“No Ken Kirap Nogut Kwiktaim na Pilim Hevi Long Tingting”

“Ating wanpela spirit i givim dispela tok long wanpela man. O ating wanpela man i tok olsem long tingting bilong em yet. O ating ol i tok long mipela i salim pas olsem i go long ol. Sapos yupela i bin harim dispela kain tok, orait yupela i no ken kirap nogut kwiktaim na pilim hevi long tingting bilong yupela”—2 TESALONAIKA 2:1, 2.

 1. Taim yu tingting bek long taim yu bin kisim save long tok i tru long pastaim, yu tingim wanem ol gutpela samting?

TINGTING bek long taim yu bin kisim save long tok i tru long pastaim. Yu amamas long ol gutpela save yu kisim long Baibel, a? Ol dispela tok i gutpela na i stret na i bekim ol askim bilong yu. Yu kisim save long Jehova na long ol gutpela pasin bilong em, olsem bikpela pasin sori na pasin marimari bilong em, na bel bilong yu i kirap na yu pilim tru! Na yu amamas long bung wantaim ol man i gat wankain bilip, em ol i mekim pasin sori tru na wok long bihainim ol lo bilong Baibel.

 2. Yumi ol wokboi bilong Jehova yumi inap bilip na wetim wanem samting? Nau yumi stap olsem wanem long ol samting bilong spirit?

² Tru tumas, yumi kisim save long ol gutpela samting Jehova bai mekim liklik taim bihain na yumi tenkyu long em! Bai em i pinisim pen na hevi na bai yumi no i dai moa. (Revelesen 21:3, 4) Olaman! Yumi inap i stap oltaim long paradais long graun, na i stap gutpela olgeta, no gat sik, na i stap amamas tru! Em gutpela samting tru! Yumi ken bilip tru na wetim dispela samting i kamap, long wanem God i tok promis long dispela samting long Baibel na dispela samting bai kamap tru. Taim yumi kisim save long ol dispela tok i tru long namba wan taim, yumi amamas tru, a? Yumi amamas olsem ol disaipel long taim Jisas i kirap bek pinis na em i kamap long ai bilong ol. Ol i tok: ‘Em i autim as tingting bilong Baibel long yumi, na long dispela taim bel bilong yumi i kirap tru!’ (Luk 24:32) Tru tumas, taim yumi kisim save long ol tok i tru na yumi dediket long Jehova, yumi amamas long wanem nau yumi stap long paradais bilong spirit. Yumi kisim gutpela blesing tru!

 3. Seten na ol narapela birua i save mekim wanem bilong pundaunim yumi bambai yumi lusim paradais bilong spirit Jehova i bin kamapim?

³ Tasol yumi mas pilim tru dispela blesing, olsem yumi stap long paradais bilong spirit Jehova i bin kamapim. Long laik bilong yumi yet yumi bin kam insait long dispela paradais na yumi inap lusim (o ol inap rausim yumi long en). Sapos yumi lusim bilip o long laik bilong yumi yet yumi kalapim ol stretpela lo bilong Jehova, samting olsem inap kamap. Tasol sapos yumi laikim tru God Jehova na Krais Jisas olsem long taim yumi “bilip nupela,” na yumi pilim tru olgeta samting Jehova i givim long yumi bilong helpim yumi long i stap strong long spirit, orait yumi inap i stap long dispela paradais. (Revelesen 2:4) Tasol Seten wantaim ol narapela birua bilong lotu i tru, ol i save tru long pasin bilong giaman. Ol i redi oltaim long pundaunim yumi bambai yumi lusim God. Yumi no ken lusim tingting long dispela samting. Ol i kamapim kain kain tok bilong grisim yumi bambai yumi ting dispela gutpela paradais bilong spirit yumi stap long en em i no wanpela paradais tru.

