God Em i As Bilong Bel Isi Em i Mekim Isi Bel Bilong Yumi
“Yupela i mas strongim bel bilong ol brata long dispela tok.”−1 TESALONAIKA 4:18.
1. Pol i askim God long mekim wanem na yumi save em i tingim tru pasin bel isi?
APOSEL Pol i laik tru bai kongrigesen Kristen i ken i stap bel isi. Olsem na long kirap bilong 13 pas bilong em long Baibel em i askim God long givim bel isi long ol man em i raitim pas long ol. Olsem: Taim Pol i raitim pas long nupela kongrigesen long Tesalonaika, em i raitim tok olsem: “Marimari wantaim bel isi i ken i stap long yupela.” Na klostu long pinis bilong dispela pas, em i raitim tok olsem: “God em i as bilong bel isi, em yet i ken mekim yupela i holi olgeta. . . . bai yupela i stap gutpela olgeta, na i no gat asua long taim Bikpela bilong yumi Jisas Krais em i kam bek.”−1 Tesalonaika 1:1; 5:23.
2 Pol wantaim ol poroman bilong em ol i bin “wok strong tumas” na mekim bikpela hatwok bilong helpim ol dispela nupela bilipman. Pol i tok: “Taim mipela i stap wantaim yupela, mipela i mekim pasin isi tru, olsem meri i save lukautim gut ol pikinini bilong en. Mipela i laikim tumas yupela, olsem na mipela i laik givim gutnius bilong God long yupela. Na i no dispela tasol. Nogat. Mipela i redi tu long i dai bilong helpim yupela. Long wanem mipela i laikim tru yupela.” Dispela tok bilong Pol i kamapim long ples klia olsem em i tingim tru dispela kongrigesen na givim bel tru long ol, a? Tru tumas, em i makim gutpela pasin ol elda Kristen ol i mas bihainim, em ol i lukautim ol 50,000 samting kongrigesen bilong ol Witnes Bilong Jehova long nau.−1 Tesalonaika 2:7-9; Jon 13:34, 35; 15:12-14.
3 Man Bilong Gris, em Seten, em i bin putim planti hevi na traim long ol dispela Kristen long Tesalonaika. Olsem na Pol i salim Timoti i go long ol bilong ‘strongim ol na helpim ol long bilip bilong ol.’ Taim Timoti i go bek long Atens em i autim gutpela tok long Pol, em i tokim Pol, ol dispela Kristen i stap strong long bilip na ol i laikim tru ol man. Taim ol i harim tok olsem ol narapela Kristen i sanap strong long bilip na i stap gut long God, dispela i mekim isi bel bilong ol, na ol i wok long beten askim God long helpim ol brata em bilip bilong ol i sot liklik. (1 Tesalonaika 3:1, 2, 5-7, 10) Dispela tu i makim pasin God i kamapim insait long ol kongrigesen long nau, olsem i gat ol wasman i raun strongim ol kongrigesen−ol kongrigesen i stap long ples i gat tambu tu o ol man i mekim nogut tru long ol.−Aisaia 32:1, 2.
‘Taim Em i Kam Bek’
4 Long pinis bilong dispela pas aposel Pol i askim God long “mekim pasin bilong sori i pulap moa yet long yupela, na yupela i ken givim bel bilong yupela long ol brata, na long olgeta man tu, olsem mipela i save givim bel bilong mipela long yupela. Mipela i laik bai God i mekim olsem, na i strongim bel bilong yupela. Na bihain bai Bikpela bilong yumi Jisas em i kam bek wantaim olgeta manmeri bilong en, orait bai yupela i stap holi na i no gat rong long ai bilong God Papa bilong yumi.”−1 Tesalonaika 3:12, 13.
5 Pol i tingting long taim bihain bihain, olsem long taim Jisas ‘i kam bek na pasin bilong dispela graun i laik pinis.’ Em taim “Pikinini Bilong Man i kam bek olsem king, na olgeta ensel wantaim em.” King bilong yumi long heven em i kam bek long yia 1914. Em i sindaun long sia king bilong em long heven na nau em i wok long skelim olgeta lain man. Em i tilim ol, na ol manmeri i gat pasin daun na ol i olsem sipsip em i putim ol i stap narapela lain. Ol dispela manmeri i bilong abrusim bagarap long taim bilong “bikpela hevi tru” na kisim laip i stap oltaim long paradais long graun.−Matyu 24:3-21; 25:31-34, 41, 46.
