsem rot God i soim yumi olsem em i amamas long yumi, na i no olsem em i bel hevi long yumi. (Hib. 12:6) Wanem ol narapela samting i soim olsem Jehova i amamas long yumi?

OL NARAPELA SAMTING I SOIM OLSEM JEHOVA I AMAMAS LONG YUMI

15. Jehova i save givim holi spirit bilong em long husat, na bilong wanem dispela i ken strongim bilip bilong yumi?

¹⁵ Jehova i save givim holi spirit bilong em long ol lain em i amamas long ol. (Mat. 12:18) Yumi ken askim yumi yet olsem, ‘Long laip bilong mi, mi save mekim ol pasin em holi spirit bilong God i kamapim?’ Olsem wanem? Yu luksave olsem nau yu gat pasin bilong i no les kwik long ol narapela winim long bipo taim yu no bin kisim save yet long Jehova? Taim yu wok long lain gut long mekim ol pasin em holi spirit bilong God i kamapim, dispela bai helpim yu long bilip tru olsem Jehova i amamas long yu!—Lukim blok “Ol Pasin Holi Spirit i Kamapim Em . . . ”

16. Jehova i save yusim husat long autim gutnius, na dispela i mekim yu pilim olsem wanem? (1 Tesalonaika 2:4)

¹⁶ Jehova i amamas long givim wok bilong autim gutnius long ol manmeri em i amamas long ol. (Ritim 1 Tesalonaika 2:4.) Lukim gutpela samting i kamap taim wanpela sista, nem bilong em Jocelyn, i autim gutnius long ol narapela. Wanpela taim, Jocelyn i kirap long moning na em i bel hevi tru. Em i tok: “Mi pilim olsem mi no gat strong long mekim wanpela samting. Tasol mi mekim wok painia, na em de mi makim bilong go autim tok. Olsem na mi beten na mi go autim tok.” Long dispela moning Jocelyn i bungim Mary, em i gat gutpela pasin na em i orait long stadi long Baibel. Sampela mun bihain Mary i tok em i wok long beten na askim God long helpim em taim Jocelyn i kam nok long dua bilong em. Jocelyn i tingim bek dispela samting i kamap, na em i tok: “Mi pilim olsem Jehova i tokim mi, ‘Mi amamas long yu.’” Tru i no olgeta manmeri bai amamas long putim yau long yumi taim yumi autim tok. Tasol yumi ken save tru olsem Jehova i amamas taim yumi givim bel olgeta long autim gutnius long ol narapela.

17. Yu kisim wanem skul long tok bilong Vicky long pe bilong baim bek man? (Buk Song 5:12)

¹⁷ Long rot bilong pe bilong baim bek man, Jehova inap fogivim sin bilong ol manmeri em i amamas long ol. (1 Tim. 2:​5, 6) Tasol olsem wanem sapos long bel yumi tingting olsem Jehova i no amamas long yumi, maski yumi bilip long pe bilong baim bek man na yumi baptais pinis? Tingim dispela, yumi no inap trastim ol filings bilong yumi yet long olgeta taim, tasol yumi ken trastim Jehova. Em i tingim ol manmeri i bilip long pe bilong baim bek man olsem ol stretpela manmeri na em i tok promis long blesim ol. (Ritim Buk Song 5:12; Rom 3:26) Vicky em wanpela sista, na em i tingim tingim long bel pe bilong baim bek man na dispela i helpim em. Wanpela taim, em i wok long tingim tingim pe bilong baim bek man, na em i tok: “Jehova i no les kwik long mi. . . . Tasol i olsem mi tokim God: ‘Mi no pilim pasin laikim bilong yu. Ofa bilong Pikinini bilong yu i no inap tekewe sin bilong mi.’” Tasol em i tingim tingim long bel pe bilong baim bek man, na dispela i helpim em long pilim tru pasin laikim bilong Jehova. Yumi tu bai pilim pasin laikim bilong Jehova na luksave olsem em i amamas long yumi taim yumi tingim tingim pe bilong baim bek yumi.

18. Sapos yumi wok yet long laikim Papa bilong yumi long heven, orait yumi ken bilip tru long wanem samting?

¹⁸ Yumi inap wok hat long bihainim ol tok em yumi stori pinis long en, tasol sampela taim yumi inap bel hevi na tingting olsem Jehova i amamas long yumi o nogat. Sapos yumi pilim olsem, orait tingim olsem Jehova i save amamas long “ol man husat i no lusim pasin bilong laikim em.” (Jems 1:12) Olsem na wok yet long go klostu long Jehova na luksave long ol rot em i soim yu olsem em i amamas long yu. Na oltaim tingim olsem Jehova “i no stap longwe long yumi olgeta wan wan.”—Apo. 17:27.