 4. Sapos bilip bilong yumi i no strong moa na yumi gat tupela tingting, wanem samting inap kamap?

⁴ Nogut yumi lukim ol man i stap long dispela paradais bilong spirit ol i gat sin na ol i save popaia na nau yumi ting em i no wanpela paradais tru. Taim yumi kisim save long tok i tru long pastaim, yumi amamas. Bilip bilong yumi i strong. Yumi bilip tru long ol gutpela samting yumi wetim i kamap. Yumi laikim tumas God na ol brata, na yumi wok strong long mekim wok bilong God. Tasol sapos yumi no was gut, yumi inap lusim bilip. Sapos yumi pilim olsem yumi no amamas moa long ol samting bilong spirit olsem long pastaim, orait, kwiktaim yumi mas kirap na stretim dispela samting. Sapos nogat, bai yumi lusim bilip. Bai yumi pilim olsem ol lo bilong God i no gutpela lo, ol i putim hevi long yumi na i laik daunim yumi. O ating bai yumi pilim olsem ol gutpela kaikai bilong spirit ‘gutpela wokboi’ i givim long yumi em nogut, na ol brata, ol gutpela wokboi bilong Jehova, ol i birua bilong yumi. Na bai yumi amamas tasol long sutim tok nogut na tok giaman long ol, olsem yumi kirap long “paitim” ol.—Matyu 24:45-51.

 5. Sapos yumi lusim paradais bilong spirit, olsem wanem bai yumi lus long ol samting olsem Adam tupela Iv i lus long en taim God i rausim tupela long Paradais bilong Iden?

⁵ Sapos olsem, orait yumi inap lus long ol gutpela blesing bilong paradais bilong spirit long nau, na bai yumi lus long kisim laip oltaim long Paradais tru em bai kamap long graun long bihain. Nogut yumi bikhet olsem Adam tupela Iv, em tupela i lusim gutpela Paradais long Iden. Tupela i gat olgeta samting bilong helpim ol long i stap amamas olgeta. Tupela inap i stap oltaim. Tasol wantu ol i kirap bihainim tok bilong narapela man na ol i sakim tok bilong God. Tupela i no tingting moa long i stap gut long Jehova. Tupela i no tingim gut ol blesing bilong Iden. Tupela i ting laik na tingting bilong ol yet em i bikpela samting. Iv i bilipim tok giaman bilong Seten. Adam i no bilipim dispela tok giaman, tasol em i larim meri bilong em i pulim em na em tu i mekim sin. Tupela i bikhet long God. Olsem na God i rausim tupela long Paradais na tupela i karim hevi i go inap long taim tupela i dai. Tupela yet i lus long kisim laip i stap oltaim na ol i givim sin na i dai tasol long lain bilong ol. (Jenesis 3:1-7, 14-19, 24; 1 Timoti 2:14; Rom 5:12) Ol i ting sapos ol i bihainim laik na tingting bilong ol yet, dispela bai helpim ol. Tasol nogat. Ol i kisim pe nogut!

 6. (a) Bilong wanem Pol i tingting planti long sampela bilong kongrigesen long Korin? (b) Em i tok wanem na yumi save em i tingting planti long sampela long kongrigesen bilong Tesalonaika tu?

⁶ Aposel Pol i tingting planti na em i tok: “Mi pret. Mi ting long dispela snek i save tumas long pasin bilong giaman, na bipo em i giamanim Iv. Nogut pasin olsem i kamap long yupela. Nogut tingting bilong yupela i bagarap, na yupela i lusim dispela pasin bilong i stap klin na tingting long Krais tasol.” (2 Korin 11:3) Long taim bilong Pol sampela man i kamapim sampela tingting na tok i kranki, na Pol i raitim pas long ol Kristen bilong toksave long ol long dispela samting. Long namba tu pas em i raitim long kongrigesen bilong Tesalonaika, em i tok: “Ating sampela man i tokim yupela long De bilong [Jehova] i kamap pinis. Ating wanpela spirit i givim dispela tok long wanpela man. O ating wanpela man i tok olsem long tingting bilong em yet. O ating ol i tok long mipela i salim pas olsem i go long ol. Sapos yupela i bin harim dispela kain tok, orait yupela i no ken kirap nogut kwiktaim na pilim hevi long tingting bilong yupela. Yupela i no ken larim wanpela man i giamanim yupela long sampela tok.”—2 Tesalonaika 2:1-3.

Klia Olgeta long Ol Man i Givim Baksait long Tok i Tru

 7. (a) I gat wanem askim yumi mas tingim sapos yumi kisim pas o buk samting bilong ol man i lusim bilip pinis na ol i givim baksait long tok i tru? (b) Bilong wanem yumi no ken hambak na ting tok bilong ol man i givim baksait long tok i tru em i no inap pundaunim yumi?