Ol Tok Bilong Helpim Yumi
6 Yu laik kisim laip i stap oltaim? Sapos olsem, orait yu mas bihainim dispela tok Pol i givim long ol Tesalonaika, em i tok: “Orait, ol brata, nau mipela i tok strong moa yet long yupela long nem bilong Bikpela Jisas. Mipela i bin soim yupela olgeta pasin yupela i mas wokabaut long en bilong bihainim laik bilong God. Nau yupela i save bihainim dispela pasin. Tasol yupela i mas mekim moa yet. Yupela i save long olgeta tok mipela i givim pinis long yupela long nem bilong Bikpela Jisas.” (1 Tesalonaika 4:1, 2) Wanem sampela bilong dispela “olgeta tok” em Pol i kamapim strong hia?
7 Namba wan “tok” i makim stretpela pasin yumi mas bihainim. Pol i tok klia, olsem: “Laik bilong God em i olsem: Yupela i mas kamap holi. Yupela i mas abrusim pasin pamuk. Long pasin bilong marit, yupela olgeta i mas save gut long bihainim pasin i holi na i gutpela, na long dispela pasin yupela i marit. Bel bilong yupela i no ken mangal nabaut, olsem ol haiden i no save long God.” Gutpela tru yumi “save” long God na long Pikinini bilong em, Krais Jisas, na yumi wok long kisim laip i stap oltaim. Sapos yumi larim ol samting i pulim yumi i go bek gen long pasin doti bilong dispela graun na yumi mekim pasin pamuk samting, em nogut tru! Tasol sori tru, sampela ol i bin sanap strong inap planti yia long ol kalabus nogut, o ol i bin wok strong inap planti yia long mekim wok misineri, na bihain Man Bilong Gris i grisim ol na ol i pundaun long traim na mekim pasin pamuk samting. Yumi kisim pinis spirit holi bilong God, olsem na yumi mas was gut, nogut yumi mekim pasin pamuk samting, na yumi “givim bel hevi” long en.−1 Tesalonaika 4:3-8; Jon 17:3; 1 Korin 10:12, 13; Efesas 4:30.
8 Nau Pol i givim wanpela “tok” long ol long ‘pasin bilong givim bel long ol brata,’ long tok Grik ol i kolim filadelfia (phil a delphiˈa). (1 Tesalonaika 4:9, 10) Dispela pasin i kamapim tru pasin bilong sori em stretpela lo i as bilong en, em long tok Grik ol i kolim agape (a·gaʹpe). Long sapta 4 ves 9 na sapta 3 ves 6 i go inap long 12, Pol i kirapim ol brata long bihainim dispela gutpela pasin bilong sori. Dispela kain sori filadelfia i stap namel long Jisas na Pita, na Devit na Jonatan, em narapela i laikim tru narapela. (Jon 21:15-17; 1 Samuel 20:17; 2 Samuel 1:26) Yumi inap skruim dispela long sori agape taim yumi poroman gut wantaim narapela man. Yumi lukim dispela samting long bikpela amamas planti Witnes Bilong Jehova i kisim taim ol i poroman wantaim narapela Witnes long mekim wok painia o long mekim narapela wok bilong God.
9 Pol i tok: “Yupela i mas mekim dispela pasin i kamap moa yet.” Oltaim yumi mas wok long laikim moa yet ol brata. Dispela pasin i save kamap strong moa taim ol elda na ol wokman bilong kongrigesen i go pas na ol i wok strong long autim tok bilong Kingdom. Sampela taim liklik kros i kamap namel long ol brata, long wanem ol i gat ol liklik pasin kranki bilong ol yet o pasin bilong narapela i pait wantaim pasin bilong narapela o kain hevi olsem, tasol sapos olgeta long kongrigesen i wok strong long ‘painim Kingdom pastaim’ bai dispela ol liklik kros i stap nambatu tasol. Oltaim yumi mas tingting long prais!−Matyu 6:20, 21, 33; 2 Korin 4:18.