⁷ Olsem wanem sapos wanpela man i lusim lotu i tru, em i bikhet na givim baksait long tok i tru, na em i laik kamapim tingting kranki bilong em long yu? Olsem wanem sapos em i tok, ol tok yumi ol Witnes Bilong Jehova i bilip long en, em i no tok i tru? Sapos dispela man i raitim pas long yu bilong kamapim dispela tingting kranki bilong em, o em i salim sampela buk o nius long yu, bai yu mekim wanem? Bai yu kaunim dispela bambai yu ken save long tingting bilong em? Ating bai yu ting olsem: ‘Mi stap strong long spirit, sapos mi kaunim ol dispela tok, dispela samting i no ken pundaunim mi. Na sapos ol tok yumi bilip long en em tok i tru, orait yumi no ken pret long ol tok ol man i sutim long en.’ Tasol yu mas lukaut gut! Sampela brata i ting olsem na ol i wok long kisim save long tingting kranki bilong ol man i givim baksait long tok i tru na dispela i bagarapim tingting bilong ol. Ol i gat tupela tingting na bilip bilong ol i no strong moa. (Skelim tok bilong Jems 1:5-8.) Olsem na yu mas tingim gut tok i stap long 1 Korin 10:12, em i tok: “Man i tingim em yet i sanap strong, em i mas lukaut gut. Nogut em i pundaun.”

 8. Sampela ol i lusim bilip liklik na yumi mas helpim ol olsem wanem?

⁸ Ol brata inap helpim sampela, em ol i bin harim tok bilong ol man i givim baksait long tok i tru na tingting bilong ol i bagarap, na bihain ol i kamap strong gen long spirit, tasol pastaim ol i karim bikpela pen na hevi long tingting na long spirit. Ol inap abrusim dispela pen na hevi. Provep 11:9 i tok, “Sapos ol man bilong mekim pasin nogut [em ol i lusim tok i tru] i toktok, dispela inap bagarapim ol arapela manmeri. Tasol gutpela tingting bilong ol stretpela man inap long helpim ol yet na bai ol i stap gut.” Jut i tok yumi mas “sori long sampela man ol i lusim bilip liklik. Ol i olsem i stap long paia. Olsem na kwiktaim tumas yupela i mas kisim bek ol.” (Jut 22, 23) Pol i tokim wasman Timoti em i mas “wok isi na stretim tingting bilong ol man bilong sakim tok. Sapos em i mekim olsem, bai God i helpim ol na ating bai ol i tanim bel na save gut long tok tru. Bipo Seten i kisim ol long umben bilong en, bilong ol i ken bihainim tok bilong em. Tasol, sapos ol i save long tok tru, bai tingting bilong ol i kamap klia gen, na bai ol i lusim umben bilong Seten.”—2 Timoti 2:25, 26.

 9. Ol man i lusim lotu i tru ol i stap nogut olsem wanem?

⁹ Tasol sori tru! Tingting bilong sampela i bagarap olgeta na ol i lusim tok i tru. Ol i givim baksait long tok i tru na ol i stap olsem long bikpela tudak; sampela ol i go bek gen long ol tok giaman bilong ol misin ol i kolim Kristen. Aposel Pita i stori long ol dispela man na em i tok ol i stap nogut tru. Em i tok: “Tru, ol i bin kisim save long Jisas Krais, em i Bikpela bilong yumi na Man bilong kisim bek yumi. Na long dispela save ol i bin ranawe na lusim olgeta pasin doti i stap long graun. Na sapos ol i pas gen long dispela pasin na em i kalabusim ol, orait bai ol i stap olsem: Namba wan taim ol i pas, ol i stap nogut, tasol bihain ol i pas gen, na ol i stap nogut tru.” Pita i tok ol i olsem dok i go bek long traut bilong en, o pik i waswas pinis long wara, tasol em i go tantanim nabaut long graun malumalum.—2 Pita 2:20-22.

10. (a) Jehova i tok wanem long harim tok bilong ol man i givim baksait long tok i tru? (b) Sapos yumi kaunim ol buk na nius ol dispela man i wokim i olsem yumi mekim wanem?