10 Nau Pol i kamapim narapela “tok” yumi mas bihainim, em i tok yumi mas i stap isi, na lukautim ol samting bilong yumi yet, na yumi mas wok long han bilong yumi yet. Sapos yumi “wokabaut stret” olsem long olgeta de, na yumi bihainim dispela kain sori em stretpela lo i as bilong en, na yumi laikim tru ol brata, orait bai yumi no sot long wanpela samting.−1 Tesalonaika 4:11, 12; Jon 13:35; Rom 12:10-12.
Tok Bilong Kirap Bek i Mekim Isi Bel Bilong Yumi
11 Nau aposel i stori long gutpela samting yumi ken wetim i kamap, em olsem: O1 man i dai pinis bai ol i kirap bek. Tasol bilong wanem Pol i kirap na stori long dispela samting? Em i laik strongim ol brata bambai ol inap karim pen na hevi ol man i laik givim long ol. Bagarap inap painim ol na bai ol i dai. Ating sampela ol i dai pinis. Olsem na Pol i laik mekim isi bel bilong ol brata Kristen bilong em. (1 Tesalonaika 2:14-20) Ol i ting liklik taim tasol na bai Krais i “kam bek,” olsem na ol i laik save wanem samting bai painim ol dispela brata i dai pinis. Ol tok nau Pol i givim long ol em inap mekim gut bel bilong ol manmeri i gat hevi long brata Kristen o famili Kristen bilong ol i dai pinis, na em inap strongim ol brata bambai ol i sanap strong i go inap long taim “de” bilong Jehova i kamap. Tok bilong Pol i mas helpim yumi olgeta long sanap strong long bilip na autim dispela gutpela tok taim yumi wetim pasin bilong nau i pinis olgeta.−2 Tesalonaika 1:6-10.
12 Pol i tok: “Tasol ol brata, mipela i no laik yupela i longlong long ol manmeri i dai pinis. Nogut bel bilong yupela i krai, olsem ol arapela man i no bilip long God na i no wetim taim bilong kirap gen long matmat.” (1 Tesalonaika 4:13) Tok bilong kirap bek inap mekim bel bilong yumi i stap isi tru! Samting olsem 5-pela yia bihain, Pol i raitim namba tu pas long ol Kristen long Korin, na long kirap bilong dispela pas em i raitim tok olsem: “God Papa bilong yumi, wantaim Bikpela Jisas Krais, i ken marimari long yupela na mekim bel bilong yupela i stap isi. Yumi litimapim nem bilong God, em i God na Papa bilong Bikpela bilong yumi Jisas Krais. Em i Papa bilong yumi, na em i as bilong sori. Em i God bilong mekim isi bel bilong olgeta man i gat hevi. Long olgeta hevi i kamap long mipela, em i save mekim isi bel bilong mipela. Olsem na mipela inap long mekim isi bel bilong ol man i gat kain kain hevi, olsem God i save mekim isi bel bilong mipela.”−2 Korin 1:2-4.
13 Pol i laik bai yumi save long samting i painim ol manmeri i dai pinis. Em i no laik bai yumi longlong long dispela samting. Long wanem bihain planti man i tok ol i Kristen ol i lusim bilip Kristen tru na ol i kirap bihainim gen tingting bilong ol Babilon na ol Grik. Ol dispela man i lusim bilip ol i bihainim tok bilong Plato, em i tok yumi gat tewel na taim yumi dai yumi no i dai tru, long wanem tewel i no save dai. Nau dispela tok em i wanpela as tok bilong olgeta lotu giaman long olgeta hap bilong graun. Taim wanpela man i dai ol misin i tok, em i go i stap long heven, o long klinpaia (pegatori), o long wanpela ples bilong kisim pen oltaim. Ol i no save wanem samting tru i painim ol manmeri i dai pinis, olsem na ol dispela tok i no mekim isi bel bilong ol man i gat hevi long man i dai pinis. Na sapos ol i gat tewel na ol i stap laip long narapela hap, dispela i no stret wantaim tok bilong kirap bek, long wanem man i mas i dai tru bambai em i ken kirap bek na i stap laip gen.