¹⁰ Tru, taim wanpela man bilong graun i tok, ‘Yu no ken daunim dispela,’ o ‘Yu no ken harim dispela,’ ating yumi laik sakim em. Tasol Jehova yet i tok yumi no ken harim tok bilong ol man i bikhet na givim baksait long tok i tru. Long Baibel Jehova i tok wanem long ol dispela kain man? Em i tok: “Yupela i mas givim baksait long dispela ol man.” (Rom 16:17, 18) “Yupela i no ken pren wantaim” ol (1 Korin 5:11); na kain man olsem “yupela i no ken bringim em i go long haus bilong yupela, na yupela i no ken tok gude long em.” (2 Jon 9, 10) Dispela tok i klia. Sapos yumi save wanpela man i givim baksait long tok i tru na yumi kaunim ol tok em i raitim, i olsem yumi singautim wanpela birua bilong tok i tru i kam insait long haus bilong yumi bambai em i ken stori long ol tingting kranki bilong em, a?

11, 12. (a) I gat wanem tok piksa bilong helpim yumi long save yumi no ken kaunim ol buk o nius samting bilong ol man i lusim pinis tok i tru na ol i givim baksait long en? (b) Olsem wanem dispela i makim tu gutpela pasin Jehova i mekim bilong helpim yumi?

¹¹ Yumi ken tok piksa long dispela samting, olsem: Sapos wanpela man i salim wanpela buk nogut long pikinini man bilong yu, em buk i gat ol piksa nogut long en i gat sem, orait bai yu mekim wanem? Sapos em i laik lukim dispela buk bambai em i ken save wanem kain tok i stap insait long en, bai yu mekim wanem? Bai yu tok: ‘Goan pikinini, yu lukim. Yu ken kaunim dispela buk. Dispela samting i no inap bagarapim yu. Taim yu liklik yet mipela i bin lainim yu olsem pasin pamuk na ol kain pasin olsem i pasin nogut. Gutpela yu ken save wanem kain pasin ol man bilong dispela graun i bihainim na bai yu ken save tru, em pasin nogut.’ Bai yu tok olsem? Nogat tru, a? Bai yu helpim pikinini long save long ol samting nogut inap kamap sapos em i kaunim ol dispela kain buk na bilong wanem em i mas tromoi o bagarapim. Maski man i stap strong long spirit, tasol sapos em i kaunim kain buk nogut olsem, dispela inap givim tingting nogut long em na kirapim tingting nogut long bel bilong em. Tingting nogut em i planim long bel inap kamapim laik nogut. Na wanem samting bai kamap? Jems i tok, dispela pasin bilong bel i kirap, em i olsem i kisim bel, na bihain em i karim kain kain sin olsem pikinini bilong en. Bihain sin i kamap bikpela na em i save kamapim dai. (Jems 1:15) Olsem na gutpela sapos yu no mekim namba wan samting, nogut ol dispela narapela samting nogut i kamap bihain, a?

¹² Yumi laik lukautim pikinini bilong yumi bambai em i no ken kaunim ol kain buk olsem, nogut em i pundaun na mekim pasin pamuk samting, a? Na olsem tasol gutpela Papa bilong yumi long heven em i laik lukautim yumi bambai yumi no ken mekim pasin pamuk bilong spirit, olsem lusim bilip na givim baksait long tok i tru. Olsem na em i tokim yumi, ‘Yupela i mas klia long ol dispela kain tok!’

13. Taim yumi autim tok, sapos wanpela man i askim yumi long sampela tok bilong ol man i bin lusim bilip, orait yumi ken mekim wanem?