14 Man i dai pinis em i olsem i slip. Man i slip em i no save long wanpela samting na em i no inap mekim sampela wok. (Skelim tok bilong Eklisiastis 9:5, 10.) Taim Jisas i mekim wok bilong em long graun na Lasaras i dai pinis, Jisas i tok Lasaras “i slip pinis” na em, Jisas, bai “kirapim” em. Ol disaipel bilong Jisas i no save long as bilong dispela tok, “olsem na nau Jisas i tok klia long ol, ‘Lasaras i dai pinis.’ ” Tupela susa bilong Lasaras, em Mata na Maria, i bilip olsem ol man i dai pinis bai ol i kirap bek na dispela i strongim bel bilong tupela, na Jisas tu i mekim gut bel bilong tupela. Na taim ol i lukim Jisas i kirapim bek dispela gutpela pren bilong em i dai pinis na i stap 4-pela de long matmat, dispela i strongim tru bilip bilong tupela!−Jon 11:11-14, 21-25, 43-45.
15 Dispela mirakel, na ol narapela strongpela wok Jisas i mekim bilong kirapim bek man i dai pinis, na bikpela samting tru, olsem Jehova i kirapim bek Jisas yet−olgeta dispela samting Baibel i stori gut long en i strongim tru bilip bilong yumi olsem ol man i dai pinis bai ol i kirap bek. (Luk 7:11-17; 8:49-56; 1 Korin 15:3-8) Tru, taim wanpela man i dai pinis yumi save bel hevi na yumi krai. Dispela man i no i stap moa wantaim yumi na yumi mas lain long karim dispela hevi. Em hatwok. Tasol wanpela tok promis bilong Nambawan Bikpela Jehova i strongim tru bel bilong yumi, em i tok em bai “pinisim indai inap oltaim oltaim, na . . . klinim aiwara i stap long pes bilong olgeta man”! (Aisaia 25:8, NW; Revelesen 21:4) Gutpela rot bilong karim dispela hevi, em olsem: Mekim planti wok long wok bilong God em i as bilong bel isi, na tokim ol narapela man long dispela gutpela tok bilong Kingdom yumi bilip pinis long en.−Skelim tok bilong Aposel 20:35.
Husat Bai Kirap Bek Pastaim na Husat Bihain?
16 Krais i “namba wan” man bilong kirap bek, em i kirap paslain long ol narapela, na nau em i sindaun long sia king long han sut bilong God long heven, na yumi bilip strong olsem em bai inapim tru ol gutpela samting Jehova i laik mekim long rot bilong Kingdom bilong em. (Hibru 6:17, 18; 10:12, 13) Olsem Pol i tok long narapela pas em i raitim: “Krais i mas i stap king, i go inap long em i daunim olgeta birua na pinisim ol. Em i rausim pinis olgeta arapela birua, orait bai em i pinisim dai tu.” Em bai mekim olsem wanem? Hap wok em bai mekim, em olsem: Em bai kirapim bek ol man i dai pinis na pinisim ol samting nogut i kamap long rot bilong dai yumi kisim long Adam. Pastaim aposel i bin stori long dispela samting, olsem: “Wanpela man i bin kamapim pasin bilong man i dai, olsem na wanpela man i bin kamapim pasin bilong daiman i kirap bek tu. I olsem: Olgeta man bilong lain bilong Adam ol i save dai. Na olsem tasol olgeta man bilong lain bilong Krais bai ol i kisim laip. Tasol yumi olgeta man wan wan bai yumi kirap bek na kisim laip long taim bilong yumi yet. Namba wan em Krais. Na taim em i kam bek, yumi olgeta lain bilong em bai yumi kirap.” (1 Korin 15:20-26) Nau, long namba wan pas em i raitim long ol Kristen long Tesalonaika, em i stori long taim bilong dispela lain i kirap bek, em i tok:
17 “Yumi bilip long Jisas i dai na i kirap bek gen. Olsem na yumi save, long strong bilong Jisas bai God i bringim ol Kristen i dai pinis na ol i kam bek wantaim Jisas. Mipela i autim tok bilong Bikpela long yupela olsem: Bihain bai Bikpela i kam bek, orait yumi manmeri i gat laip na i stap yet, bai yumi no i go paslain long ol manmeri i dai pinis. Nogat. Bambai God i tok strong, na namba wan ensel i singaut, na biugel bilong God i krai. Na bai Bikpela i lusim heven na i kam daun, na ol man i bilip long Jisas na bipo ol i dai pinis, bai ol i kirap bek pastaim.”−1 Tesalonaika 4:14-16.
18 Bihain long yia 1914, taim Jisas i “kam bek” pinis na i stap king long Kingdom, em yet, em namba wan ensel, em i singaut long heven na i tok, “ol man i bilip long Jisas,” olsem lain bilong em, ol i mas i kam bung. Sampela bipo ol i dai pinis, olsem na bilong bihainim dispela singaut ol i mas kirap bek olsem spirit na i go long heven. Longtaim pinis Wastaua i kamapim tingting olsem: Kirap bek bilong dispela lain bilong Krais, em ol manmeri spirit holi i bin makim ol, em i kirap long yia 1918.
19 Tasol olsem wanem long hap lain bilong ol i stap yet long graun, em lain bilong ol i wok long i go liklik na nau i no winim 10,000? Ol tu i mas i stap gut long God i go inap long taim ol i dai. Pol i stori olsem em yet i stap wantaim ol long taim Krais i kam bek na em i tok: “Long dispela taim yumi manmeri i gat laip na i stap yet, bai Bikpela i kisim yumi i go antap long klaut wantaim ol dispela manmeri, na bai yumi lukim Bikpela. Olsem na bai yumi stap wantaim Bikpela oltaim oltaim.” (1 Tesalonaika 4:17; skelim wantaim tok bilong Revelesen 1:10.) Olsem na bihain bai olgeta bilong dispela lain 144,000 i kirap bek na i go long heven. Ol i go antap bilong mekim wok pris na wok king wantaim Pikinini Sipsip, Krais Jisas, long Maunten Saion long heven. “Dispela em i namba wan taim ol man i kirap bek long matmat.” (Revelesen 14:1, 4; 20:4, 5) Tasol olsem wanem long ol planti milion milion manmeri ol i stap yet long matmat?
20 Pol em i no stori tru long ol dispela manmeri long namba wan pas em i raitim long ol Kristen long Tesalonaika, tasol Revelesen 20:12 i tok, “ol daiman,” ol man i gat nem na ol man nating,” bai ol i kirap bek na i sanap long pes bilong sia king bilong God, em bilong skelim ol man long kot. (Lukim tu Jon 5:28, 29.) Tasol long nau, ‘bikpela lain’ tru, inap planti milion, ol i bung pinis long pes bilong dispela sia king. Dispela lain bai abrusim bagarap long “bikpela hevi” liklik taim bai kamap. Pikinini Sipsip i stap wasman bilong ol na em i bringim ol i go bilong kisim “wara i gat laip” bambai ol i no ken i dai na pinis long graun. Tasol sampela ol i lapun o sampela samting ol i no bin tingim em bai painim sampela na bai ol i dai nau long taim Bikpela i kam bek pinis na i stap king. (Revelesen 7:9, 14, 17; Eklisiastis 9:11) Olsem wanem long ol dispela manmeri?
21 Olgeta dispela “arapela sipsip” ol inap kirap bek kwiktaim. (Jon 10:16) Bilip bilong ol na gutpela wok ol i mekim, olsem Ebraham long bipo, dispela i mekim na ol i stap pren bilong God. Olsem ol bilipman Hibru sapta 11 i stori long ol, ol dispela “arapela sipsip” long nau tu i bin karim ol hevi na sanap strong. Olsem na ol tu “bai i kirap long matmat, na bai ol i kisim laip i gutpela moa.” Ating bai ol i kirap bek kwiktaim bihain long Amagedon. (Hibru 11:35; Jems 2:23) Ol man i bilip na ol i bin ‘kaikai bodi bilong Jisas na dring blut bilong em,’ olgeta bai ol i insait long truim bilong tok promis bilong em, olsem: “Em i gat laip i stap gut oltaim oltaim, na bai mi kirapim em long las de.”−Jon 6:54; Rom 5:18, 21; 6:23.