¹³ Tasol olsem wanem sapos yumi autim tok na wanpela man i kamapim sampela askim o tok i wankain olsem bilong ol dispela man i bikhet na givim baksait long tok i tru? Sapos em i no laik kisim save, em i laik tok pait tasol, orait, gutpela sapos yumi lusim em na yumi go long narapela haus. Tasol sapos wanpela man i givim kain askim olsem long yumi na em i no giaman, em i laik tru long save tok bilong ol dispela man i lusim bilip em i stret o nogat, orait yumi ken mekim wanem? Pastaim yumi ken tok, ‘Yu tingting planti long wanem tok bilong ol?’ Ating i gat wanpela o tupela tok tasol em i tingting long en. Orait, yumi ken stori long dispela tok tasol; yumi ken kamapim sampela tok bilong Baibel na bilong ol buk bilong Sosaiti na bekim tok long em long tok i tru yumi save pinis long en. Yumi no ken ting bilong bekim tok yumi mas kaunim olgeta tok bilong wanpela buk o nius bilong ol dispela man, em buk o nius i krungutim gutnem bilong yumi o i mekim ol tok i giaman liklik. Nogat.

Bilip long Jehova

14. Papa bilong yumi long heven em i mekim wanem gutpela pasin sori long yumi? Bilong wanem yumi inap bilip tru long Em?

¹⁴ Taim yumi wok long strongim bilip bilong yumi na yumi wok strong long mekim ol wok bilong Kingdom, yumi ken bilip tru long Jehova. Yumi save, dispela Papa bilong yumi long heven em i gat bikpela sori long yumi na em i laik lukautim yumi na helpim yumi. Em i save lainim yumi na toksave long yumi. Em i mekim olsem long rot bilong Baibel, na oganaisesen bilong em i save tokaut klia long yumi na soim rot long yumi. Sapos yumi gat gutpela papa na yumi tokim em long givim bret o pis long yumi, em i no ken givim wanpela ston o wanpela snek nogut long yumi, a? Na God i no ken giamanim yumi. (Matyu 7:7-11) Tasol em i no ken mekim na bai traim i no inap painim yumi long rot bilong ol tok giaman o tok gris bilong Seten. Nogat. Tasol em i tok long em yet, olsem: “Mi Jehova, mi God bilong yu, na mi save lainim yu long pasin bilong helpim yu yet; mi Man bilong mekim yu i wokabaut long rot i stret yu mas wokabaut long en.” (Aisaia 48:17, NW) Yes, ‘Jehova i save lainim yumi bilong helpim yumi.’ Em i tok, yumi mas klia long ol man i givim baksait long tok i tru na yumi mas klia long ol tok ol i lainim ol man long en. Em i givim dispela tok long yumi bilong lukautim yumi; em i bilong helpim yumi bambai yumi no ken lus.

15. Aposel Pol i mekim wanem ol strongpela toksave bilong helpim yumi long was gut long ol man i laik pulim ol disaipel i go bihainim ol?

¹⁵ Aposel Pol i toksave long ol elda Kristen, olsem: “Sampela man bilong yupela yet bambai ol i kirap na ol i mekim tok giaman nabaut, bilong pulim ol Kristen i go bihainim ol.” (Aposel 20:30) Ol i mekim ol tok giaman bilong pulim ol disaipel i go bihainim ol. Sapos yumi wok long harim harim ol dispela kain “tok giaman” na tingting i kranki, ating bihain bai yumi ting dispela tok o tingting i stret. Iv i lukluk lukluk long diwai tambu na harim harim ol tingting kranki Seten i kamapim na nau em i ting tok bilong Seten i stret. Pol i tok: “Yupela i mas lukaut gut. Nogut wanpela man i givim tok nating na tok win long yupela na giamanim yupela long dispela. Kain man olsem ol i save toktok long pasin bilong ol tumbuna na long kain kain rabis pasin bilong dispela graun. Ol i no save toktok long Krais.” (Kolosi 2:8) Na Pol i tok tu: “Long switpela tok na long tok gris ol [man i givim baksait long tok i tru] i save giamanim bel bilong ol man i no save ting long pasin nogut.” (Rom 16:17, 18; lukim tu 2 Korin 11:13-15.) Tru, dispela kain tok i giamanim sampela na ol i lusim tok i tru, tasol i no olsem yumi mas bihainim ol. Tasol oltaim yumi mas was gut.

16. Yumi mas bihainim wanem ol toksave bilong Baibel bilong helpim yumi long sakim ol samting Seten i mekim bilong giamanim ol man na pulim ol bambai ol i lusim lotu i tru?

¹⁶ Seten i wok yet long mekim wankain pasin bilong giamanim ol man olsem em i bin mekim long Iden. Em i save mekim ol tok gris na tok giaman na kirapim man long tingim laik bilong em yet. Pita i tok: “Sampela tisa bilong tok giaman bambai ol i kirap namel long yupela tu. Bai ol i hait na kamapim kain kain tok giaman bilong bagarapim man. . . . Ol dispela man ol i man bilong mangal tru, olsem na bai ol i mekim planti tok giaman bilong pulim mani samting bilong yupela.” (2 Pita 2:1-3) Ol i giamanim tru ol man na ol man i ting tok giaman ol i mekim em tok i tru. Long 2 Timoti 2:14-19 Pol i tok yumi mas bihainim tok bilong Jehova, em Baibel, na stretim tok, na yumi mas sakim ol man i mekim kain kain rabis tok olsem i kirapim ol man long givim baksait long God. Em i tok, “tok bilong ol em i olsem sua nogut, na bai em i kamap bikpela tru.”

17, 18. (a) Tok bilong ol man i givim baksait long tok i tru, olsem wanem em i olsem sua nogut? (b) Aposel Pita i givim wanem toksave long yumi long ol man i laik pulim yumi bambai yumi lusim lotu i tru? (c) I gat wanem ol askim narapela tok i kamap bihain long dispela bai bekim?

¹⁷ Dispela tok piksa i sutim stret tingting kranki bilong ol man i givim baksait long tok i tru. Dispela kain tingting i olsem sua nogut i kamap bikpela kwiktaim na i bagarapim man long spirit. Kongrigesen i olsem bodi bilong man—sapos wanpela hap bilong bodi i gat sik, ating dispela sik inap kalap i go long narapela hap bilong bodi. Man i kamapim tingting kranki na tok giaman bilong pulim ol narapela man long givim baksait long tok i tru, sapos ol brata i sanap strong na long pasin sori ol i wok long givim gutpela marasin long dispela man, olsem givim ol tok bilong Baibel long em, tasol em i no orait bek na kamap strong gen long spirit, orait ating ol i mas katim na rausim dispela hap bilong bodi (olsem rausim em long kongrigesen) bilong lukautim ol narapela hap bilong bodi. (Skelim tok bilong Taitas 1:10, 11.) Yu mas was gut. Bilong i stap strong long spirit, yu mas klia long ol kain rabis tok na tingting kranki bilong ol man i givim baksait long tok i tru. Tok bilong ol i olsem “sua nogut” na em inap bagarapim yu long spirit! Yu mas bihainim gutpela tok bilong Pita i stap long 2 Pita 3:17, 18, em i tok: “Ol pren tru, yupela i save pinis ol dispela samting bai i kamap bihain. Olsem na yupela i mas lukaut gut long yupela yet. Nogut giaman bilong ol man bilong sakim lo em bai i pulim yupela na yupela i no sanap strong moa. Yupela i stap long marimari bilong Bikpela na Man bilong kisim bek yumi Jisas Krais, na yupela i save long em. Olsem na yupela i mas kisim moa dispela marimari, na yupela i mas kisim planti save long Krais.”

¹⁸ Tasol yumi mas mekim wanem na bai ol tok giaman na tingting kranki bilong ol man i givim baksait long tok i tru i no ken bagarapim tingting na bilip bilong yumi? Olsem wanem yumi ken was gut long bel bilong yumi na yumi no ken bihainim ol dispela tingting kranki? Orait, tok i kamap bihain long dispela bai bekim ol dispela askim.

Yu Tingim?

◻ Long wanem rot yumi inap lusim ol gutpela samting bilong paradais bilong spirit Jehova i bin kamapim?

◻ Sapos yumi kaunim buk samting bilong ol man i givim baksait long tok i tru, olsem wanem dispela i wankain olsem yumi kaunim buk i gat ol toktok nogut bilong pasin pamuk na pasin sem samting long en?

◻ Sapos wanpela man i askim yumi long sampela tok bilong ol man i givim baksait long tok i tru, orait yumi ken mekim wanem?

◻ Tok bilong ol man i givim baksait long tok i tru, olsem wanem dispela i olsem sua nogut?

[Piksa long pes 14]

Yu bihainim gutpela tingting na rausim ol pas samting bilong ol man i givim baksait long tok i tru?