22 Pol i stori long dispela gutpela samting yumi ken wetim i kamap long bihain, olsem ol man i dai pinis bai ol i kirap bek, na bihain em i tok: “Yupela i mas strongim bel bilong ol brata long dispela tok.” (1 Tesalonaika 4:18) Na bihain em i stori long sampela samting moa em i bikpela samting long “taim Bikpela bilong yumi Jisas Krais em i kam bek.” (1 Tesalonaika 5:23) Em i stori long wanem ol samting? Orait, yu mas lukim tok i kamap bihain long dispela, nem bilong en: “Bel Isi i Kam long God−Wanem Taim Bai i Kam?”
Ol Bikpela Tok—
◻ Pol i askim God long mekim wanem ol samting bilong helpim ol Kristen?
◻ Pol i givim wanem ol “tok” long yumi bilong yumi bihainim na dispela bai helpim yumi?
◻ Baibel i tok wanem long ol man i dai pinis na dispela i mekim isi bel bilong yumi?
◻ Pol i stori olsem wanem long taim bilong ol man i kirap bek?
2. (a) Pol i gat wanem tingting long ol kongrigesen? (b) Ating ol elda long nau i ken mekim wanem na bai ol i bihainim pasin bilong Pol?
3. (a) Timoti inap helpim kongrigesen bilong Tesalonaika olsem wanem? (b) Dispela i makim wanem samting long nau?
4, 5. (a) Nau Pol i askim God long mekim wanem? Bilong wanem yumi mas tingim dispela tok em i mekim? (b) Wanem bikpela samting i kamap long taim bilong yumi?
6. Nau yumi mas bihainim wanem strongpela tok bilong Pol?
7. (a) Nau Pol i kolim wanem bikpela “tok” yumi mas bihainim? (b) Yumi kisim pinis spirit holi bilong God na bilong wanem yumi mas was gut?
8, 9. (a) ‘Pasin bilong givim bel long ol brata’ em wanem kain pasin? (b) Yumi mas mekim wanem na bai yumi inap bihainim dispela pasin? Dispela bai helpim yumi olsem wanem?
10. Yumi ol Kristen i mas mekim wanem na bai yumi “wokabaut stret”?
11. (a) Bilong wanem Pol i kirap nau na stori long kirap bek? (b) Dispela tok Pol i givim long ol Kristen bilong pastaim i mas mekim wanem long yumi?
12. Taim wanpela gutpela pren o famili bilong yumi i dai pinis, i gat wanem samting em inap mekim bel bilong yumi i stap isi? Husat i as bilong dispela?
13, 14. (a) Bilong wanem Pol i laik bai ol Kristen i save long samting i painim man i dai pinis? (b) Ol man i dai pinis ol i stap olsem wanem, olsem Baibel i tok?
15. (a) Yumi bilip olsem ol man i dai pinis bai ol i kirap bek na wanem samting i strongim dispela bilip bilong yumi? (b) Taim yumi gat hevi long man i dai pinis, wanem samting inap helpim yumi long karim dispela hevi?
16, 17. (a) Krais bai pinisim ol arapela birua na olsem wanem em bai pinisim laspela “birua”? (b) Nau Pol i stori olsem wanem long taim bilong ol man i kirap bek?
18. O1 manmeri spirit holi i makim ol na “bipo ol i dai pinis,” ol i kirap bek long wanem taim?
19. Hap lain bilong ol i stap laip yet, wanem taim bai ol i “go antap long klaut”? Olsem wanem bai ol i “go antap long klaut”? Ol i go antap bilong mekim wanem wok?
20, 21. (a) Wanem samting bihain bai painim ol planti milion milion manmeri nau ol i stap long matmat? (b) Wanem lain ol i no ken i dai na pinis long graun? Olsem wanem na ol i no ken i dai? (c) Ating sampela bilong dispela lain bai i dai, tasol bihain bai wanem gutpela samting i painim ol?
22. Yumi ken mekim wanem bilong strongim bel bilong ol brata?